१ सामुए़ल 17 - लिम्बुगोल्यतरे़ इस्राइलिहाॽ कुनामे़न्छाॽ मे़त्तुसि 1 आल्ल पलिस्तिहाॽरे़ थङ् चोःक्मारे़ लागि खुनिॽ थक्सुबाहाॽ मे़सुप्सुसि, हे़क्क्याङ् खे़ङ्हाॽ यहुदाबा सोकोओ मे़जुप्से़॥ खे़ङ्हाॽरे़ सोको नु आजेका लुम्मोबा एपेस-दम्मिम ते़न्नो तुरायक् मे़जोगुआङ् मे़युङ्सिङ्॥ 2 सावले़न् नु इस्राइलिहाॽआङ् मे़जुप्से़आङ् एलाह ते़म्बेॽओ पलिस्तिहाॽनु थङ् चोःक्से़ तुरायक् मे़जोगुआङ् मे़युङ्सिङ्॥ 3 पलिस्तिहाॽ थिक् कोःक्माओ मे़युङ्सिङ् हे़क्क्याङ् इस्राइलिहाॽ वेॽ कोःक्माओ मे़युङ्सिङ्॥ खे़न् कोःक्माहाॽ लुम्मो ने़ने़बा ते़म्बेधिक ने़स्से़॥ 4 हे़क्क्याङ् गातबा गोल्यत मिङ् के़वाःप्पा के़धुम्बा थक्सुबाधिक् पलिस्ति तुराहिम्लाम् लःन्दे़ फे़रे़॥ खे़न् हुक्सिक् तुक्सिआङ् कुभ्रे़ःङ् यारिक् केःम्बा चोगे़॥ 5 खुने़ॽ कुधे़गेःक्को कासा तोपि खुःक्खुआङ् पत्छे़, हे़क्क्याङ् तुक्पोङ् किलो यारिक् के़लिःप्पा कासा से़ःप्चाङ् तेत् चाक्खुआङ् वये़॥ 6 खुने़ॽ कुलाङ्हाॽओ कासा से़ःप्चाङ् चाक्खुआङ् पत्छे़, हे़क्क्याङ् खे़ल्ले़ कुभे़जुम् कुभे़याहाॽओ कुभक्ताङ्ङोलाम् कुएःक्थाःक्मो कासा लाःक्थिक् ते़ल्ले़म् हेसुआङ् पत्छे़॥ 7 खुने़ॽ कत्तुबा लाःक्किल्ले़ कुलाःन् थाक् चिरिक् किप्मा सिङ्ग्याःप्पा वये़, हे़क्क्याङ् फे़न्जेॽ लाःक्किल्ले़ कुसम्मिन् किलो नुसि यारिक् योरे़, खे़म्ब्याङ् कुघो के़बङ्बे़न् खुने़ॽ कुदगि कुदगि लाङ्घेगे़र वये़॥ 8 गोल्यते़न् ये़म्सिङ्ङाङ् इस्राइलि थक्सुबाहाॽ अःक्ते़र अक्खे मे़त्तुसि, “खे़प्मो खे़निॽ थे के़जोगिबाबे? थङ् के़जोगिबाबि? आङ्गाॽ पलिस्तिआ॥ सावलरे़ कुयोःक्पासे! आङ्गाॽनु थङ् चोःक्से़ खे़निॽ लत्छा मनाधिक् सेगाम्मे़ॽ॥ 9 खे़ल्ले़ आङ्गाॽ नाःन्नाने़फग्र आनिगे पलिस्तिहाॽ खे़निॽ योःक्पा पोःक्खिगे़आङ् खे़निॽ से़वा चोःक्मा याःम्बक् चोगुम्बे़, कर आङ्गाॽ खे़न् नाःन्दुङ्ने़फग्र खे़निॽ आनिगे योःक्पा के़बोःक्खिआङ् आनिगे़न् से़वा याःम्बक् के़जोगुम्ल पोङ्॥” 10 हे़क्क्याङ् खे़न् पलिस्तिःल्ले़ पाःत्तु, “इस्राइलि थक्सुबाहाॽ आङ्गाॽ आलागि थेसिआङ् मेःन्, आङ्गाॽनु थङ् चोःक्से़ मनाधिक् पाङ्घाम्मे़ॽ!” 11 सावल नु के़रे़क् इस्राइलिहाॽरे़ कन् पाःन्निन् मे़घे़प्सुआङ् साॽरिक् मे़गिसे़ मे़यक्खे़॥ यिसैरे़ दाउदे़न् सावलरे़ कुदुरायक्को पाङ्घुबा 12 आल्ल दाउदे़न् इप्राति यिसै मे़प्मनाबा मनाःल्ले़ कुस्सा वये़॥ खुने़ॽग यहुदा लाजेॽबा बेथले़हे़म के़युङ्बा वये़॥ हे़क्क्याङ् खुने़ॽ ये़त्छि कुस्सा ये़म्बित्छा मे़वये़॥ खे़न् ये़म्मो यिसैःन् काप्पोबा नु कुसावेःत् मे़न्याक्मनाबा पोःक्खे़आङ् वये़॥ 13 यिसैरे़ कुस्सा तुम्बे़न्, सरुम्बे़न् नु हाङ्सरुम्बे़न् थङ्ङो सावले़न्नु मे़वये़॥ तुम्बे़न् एलिआब, सरुम्बे़न् अबिनादाब नु हाङ्सम्सरुम्बे़न् सम्मा मे़वये़॥ 14 दाउदे़न् के़रे़क्नुःल्ले़ पाःक्पा वये़॥ खुने़ॽनुःल्ले़ तुम्बा सुम्सि कुम्भुॽहाॽ सावले़न्नुए मे़वये़॥ 15 कर खे़न् ये़म्मो दाउदरे़ सावले़न् ले़रुआङ् कुम्बारे़ कुमे़ल्लुक् कम्से़ बेथले़हे़म नुःक्खे़ पे, फे़रे़र वये़॥ 16 खे़न् पलिस्ति गोल्यतरे़ थिक्याःन्धक् तानाम् नु युःन्छिक् लिबोङ् ये़न् थारिक् इस्राइलिहाॽ थङ् थक्मा साःत्तुसि॥ 17 थिक्ये़न् यिसैरे़ खुने़ॽ कुस्सा दाउदे़न् मे़त्तु, “कन् फुलक् ङासि साम्बेःत्ते़न् नु थिबोङ् कुले़प् खरे़ःङ्हाॽ तेॽरे़आङ् के़म्भुॽसिरे़ खुनिॽ तुरायक्को हारा पेगे़ॽ॥ 18 कन् खरे़ःङ्हाॽनु सोरिक् पित्नुखोःन्दिःन् हे़न्छिङ् थक्सुबाहाॽरे़ खुनिॽ थक्पेबान् तेॽरे़ पिरे़ॽ॥ हे़क्क्याङ् के़म्भुॽसि मे़नुॽमे़दार मे़वाॽबि मेःम्बि ओमत्ते़से़ॽ, खे़ब्याङ् खे़ङ्हाॽलाम् इङ्घङ् निःन्धो फे़त्ते़ॽआङ् फे़रे़ॽ॥ 19 खे़ङ्हाॽ सावल हे़क्क्याङ् के़रे़क् इस्राइलि मनाहाॽनु सोरिक् एलाहबा ते़म्बेॽओ पलिस्तिहाॽनु थङ् चोःक्नु मे़याक्॥” 20 हे़क्क्याङ् कुदाःन्दिक् तानाम्सा दाउदरे़ लत्छा मे़ल्लुक् के़गम्बाल्ले़ कुहुक्को मे़ल्लुक्हाॽ ले़रुधसि हे़क्क्याङ् कुजाहाॽ याङ्सिङ्ङाङ् कुम्बा यिसैरे़ मुरामे़त्तुबा याःम्बक्को थासिङ्॥ थक्सुबाहाॽ ते़ङ्धङ्गे़न् उवा चोःक्नु ते़म्बेॽओ मे़बेर मे़बत्छे़ल्ले़ तुरायक्को खे़न् के़रे़॥ 21 इस्राइलिहाॽ नु पलिस्तिहाॽ थङ् चोःक्मारे़ लागि थे़ःक्पे़त् मे़ये़म्सिङ्ङाङ् यारिप् मे़बोःक्खे़र मे़बत्छे़॥ 22 दाउदरे़ खुने़ॽ तेॽरुआङ् पेबा कुजाहाॽ चिगक्वा के़युङ्बाल्लो युक्खुधआङ् थे़ःक्पे़त् मे़ये़बे़बा ते़न्नो लोःक्ते़र पे हे़क्क्याङ् कुम्भुॽसि से़वा मे़त्तुसि॥ 23 दाउदे़न् कुम्भुॽसिनु ताॽजे़ङ्नु ये़बे़ल्ले़, गातबा पलिस्ति गोल्यते़न् तुराहिम्लाम् लःन्दे़आङ् तगिबा हे़क्के अःक्ते़॥ खे़ल्ले़ पाःत्तुबान् खे़न् दाउदरे़ खे़प्सु॥ 24 इस्राइलिहाॽरे़ खे़न् मनान् मे़निसुनुमे़ःन्ने साॽरिक् मे़गिसे़ हे़क्क्याङ् मे़घे़त्छिङ् मे़बे॥ 25 आल्ल खे़ङ्हाॽ अक्खेलॽरिक् मे़बारे़, “ओमे़त्ताम्मे़ॽ, खे़न् मनान् थिक्याःन्धक् लःन्नाङ् इस्राइलिहाॽ थङ् थक्मा साःत्तुसिॽ॥ खे़न् के़से़प्पा मनान् हाङ्ङिल्ले़ पयम् यम्बा थुम्घो पिरुॽ, हे़क्क्याङ् कुस्सा मे़न्छ्याःन्नु मेःक्खिम् मे़त्तुॽ, खे़म्ब्याङ् खे़ल्ले़ के़रे़क् कुहिम्सयङ्हाॽरे़ इस्राइलओ एःङ्याङ्ङाङ् हुङ्मा मे़बोङ्ने़न्॥” 26 दाउदरे़ खुने़ॽ कुबेसाङ् के़ये़प्पा मनाहाॽ सेःन्दोसुसि, “कन् पलिस्तिःन् के़से़प्पा नु अक्तङ्बा कुनामे़न्छाॽ पाःन्निन् इस्राइललाम्बा के़घे़प्पा के़देबा मनाःल्ले़ आक्तङ्बा थुम्घो खोसुबे? कुहिङ्वे़त् निङ्वाॽफुमाङ्ङिल्ले़ कुधक्सुबाहाॽ कुनामे़न्छाॽ के़मे़प्पा कन् हर्दो मे़ङ्हे़क्मनाबा पलिस्तिःन् हाःप्पे?” 27 खे़न् गोल्यते़न् के़से़प्पा मनाःल्ले़ आक्तङ्बा थुम्घो खोसुबे के़लॽबा पाःन्निन् खे़न् मनाहाॽरे़ दाउदे़न् याम्मोआङ् मे़मे़त्तु॥ 28 हे़क्केलॽरिक् दाउदे़न् मनाहाॽनु ताॽजे़ङ्नु ये़बे़बा खुने़ॽ कुम्भुॽ तुम्बा एलिआबे़ल्ले़ खे़प्सुआङ् साॽरिक् कुसिक् पोगे़॥ खे़ल्ले़ दाउदे़न् अक्खे मे़त्तुर सेःन्दोसु, “खे़ने़ॽ कप्मो थे चोःक्नु के़वाॽ? ताम्भुङ्ङो के़वाॽबा चबे़ःत्छिक् मे़ल्लुक्हाॽ आत्तिन्हाॽ ओमे़त् के़बाङ्घुसिआङ् कप्मो के़ये़? खे़ने़ॽ आङ्दिङ् के़लॽबा नु फे़न्निङ्वाॽ के़इःप्पाने़ फाॽआङ् आङ्गाॽ कुसिङ् निःत्ने़॥ खे़ने़ॽग कप्मो थङ् ओमत्छे़रक् के़द्ये़!” 29 दाउदरे़ मे़त्तु, “आल्लो आङ्गाॽ थे चोगुङ्ङाङ् वाॽबे? आङ्गाॽ पाःप्माङ् मे़नुॽने़न्बाबि?” 30 कुम्भुॽलाम् थिक्नाहाङ् पेआङ् खुने़ॽ याम्मो वेॽ मनाहाॽरो पे, हे़क्क्याङ् आम्भा खे़न् पाःन्निन् याम्मो सेःन्दोसुसि, हे़क्क्याङ् के़रे़क्ले़ बाखे़न् आन्देःम्बा पाःन्निन् नोगप् मे़बिरु॥ 31 दाउदरे़ पाःत्तुबा पाःन्हाॽ वेॽहाॽरे़ खुनिॽ ने़भाक्को चुक्ते़, हे़क्क्याङ् खे़न् पाःन्निन् सावलरे़ओ मे़गे़त्तु, खे़ब्याङ् खुने़ॽ दाउदे़न् उःत्तु॥ 32 हे़क्क्याङ् दाउदरे़ सावले़न् मे़त्तु, “खे़न् पलिस्तिःन् किप्मा के़घुबा वाॽ फाॽआङ् खे़न्नु हाःत्ताङ् मे़ङ्गिने़ल्ल॥ आङ्गाॽ पेःक्काआङ् खे़न् पलिस्तिःन्नु थङ् चोःक्का॥” 33 सावलरे़ खे़न् मे़त्तु, “खे़ने़ॽ के़बेःक्काङ् खे़न्नु थङ् चोःक्मा के़न्छुक्तुन्॥ खे़ने़ॽ हिन्जाॽ के़वाॽ, कर खे़ङ्ग कुहिङ्हिङ् थङ् चोःक्ल वाॽ॥” 34 कर दाउदरे़ सावले़न् मे़त्तु, “आङ्गाॽ आम्बारे़ कुमे़ल्लुक्हाॽ ओमे़त्तुङ्सिङ्ॽ॥ केबा इग्र माःक्युःन् ताआङ् मे़ल्लुक्लुप्लाम्बा मे़ल्लुक्साःत्थिक् तेॽरुल्ले़, 35 आङ्गाॽ खे़न् नाःत्तुङ् हे़क्क्याङ् हिप्तुङ्ङाङ् खे़ल्ले़ कुम्ब्राओलाम् मे़ल्लुक्किन् नाप्तुङ्॥ आङ्गाॽ ले़प्माङ् आहाॽसे़ हिसिङ्ङिल्ले़ सिङ्दाङ्बो ते़म्सुङ्ङाङ् चिधक् चिधक् थगुङ् से़रुङ्॥ 36 आदाङ्बारे़ के़से़वारोबाल्ले़ केबा नु माःक्यु ने़प्माङ् से़रुङ्सिङ्ङाङ् वाॽ॥ कन् हर्दो मे़न्हे़क्मनाबा पलिस्तिःन्नाङ् हाबा खे़न् सिगेबा माःक्युहाॽ हे़क्केए से़रुङ्, थेआङ्भे़ल्ले़ कुहिङ्वे़त् निङ्वाॽफुमाङ्ङिल्ले़ कुधक्सुबाहाॽ खे़ल्ले़ कुनामे़न्छाॽ मे़त्तुसिआङ् वाॽ॥ 37 सिगेबा नु माःक्यु हुक्लाम्बा के़दाङ्बा के़से़ःप्पा यहवे दाङ्बाल्ले़ कन् पलिस्तिःल्ले़ कुहुक्लाम्बाआङ् आङ्गाॽ से़ःप्पा॥” हे़क्क्याङ् सावलरे़ दाउदे़न् मे़त्तु, “हे़क्केने़फग्र पेगे़ॽ, यहवे दाङ्बे़न् खे़ने़ॽनु वाॽर॥” 38 खे़ब्याङ् सावलरे़ कुलगेःत्तिन् दाउदे़न् चाःक्तु॥ हे़क्क्याङ् खुने़ॽ थङ्ङो थक्से़ःप्मा से़ःप्चाङ्ङिन् चाक्तु, कुधे़गेःक्पो कासा ताङ्खुःक्के़न् खुःक्तु॥ 39 खे़ब्याङ् कुदाभेन् दाउदरे़ कुसे़ःप्चाङ् सम्दाङ् इभुत्तु पिरु॥ हे़क्क्याङ् दाउदे़न् ना नु कत्ना लाङ्घेगे़ साॽरुल्ले़ खुने़ॽ कुजुप् मे़द्ये़ने़न्, थेआङ्भे़ल्ले़ खुने़ॽ आप्फाल्ले़आङ् अक्तङ्बा मे़न्जाङ्ङे वये़॥ हे़क्क्याङ् दाउदरे़ सावले़न् मे़त्तु, “कन्हाॽ चाङ्माआङ् आङ्गाॽ लाङ्घेःक्मा मे़सुक्कान्, थेआङ्भे़ल्ले़ आङ्गाॽ आप्फाल्ले़आङ् मे़न्जाङ्ङे वाॽआ॥” खे़ल्ले़चोगुल्ले़ दाउदरे़ खे़ङ्हाॽ पे़ल्ले़क् वरे़क् फे़न्दुदेसु॥ 40 खे़न् एगाङ् दाउदरे़ आबाङे कुदक्काःत्तिन् याङ्सिङ्, हे़क्क्याङ् वहःङ्ङिल्ले़ कुयाओलाम् वरे़ङ्ले़ङ्बा लुङ् ङासि सेगुआङ् मे़ल्लुक्कम्से़ पेःक्किल्ले़ हेसुबा याःङ्घाओ याक्तु॥ हे़क्क्याङ् लुङ्ले़प्मा कुअर्दोन् याङ्सिङ्ङाङ् खे़न् पलिस्तिःन्नु थङ् चोःक्से़ थासिङ्॥ 41 खे़म्भे़ल्ले़ कुभे़जुम् कुभे़या के़बङ्बान् तगि लाम्लोसुआङ् खे़न् गोल्यते़न् दाउद ले़प्माङ् फे़रे़॥ 42 खे़ल्ले़ दाउदे़न् नुरिक् याबोॽरुर ओमत्तु, हे़क्क्याङ् कुनारा मराःक्क्याःप्पा नु नुबादाबा हिन्जाॽइन् निसुआङ् खे़न् चिःप्मा हेःक्तु॥ 43 खे़ल्ले़ दाउदे़न् अक्खे मे़त्तु, “आङ्गाॽ थे ख्याबा-कोःत्चो आबि? हे़क्क्याङ् आहिप्से़ तक्कात् के़भे़त्तुआङ् के़भे़रे़बाबि?” खे़ल्ले़ कुमाङ्ङिल्ले़ कुमिङ् लोःक्खुर दाउदे़न् माङ्दे साक्मुरा मे़प्मा हेःक्तु॥ 44 पलिस्ति गोल्यतरे़ दाउदे़न् मे़त्तु, “फे़रे़ॽ, आङ्गाॽ से़त्ने़आङ् के़ने़क्सान् ताङ्साक्पोबा पुहाॽ नु खाम्बेःक्मोबा थक्साहाॽ चाबाङ्घुङ्सिङ्॥” 45 दाउदरे़ गोल्यते़न् मे़त्तु, “खे़ने़ॽग आङ्गाॽनु थङ् चोःक्से़ ताभे, लाःक् हे़क्क्याङ् ये़न् के़भे़त्तुआङ् के़भे़रे़, कर आङ्गाॽग खे़ने़ॽ कुनामे़न्छाॽ के़मे़त्तुसिबा इस्राइलि थक्सुबाहाॽरे़ खुनिॽ निङ्वाॽफुमाङ् मुक्साम्दाङ्बा यहवे दाङ्बाल्ले़ कुमिङ्ङो खे़ने़ॽनु थङ् चोःक्से़ त्याङ्ङाङ् वाॽआ॥ 46 आइन्बा ये़न्नो यहवे दाङ्बाल्ले़ खे़ने़ॽ आहुक्को के़धासे़आङ् वाॽ, हे़क्क्याङ् आङ्गाॽ से़त्ने़आङ् के़धेगेःक्किन् खक्तुङ्ॽ॥ आइन्बा कन् ये़न्नो पलिस्तिहाॽरे़ खुनिॽ कुसिवे़त् थक्हाॽ ताङ्साङ्बोबा पुहाॽ नु खाम्बेःक्कोबा थक्साहाॽ चामा पिरुङ्सिङ्ॽ, हे़क्क्याङ् इस्राइलओ निङ्वाॽफुमाङ् वाॽरे़छ फाॽआङ् इक्सादिङ् खाम्बेःक्मो के़रे़क् पिसाङ्बा मनाहाॽरे़ कुसिङ् मे़निःत्तुरो॥ 47 कप्मो के़वाॽबा के़रे़क् मनाहाॽरे़ यहवे दाङ्बाल्ले़ कुमनाहाॽ से़ःप्मासि ताभे, लाःक्, तोङ् लि चाहाब् मे़जोःक्ने़न्लछ के़लॽबा कुसिङ् मे़निःत्तुॽ, थेआङ्भे़ल्ले़ थङ्ङिङ्ग यहवे दाङ्बाल्ले़न्नेरो, हे़क्क्याङ् खुने़ॽए खे़निॽ के़रे़क् पलिस्तिहाॽ आनिगे हुक्को थासु पिरिगे़॥” 48 खे़न् एगाङ् गोल्यते़न् दाउद वये़बा ले़प्माङ् थासिङ् फे़रे़, हे़क्क्याङ् दाउदे़न्नाङ् खिमो खे़न्नु थक्से़ लोःक्ते़बे॥ 49 खुने़ॽ कुसुक्वाओ कुहुक्के़न् केःत्तुआङ् लुङ्धिक् लःत्तु, हे़क्क्याङ् लुङ्ले़प्मा अर्दोओ याक्तुआङ् खे़न् गोल्यतरे़ कुद्वाबो ले़प्तु॥ हे़क्क्याङ् लुङ्ङिल्ले़ खे़ल्ले़ कुद्वाबे़न् पर्हङ् हङे़ खे़ब्याङ् खाम्बाङ्ङो खे़न् साम्बोन् हर्गुप् चोःन्दे़॥ 50 अक्खेलॽरिक् दाउदे़ल्ले़ अर्दो नु लुङ्ङिल्ले़ थङ् थक्मा नाःन्दु॥ खुने़ॽनु ताभे होःप्ते़साङ् खे़ल्ले़ गोल्यते़न् अर्दोःल्ले़ ले़प्तुआङ् सोःन्दु, हे़क्क्याङ् से़रुरो॥ 51 हे़क्क्याङ् दाउदे़न् लोःक्ते़र पेआङ् गोल्यते़न् चोःन्दे़बा ते़न्नो ये़म्सिङ्॥ हे़क्क्याङ् गोल्यतरे़ कुदाभेन् कुसुःप्पोलाम् तरप् फिःक्खुआङ् कुधे़गेःक्के़न् फुत्चिक् पुॽरे़र च्ये़प्तु॥ हे़क्केरिक् पलिस्तिहाॽरे़ खुनिॽ के़धुम्बा मनान् स्ये़बा मे़निसुआङ् खे़ङ्हाॽ मे़नुःक्खे़आङ् मे़घे़त्छिङ्॥ 52 इस्राइल हे़क्क्याङ् यहुदाबा मनाहाॽरे़ थङ् थक्मा मे़नाःन्दुबा इक्लानु गात हे़क्क्याङ् एक्रोन लाःप्मा लाम् थारिक्के खे़ङ्हाॽ पुबेलाप्सा मे़नाःत्तु मे़देॽरुसि॥ सारैम्माङ्धो गात नु एक्रोन पेःक्मालाम् कुले़ःम् खे़ङ्हाॽरे़ खुनिॽ कुसिवे़त् थक्हाॽ से़रे़आङ् ने़स्से़॥ 53 इस्राइलिहाॽरे़ खे़ङ्हाॽ मे़नाःत्तुसिआङ् मे़नुःक्खे़ल्ले़ पलिस्तिहाॽरे़ खुनिॽ तुराहिम्बा के़रे़क् चिगक्वाहाॽ मे़नाप्तु मे़देॽरु मे़बिरुसि॥ 54 दाउदरे़ गोल्यतरे़ कुधे़गेक्पान् पक्खुआङ् यरुसले़म तारु, कर खे़ल्ले़ कुभे़जुम् कुभे़याहाॽ आबाङे कुस्साःङ्गा हिम्मो ने़स्सु॥ दाउदे़न् सावलरे़ कुदगि मे़दारुबा 55 सावलरे़ दाउदे़न् खे़न् पलिस्तिःन्नु थक्से़ पेर पत्छे़बा निसुआङ् थक्मोबा अबनेरे़न् सावलरे़ सेःन्दोसु, “अबनेरे, खे़न् चुक्पे़न् हाःत्ले़ कुस्साबे?” अबनेररे़ मे़त्तुॽ, “आदाङ्बा हाङ्ङे, से़क्खा पाःत्तुङ् कन् मनान् कुसिङ् मे़निःत्तान्॥” 56 हाङ्ङिल्ले़ अबनेर थक्मोबान् मे़त्तु, “खे़न् चुक्पे़न् हाःत्ले़ कुस्साबे फाॽआङ् निङ्वाॽ निःन्धो चोगे़दारे़ॽ॥” 57 दाउदे़ल्ले़ खे़न् पलिस्तिःन् से़रुआङ् नुःक्खे़द्ये़, हे़क्क्याङ् अबनेररे़ खे़न् चुक्पे़न् तेॽरुआङ् सावलरे़ कुदगाङ् तोःन्दु॥ खे़न् पलिस्तिःल्ले़ कुधेगेःक्पे़न् दाउदरे़ पक्खुआङ् पत्छे़॥ 58 सावलरे़ खे़न् सेःन्दोसु, “चुक्पे खे़ने़ॽ हाःत्ले़ कुस्साने़बे?” दाउदरे़ मे़त्तु, “आङ्गाॽ आदाङ्बारे़ के़योक् बेथले़हे़मबा यिसैरे़ कुस्साआरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.