१ सामुए़ल 20 - लिम्बुजोनाथाने़ल्ले़ दाउदे़न् फाॽरु 1 खे़ब्याङ् दाउदे़न् रामाबा नैयोतलाम् खे़त्छिङ्ङाङ् जोनाथानरो पे॥ हे़क्क्याङ् खुने़ॽ मे़त्तु, “आङ्गाॽ थे चोगुङ्ङाङ् वाॽबे? आङ्गाॽनु थे आप्तिक् वाॽबे? खे़ने़ॽ के़म्बारे़ कुदक्ले़ङ्वाओ आङ्गाॽ थे फे़न्याःम्बक् चोगुङ्ङाङ् वाॽआङ् खुने़ॽ से़प्मा कोःत्ताॽबाबे?” 2 जोनाथानरे़ मे़त्तु, “अक्तङ्बा मे़बोङ्ने़न्ल॥ खे़ने़ॽ के़न्छिने़न्॥ चुक्पा याःम्बक्साङ् यम्बा याःम्बक्साङ् आम्बारे़ आङ्गाॽ सेःन्मे़न्दोए याःम्बक् मे़जोगुन् के़लॽबा आनिङ्वाॽ निःन्धो वाॽ॥ आङ्गाॽ आम्बारे़ अक्तङ्बा पाःन्निन् आङ्गाॽलाम् आक्खेलॽरिक् चिक्खुबे? कन् पाःन्निन् से़क्खा मेःन्॥” 3 कर दाउदरे़ माङ्हे़क्सिङ्ल पाःत्तु, “खे़ने़ॽ के़म्बारे़ कुनिङ्वाॽओ निङ्वाॽ इःत्छिङ्ङाङ् वाॽ, ‘जोनाथानरे़ कन् पाःन्निन् मे़घे़प्सुन्ल खे़न् पाःन्निन् खे़प्सुल्ले़ कुनिङ्वाॽ तुक्॥’ थेआङ्भे़ल्ले़ खे़ने़ॽ लुङ्माॽ के़दुक्ताङ्बा पाःन्निन् खुने़ॽ कुसिङ् निःत्तुआङ् वाॽ॥ से़क्खाए यहवे दाङ्बे़ल्ले़ कुमिङ्ङो नु खे़ने़ॽ कुहिङ्वे़त् के़वाॽबा हे़क्के माङ्हे़क्सिङ्ङाआङ् पाःत्तुङ्ॽ आङ्गाॽ आसिमे़न् निःत्ताङ् वाॽ॥” 4 जोनाथानरे़ दाउदे़न् मे़त्तुॽ, “खे़ने़ॽ थे चोःक्मा के़निङ्वाॽ वाॽ, आङ्गाॽ हाबा खे़न् के़लागि चोगुङ्ॽ॥” 5 खे़ल्ले़चोगुल्ले़ दाउदरे़ मे़त्तु, “ताःन्दिक्क लादुप् तङ्नाम्, हे़क्क्याङ् आङ्गाॽ हाङ्ङिन्नु सोरिक् युङ्माआङ् चाजामा पोङ्॥ कर आत्छे़न्दान् युःन्छिक् थारिक् प्याङ्सिओ पेःक्काआङ् चिङ्सिङ्ए़॥ 6 खे़ने़ॽ के़म्बारे़ आङ्गाॽ होःप्पाबा निङ्वाॽ खोसुआङ् से़ःन्लाप्पाने़फग्र अक्खे मे़त्ते़ॽ, ‘बेथले़हे़म कुहिम्मो थारिक् चघप् पेःक्मा के़बोङ्बा पोःक्खे़बाल्ले़ चोगुल्ले़ दाउदरे़ आङ्गाॽ नासिङ्ये़म् नाःक्ताङ्, थेआङ्भे़ल्ले़ खे़प्मो कुहिम्सयङ्बा के़रे़क्ले़ तङ्बेॽ थक्माबा वयागे़न् सिदुङ्जभा तोःम्मा के़बोङ्बा वाॽरछ॥’ 7 खुने़ॽ ‘नुॽ’ पाःत्तुने़भग्र आङ्गाॽ आलागि नुबाए पोङ्, कर कुसिक्चाने़भग्र खुने़ॽ आङ्गाॽ से़प्माए कोःत्ताबारे़छ फाॽआङ् खे़ने़ॽ कुसिङ् के़निःत्तुरो॥ 8 आङ्गाॽग खे़ने़ॽ के़योःक्कारो आङ्गाॽ लुङ्माॽ तुक्ताङ्ङे़ॽओ, थेआङ्भे़ल्ले़ खे़ने़ॽ नु आङ्गाॽग यहवे दाङ्बे़ल्ले़ कुदगि लत्छा माङ्हे़क् आजोगे़सुआङ् वाॽ॥ आङ्गाॽ ताप्फे़ःम्बा याःम्बक् चोगुङ्ङाङ् वाॽने़फग्र खे़ने़ॽए से़राङ्ङे़ॽ॥ कर के़म्बारे़ कुहुक्को थामा मे़बाङ्घाङ्ङिन्ने़ॽओ॥” 9 जोनाथानरे़ मे़त्तु, “मेःन्, मेःन्, अक्तङ्बा मे़बोङ्ने़ल्ल॥ आङ्गाॽ आम्बारे़ खे़ने़ॽ से़प्माए के़गोःत्ते़बा फाॽआङ् कुसिङ् निःत्तुङ्ङिल्ले़ खे़न् पाःन्निन् आङ्गाॽ मे़मे़त्ने़म्बि?” 10 दाउदरे़ जोनाथाने़न् मे़त्तु, “खे़ने़ॽ के़म्बा कुसिक् पोःक्काङ् के़दन्निल्ले़, खे़न् आङ्गाॽ हाःत्ले़ मे़त्ताॽबे?” 11 जोनाथानरे़ मे़त्तु, “फे़रे़ॽ, आन्छिॽ प्याङ्सिओ पित्छि॥” हे़क्क्याङ् खुन्छिॽ सोरिक् प्याङ्सिओ पेसि॥ 12 हे़क्क्याङ् जोनाथानरे़ दाउदे़न् याम्मो मे़त्तु, “इस्राइलबा निङ्वाॽफुमाङ् यहवे दाङ्बे़ल्ले़ कुमिङ्ङो माङ्हे़क्सिङ्ङाआङ् पाःत्तुङ्ॽ, ताःन्दिक् इग्र आत्छिन्दान् आम्भा कन् ये़म्मो आङ्गाॽ आम्बा सेःन्दोसुङ्ॽ॥ खे़ने़ॽ के़याःम्बेओ खुने़ॽ कुनिङ्वाॽ नुबा वाॽने़फग्र आङ्गाॽ खे़ने़ॽ मे़त्ने़॥ 13 कर आङ्गाॽ आम्बारे़ खे़ने़ॽ खाःम्मा निङ्वाॽ इःत्तुआङ् वाॽने़फग्र, हे़क्क्याङ् खे़ने़ॽ मे़मे़त्ने़न्नाङ् मे़से़ःप्ने़न्ने़भग्र यहवे दाङ्बे़ल्ले़ आङ्गाॽ से़त्तार॥ यहवे दाङ्बे़न् आम्बानु वाॽबा हे़क्केए खे़ने़ॽनुआङ् वाॽर॥ 14 कर आङ्गाॽ हिङ्ङार थारिक् यहवे दाङ्बे़ल्ले़ हे़क्के आङ्गाॽ लुङ्माॽ तुक्ताङ्ङे़ॽ, कर आङ्गाॽ आन्छे़रे़न्ने़ॽ॥ 15 खे़ने़ॽ आहिम्सयङ्हाॽ लुङ्माॽ तुक्मासि आप्फाल्ले़आङ् मे़ले़रे़से़न्ने़ॽ॥ यहवे दाङ्बाल्ले़ कन् इक्सादिङ् खाम्बेःक्मोलाम् दाउदरे़ के़रे़क् कुनिङ्मिहाॽ मे़क्खुसिसाङ् खे़न् लुङ्गुम्मिन् आहिम्सयङ्ङो वाॽररो॥” 16 अक्खे पाःत्तुर जोनाथानरे़ दाउदरे़ कुहिम्सयङ्हाॽनु याम्मो माङ्हुप् चोगु, “यहवे दाङ्बाल्ले़ दाउदरे़ के़रे़क् कुनिङ्मिहाॽ खुम्दिङ् पिरुसिर॥” 17 हे़क्क्याङ् जोनाथानरे़ दाउदे़न् याम्मो माङ्हे़क् चोःक्पाङ्घु थेआङ्भे़ल्ले़ खुने़ॽ दाउदे़न् आबाङे कुइसिक् साॽरिक् लुङ्माॽ तुक्तुआङ् वये़॥ 18 जोनाथानरे़ दाउदे़न् मे़त्तु, “ताःन्दिक्क लादुप् तङ्नाम् वाॽ॥ खे़प्मो के़युक्नादे़न्निल्लक् ने़बा निदे़त् हे़क्क्याङ् के़होःप्लछ के़लॽबा निङ्वाॽ खोदे़त्लो॥ 19 आत्छिन्दान् युःन्छिक् खे़ने़ॽ के़होप्पा पान् कॽयो लःन्निल्ले़, उन्छोन् के़जिङ्सिङ्बादे़न्नो चिङ्सिङ्ङे़ॽ हे़क्क्याङ् ए़जे़ल लुङ्ङिल्ले़ कुबेसाङ् आहाङ्घे़ॽ॥ 20 थेहाॽइ सोःक्तुङ्ङाङ् के़आप्पा ले़ङ्सिङार सुम्सि तोङ् आबुङ्देसुङ्॥ 21 हे़क्क्याङ् आसे़वारोबे़न् खे़न् तोःङ्हाॽ कोःत्छे़ पाङ्घुङ्ॽ॥ आङ्गाॽ खे़न्, ‘ओमे़त्ते़ॽ, तोःङ्हाॽ खे़ने़ॽ के़वाॽबाल्ले़ कत्ना ले़प्साङ् मे़ने़ःॽ, खे़ङ्हाॽ खप्से़ॽआङ् फे़त्ते़ॽ’ मे़तुङ्ने़भग्र खे़ने़ॽ के़जिङ्सिङ्बादे़न्लाम् लःन्माआङ् फे़म्मा के़सुक्॥ आङ्गाॽ से़क्खाए यहवे दाङ्बे़न् कुहिङ्वे़त् वाॽबा कुइसिक् पाःत्तुङ्ॽ, खे़ने़ॽ के़नुॽबा के़जोक्, थेआङ्भे़ल्ले़ खे़ने़ॽ के़न्छिने़न्॥ 22 कर आङ्गाॽ खे़न् आसे़वारोबे़न् ‘ओमे़त्ते़ॽ, तोःङ्हाॽ खे़ने़ॽ के़वाॽबाल्ले़ नाहाङ् ले़प्माङ् मे़ने़ःॽ’ मे़त्तुङ्ने़भग्र यहवे दाङ्बाल्ले़ खे़ने़ॽ खे़त्छिङ्माए पोङ् के़लॽबा निङ्वाॽ चोगुबारे़छ॥ 23 आन्छिॽ लुम्मो पोःक्खे़बा माङ्हे़क्किन् सदादिङ् थारिक्के के़त्ल के़लॽबा पाःन्नो यहवे दाङ्बे़न् के़निबा तोःन्दि पोङ्लो॥” 24 खे़ल्ले़चोगुल्ले़ दाउदे़न् प्याङ्सिओ चिङ्सिङ्ङाङ् युङे़॥ हे़क्क्याङ् लादुप् तङ्नाम् त्ये़ हे़क्क्याङ् हाङ्ङिन् चाजासे़ युङ्सिङ्॥ 25 हाङ्ङिन् लुङ्धाक् पिसाङ्बा कुयुक्नादे़न्नो युङे़, हाङ्ङिल्ले़ कुदगाङ् ले़प्माङ् जोनाथाने़न् हे़क्क्याङ् हाङ्ङिल्ले़ कुबेसाङ् अबनेरे़न् युङे़ कर दाउदे़न् कुयुङ्दे़न्नो होःप्ते़॥ 26 खे़न् ये़न्नो सावलरे़ थेआङ् मे़बाःत्तुन्, थेआङ्भे़ल्ले़ खुने़ॽ इःत्तु, “यहुदि थिम् इसिःक् आसुत्थो पोःक्खे़बिला॥” 27 कर कुदाःन्दिक्मा, लादुप् तङ्नाम्मिल्ले़ निसिगेक्पा ये़न्नोआङ् दाउदे़न् कुयुङ्मादे़न्नो होःप्ते़॥ हे़क्क्याङ् सावलरे़ कुस्सा जोनाथाने़न् मे़त्तु, “थेआङ् यिसैरे़ कुस्सान् मिःप्माआङ् आइन्नाङ् चाजासे़ कप्मो मे़द्ये़ने़म्बाग?” 28 जोनाथानरे़ कुम्बा सावले़न् मे़त्तु, “दाउदरे़ बेथले़हे़म पेःक्मा आभाःक्ते़ फाॽआङ् आङ्गाॽ मे़त्ताङ्ङाङ् वये़॥ 29 खुने़ॽ पाःत्तु, ‘आङ्गाॽ पेःक्मा आबाङ्घे़ॽ, थेआङ्भे़ल्ले़ आनिगे हिम्सयङ्हाॽरे़ पाङ्जुम्मो सिदुङ्जभा मे़दोन्दुर मे़याक्, हे़क्क्याङ् आम्भुॽसिरे़ खे़ने़ॽ खे़प्मो के़वाॽरबोङ् मे़मे़त्ताङ्ङाङ् वाॽ॥ खे़ने़ॽ पेःक्मा के़बाङ्ङाने़भग्र आम्भुॽसि तुम्से़ पेःक्का॥’ खे़ल्ले़चोगुल्ले़ हाङ्ङिल्ले़ कुजामादे़न्नो खुने़ॽ तामा मे़सुक्ते़न्॥” 30 हे़क्केःल्ले़ सावले़न् जोनाथाने़न्नु साॽरिक् कुसिक् पोगे़आङ् अक्खे मे़त्तु, “कुइगे़भे़म्बा नु आङ्दिङ् के़लॽबाए, खे़ने़ॽग आस्सा मेःन्ने! खे़ने़ॽ यिसैःल्ले़ कुस्सा दाउदे़न् हाङ् पोङ्मा के़सेगुआङ् आबाङे के़जाःत्थि नु के़म्मारे़ कुजाःत्थि के़देसुबान् आङ्गाॽ मे़निआन्बि? 31 यिसैरे़ कुस्सा दाउदे़न् हिङ्ल थारिक् खे़ने़ॽ हाङ् पोङ्मा के़न्छुक्ने़न्॥ आल्ल खे़न् आङ्गाॽओ कुदाःत्छे़ कुभा पाङ्घे़से़ॽ, थेआङ्भे़ल्ले़ खे़न् से़प्माए पोङ्॥” 32 जोनाथानरे़ कुम्बा मे़त्तु, “थेआङ् खुने़ॽ सिमा पोङ्बाबे? खुने़ॽ थे चोगुआङ् वाॽबे?” 33 हे़क्केःल्ले़ कुम्बा सावलरे़ कुलाःक्किन् पक्खुआङ् जोनाथाने़न् फे़ङ् ले़प्तुभे़न्छु॥ हे़क्क्याङ्ग जोनाथानरे़ से़क्खाए आम्बारे़ दाउदे़न् से़प्माए निङ्वाॽ चोगुबारे़छ फाॽआङ् निङ्वाॽ खोसु॥ 34 जोनाथाने़न् कुसिक् पोगे़आङ् चाजामादे़न्नोलाम् मुत्थ्रिक् पोगे़आङ् पे॥ हे़क्क्याङ् खे़न् लाःल्ले़ निये़न्बा ये़न्नो खुने़ॽ थे़माआङ् मे़जने़न्, थेआङ्भे़ल्ले़ खुने़ॽ कुम्बारे़ दाउदे़न् कुनामे़साॽरुन्नाङ् कुनाधासु पिरुबाल्ले़ चोगुल्ले़ चाॽरिक् कुनिङ्वाॽ तुगे़॥ 35 कुदाःन्दिक्मा तानाम्सा जोनाथाने़न् दाउदरे़ कुदुम्से़ चुक्सा हिन्जाॽधिक् तेॽरुआङ् प्याङ्सिओ पे॥ 36 हे़क्क्याङ् खुने़ॽ खे़न् हिन्जाॽइन् मे़त्तु, “आङ्गाॽ तोङ् आबुङ्, खे़ने़ॽ लोःक्ते़ पेगे़ॽआङ् कोःत्ते़ॽ॥” हे़क्क्याङ् खे़न् हिन्जाॽइन् पेर पत्छे़ल्ले़ खुने़ॽआङ् नाहाङ्ना तोःङ्धिक् आबुदेसु॥ 37 जोनाथानरे़ कुदोःङ्ङिन् मक्थ्ये़बा ते़न्नो हिन्जाॽइन् के़रे़र पत्छे़ल्ले़ जोनाथानरे़ मे़त्तु, “ओमत्ते़ॽ, तोःङ्ङिन् खे़ने़ॽ के़वाॽबान्नुःल्ले़ नाहाङ्दाङ् मे़ने़ने़म्बि?” 38 हे़क्क्याङ् याम्मो मे़त्तु, “हारा पेगे़ॽ हारा, मे़हाङ्घे़न्ने़ॽ” खे़न् हिन्जाॽइल्ले़ तोःङ्ङिन् खप्सु हे़क्क्याङ् कुन्दाङ्बाल्लो नुःक्खे़॥ 39 कर हिन्जाॽइल्ले़ कन् पाःन्निल्ले़ कुबेन् थेबे? फाॽआङ् थेआङ् कुसिङ् मे़निःत्तुन्, दाउद नु जोनाथानरे़रक् कुसिङ् निःत्ते़सुआङ् वये़॥ 40 हे़क्क्याङ् जोनाथानरे़ खुने़ॽ कुलिॽ नु कुदोःङ्हाॽ खे़न् हिन्जाॽइन् पिरुआङ् मे़त्तुॽ, “कन्हाॽ तेॽरे़आङ् पाङ्जुम्मो नुःक्खे़ पेगे़ॽ॥” 41 खे़न् हिन्जाॽइन् पेआङ् यम्बा लुङ्ङिल्ले़ लाङ्गे़न् ले़प्साङ्नु दाउदे़न् लःन्दे़, हे़क्क्याङ् जोनाथानरे़ कुदगि सुम्ले़ङ् अःक्खुम् अःक्खुम् लॽरिक् थुःङ्सिङ्ङाङ् से़वा मे़त्तु॥ हे़क्क्याङ् खे़ङ्हाॽ चुप् मे़त्ने़सिआङ् हे़प्ने़सिर हाबे़सि, जोनाथाने़न्नुःल्ले़ दाउदे़न् साॽरिक् हाबे़॥ 42 खे़ब्याङ् जोनाथानरे़ दाउदे़न् मे़त्तु, “नुःरिक्काङ् पेगे़ॽओ, थेआङ्भे़ल्ले़ आन्छिॽ लुम्मो नु आन्छिॽ सामे़न्छाॽ लुम्मो सदादिङ् साःक्खि के़वाॽबा यहवे दाङ्बाल्ले़ कुमिङ्ङो आन्छिॽ ने़प्माङ् माङ्आहे़क्ने़सिआङ् वाॽ॥” खे़म्ब्याङ् दाउदे़न् खे़प्मोनु पे, हे़क्क्याङ् जोनाथाने़न् पाङ्जुम्मो नुःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.