१ सामुए़ल 15 - लिम्बुअमाले़किहाॽनु थङ् पोःक्खे़बा 1 सामुए़लरे़ सावले़न् मे़त्तु, “यहवे दाङ्बाल्ले़ खे़ने़ॽ इस्राइलि कुमनाहाॽओ हाङ् युक्तिङ् चोःक्मारे़ लागि पाङ्घुबा मनान् आङ्गाॽएरो॥ खे़ल्ले़चोगुल्ले़ यहवे दाङ्बाल्ले़ कुइङ्घङ्ङिन् सिङ्सिङ् ये़क्ये़क्काङ् खे़प्से़ॽओ॥ 2 मुक्साम्दाङ्बा यहवे दाङ्बाल्ले़ अक्खे पाःत्तु, ‘आङ्गाॽ अमाले़किहाॽ खुम्दिङ् पिरुङ्सिङ्ॽ, थेआङ्भे़ल्ले़ इस्राइलिहाॽ मिस्र लाजेॽलाम् मे़लःन्दे़ मे़धाङे़ल्ले़ अमाले़किहाॽरे़ थङ् चोःक्मा फाॽआङ् मे़भत्तुसिआङ् वाॽ॥’ 3 आल्ल अमाले़किहाॽनु थङ् चोःक्से़ पेगे़ॽ॥ खे़ङ्हाॽरे़ मे़गत्तुबा के़रे़क् चिगक्वा सामाहाॽ थेधिक्काङ् मे़ल्ले़त्ते के़रे़क् खाप्पुथ्यःङ् चोगे़ॽ॥ खे़ङ्हाॽरे़ खुनिॽ ये़म्बित्छा, मे़न्छुमा, अङे़ःक्वाहाॽ हे़क्क्याङ् नुगे़धुङ्बा अङे़ःक्वा साहाॽ, कुम्बाबा पित्, मे़ःन्दा मे़ल्लुक्, उमे नु अदङ्हाॽ के़रे़क् मे़क्खे़से़ॽ॥” 4 खे़ल्ले़चोगुल्ले़ सावलरे़ के़रे़क् थक्सुबाहाॽ तेलेम मे़प्मनाबा ते़न्नो सुप्सुसि॥ खे़प्मो इस्राइलबा लाङे़न्छिङ् ने़त्छि खाम्बाङ्ङो के़धक्पा थक्सुबाहाॽ हे़क्क्याङ् यहुदाबा हे़न्छिङ् थिबोङ् मनाहाॽ मे़वये़॥ 5 सावल नु कुमनाहाॽ अमाले़किहाॽरे़ खुनिॽ पाङ्जुम्मो मे़बे, हे़क्क्याङ् खे़प्मोबा च्वाःत् के़होप्पा वहःङ्ङिल्ले़ कुयाओ खे़ङ्हाॽ मे़सुगुसिर मे़युङे़॥ 6 खे़म्ब्याङ् खुने़ॽ केनिहाॽ मे़त्तुसि, “खे़निॽ अमाले़किहाॽरे़ओलाम् लःन्दे़म्मे़ॽआङ् पेगाम्मे़ॽ, हे़क्के के़जोगुम्ने़भाग्र अमाले़किहाॽ से़रुङ्सिङ्ङिल्ले़ खे़निॽ के़न्छ्ये़ॽइन्, थेआङ्भे़ल्ले़ के़रे़क् इस्राइलिहाॽ मिस्रलाम् मे़लःन्दे़ मे़धाङे़ल्ले़ खे़निॽ खे़ङ्हाॽ लुङ्माॽ तुक्मा याःम्बक् ओसेःन् के़धाक्तुम्सिम्॥” कन् पाःन्हाॽ मे़घे़प्सुआङ् खे़ङ्हाॽ अमाले़किहाॽलाम् मे़लःन्दे़ मे़बे॥ 7 हे़क्क्याङ् हाबिलालाम् मिस्रबा नाम्गे़न् इःन्दोओ के़ने़बा सुर थारिक्के सावलरे़ अमाले़किहाॽनु थङ् चोःक्नु नाःन्दु तेॽरुसि॥ 8 खुने़ॽ अमाले़किहाॽरे़ खुनिॽ हाङ् अगागे़न् कुहिङ्वे़त् ते़म्सु, हे़क्क्याङ् अगाग हाङ्ङिल्ले़ के़रे़क् कुमनाहाॽ ताभेःल्ले़ से़रुसि॥ 9 कर सावल नु कुमनाहाॽरे़ अगागे़न् नु नुःब्नुबा मे़ल्लुक् हे़क्क्याङ् कुम्बाबा कुम्मामा पित्, वरुप्लुप्पा पित्सात्, नु मे़ल्लुक्साःत् खे़ब्याङ् चाहाब् के़जोःक्पा के़रे़क् चिगक्वा सामाहाॽ हाबा मे़से़ःप्तु मे़गत्तुसि॥ कर याःम्बक् मे़म्बिमनाबा नु कुमे़ल्लुङ् के़होःप्पाहाॽग खाप्पुथ्यःङ् मे़जोगु॥ सावले़न् हाङ्याःम्बक् चोःक्मालाम् मे़नाॽरु 10 हे़क्क्याङ् यहवे दाङ्बाल्ले़ सामुए़ले़न् अक्खे मे़त्तु, 11 “आङ्गाॽ सावले़न् हाङ् चोगुङ्बाओ साॽरिक् आनिङ्वाॽ तुगे़आङ् वाॽ, थेआङ्भे़ल्ले़ खुने़ॽ आङ्गाॽलाम् नुःक्खे़बेआङ् वाॽ, हे़क्क्याङ् खे़ल्ले़ आङ्गाॽ आइङ्जाङ्ङिन्नाङ् इःप्मा नाःप्मा ते़न्दिङ् मे़जोगुन्लो॥” कन् पाःन्निल्ले़ चोगुल्ले़ सामुए़लरे़ कुनिङ्वाॽ पङे़, हे़क्क्याङ् से़न्दिक् नाम्दाःत्तात् यहवे दाङ्बान् पेलि फाक्तु॥ 12 हे़क्क्याङ् सामुए़ले़न् तानाम्सा पोगे़आङ् सावलरे़ कुदुम्से़ पे, कर खुने़ॽ मे़मे़त्तु, “सावले़ङ्ग कर्मेल पेआङ् याक्॥ खे़प्मो खुने़ॽ कुनिङ्वाॽसोरे़ लागि इःत्लुङ्धिक् लेःत्तुआङ् युङ्, हे़क्क्याङ् यो गिलगाल नुःक्खे़ ये़ चुरे़आङ् वाॽ॥” 13 हे़क्क्याङ् सामुए़ले़न् सावल वये़बा ते़न्नो कुदुम्से़ के़रे़, हे़क्क्याङ् सावलरे़ सामुए़ले़न् मे़त्तु, “यहवे दाङ्बाल्ले़ कुमुॽइसाम्मिन् आदाङ्बानु वाॽररो॥ आङ्गाॽ यहवे दाङ्बाल्ले़ कुइङ्जाङ् हे़क्के याःम्बक् चोगुङ्ङाङ् वाॽरो॥” 14 कर सामुए़लरे़ मे़त्तु, “आङ्गाॽ आन्भाक्को मे़ल्लुक् फे़ःक्ते़बा खे़प्सुङ्बाङ्ग थेबे? पित्हाॽ मे़माःङ्बे़न् आन्भाक्को खे़प्सुङ्बाङ्ग थेबे?” 15 सावलरे़ मे़त्तु, “थक्सुबाहाॽरे़ खे़ङ्हाॽ अमाले़किहाॽलाम् मे़दारुसिबारो॥ खे़ङ्हाॽरे़ नुःब्नुबा मे़ल्लुक् नु कुम्बाबा कुम्मामा पित्हाॽ यहवे दाङ्बा के़निङ्वाॽफुमाङ्ङो ले़त्ति तोःन्छे़ मे़नन्छुसिबारो॥ कर आनिगे वेॽ के़नम्बाहाॽ के़रे़क् से़रुम्सिम्बे़॥” 16 कर सामुए़लरे़ सावले़न् मे़त्तु, “मे़बारे़न्ने़ॽ, याःक्तु! मिःप्मा से़न्दिक् यहवे दाङ्बाल्ले़ मे़त्ताङ्बा पाःन्निन्लक् खे़प्से़ॽ॥” सावलरे़ सेःन्दोसु, “आक्तङ्बा पाःन्बे? मे़त्ताङ्ङे़ॽ॥” 17 हे़क्क्याङ् सामुए़लरे़ मे़त्तु, “खे़ने़ॽ आबाङे चुःक्साआ फाॽआङ् निङ्वाॽ के़इःत्तुसाङ् खे़ने़ॽग इस्राइलि सुवाङ्बा लाम्लोबा के़न्वये़न्बि? हे़क्क्याङ् यहवे दाङ्बाल्ले़ इस्राइल लाजेॽओ हाङ् के़सेगे़बा मेःम्बि? 18 हे़क्क्याङ् खुने़ॽ ‘पेगे़ॽ, हे़क्क्याङ् लायो के़जोःक्पा अमाले़किहाॽ के़रे़क् से़रे़से़ॽ॥ खे़ङ्हाॽ के़रे़क् मे़म्मे़ङ्सिङ्ङे थारिक् खे़ङ्हाॽरे़ खुनिॽ तक्ले़ङ्वाओ थङ् चोगे़ॽ’ फाॽआङ् के़बाङ्घे़॥ 19 थेआङ् खे़ने़ॽ यहवे दाङ्बाल्ले़ कुइङ्जाङ्ङिन् हे़क्के याःम्बक् के़न्जोगुन्? थेआङ् मे़नाप्तु मे़दारुसिबा चिगक्वाहाॽ के़दाःक्तुआङ् यहवे दाङ्बाल्ले़ कुसिराॽ मे़न्धाङ्मनाबा याःम्बक् के़जोगुबाबे?” 20 सावलरे़ सामुए़ले़न् मे़त्तु, “कर आङ्गाॽग यहवे दाङ्बाल्ले़ कुइङ्जाङ्ङिन् इःत्तुङ् नाःत्तुङ्॥ यहवे दाङ्बाल्ले़ पेगे़ॽआङ् चोगे़ॽ मे़त्ताङ्बा याःम्बक्किन् चोगुङ्॥ हे़क्क्याङ् अमाले़कि हाङ्ङिन् ते़म्सुङ् तारुङ्ङाङ् वाॽ॥ खे़ङ्हाॽओ वेॽहाॽग खक्पे़त् मे़क्खुङ्सिङ्॥ 21 थक्सुबाहाॽरे़ मे़नाप्तु मे़दारुसिबा पाःन्हाॽ नुःब्नुबा मे़ल्लुक् नु कुम्बाबा कुम्मामा पित्हाॽ हे़क्क्याङ् के़रे़क्नुःल्ले़ नुःब्नुबा चिगक्वाहाॽ यहवे दाङ्बा के़निङ्वाॽफुमाङ्ङो वयागे़न् सिदुङ्जभा तोःन्छे़ गिलगालओ मे़युक्खुसिआङ् वाॽ॥” 22 कर सामुए़लरे़ मे़त्तु, “वयागे़न् सिदुङ्जभानुःल्ले़ यहवे दाङ्बाल्ले़ कुइङ्जाङ्ङिन् इःप्मा नाःप्माओए खुने़ॽ मे़सःत्ने़म्बि? वयागे़न् सिदुङ्जभानुःल्ले़ इङ्जाङ् इःप्मा नाःप्मा नुबारो॥ हे़क्क्याङ् कुबाःन्जाःक् इःप्मा नाःप्मान् मे़ल्लुक् सोःत्ते़नुःल्ले़ नुबारो॥ 23 खुने़ॽ कुइङ्जाङ् इःप्मा नाःप्मा मे़न्दे़म्माग कित्चाक् चोःक्मा हे़क्तङ्बा लायोरो, हे़क्क्याङ् आङ्दिङ् लॽमाग लुङ् नावाइत्ला से़वा मे़प्नाबान्नुःल्ले़आङ् ताप्फे़ःम्बारो॥ थेआङ्भे़ल्ले़ खे़ने़ॽ यहवे दाङ्बाल्ले़ कुबाःन्जाःक्लाम् माःङ्घा के़बोःक्खे़, खे़ल्ले़चोगुल्ले़ यहवे दाङ्बाल्ले़आङ् खे़ने़ॽ हाङ् पोङ्मालाम् के़ले़रे़आङ् वाॽरो॥” 24 सावलरे़ सामुए़ले़न् मे़त्तु, “आङ्गाॽ लायो चोगुङ्॥ यहवे दाङ्बाल्ले़ कुइङ्जाङ्ङिन् नु खे़ने़ॽ के़बाःन्निन् खे़म्मा ते़न्दिङ् मे़न्जोःक्पान्॥ आङ्गाॽ आमनाहाॽनु किसाङ्, हे़क्क्याङ् खे़ङ्हाॽरे़ थे चोःक्मा मे़गोःत्तु हाबा खे़न्ने चोगुङ्॥ 25 आल्ल आङ्गाॽ पेलि चोःक्का, आङ्गाॽ आलायोन् ले़प्मि चोगे़ आबिरे़ॽ, आङ्गाॽनु फे़रे़ॽ, हे़क्केःल्ले़ आङ्गाॽ यहवे दाङ्बान् कुदगि माङ्से़वा मे़प्मा सुक्तुङ्ल॥” 26 कर सामुए़लरे़ मे़त्तु, “आङ्गाॽ खे़ने़ॽनु मे़बेःक्कान्॥ खे़ने़ॽ यहवे दाङ्बाल्ले़ कुबाःन्जाःन् इःप्मा नाःप्मा ते़न्दिङ् के़न्जोगुन्, हे़क्क्याङ् यहवे दाङ्बाल्ले़ खे़ने़ॽ इस्राइल लाजेॽओ हाङ् पोङ्मालाम् के़ले़रे़ के़देसे़आङ् वाॽ॥” 27 सामुए़ले़न् पेःक्मा फाॽआङ् हिसिङ्ल पत्छे़, कर सावलरे़ कुदेःत् फे़राओ ते़म्सु, हे़क्केःल्ले़ खे़न् तेत् फे़राःन् ते़रे़ॽ ते़ःक्खे़॥ 28 हे़क्क्याङ् सामुए़लरे़ मे़त्तु, “यहवे दाङ्बाल्ले़ आइन् इस्राइल हाङ्जुम्मिन् खे़ने़ॽलाम् खे़ःक्खुआङ् के़बेसाङ्बा हाङ्ङिन् पिरुआङ् वाॽ, खे़न्निङ्ग खे़ने़ॽनुःल्ले़ नुबा चोक्॥ 29 यहवे दाङ्बाङ्ग इस्राइलबा हाङ्वा माङ्वा मिमिदिङ्लो, खुने़ॽ इङ्ले़क् मे़बाःत्ने़न्, थेआङ्भे़ल्ले़ खुने़ॽ मना मेःन् हे़क्क्याङ् कुनिङ्वाॽआङ् मे़ले़क्खुन्॥” 30 सावलरे़ नोगप् पिरु, “आङ्गाॽ लायो चोगुङ्॥ कर इस्राइलि आमनाहाॽरे़ खुनिॽ लाम्लोबा नु इस्राइल लाजेॽ तगि थिक्ले़ङ्लक् मिङ्सो इङ्धाङ्साबा आजोगे़ॽ, आङ्गाॽनु फे़रे़ॽ, हे़क्केःल्ले़ आङ्गाॽ के़निङ्वाॽफुमाङ् यहवे दाङ्बान् माङ्से़वा मे़प्मा सुक्तुङ्ल॥” 31 खे़ल्ले़चोगुल्ले़ सामुए़ले़न् सावले़न्नु सोरिक् पे, हे़क्क्याङ् सावलरे़ यहवे दाङ्बान् माङ्से़वा मे़त्तु॥ 32 हे़क्क्याङ् सामुए़लरे़ मे़त्तु, “अमाले़किहाॽरे़ खुनिॽ हाङ् अगागे़न् आङ्गाॽओ फे़त्ते़ॽ॥ अगागे़न् मे़ङ्गिए से़क्खासाङ् आङ्गाॽ मे़सिआन् हिङ्ङा” के़लॽबा निङ्वाॽ इःत्तुर खुने़ॽओ फे़रे़॥ 33 कर सामुए़लरे़ अक्खे पाःत्तु, “खे़ने़ॽ के़दाभेःल्ले़ मना के़से़रुसिआङ् मे़न्छुमाहाॽ सा मेःन्ने मे़बोःक्खे़बा हे़क्के आङ्गाॽ खे़ने़ॽ से़त्ने़आङ् के़म्मा सा मेःन्ने पोङ्लो॥” हे़क्क्याङ् सामुए़लरे़ अमाले़कि हाङ् अगागे़न् यहवे दाङ्बाल्ले़ कुदगि गिलगालओ से़रुरो॥ 34 हे़क्क्याङ् सामुए़ले़न् रामा कुबाङ्भेॽ पे, कर सावले़न् गिबाबा खुने़ॽ आबाङे कुहिम्मो पे॥ 35 सामुए़ले़न् कुसिमा ये़न् थारिक्साङ् सावलरे़ कुदुम्से़ आभे़ल्ले़आङ् मे़बेने़न्, कर सामुए़ले़न् सावलरे़ कुलागि मे़रिङ् थक्ते़आङ् वये़॥ यहवे दाङ्बाल्ले़ सावले़न् इस्राइलओ हाङ् चोगुबाओ खुने़ॽ कुनिङ्वाॽ तुगे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.