१ सामुए़ल 16 - लिम्बुदाउदे़न् हाङ् युक्तिङ् पोःक्खे़बा 1 यहवे दाङ्बाल्ले़ सामुए़ले़न् मे़त्तु, “आङ्गाॽ सावले़न् इस्राइलबा हाङ् पोङ्मा नाॽरुङ्बाल्ले़ चोगुल्ले़ खे़ने़ॽ आभे़ल्ले़ थारिक् खे़ल्ले़ कुलागि मे़रिङ् के़धक्पाबे? खे़ने़ॽ के़गत्तुबा सादाङ्ङिन् निःङ्गेॽइल्ले़ थिम्से़ॽ हे़क्क्याङ् थासिङे़ॽ॥ आङ्गाॽ बेथले़हे़मबा यिसैरे़ओ खे़ने़ॽ पाङ्ने़र पत्ता॥ थेआङ्भे़ल्ले़ आङ्गाॽ कुस्साधिक् हाङ् पोङ्मारे़ लागि सेगुङ्ङाङ् वाॽ॥” 2 कर सामुए़लरे़ मे़त्तु, “आक्खेलॽरिक् पेःक्मा सुक्काबे? कल्ले़ कुयाःम्बेओ सावलरे़ खे़प्सुआङ् आङ्गाॽ से़त्तागनु॥” यहवे दाङ्बाल्ले़ मे़त्तु, “पिप्माधिक् तेॽरे़आङ् अक्खे मे़त्ते़से़ॽ, ‘आङ्गाॽ यहवे दाङ्बाओ वयागे़न् सिदुङ्जभा तोःन्छे़ त्याङ्बारो॥’ 3 ले़त्ति तोःम्मादे़न्नो यिसैन्नाङ् उत्ते़ॽ, हे़क्क्याङ् खे़ने़ॽ थे चोःक्मा पोङ् के़रे़क् मे़त्ने़॥ खे़प्मो आङ्गाॽ ओसेःन्धाक्ने़बा मनान् हाङ् के़सेःन्दुर पोङ्लो॥” 4 यहवे दाङ्बाल्ले़ पाःत्तुबा हे़क्केए सामुए़लरे़ चोगु॥ खुने़ॽ बेथले़हे़म के़रे़ हे़क्क्याङ् खे़न् पाङ्जुम्बा साम्योसिक्साम्बाहाॽरे़ मे़दुमुआङ् खे़ङ्हाॽ किमे़ल्ले़ मे़यक्खे़॥ हे़क्क्याङ् खे़ङ्हाॽरे़ सेःन्मे़दोसु, “आदाङ्बे नुरिक् तारिक्काङ् के़धाङे़बि?” 5 सामुए़लरे़ मे़त्तुसि, “आङ्गाॽ नुरिक् तारिक् सनारुङ्ङाङ् त्याङ्, आङ्गाॽ यहवे दाङ्बाओ वयागे़न् सिदुङ्जभा तोःन्छे़ त्याङ्बा॥ खे़निॽ सुत्थो पोःक्खाम्मे़ॽआङ् आङ्गाॽनु वयागे़न् सिदुङ्जभा तोःन्छे़ त्ये़म्मे़ॽ॥” हे़क्क्याङ् सामुए़लरे़ यिसैःन् नु खे़ल्ले़ कुस्साहाॽ सुत्थो चोगुसिआङ् खे़ङ्हाॽ ले़त्ति तोःम्मादे़न्नो उःत्तुसि॥ 6 खे़ङ्हाॽ खे़प्मो मे़गे़रे़ हे़क्क्याङ् सामुए़लरे़ एलिआबे़न् निसुआङ् निङ्वाॽ इःत्तु, “से़क्खासाङ् यहवे दाङ्बाल्ले़ सेःन्दुबा हाङ्ङिन् कप्मो खुने़ॽ कुदगि ये़प्लछ॥” 7 कर यहवे दाङ्बाल्ले़ सामुए़ले़न् मे़त्तु, “नुबादाबा नु केःम्बा चोःक्साङ् खे़न् ओमे़मे़त्ते़न्ने़ॽ, थेआङ्भे़ल्ले़ आङ्गाॽ खे़न् नाॽरुङ्ङाङ् वाॽ॥ यहवे दाङ्बाल्ले़ मना हे़क्के ओमे़मे़त्तुसिन्॥ मनाहाॽरे़ नारा ओमे़मे़त्तुआङ् निङ्वाॽ मे़इःत्तु, कर यहवे दाङ्बाल्ले़ सिक्लुङ्मे़न् ओमे़त्तुआङ् याःम्बक् चोगु॥” 8 हे़क्केःल्ले़ यिसैरे़ अबिनादाबे़न् उःत्तु, हे़क्क्याङ् सामुए़लरे़ कुदगि लाङ्घेक् पाङ्घु॥ कर सामुए़लरे़ पाःत्तु, “मेःन्, कन्नाङ् यहवे दाङ्बाल्ले़ सेगुबा मनान् मेःन्॥” 9 खे़न् एगाङ् यिसैरे़ सम्माःन् सामुए़लरे़ कुबेसाङ् तारु॥ कर सामुए़लरे़ पाःत्तु, “यहवे दाङ्बाल्ले़ सेगुबा मनान् कन्नाङ् मेःन्॥” 10 अक्खेलॽरिक्के यिसैरे़ नुसि कुस्साहाॽ सामुए़लरे़ कुदगि तारुसि, कर खुने़ॽ पाःत्तु, “यहवे दाङ्बाल्ले़ कन्हाॽओ आत्तिन्नाङ् सेगुसिबा होप्॥” 11 हे़क्क्याङ् सामुए़लरे़ सेःन्दोसु, “खे़ने़ॽ के़स्साहाॽ कम्भरक्पि?” यिसैरे़ मे़त्तु, “आल्लसाङ् फोःक्वाबाधिक् वाॽ, कर खे़ङ्ग मे़ल्लुक् कत्छे़ पेआङ् वाॽ॥” सामुए़लरे़ यिसैन् मे़त्तु, “खे़न् उःत्ते़ॽ॥ खुने़ॽ मे़न्दाए थारिक् आनिॽ आन्युङ्ने़न्॥” 12 खे़ल्ले़चोगुल्ले़ यिसैरे़ खे़न् फोःक्वाबे़न् कुलासे़ पाङ्घुसि॥ खे़न् कुनारा मराःक्याःप्पा, कुमिक् चाःत्चाःत् के़लॽबा हे़क्क्याङ् साॽरिक् नुःब्सुक्पा वये़॥ यहवे दाङ्बाल्ले़ सामुए़ले़न् मे़त्तु, “आङ्गाॽ सेःन्दुङ्बा मनान् कन्नेरो, हाङ् सेःन्दे़ॽ॥” 13 हे़क्क्याङ् सामुए़लरे़ निःङ्गेॽ के़याक्पा सादाङ्ङिन् पक्खुआङ् कुम्भुॽहाॽरे़ खुन्छिॽ तगि हाङ् सेःन्दु, खे़न् ये़न्नाङ्धो यहवे दाङ्बाल्ले़ कुयाम्साम्मिन् मुक्साम्नु दाउदरे़ओ त्ये़॥ हे़क्क्याङ् सामुए़ले़न् रामा ले़प्माङ् पे॥ दाउदे़न् सावलरे़ कुहाङ्हिम्मो 14 आल्ल यहवे दाङ्बाल्ले़ कुयाम्साम्मिल्ले़ सावले़न् ले़रु, हे़क्क्याङ् यहवे दाङ्बाल्ले़ पाङ्घु युसुबा फे़न्साम्मिल्ले़ सावले़न् ते़म्सुआङ् तुक्खे चाःत्तु॥ 15 सावलरे़ कुसे़वारोबाहाॽरे़ खुने़ॽ मे़मे़त्तु, “आदाङ्बे ओमे़त्ते़ॽ, निङ्वाॽफुमाङ्लाम् के़दाबा लत्छा फे़न्साम्मिल्ले़ तुक्खे के़जाःत्ल वाॽ॥ 16 खे़ल्ले़चोगुल्ले़, आदाङ्बारे़ आनिगे मुरा ओमे़त्ते़ॽ, हे़क्क्याङ् नुरिक् मुक्ला मुङ्मा के़ले़बा मनाधिक् कोःत्तुम् तारुम्बे़॥ फे़न्साम्मिन् खे़ने़ॽओ ताइल्ले़ खे़ल्ले़ मुक्ला मुक्खु हे़क्क्याङ् आदाङ्बा के़वेःत्लो॥” 17 खे़ल्ले़चोगुल्ले़ सावलरे़ कुसे़वारोबाहाॽ मे़त्तुसि, “नुरिक् मुक्ला के़मुङ्बा मनाधिक् कोःत्ताम्मे़ॽआङ् आङ्गाॽओ ताराम्मे़ॽ॥” 18 खुने़ॽ कुसे़वारोबाधिक्ले़ मे़त्तु, “बेथले़हे़म के़युङ्बा यिसैरे़ कुस्साधिक्ले़ नुरिक् मुक्ला मुक्खुबा आङ्गाॽ निसुङ्ङाङ् वाॽ॥ खे़न् मे़ङ्गिए थङ् थक्मा के़धुम्बा मना चोक्॥ खुने़ॽ पान् पाःप्मा सिक्कुम्साबा नु ओमे़प्माल्ले़ साॽरिक् कुघे़म्सिङ्मा के़याक्पा नुबा मना वाॽ॥ हे़क्क्याङ् यहवे दाङ्बान् खे़न्नु वाॽ॥” 19 खे़ल्ले़चोगुल्ले़ सावलरे़ इङ्घङ् के़साबा मनाहाॽ यिसैरे़ओ अक्खे मे़त्तुसिआङ् पाङ्घुसि, “के़मे़ल्लुक् के़गम्बा के़स्सा दाउदे़न् आङ्गाॽओ पाङ्घे़ॽ॥” 20 खे़ल्ले़चोगुल्ले़ यिसैरे़ सेहोॽ सुक्वाधिक् कुधिम् चे़ल्ले़क्सेॽ सेजःङ्वा, मे़ःन्दाज्याःक् थिक् हे़क्क्याङ् खरे़ःङ् के़गुबा अदङ् थिक्नु कुस्सा दाउदे़न् सावलरे़ओ पाङ्घुदेसु॥ 21 हे़क्क्याङ् दाउदे़न् सावलरे़ॽओ के़रे़आङ् कुसे़वा चोःक्मा हेःक्तु॥ सावलरे़ खे़न् साॽरिक् कुसिराॽ थाङ्मा हेःक्ते़, हे़क्क्याङ् खुने़ॽ कुभे़जुम् कुभे़या के़बङ्बा कुसे़वारोबा पोःक्खे़॥ 22 हे़क्क्याङ् सावलरे़ यिसैन् इङ्घङ् हाक्तु, “दाउदे़न् आसे़वा याःम्बक् चोःक्से़ याःक्ल, थेआङ्भे़ल्ले़ आङ्गाॽ कुयाःम्बक्किन् साॽरिक् नुबा निसुङ्॥” 23 आभे़ल्ले़साङ् निङ्वाॽफुमाङ्ङिल्ले़ तुक्खे चाःत्छे़ पाङ्घुबा फे़न्साम्मिन् सावलरे़ओ त्ये़ःल्ले़, दाउदरे़ कुमुक्लाःन् याङ्सिङ्ङाङ् मुक्खु पिरु, हे़क्क्याङ् खिदोए सावले़न् वेःत्ते़॥ हे़क्क्याङ् खे़न् तुक्खे के़जाःप्पा फे़न्साम्मिल्ले़ खुने़ॽ ले़रुआङ् पेःक्खे़प्पा वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.