१ सामुए़ल 21 - लिम्बुदाउदे़न् सावललाम् खे़त्छिङ् 1 दाउदे़न् निङ्वाॽफुसाम्बा अहिमेलेक वये़बा नोब ये़क्यक्को खे़त्छिङ्ङाङ् पे॥ हे़क्क्याङ् अहिमे़ले़क्के़ल्ले़ दाउदे़न् निसुल्ले़ कुगिमाल्ले़ चिरिम्लिम्ना यक्खे़र मे़त्तु, “खे़ने़ॽ थेआङ् ए़क्लेःक् के़द्ये़बाबे? थेआङ् खे़ने़ॽनु वेॽ आत्तिन्हाॽआङ् मे़होःप्पाबे?” 2 दाउदरे़ निङ्वाॽफुसाम्बा अहिमेलेक्के़न् मे़त्तु, “आङ्गाॽ एःक्सा त्याङ्, थेआङ्भे़ल्ले़ हाङ्ङिल्ले़ खुने़ॽ कुलागि याःम्बक् चोःक्से़ पाङ्घाङ्ङाङ् वाॽ॥ खुने़ॽ चोगे़ॽ मे़त्ताङ्बा याःम्बक्किल्ले़ कुयाःम्बेओ आङ्गाॽ थेआङ् पाःप्मा मे़नुॽने़न्॥ आङ्गाॽ आमनाहाॽलाम् थासिङ्ङाङ्ङिल्ले़ आम्भा कन् ते़न्नो तुमिरो मे़त्तुङ्सिङ्ङाङ् वाॽ॥ 3 आल्ल खे़ने़ॽ के़हुक्को थे वाॽ? ङासि खरे़ःङ् पिराङ्ङे़ॽ इग्र खे़ने़ॽनु थे वाॽ हाबा खे़न् पिराङ्ङे़ॽ॥” 4 कर निङ्वाॽफुसाम्बाल्ले़ दाउदे़न् मे़त्तु, “आङ्गाॽ चामा फाॽआङ् ले़ःङ्मनाबा खरे़ःङ् मे़गत्तान्॥ कर तोःम्मनाबा सेसे खरे़ःङ्लक् वाॽ॥ खे़ने़ॽ के़मनाहाॽ मे़न्छुमाहाॽनु मे़न्इम्मे मे़वाॽने़भग्र खे़न् खरे़ःङ्ङिन् तेॽमा के़सुक्तुॽ॥” 5 दाउदरे़ निङ्वाॽफुसाम्बान् मे़त्तु, “खे़ङ्हाॽ मे़न्छुमाहाॽनु मे़न्इम्मे मे़वाॽ॥ चुक्पा याःम्बक्को मे़बेःक्किल्ले़ए आङ्गाॽ आमनाहाॽ थिम् कुइसिक् आबाङे सुत्थो मे़जोःक्सिङ्ङिल्ले़ अक्तङ्बा यम्बा याःम्बक्को मे़बेःक्किल्ले़ खे़न्नुःल्ले़ साॽरिक् सुत्थो मे़जोःक्सिङ्ङाङ् मे़वाॽ॥” 6 खे़प्मो वेॽ खरे़ःङ् होःप्ते़बाल्ले़ चोगुल्ले़ खे़न् निङ्वाॽफुसाम्बे़ल्ले़ दाउदे़न् निङ्वाॽफुमाङ्ङो तोःम्मनाबा खरे़ःङ्ङिन् पिरु, खे़न् सेसे खरे़ःङ्ङिन् चप्ते़न्नोलाम् मे़लःत्तुआङ् के़गोबा खरे़ःङ्ङिल्ले़ मे़ले़क्तुआङ् ने़स्से़॥ 7 आल्ल खे़ल्ले़ याःन्दिक् सावलरे़ कुसे़वारोबाधिक् यहवे दाङ्बाल्ले़ कुदगि खे़प्मो याःक्ते़आङ् वये़॥ खे़ल्ले़ कुमिङ् एदोमि दोएग वये़, हे़क्क्याङ् खे़न् सावलरे़ कुसे़वारोबाहाॽओ कुधे़गेक् वये़॥ 8 दाउदरे़ निङ्वाॽफुसाम्बा अहिमेलेक्के़न् मे़त्तु, “खे़ने़ॽ लाःक् इग्र ताभे के़गत्तुबि? थेआङ्भे़ल्ले़ हाङ्ङिल्ले़ कुयाःम्बक् चोःक्से़ मिल्लिक् लोःक्ते़ॽ मे़त्ताङ्बाल्ले़ आङ्गाॽ लाःक् इग्र ताभे पङ्मा मे़घोसुङ्ङिन्॥” 9 निङ्वाॽफुसाम्बाल्ले़ मे़त्तु, “एलाहबा ते़म्बेॽओ खे़ने़ॽ के़से़रुबा पलिस्ति गोल्यतरे़ कुदाभेन् कप्मो वाॽ॥ खे़न् एपोद तेःत्तिल्ले़ कुएगाङ् चिरिक्किल्ले़ किप्मनाआङ् ने़ःॽ॥ खे़न् के़देॽरुने़भग्र तेॽरे़॥ कप्मो वेॽ ताभे होप्॥” दाउदरे़ मे़त्तु, “खे़न् हे़क्तङ्बा वेॽ ताभेए होप्॥ आङ्गाॽ हाबा खे़न् पिराङ्ङे़ॽ॥” 10 खे़न् ये़न् दाउदे़न् खे़त्छिङ्ङाङ् लाम्धासिङ्, हे़क्क्याङ् गातबा हाङ् आकिसरे़मो पे॥ 11 कर आकिसरे़ कुसे़वारोबाहाॽरे़ दाउदे़न् खे़प्मो खुनिॽ सिराॽमे़धाङे़न्॥ खे़ङ्हाॽरे़ आकिस हाङ्ङिन् मे़मे़त्तु, “कन् मनाःङ्ग कन् लाजेॽबा हाङ् दाउदे़न् मेःम्बि? कल्ले़ कुयाःम्बेओ मे़न्छुमाहाॽ मे़लाःक्खे़र अक्खे पाःत्नु साम्मे़लोरे़आङ् वये़, ‘सावलरे़ हे़न्छिङ् हे़न्छिङ् से़रुसि, कर दाउदरे़ लाङे़न्छिङ् लाङे़न्छिङ् से़रुसि॥’” 12 कन् पाःन्निन् दाउदरे़ कुनिङ्वाॽओ युक्खु, हे़क्क्याङ् खुने़ॽ गातबा हाङ् आकिसे़न्नु साॽरिक् किसे़॥ 13 खे़ल्ले़चोगुल्ले़ दाउदरे़ खे़ङ्हाॽरे़ खुन्छिॽ तगिए के़नाङ्बा हे़क्के के़लॽबा इत्ला चोगु॥ खे़ङ्हाॽरे़ खुन्छिॽ तगि लाम्धेःत्तिल्ले़ ने़प्माङ् ले़प्माङ् उगुर कुमुधोओ कुध्याःत्तिन् वादेःन्दुर खुने़ॽ के़नाङ्बा हे़क्तङ्बाए पोःक्खे़॥ 14 खे़भे़ल्ले़ आकिसरे़ कुसे़वारोबाहाॽ मे़त्तुसि, “कन् मनाःङ्ग के़नाङ्बानिरे़छ॥ खे़न् थेआङ् आङ्गाॽओ के़दारुम्बा? 15 आङ्गाॽओ थे के़नाङ्बाहाॽ मे़सुःम्बि? हे़क्क्याङ् खे़निॽ कन्निन् आङ्गाॽ तुक्खे आजाःत्छे़ के़दारुम्बाबि? कन्हे़क्दङ्बान् आहिम्मो आङ्गाॽ युक्खुङ्बाबि?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.