१ सामुए़ल 19 - लिम्बुदाउदे़न् सावलरे़ तुक्खे चाःत्तुबा 1 सावलरे़ दाउदे़न् से़रे़म्मे़ॽ फाॽआङ् कुस्सा जोनाथाने़न् नु के़रे़क् कुमनाहाॽ मे़त्तुसि॥ कर जोनाथानरे़ दाउदे़न् साॽरिक् कुसिराॽ थाङे़॥ 2 खे़ल्ले़चोगुल्ले़ जोनाथानरे़ दाउदे़न् मे़त्तु, “आम्बा सावलरे़ खे़ने़ॽ से़प्मारे़ लागि खुने़ॽ सुये़म् ओमे़त्तुर वाॽ॥ ताःन्दिक् तानाम् सिङ्सिङ् ये़क्ये़क्काङ् वये़ॽ, प्याङ्सि ले़प्माङ् पेगे़ॽआङ् चिङ्सिङ्ङे़ॽआङ् युङे़ॽ॥ 3 आङ्गाॽ लाःक्कात् पेःक्काआङ् खे़ने़ॽ के़जिङ्सिङ्बा प्याङ्सि पेसाङ् आङ्गाॽ आम्बारे़ कुबेसाङ् ये़प्पा हे़क्क्याङ् खे़ने़ॽ के़याःम्बेओ आङ्गाॽ खुने़ॽनु ताॽजे़ङ्ङा॥ हे़क्क्याङ् आङ्गाॽ कुभा पान् निङ्वाॽ खोसुङ्ने़भग्र खे़न् चे़क्ने़॥” 4 जोनाथानरे़ दाउदरे़ कुयाःम्बेओ कुम्बा नुरिक् ताॽजे़क्तु, “आदाङ्बे हाङ्ङिल्ले़ के़योक् दाउदे़न् थेआङ् मे़मे़त्ते़न्ने़ॽ॥ खुने़ॽ के़दक्ले़ङ्वाओ थेआङ् फे़न्याःम्बक् मे़न्जोःक्के वाॽ॥ खुने़ॽ थे चोगुआङ् वाॽ, खे़न् आदाङ्बारे़ लागि नुबाए चोगुआङ् वाॽ॥ 5 खे़न् पलिस्तिःन् से़रुल्ले़ खुने़ॽ कुधक्किन् ले़रुआङ् मे़ङ्गिए थङ् चोगे़॥ यहवे दाङ्बे़ल्ले़ के़रे़क् इस्राइलिहाॽरे़ खुनिॽ लागि यम्बा थङ् नाःन्दु॥ हे़क्क्याङ् खे़न् के़निसुआङ् साॽरिक् के़निङ्वाॽ त्ये़॥ हे़क्केःल्ले़ खे़ने़ॽ के़दक्ले़ङ्वाओ थेआङ् मे़न्जोःक्मनाबा मनान् थे़माआङ् से़प्मा के़गोःत्तुबाबे?” 6 जोनाथानरे़ पाःत्तुबा पाःन्निल्ले़ सावले़न् कुनिङ्वाॽ त्ये़, हे़क्क्याङ् से़क्खाए यहवे दाङ्बे़न् कुहिङ्वे़त् वाॽबा कुइसिक् आङ्गाॽ दाउदे़न् मे़से़त्तान् लॽरिक् माङ्हे़क्सिङ्॥ 7 खे़ल्ले़चोगुल्ले़ जोनाथानरे़ दाउदे़न् उःत्तु, हे़क्क्याङ् कन् के़रे़क् पाःन्हाॽ मे़त्तु॥ खम्ब्याङ् जोनाथानरे़ दाउदे़न् सावलरे़ओ तेॽरु, हे़क्क्याङ् तगिबा हे़क्के हाङ्ङिल्ले़ कुसे़वा याःम्बक् चोःक्मा हेःक्तु॥ 8 याम्मो थङ् पोङ्मा हेःक्ते़, हे़क्क्याङ् दाउदे़न् पलिस्तिहाॽनु थङ् चोगे़॥ खे़प्मो खुने़ॽ साॽरिक् थगुसि, खे़न् पलिस्तिहाॽ खे़प्मोनु मे़घे़त्छिङ् मे़घे़रे़॥ 9 थिक्यान् सावलरे़ कुहुक्को लाःक्किन् याङ्सिङ्ङाङ् कुहिम्मो युङे़ज्ये़, खे़म्भे़ल्ले़ यहवे दाङ्बालाम्बा के़दाबा फे़न्साम्मिल्ले़ सावले़न् ते़म्सु, खे़न् ये़म्मो दाउदे़न्नाङ् मुक्ला मुक्खुर आम्भा खे़प्मो युङे़॥ 10 सावलरे़ दाउदे़न् लुङ्धाक्को लाःक्किल्ले़ तिःक्खुर फाॽआङ् फे़ङ् ले़प्तु कर दाउदे़न् इःम्सिङ्, हे़क्क्याङ् खे़न् लाःक्किन् लुङ्धाक्को लेःत्छिङ्॥ दाउदे़न् हाबा खे़न् से़न्दिक् खे़त्छिङ्॥ 11 हाबा खे़न् से़न्दिक्सा सावलरे़ दाउदरे़ कुहिम्मो कुभा कुमनाहाॽ कुधोःम्से़ हे़क्क्याङ् कुदाःन्दिक्मा तानाम् थारिक्ले़ से़प्मा फाॽआङ् पाङ्घुसि॥ कर दाउदरे़ कुमेत् मिकलरे़ मे़त्तु, “खे़ने़ॽ आल्लो से़न्दिक्सा के़ङ्घे़त्छिङ्ङिन् के़म्बेःक्ने़न्ने़भग्र फग्र ताःन्दिक् तानाम्सा के़म्से़त्॥” 12 खे़ल्ले़चोगुल्ले़ मिकलरे़ दाउदे़न् पेधाःप्पोलाम् लाःक्कात् यो थासुआङ् लःत्तुदेसु, हे़क्क्याङ् स्वाःत्ताङ् खे़त्छिङ् पे॥ 13 खे़ब्याङ् मिकलरे़ नावाइत्लाधिक् तारुआङ् कुयुक्नाओ ने़स्सु, हे़क्क्याङ् कुधे़गेःक्पो मे़ःन्दा मुरिक्किल्ले़ कबुआङ् तेत् खाप्तु ने़स्सु॥ 14 सावलरे़ कुमनाहाॽ दाउदरे़ कुदे़म्से़ पाङ्घुसि, कर मिकलरे़ खे़ङ्हाॽ मे़त्तुसि, “खुने़ॽग तुक्ल ने़ःॽ॥” 15 हे़क्केःल्ले़ सावलरे़ दाउदे़न् आबाङे मिक्किल्ले़ ओमे़त्ताम्मे़ॽ फाॽआङ् खे़ङ्हाॽ पाङ्घुसि॥ खुने़ॽ खे़ङ्हाॽ मे़त्तुसि, “खे़न् कुयुक्नानु आङ्गाॽओ ताराम्मे़ॽ, हे़क्क्याङ् आङ्गाॽ खे़न् से़रुङ्ॽ॥” 16 खे़न् कुमनाहाॽ मे़बेआङ् हिम्मो मे़लासे़ कर युक्नाओ नावाइत्लान् नु खे़ल्ले़ कुधे़गेःक्पो मे़न्दाक् मुरिक्किल्लक् मे़घोसु॥ 17 खे़ल्ले़चोगुल्ले़ सावलरे़ मिकले़न् मे़त्तु, “खे़ने़ॽ थेआङ् आङ्गाॽ आनिङ्मि दाउदे़न् के़घे़त्तु के़देसुआङ् इङ्गे़ले़क्काबा?” मिकलरे़ मे़त्तु, “खुने़ॽ, ‘खे़त्छिङ्मा के़म्भाॽआन्ने़भग्र से़त्ने़’ मे़त्ताङ्॥” 18 दाउदे़न् खे़त्छिङ्ङाङ् रामा पाङ्जुम् सामुए़लरो पे, हे़क्क्याङ् सावलरे़ खुने़ॽनु चोगुबा के़रे़क् पाःन्हाॽरे़ कुयाःम्बेओ सामुए़ले़न् चे़क्तु॥ खे़म्ब्याङ् सामुए़ले़न् नु खुने़ॽ नैयोत पेसिआङ् युङ्मा हेःक्ते़सि॥ 19 दाउदे़न् रामाबा नैयोतओ वाॽ फाॽआङ् कुभा मनारे़ सावले़न् मे़मे़त्तु॥ 20 खे़ल्ले़चोगुल्ले़ सावलरे़ कुभा मनाहाॽ दाउदरे़ कुदे़म्से़ पाङ्घुसि॥ खे़म्भे़ल्ले़ खे़ङ्हाॽरे़ सामुए़लरे़ लाम्लोसुसिबा माङ्निङ्वाॽपान् के़बाःप्पाहाॽ सामुए़ले़न्नु माङ्निङ्वाॽपान् पाःत्नु मे़यागे़बा मे़निसुसि, हे़क्केःल्ले़ खे़ङ्हाॽरोआङ् निङ्वाॽफुमाङ्ङिल्ले़ कुयाम्साम्मिन् त्ये़आङ् खे़ङ्हाॽआङ् माङ्निङ्वाॽपान् पाःप्मा मे़हेःक्ते़॥ 21 कन् पाःन्हाॽ सावलरे़ खे़प्सुआङ् याम्मोआङ् वेॽ मनाहाॽ पाङ्घुसि॥ खे़ङ्हाॽआङ् खुन्छिॽनु माङ्निङ्वाॽपान् पाःप्मा मे़हेःक्ते़॥ सावलरे़ याम्मो सुम्सिगेःक्पो मनाहाॽ पाङ्घुसि, हे़क्क्याङ् खे़ङ्हाॽरे़आङ् हाबाहे़क्के मे़जोगु॥ 22 हे़क्केःल्ले़ सावले़न् आबाङे रामा थासिङ्ङाङ् पे, खे़म्ब्याङ् सेकुओ के़ने़बा यम्बा वबाक्को के़रे़॥ खे़प्मो खुने़ॽ के़रे़आङ् मनाहाॽ सेःन्दोसुसि, “सामुए़ले़न् नु दाउदे़न् आत्तान् वाॽसिबे॥” खे़ब्याङ् खे़प्मोबा मनाहाॽरे़ “खुन्छिॽग रामाबा नैयोतओ वाॽसिरो” मे़मे़त्तु॥ 23 खुने़ॽ खे़न् लाम्मो लाङ्घेगे़र पत्छे़ल्ले़सा निङ्वाॽफुमाङ्ङिल्ले़ कुयाम्साम्मिन् खुने़ॽओ त्ये़आङ् खुने़ॽआङ् रामाबा नैयोत थारिक्के कुसिक्समे़र माङ्निङ्वाॽपान् पाःत्नु लाङ्घेगे़ के़रे़॥ 24 खे़प्मो खुने़ॽ कुजाङ् कुदेःत्हाॽ फे़न्दु, हे़क्क्याङ् सामुए़लरे़ कुदगि कुसिक्समे़र माङ्निङ्वाॽपान् पाःत्नु ले़न्दिक् नाम्धाधा नु से़न्दिक् नाम्दाःत्ताःत्ताङ् युङे़ ले़क्चाबुधुःक् युङे़गरे़॥ खे़ल्ले़चोगुल्ले़ मनाहाॽ अक्खे मे़लॽरे़, “थे सावले़न्नाङ् माङ्निङ्वाॽपान् के़बाःप्पाहाॽओ लत्छाबि?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.