१ सामुए़ल 18 - लिम्बु1 दाउदरे़ सावले़न्नु ताॽजे़ङ्मा सुरुआङ्, सावलरे़ कुस्सा जोनाथाने़न् दाउदे़न्नु निङ्वाॽओ थिक्हुप् पोःक्खे़, हे़क्क्याङ् आबाङे हे़क्के दाउदे़न् लुङ्माॽ तुक्मा हेःक्तु॥ 2 खे़न् ये़न्नाङ्धो सावलरे़ दाउदे़न् खुने़ॽनुए कप्मा हेःक्तु, हे़क्क्याङ् कुम्बारे़ कुहिम्मो याम्मो नुःङ्मा पेःक्मा मे़बाङ्घुन्॥ 3 जोनाथानरे़ दाउदे़न् आबाङे हे़क्के लुङ्माॽ तुक्तुबाल्ले़ चोगुल्ले़, जोनाथानरे़ खे़न्नु माङ्हे़क् चोगु॥ 4 खे़ब्याङ् जोनाथानरे़ आबाङे हे़प्सुबा तेत्ते़न् फे़न्दु, हे़क्क्याङ् खुने़ॽ आबाङे कुधक्सुबा चाङ्ङिन् नु कुदाभेन्, कुलिन् हे़क्क्याङ् कुभॽइःन्नाङ् दाउदे़न् पिरु॥ 5 सावलरे़ याःम्बक् चोःक्से़ पाङ्घुबा आत्तिन् याःम्बक्कोसाङ् दाउदरे़ कुस्साङ्लस्सुर याःम्बक् चोगु, खे़ल्ले़चोगुल्ले़ सावलरे़ खे़न्निन् थोसुदिङ् थक्मोबा युक्तिङ् चोगु॥ अक्खेलॽरिक् थोसुदिङ् थक्मोबा पोःक्खे़बाल्ले़ चोगुल्ले़ के़रे़क् मनाहाॽ नु सावलरे़ कुधक्सुबा लाम्लोबाहाॽरे़आङ् खुन्छिॽ सिराॽथाङे़रो॥ सावलरे़ दाउदे़न् नाहे़त्तुबा 6 दाउदरे़ पलिस्ति गोल्याते़न् से़रुआङ् नुःक्खे़र पत्छे़, हे़क्केःल्ले़ इस्राइलबा के़रे़क् पाङ्जुम्लाम् मे़न्छुमाहाॽ मे़लःन्दे़, हे़क्क्याङ् खे़ङ्हाॽरे़ तुःङ्गे नु खित्चिङ् खित्चिङ् के़लॽबा मुक्लाहाॽ मे़मुक्खुर साम्लोनु हे़क्क्याङ् लाःङ्नु सावल हाङ्ङिन् कुदुम्से़ मे़द्ये़॥ 7 मे़न्छुमाहाॽ मे़सःत्ते़आङ् अक्खेलॽरिक् साम्मे़लोरे़, “सावलरे़ हे़न्छिङ् हे़न्छिङ् से़रुसि, हे़क्क्याङ् दाउदरे़ग लाङे़न्छिङ् लाङे़न्छिङ् से़रुसि॥” 8 कन् पाःन्निल्ले़ कुनिङ्वाॽ तुगे़आङ् सावले़न् साॽरिक् कुसिक् पोगे़॥ खुने़ॽ पाःत्तु, “दाउदरे़ कुलागि खे़ङ्हाॽरे़ लाङे़न्छिङ् लाङे़न्छिङ् मे़निरुसि॥ आङ्गाॽ आलागिग हे़न्छिङ् हे़न्छिङ्लक् मे़निरुसि॥ आल्ल खुने़ॽ हाङ् चोःक्मारक् मे़गत्तुॽ॥” 9 खे़न् ये़न्नाङ्धो सावलरे़ दाउदे़न् साॽरिक् नाहे़प्मा हेःक्तु॥ 10 कुदाःन्दिक्मा निङ्वाॽफुमाङ्ङिल्ले़ पाङ्घु तासुबा फे़न्साम्मिल्ले़ सावले़न् ते़म्सु॥ खुने़ॽ हिम्मोए माङ्निङ्वाॽपान् पारे़र युङे़, कर दाउदे़न् तगिबा हे़क्केए सावलरे़ कुलागि मुक्ला मुङ्नु युङे़॥ सावलरे़ कुहुक्को लत्छा लाःक्थिक् कत्तुआङ् युङे़॥ 11 “दाउदे़न् लुङ्धाक्को खर्दिःङ् तिःक्खु फत्छुर ले़प्तुङ्” के़लॽबा निङ्वाॽ इःत्तुआङ् लाःक्किल्ले़ निले़ङ् ले़प्तु, कर दाउदे़न् निले़ङ्ङे इःम्सिङ्॥ 12 सावले़न् दाउदे़न्नु किमा हेःक्ते़, थेआङ्भे़ल्ले़ यहवे दाङ्बान् दाउदे़न्नु वये़, कर सावले़न् यहवे दाङ्बे़ल्ले़ ले़रुसुरुआङ् वये़॥ 13 खे़ल्ले़चोगुल्ले़ दाउदे़न् हे़न्छिङ् थक्सुबा तुरारे़न् थक्मोबा युक्तिङ् चोगुआङ् खुने़ॽलाम् माःङ्घा पाङ्घुदेसु॥ हे़क्क्याङ् दाउदरे़ हे़न्छिङ् थक्सुबा तुराहाॽ नुरिक्काङ् लाम्लोसुसि॥ 14 खुने़ॽ चोगुबा के़रे़क् याःम्बक्को कुलिङ्दो के़रे़, थेआङ्भे़ल्ले़ निङ्वाॽफुमाङ्ङिन् खुने़ॽनु वये़॥ 15 दाउदरे़ चोगुबा याःम्बक्हाॽ कुलिङ्दो के़रे़बा सावलरे़ निसुआङ् खुने़ॽ दाउदे़न्नु साॽरिक् किमा हेःक्ते़॥ 16 कर के़रे़क् इस्राइलिहाॽ नु यहुदाबाहाॽरे़ दाउदे़न् लुङ्माॽ मे़दुक्तु, थेआङ्भे़ल्ले़ खुने़ॽ थङ्ङो खे़ङ्हाॽरे़ खुनिॽ लाम्लोबा पोःक्खे़आङ् नुरिक्काङ् लाम्लोसुसिर वये़॥ दाउदरे़ सावलरे़ कुस्सा मे़न्छुमान् मेःक्खिम् मे़त्तु 17 सावलरे़ दाउदे़न् मे़त्तु, “आङ्गाॽ आस्सा तुम्मा मेराबे़न्नु खे़ने़ॽ ते़न्धाम् मेःक्खिम् मे़त्ने़, कर खे़ल्ले़ कुले़क्वा थुम्दे़ॽर आसे़वा याःम्बक् चोगे़ॽ, हे़क्क्याङ् यहवे दाङ्बाल्ले़ कुलागि थङ् थक्ते़ॽ॥” थेआङ्भे़ल्ले़ सावलरे़ आबाङे कुहुक्लाम् मेःन्, कर पलिस्तिहाॽरे़ खुनिॽ हुक्लाम्बा दाउदे़न् से़प्मा निङ्वाॽ चोगुआङ् वये़॥ 18 कर दाउदरे़ सावले़न् मे़त्तु, “इस्राइल सुवाङ्ओ आम्बा चुःक्सा वाॽ, आङ्गाॽ हाङ्ङिल्ले़ कुम्बाङ्लुमिॽ पोङ्मा मे़लाॽआन्॥” 19 खे़ल्ले़चोगुल्ले़ सावलरे़ कुस्सा मेराबे़न् दाउदे़न्नु मेःक्खिम् चोःक्मा पिमा ये़न् त्ये़, कर मेराबे़ल्ले़ कुमेःक्खिम्ग महोलाबा अद्रिएले़न्नु निॽ पोःक्खे़॥ 20 कर सावलरे़ वेॽ कुस्सा मे़न्छुमा मिकले़न् नु दाउदे़न् नानुॽने़सि के़लॽबा पाःन्निन् कुसिङ् मे़निःत्तुआङ् खे़ङ्हाॽरे़ सावले़न् मे़मे़त्तु॥ हे़क्केःल्ले़ सावले़न् साॽरिक् कुनिङ्वाॽ त्ये़॥ 21 हे़क्क्याङ् खुने़ॽ कुनिङ्वाॽओ अक्खे पाःत्तु, “खे़न्ने दाउदे़न्नु मेःक्खिम् चोगुङ् पिरुङ्ॽ, हे़क्क्याङ् दाउदे़न् सिर, खे़ब्याङ् पलिस्तिहाॽ खुने़ॽ कुदक्ले़ङ्वाओ मे़बोःक्ल॥” खे़ल्ले़चोगुल्ले़ सावलरे़ दाउदे़न् कुम्बाङ्लुमिॽ पोङ्मा वेॽ सुये़म् पिरु॥ 22 हे़क्क्याङ् सावलरे़ कुमनाहाॽ दाउदरे़ओ पेःक्माआङ् स्वाःत् अक्तङ्बा पान् मे़प्मा इङ्जाङ् पिरुसि, “हाङ्ङिन् खे़ने़ॽनु कुनिङ्वाॽ त्ये़आङ् वाॽ, खुने़ॽ के़रे़क् कुमनाहाॽरे़आङ् खुनिॽ सिराॽ के़म्धाङ्॥ आल्ल हारा हाङ्ङिल्ले़ कुम्बाङ्लुमिॽ पोःक्खे़ॽ॥” 23 खे़ङ्हाॽरे़ आम्भा कन् पाःन्निन् दाउदे़न् मे़मे़त्तु॥ कर दाउदरे़ मे़त्तुसि, “हाङ्ङिल्ले़ कुम्बाङ्लुमिॽ पोङ्मा उसुरु चोक् फाॽआङ् निङ्वाॽ के़इःत्तुम्बि? आङ्गाॽग थेआङ् के़होप्पा मनाआ, हाःत्ले़आङ् आङ्गाॽ कुसिङ् मे़न्निःतान्॥” 24 दाउदरे़ पाःत्तुबा कन् पाःन्हाॽ सावले़न् कुमनाहाॽरे़ खुने़ॽ मे़मे़त्तु॥ 25 हे़क्क्याङ् सावलरे़ याम्मो अक्खे मे़प्मा पाङ्घुसि, “निङ्मिहाॽरे़ खुनिॽ ले़क्वा हुङ्मारे़ लागि हाङ्ङिल्ले़ मे़न्छ्याःल्ले़ कुमे़ल्लुङ्ले़ लागि किप्थिक् पलिस्तिहाॽरे़ खुनिॽ चुत्चुॽजङ्हाॽरक् नाःक्तुआङ् वाॽ॥” सावलरे़ दाउदे़न् पलिस्तिहाॽरे़ खुनिॽ हुक्लाम् सिर के़लॽबा निङ्वाॽ इःत्तुआङ् वये़॥ 26 सावलरे़ पाःत्तुबा पाःन्निन् कुमनाहाॽरे़ दाउदे़न् मे़मे़त्तु॥ कन् पाःन्निल्ले़ हाङ्ङिल्ले़ कुस्साःन्नु मेःक्खिम् चोःक्मा दाउदे़न् ते़न्दे़॥ हाङ्ङिल्ले़ पाःत्तुबा ये़म्मिन् तामानुःल्ले़ तगि कुमनाहाॽ तेॽरुसिआङ् दाउदे़न् पे॥ 27 हे़क्क्याङ् दाउदे़न् नु कुमनाहाॽ मे़बेआङ् किप् ने़त्छि पलिस्तिहाॽ से़रुसि, हे़क्क्याङ् खे़ङ्हाॽरे़ खुनिॽ चुत्चुॽजङ्हाॽ मे़घक्तु, खे़ब्याङ् हाङ्ङिल्ले़ कुम्बाङ्लुमिॽ पोङ्ङार फाॽआङ् तेॽरुआङ् हाङ्ङिन् पिरु॥ खे़ल्ले़चोगुल्ले़ सावलरे़ कुस्सा मिकले़न् दाउदे़न्नु मेःक्खिम् चोगुबिरु॥ 28 यहवे दाङ्बान् दाउदे़न्नु वाॽरछ के़लॽबा सावलरे़ निङ्वाॽ खोसु, हे़क्क्याङ् मिकलरे़आङ् दाउदे़न् साॽरिक् नानुॽरुरे़त्छ फाॽआङ् कुसिङ्निःत्तु॥ 29 खे़ल्ले़चोगुल्ले़ सावले़न् दाउदे़न्नु छे़न्ना साॽरिक् किमा हेःक्ते़, हे़क्क्याङ् कुहिङ्हिङ् थारिक्के खुने़ॽ दाउदरे़ कुनिङ्मि पोःक्खे़॥ 30 पलिस्तिहाॽरे़ खुनिॽ थक्मोबाहाॽ थङ् चोःक्से़ मे़द्ये़र मे़वये़॥ अक्खेलॽरिक् खे़ङ्हाॽ थङ् चोःक्से़ मे़द्ये़ःल्ले़ सावलरे़ वेॽ कुधक्मोबाहाॽनुःल्ले़ दाउदरे़ यरिक् नाःन्दुसि॥ खे़ब्याङ् हे़क्के पोःक्खे़ल्ले़ खुने़ॽ कुमिङ् इङे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.