१ सामुए़ल 2 - लिम्बुहन्नाःल्ले़ कुबेलिगे़न् तुवा 1 हे़क्क्याङ् खे़प्मो हन्नाःल्ले़ अक्खेलॽरिक् पेलिगे़न् तुवा चोगु, “आङ्गाॽ आनिङ्वान् यहवे दाङ्बाओ सःत्ते़आङ् वाॽरो, यहवे दाङ्बाओ आङ्गाॽ आमुक्साम्मिन् त्ये़आङ् वाॽरो॥ आनिङ्मिहाॽ येःप्मासि पान् आङ्गाॽ आम्ब्राओ त्ये़आङ् वाॽरो, आदाङ्बारे़ आङ्गाॽ से़न्लप् के़बिराङ्बाओ आसिक् पसम्समे़आङ् वाॽआरो॥ 2 यहवे दाङ्बान् हे़क्तङ्बा सेसेबा हाःत्ताङ् होप्, खे़ने़ॽ कुसिङ्ताङ्बा वेॽ आत्तिन्नाङ् होप्, आनिॽ निङ्वाॽफुमाङ्ङिन् हे़क्तङ्बा याक्पेॽ वेॽ एःन्नाङ् होप्॥ 3 आङ्दिङ् लॽमा पान् मे़बारे़न्ने़ॽ, यम्बा ले़ङ्सिङ्मा पाःन्छेःक्वा के़म्ब्राओलाम् मे़लःत्ते़न्ने़ॽ॥ थेआङ्भे़ल्ले़ यहवे दाङ्बाङ्ग के़रे़क् सिक्कुम् निङ्वाॽ के़गप्पा निङ्वाॽफुमाङ्लो, हे़क्क्याङ् खुने़ॽ मनारे़ मे़जोगुबा नुबा नु ताप्फे़ःम्बा याःम्बक्हाॽ से़न्दुरो॥ 4 के़धुम्बा थङ् के़जोःक्पाहाॽरे़ खुनिॽ लिन् ए़गे़आङ् वाॽरो, कर हर्जुॽ के़जोःम्बाहाॽ के़धुम्बा मे़बोःक्खे़आङ् मे़वाॽरो॥ 5 खाघा के़जाबाहाॽ आल्लो चामारे़ लागि आबाङे मे़सङ्सिङ् मे़देसिङ्ङाङ् मे़वाॽरो, कर कुसे़त्के़लाःक्पाहाॽरे़ अल्लो खुनिॽ खाघा चामा मे़घोसुआङ् मे़वाॽरो॥ सामे़ङ्गप्मनामा मे़न्छुमाःल्ले़ नुसि हिन्जाॽबित्छाॽ कत्तुसिआङ् मे़वाॽरो, कर यरिक् सागे़गप्मा मे़न्छुमाःल्ले़ कुस्सा थिक्काङ् मे़न्हिङे़ल्लो॥ 6 यहवे दाङ्बाल्ले़ए सिमे़न् तारु हे़क्क्याङ् ने़त्तिगे़न् हिङ्मन् आबिरो, खुने़ॽए मनाहाॽ इपुङ्ङो पाङ्घुसि हे़क्क्याङ् के़सिबाहाॽ याम्मो हिङ्मन् पिरुसिरो॥ 7 यहवे दाङ्बाल्ले़ए मनाहाॽ याङ्गे़साॽबा नु याङ्साकुन्धेसाबा चोगुसिरो, हे़क्क्याङ् खुने़ॽए कुभा योयोक् चोगुसि हे़क्क्याङ् कुभा थो फोःक्खुसिरो॥ 8 खुने़ॽग याङ्गे़साॽबाहाॽ खाम्हिःक्कोनु थो फोःक्खुसिरो थेधिक्काङ् मे़ङ्गप्मनाबाहाॽ खुन्छिॽ तुक्खे लाक्खेलाम्बा थाःङ् फोःक्खुसिरो॥ खुने़ॽ खे़ङ्हाॽ हाङ्साहाॽनु कुदङ्बा चोगुसिरो हे़क्क्याङ् मिङ्सो इङ्धाङ्बा युक्नाओ युक्खुसिरो॥ थेआङ्भे़ल्ले़ इक्सादिङ् खाम्बेःक्माल्ले़ कुयुक्नाहाॽग यहवे दाङ्बाल्ले़न्नेरो, खुने़ॽ योॽबा लाजेन् खे़ल्ले़ कुसम्धाङ् युक्खुआङ् युङ्लो॥ 9 खुने़ॽ नसाःन्साबा कुमनाहाॽ से़ःप्तुसिरो, कर लायोबा मनाहाॽ खामाक्मो मे़मे़क्लो॥ हाःत्ताङ् आबाङे थुम्ले़ के़नाःम्बा पोङ्मा मे़सुक्ने़ल्लो॥ 10 यहवे दाङ्बे़ल्ले़ कुदक्ले़ङ्वाओ के़बोक्पाहाॽ के़रे़क् मे़मे़क्लो॥ खुने़ॽ थो साङ्ग्राम्पेदाङ् लाम्बानु हुःक्ल खे़ङ्हाॽ फे़ःक्तुसिरो, इक्सादिङ् खाम्बेःक्मान् के़रे़क् पिसाङ् यहवे दाङ्बे़ल्ले़ खासे़न् चोगुरो॥ खुने़ॽ सेगुबा हाङ्ङिन् मुक्साम् पिरुरो, हे़क्क्याङ् खुने़ॽ आबाङे सेःन्दुबा हाङ्ङिन् थङ् के़नाःम्बा चोगुरो॥” 11 खे़न् एगाङ् एल्कानान् रामाबा कुहिम्मो नुःक्खे़॥ कर अङे़ःक्वा सामुए़ले़न् यहवे दाङ्बाओ माङ्से़वा चोःक्से़ निङ्वाॽफुसाम्बा एलिरे़ कुगम्ब्राङ्ङो सिलोओ याःक्ते़रो॥ एलिरे़ कुस्साहाॽ 12 एलिरे़ कुस्सा ने़त्छि कुइगे़भे़म्बा वये़सि, खे़न् ने़प्माङ्ले़ यहवे दाङ्बे़न् आप्फाल्ले़आङ् मिङ्सो इङ्धाङ् मे़बिरे़छुन्॥ 13 खे़ङ्हाॽरे़ निङ्वाॽफुसाम्बा याःम्बक्किन् कुना मे़साॽरे़सुन्-कुभा मनाहाॽरे़ सिदुङ्जभा मे़दोन्दुल्ले़ एलिरे़ ने़प्फु कुस्साहाॽरे़ निङ्वाॽफुसाम्बे़ल्ले़ कुसे़वारोबे़न् हुक्को सुम्जुलिन् पिरे़त्छुआङ् पाङ्घे़सु॥ सिदुङ्जभा चोःक्मनाबा सान् लाक्तुर युङ्ङिल्ले़, 14 खे़न् से़वारोबे़ल्ले़ सा थोःक्मनाबा खप्प्याओ सुम्जुलिन् केःत्तु हे़क्क्याङ् खे़न् सुम्जुलिःल्ले़ तिःक्सुआङ् के़धाङ्बा सान् एलिरे़ कुस्साहाॽ मे़बिरुसिर याःन्दुसि॥ सिलोओ माङ्से़वा चोःक्से़ के़दाबा के़रे़क् इस्राइलिहाॽनु हाबा हे़क्तङ्बा मे़जोगु॥ 15 कुभा ये़म्मो साःल्ले़ कुसोःत्ते़न् ले़त्ति तोःम्मादे़न्नो मिधिङ्मानुःल्ले़ तगिए निङ्वाॽफुसाम्बाल्ले़ कुसे़वारोबे़न् त्ये़आङ् मे़त्तुसि, “निङ्वाॽफुसाम्बाल्ले़ कुलागि ओॽमा चामारे़ लागि सामाङ्वा आबिरे़ॽ थेआङ्भे़ल्ले़ खुने़ॽ खे़निॽलाम्बा थोःक्मनाबा सा मेःन् कुमाङ्वारक् ताःक्तुरो॥” 16 “ओःक्, तगि कुसोःत्ते़न् मिधिक्खुङ्ॽ, हे़क्क्याङ् के़नाःक्तुबा यारिक्के तेॽरे़ॽ” लॽरिक् खे़न् सिदुङ्जभा के़दोम्बा मनाःल्ले़ पाःत्तुने़फग्र खे़न् से़वारोबे़ल्ले़ अक्खे पाःत्तु, “मेःन् खे़न् आङ्गाॽ आल्लोसा आग्बिर पोङ्, मेःन्ने़फग्र नाप्निङ्ङाङ्साङ् तेॽरुङ्ॽ॥” 17 एलिरे़ कुस्साहाॽरे़ खुन्छिॽ लायोन् साॽरिक् यम्बा पोःक्खे़बा यहवे दाङ्बाल्ले़ निसु, थेआङ्भे़ल्ले़ यहवे दाङ्बाओ मे़दोन्दुबा वयागे़न् सिदुङ्जभान् खे़ङ्हाॽरे़ कुनामे़न्छाॽ मे़त्ते़छु॥ सामुए़ले़न् सिलोबा निङ्वाॽफु हिम्मो 18 खे़न् ये़म्मो अङे़ःक्वा सामुए़ले़ङ्ग नाइनासुःत् एपोद चाङ् चाक्खुआङ् यहवे दाङ्बाओ चक्मे़ल्लॽए से़वा चोःक्मा हेःक्ते़॥ 19 तङ्बेधक्मा कुम्मारे़ खे़न् लत्छा चुक्सा तेत् तॽरु, हे़क्क्याङ् तङ्बेधक्माबा वयागे़न् सिदुङ्जभा तोःन्छे़ कुये़म्बाःन्नु पेसिल्ले़ खे़न् तेःत्तिन् कुम्मारे़ सामुए़ले़न् तेॽरुबिरु॥ 20 एलिःल्ले़ एल्कानान् नु कुमेत् हन्नाःन् हाङ्वागे़न् मुॽइसाम् पिरुसिर मे़त्तुसि, “खे़न्छिॽ के़नाःक्ते़सुबा कन् खे़न्छिॽ साःल्ले़ कुले़क्वाओ यहवे दाङ्बाल्ले़ कन् मे़न्छुमान्लाम्बाए ये़म्बित्छा नु मे़न्छुमा साहाॽ के़बिसिररो॥” खे़ब्याङ् खे़ङ्हाॽ खुन्छिॽ आबाङे हिम्मो नुःक्खे़सि॥ 21 हे़क्क्याङ् यहवे दाङ्बे़ल्ले़ हन्नाःन् लुङ्माॽ तुक्तुॽ, हे़क्क्याङ् खे़न् मे़न्छुक्मा पोःक्खे़आङ् ये़म्बित्छा सुम्सि नु मे़न्छुमा ने़त्छि साहाॽ कत्तुसि॥ ना अङे़ःक्वा सामुए़ले़न् यहवे दाङ्बे़ल्ले़ कुनिमो पोमाधाङ्मा हेःक्ते़॥ एलिन् नु कुस्साहाॽ 22 एलिन् आल्ल साॽरिक् काप्पोबा तुम्से़आङ् वये़, हे़क्क्याङ् खुने़ॽ कुस्साहाॽरे़ के़रे़क् इस्राइलिहाॽनु चोगुसिबा ताप्फे़ःम्बा याःम्बक्हाॽ खे़प्सु॥ हे़क्क्याङ् सेसे साःङ्गाहिम् लाम्धेःप्पो से़वा के़जोःक्मा मे़न्छुमाहाॽनु सोरिक् इप्से़छिबा पाःन्हाॽआङ् खुने़ॽ खे़प्सु॥ 23 खे़ल्ले़चोगुल्ले़ खुने़ॽ खे़ङ्हाॽ मे़त्तुसि, “खे़न्छिॽ थेआङ् अक्तङ्बा याःम्बक् के़जोःक्सुबाग? खे़न्छिॽ फे़न्याःम्बक् के़जोःक्सु के़लॽबा पान् के़रे़क् मनाहाॽलाम् आङ्गाॽ खे़प्सुङ्ङाङ् वाॽ॥ 24 मेःन्ना, आस्सासे, आङ्गाॽ च्या खे़प्सुङ्ल वाॽआ, यहवे दाङ्बाल्ले़ कुमनाहाॽरे़ खुन्छिॽलुम्मो के़इङ्बा कम्भदाङ्बा पाःन्हाॽ नुबा मेःन्॥ 25 मनाःल्ले़ मनाःल्ले़ए कुदक्ले़ङ्वाओ लायो लासोत् चोगुने़फग्र निङ्वाॽफुमाङ्ले़ कुहुक्किन् लायो के़जोःक्पाल्ले़ कुसम्धाङ् चुक्मा सुक्लो॥ कर मनाःल्ले़ निङ्वाॽफुमाङ्ले़ कुदक्ले़ङ्वाओ लायो चोगुने़फग्र खे़ल्ले़ कुलागि हाःत्ले़ पेलिगे़न् तुवा चोगुबाबे?” कन् के़रे़क् पाःन्हाॽ खे़प्से़छुसाङ् खुन्छिॽ पानुदिङ् पाःल्ले़ कुबाःन्हाॽ खे़म्घे़म् मे़लाप्ते़सुन्, थेआङ्भे़ल्ले़ यहवे दाङ्बाल्ले़ खे़ङ्हाॽ से़प्मासिए निङ्वाॽ चोगुआङ् वये़रो॥ 26 हे़क्क्याङ् यहवे दाङ्बान् नु मनाहाॽरे़ खुनिॽ लुङ्गुम्लाम् सामुए़ले़न् थक्ला लिङ्गे़न्नो पोरे़र पे॥ एलिरे़ कुहिम्सयङ्ङो ताप्फे़ःम्बा माङ्निङ्वाॽपान् 27 आल्ल निङ्वाॽफुमाङ्ङिल्ले़ लत्छा कुसे़वारोबाधिक् त्ये़आङ् एलिन् मे़त्तु, “यहवे दाङ्बाल्ले़ अक्खे पाःत्तुॽ, ‘के़म्बा के़न्धे़बासिरे़ खुनिॽ हिम्सयङ्हाॽ मिस्र लाजेॽबा फारो हाङ्ङिल्ले़ कुयोःग्बा मे़वये़ल्ले़ आङ्गाॽ आबाङे खे़ङ्हाॽरो ओसेःन् मे़धाक्सिङ्ङान्बि? 28 आङ्गाॽ के़रे़क् इस्राइलि थाःक्हाॽओ खे़ने़ॽ के़सुधे़बा हारुने़न् आङ्गाॽओ माङ्से़वा चोःक्मारे़ लागि निङ्वाॽफुसाम्बा पोङ्से़, मनाहाॽरे़ आङ्गाॽओ सिदुङ्जभा मे़दोन्दुबा ले़त्ति तोःम्मादे़न्नो सिदुङ्जभा तोःन्छे़, सुक्पा-साङ्सिङ् हाःन्छे़ हे़क्क्याङ् आङ्गाॽ आबेसाङ् नाइनासुःत् एपोद चाङ्माआङ् से़वा चोःक्मारे़ लागि सेगुङ्॥ हे़क्क्याङ् के़रे़क् इस्राइलिहाॽरे़ ले़त्ति मे़दोःन्दुबाओलाम् कुभा लक्हाॽ खे़ने़ॽ के़सुधे़बा हिम्सयङ्हाॽरे़ खुनिॽ लागि कप्मा युक् पिरुङ्सिङ्॥ 29 आङ्गाॽ आयुक्नाओ तोःन्छे़ मे़दारुबा ले़त्तिहाॽ नु वयागे़न् सिदुङ्जभाहाॽ खिनिॽ थेआङ् मिङ्सो इङ्धाङ् के़म्बिरुम्मिन्बाबे? खे़ने़ॽ इस्राइलि आमनाहाॽरे़ ले़त्ति मे़दोन्दुबा नुबा चिगक्वाहाॽ खे़ने़ॽ के़लागि के़युक्खुआङ् आङ्गाॽनुःल्ले़आङ् यरिक् थेआङ् के़स्साहाॽ मिङ्सो इङ्धाङ् के़बिरुसिबाबे?’ 30 “खे़ल्ले़चोगुल्ले़ यहवे दाङ्बा, इस्राइलबा निङ्वाॽफुमाङ्ङिल्ले़ अक्खे पाःत्तु, ‘खे़ने़ॽ के़हिम्सयङ् नु के़म्बारे़ कुहिम्सयङ्हाॽरे़ सदादिङ् चक्मे़न्लॽए आङ्गाॽ आदगि माङ्से़वा मे़जोगुर फाॽआङ् माङ्हुप् चोगुङ्ङाङ् वयाङ्॥’ कर आल्ल यहवे दाङ्बाल्ले़ अक्खे पाःत्तु, ‘आल्लआङ्धो अक्खे पोङ्मा मे़नुॽने़न्॥ आङ्गाॽ मिङ्सो इङ्धाङ् के़बिबाहाॽ मिङ्सो इङ्धाङ् पिरुङ्सिङ्, हे़क्क्याङ् आङ्गाॽ कुनामे़न्छाॽ के़मे़प्पाहाॽ आङ्गाॽ चिःत्तुङ्सिङ्॥’ 31 ओमे़त्ते़ॽ, आल्ल अक्तङ्बा ये़म् तारबत्, खे़ने़ॽ के़हिम्सयङ्हाॽ नु के़म्बारे़ कुहिम्सयङ्हाॽ के़रे़क् नुप्सुङ्सिङ्, हे़क्क्याङ् खुन्छिॽ थाःक्सॽर याःन्दुङ्सिङ्ङाङ् काप्पोबा मे़न्दुम्मे मे़सिःॽ॥ 32 आङ्गाॽ आयुङ्मादे़न्नो खे़ने़ॽ पयम् यम्बा तुक्खे ताबा के़निसुॽ॥ हे़क्केसाङ् इस्राइलिहाॽरे़ खुनिॽ लागिग नुॽमा तामाए पोङ्, कर आल्लआङ्धो खे़ने़ॽ के़हिम्सयङ्ङो के़रे़क् थाङ्बे़न् मे़वाॽरए मे़सिमे़घे़त्लो॥ 33 कर कुभा मनाहाॽ आङ्गाॽ से़ःप्तुङ् कत्तुङ्सिङ् हे़क्क्याङ् खे़ङ्हाॽग खे़ने़ॽ के़मिक्वा नु मे़रिङ् थक्मारे़ लागिरक् मे़बोङ्॥ हे़क्क्याङ् यरिक्तङ्बा के़मनाहाॽ थाङ्बे़न् मे़वे़न्नाङ् मे़वाॽइल्ले़सा मे़सिरो॥ 34 “कन् के़रे़क्ले़न् मिक्सेःङ्ग खे़ने़ॽ ने़प्फु के़स्साहाॽओ ताप्फे़ःम्बा पोङ्बा के़निसुॽ॥ खुन्छिॽ ने़प्माङ् थिक्याःल्ले़ सिसिरो॥ 35 आङ्गाॽ आबाङे खे़ने़ॽ के़लागि लत्छा नसानिबा निङ्वाॽफुसाम्बाधिक् फोःक्खुङ्, खे़ल्ले़ आङ्गाॽ आनिङ्वाॽ नु आयाम्साम्मो इःत्तुङ्बा हे़क्केए चोगुॽ॥ आङ्गाॽ खे़ल्ले़ कुधाःक्हाॽ आभे़ल्ले़साङ् के़वाॽबा चोगुङ्सिङ्, हे़क्क्याङ् खे़ल्ले़ आङ्गाॽ सेगुङ्बा हाङ्ङिल्ले़ कुदगि सदादिङ् माङ्से़वा चोगुरो॥ 36 हे़क्क्याङ् खे़ने़ॽ के़हिम्सयङ्ङो के़हिङ्बा के़याःक्पा के़रे़क्ले़ खुने़ॽ कुदगि मे़बेःक्काङ् थुङ्बोहबत् मे़भन्छिङ्ॽ खे़ब्याङ् युप्पा याङ्इत्छेॽ थिक् नु चबे़ःत्छिक् कुजाजि पिराङ्ङे़ॽना लॽरिक् पेलि मे़भाक्तुॽ, ‘आङ्गाॽआङ् निङ्वाॽफुसाम्बा याःम्बक् चोःक्मा लक्को आयाक्ते़ॽना, हे़क्केःल्लॽरिक् आङ्गाॽ आलागि चामा थुङ्मा कुजा कत्तुङ्ल॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.