१ सामुए़ल 14 - लिम्बुजोनाथानरे़ मे़ङ्गिए याःम्बक् चोगुबा 1 थिक्ये़न् सावलरे़ कुस्सा जोनाथानरे़ खुने़ॽ कुभे़जुम् कुभे़या के़बङ्बा थाङ्बे़न्निन् मे़त्तु, “फे़रे़ॽ आन्छिॽ खे़न् कोःक्माल्ले़ नाहाङ् ले़प्माङ्बा पलिस्तिहाॽरे़ खुनिॽ तुराहिम् ले़प्माङ् पित्छि॥” कर खे़ल्ले़ कन् पाःन्निन् कुम्बा मे़म्मे़त्ते वये़॥ 2 खे़न् ये़म्मो सावलरे़ गिबा कुबेसाङ् मिग्रोन् मे़प्मनाबा ते़न्नो फुॽले़सेॽ सिङ्सेल्ले़ कुसिगाङ् तुराहिम् लेःत्तुआङ् युङे़॥ खुने़ॽनु के़प्मे़ङ्गे़त् किप् तुक्सि यारिक् मनाहाॽ मे़वये़॥ 3 खे़ङ्हाॽरे़ खुनिॽ लुम्मो निङ्वाॽफुसाम्बे़ल्ले़ चाङ्मनाबा एपोद चाङ् के़जाङ्बा अहियाहन् वये़॥ अहियाहःङ्ग इक्काबोदरे़ कुन्साॽ अहितुबरे़ कुस्सा वये़॥ इक्काबोद नु अहितुबे़ङ्ग सिलोओ यहवे दाङ्बे़ल्ले़ कुसे़वा के़जोःक्पा निङ्वाॽफुसाम्बा एलिरे़ कुम्मे़न्छाॽ हे़क्क्याङ् पिनहासरे़ कुस्सा वये़सि॥ जोनाथाने़न् पेबा हाःत्ले़आङ् निङ्वाॽ मे़ङ्घोसुन्॥ 4 जोनाथानरे़ पलिस्ति तुराहिम् पेःक्मा कोःत्तुबा मिकमासबा चिभिःप्फिःप्पा लाम्मिल्ले़ ने़प्माङ् पिसाङ् याक्केःक् फुङ्गेःक् पत्छे़॥ थिक् ले़प्माङ्बान् बोसेस नु वेॽ ले़प्माङ्बान् सेनेह मे़मे़त्तु॥ 5 थाङ्गे़त् ले़प्माङ्बा याक्केःक्किन् मिक्मासरे़ कुदगि नु लाङ्गे़त् ले़प्साङ्बान् गिबारे़ कुदगि पत्छे़॥ 6 जोनाथानरे़ कुभे़जा कुभे़युम् के़बङ्बे़न् मे़त्तु, “फे़रे़ॽ, आन्छिॽ खे़न् हर्दो मे़न्हे़क्मनाबाहाॽरे़ खुनिॽ तुराहिम्मिन् ओमे़त्छे़ पित्छि॥ आनिॽ यरिक् आवाॽसाङ् सुःल्लिक् आवाॽसाङ् आनिॽ से़ःप्मारे़ लागि यहवे दाङ्बे़न् वाॽ, खुने़ॽ आत्तिन्हाॽरे़आङ् नाःम्मा मे़न्छुक्तुन्॥” 7 खुने़ॽ कुभे़जा के़भे़युम् के़बङ्बे़ल्ले़ मे़त्तु, “आदाङ्बारे़ थे चोःक्मा के़सिराॽधाङ्, चोगे़ॽ॥ लाम्लोरे़ॽ आदाङ्बारे़ थे के़जोगुसाङ् आङ्गाॽ आनिङ्वाॽलाम्बाए फाॽने़॥” 8 जोनाथानरे़ मे़त्तु, “फे़रे़ॽ, आन्छिॽ नाहाङ्दाङ् नाःङ्सुआङ् पित्छि हे़क्क्याङ् खे़ङ्हाॽरे़ आम्निसिर॥ 9 खे़ङ्हाॽरे़ ‘आनिगे खे़न्छिॽओ मे़ङ्गे़त्ते थारिक् खे़न्छिॽ हाबा खे़प्मो ये़बे़से़ॽ’ आम्मे़त्छिने़फग्र आन्छिॽ आये़प्सिबा ते़न्नोए ये़प्सि खे़ङ्हाॽरे़ओ पित्छि मेःन्॥ 10 कर खे़ङ्हाॽरे़ ‘कत्थो थाङे़से़ॽ’ मे़लॽने फग्र आन्छिॽ खात्थो पित्छि, थेआङ्भे़ल्ले़ यहवे दाङ्बाल्ले़ खे़ङ्हाॽ आन्छिॽहुक्को थासु आबिरे़छि के़लॽबा आन्छिॽ लागि इबु पोङ्लो॥” 11 खे़ल्ले़चोगुल्ले़ खे़ङ्हाॽ पलिस्तिहाॽरे़ओ निधाःम्ने़सि॥ हे़क्क्याङ् पलिस्तिहाॽ अक्खेलॽरिक् मे़बारे़, “ओमे़त्ताम्मे़ॽ, हिब्रुहाॽग खुनिॽ मे़जिङ्सिङ्बा हङ्गारिङ्बाहाॽलाम् मे़लःन्ल मे़बत्लो॥” 12 पलिस्ति कम्ब्राङ्बा तुराहिम् थक्सुबाहाॽरे़ जोनाथाने़न् नु कुभे़जुम् कुभे़या के़गुबान् मे़मे़त्तुसि, “कत्थो थाङे़से़ॽ, हे़क्क्याङ् आनिगे निसाम् हुॽआसिगे़॥” हे़क्केःल्ले़ जोनाथानरे़ कुभे़जुम् कुभे़या के़गुबे़न् मे़त्तु, “आङ्गाॽ आएगाङ् थाङे़ॽ॥ यहवे दाङ्बाल्ले़ खे़ङ्हाॽ आनिॽ इस्राइलि हुक्को थासुसिआङ् वाॽ॥” 13 हे़क्क्याङ् जोनाथानरे़ कुलाङ् कुहुक्ले़ तोॽरुआङ् उःङ्सिङ्ल थो थोःक्सिङ्, हे़क्क्याङ् खुने़ॽ कुभे़जुम् कुभे़या के़बङ्बे़न्नाङ् कुएगाङ् कुएगाङ् थासिङ्॥ जोनाथानरे़ खे़न् पलिस्तिहाॽ हिप्तुसिआङ् हर्गुप् सोःन्दुसि, खे़ब्याङ् खुने़ॽ कुभे़जुम् कुभे़या के़बङ्बे़ल्ले़ खे़ङ्हाॽ स्ये़रुसि॥ 14 कन् थिक्सिगेक्पा थङ्ङो कुगाप् थिक् पित्ले़ थिक्ये़न् तोःङ्मे़ल्ले़ के़जुःप्पादे़न्नो जोनाथान नु कुभे़जुम् कुभे़या के़बङ्बे़ल्ले़ निबोङ् पलिस्ति थक्सुबाहाॽ से़रे़छुसि॥ 15 हे़क्क्याङ् तुराहिम् थक्ते़न्नो के़वाॽबा थक्सुबाहाॽ यङ्मा मे़स्ये़॥ खे़ब्याङ् तुराहिम्मो नु चिगक्वा कुजा के़नाप्पा लुप्पो के़वाॽबा मनाहाॽ के़रे़क् पगि मे़गिसे़॥ इक्सादिङ् खाम्बेःक्किन्ने यक्खे़आङ् यम्बा किमा यङ्मा पोःक्खे़॥ पलिस्तिहाॽ हारिमे़द्ये़बा 16 बिन्यामिन ते़ङ्गप्पोबा गिबाओ सावलरे़ कुइक् के़गोबा मनाहाॽरे़ पलिस्ति थक्सुबाहाॽ फुत्चिङ्ज्याःङ् मे़बोःक्खे़आङ् ना नु कत्ना मे़लोःक्ते़आङ् मे़वये़बा मे़निसुसि॥ 17 हे़क्क्याङ् सावलरे़ खुने़ॽनु के़वाॽबा कुमनाहाॽ मे़त्तुसि, “थक्सुबाहाॽ हाःत्हात् मे़वाॽ हाःत्हात् मे़होप् निरे़म्सिम्मे़ॽ॥” खे़ङ्हाॽरे़ मे़निरुसिल्ले़ जोनाथान नु कुभे़जा कुभे़युम् के़गुबे़न् खे़प्मो होःप्ते़सि॥ 18 हे़क्क्याङ् सावलरे़ अहियाह निङ्वाॽफुसाम्बे़न् मे़त्तु, “निङ्वाॽफुमाङ्ङिल्ले़ कुसन्दोःक्किन् कप्मो फे़त्ते़ॽ॥” (खे़न् ये़म्मो निङ्वाॽफुमाङ्ङिल्ले़ कुसन्दोःक्किन् इस्राइलिहाॽनु वये़॥) 19 सावले़न् निङ्वाॽफुसाम्बे़न्नु पारे़र पत्छे़, ना पलिस्तिहाॽरे़ खुनिॽ तुराहिम्मो साॽरिक् साॽरिक् हयङ् किल्लिङ् पोःक्खे़र पे, हे़क्क्याङ् खुने़ॽ निङ्वाॽफुसाम्बे़न् मे़त्तु, “खे़ने़ॽ के़हुक्किन् लःत्ते़ॽ॥” 20 हे़क्क्याङ् सावलनु के़वाॽबा के़रे़क् मनाहाॽ खुने़ॽनु मे़जुप्से़आङ् थङ् थक्मादे़न् ले़प्साङ् मे़धासिङ्, खे़प्मो पलिस्ति थक्सुबाहाॽ फुत्चिङ्ज्याःङ् मे़बोःक्खे़आङ् आबाङे मे़ज्ये़प्सिङ् मे़धक्सिङ्ल मे़यागे़बा खे़ङ्हाॽरे़ मे़निसुसि॥ 21 खे़न् ये़म्मो पलिस्तिहाॽरे़ खुनिॽ तुराहिम्मो के़बेःक्पा इस्राइलिहाॽ पलिस्तिहाॽ मे़ले़रुसिआङ् सावल हे़क्क्याङ् जोनाथाने़न्नु के़वाॽबा इस्राइलिहाॽनु मे़भे़रे़॥ 22 एफ्राइमबा कोःक्मा फाङ्जङ् थे़गु माङ्वा लाजेॽ के़घे़त्छिङ्बाआङ् के़जिङ्सिङ्बा इस्राइलिहाॽरे़ पलिस्तिहाॽ मे़घे़त्छिङ् के़लॽबा इङ्घङ् मे़घे़प्सु, हे़क्केःल्ले़ खे़ङ्हाॽआङ् इस्राइलि थक्सुबाहाॽनु मे़दङ्सिङ्ङाङ् पलिस्तिहाॽ मे़नाःत्तुसि॥ 23 खे़न् ये़न्नो, यहवे दाङ्बे़ल्ले़ इस्राइलिहाॽ थङ्लाम् से़ःप्तुसि, हे़क्क्याङ् बेथ-आवन नाधाःम्बि थारिक् थङ् पोःक्खे़र पेरो॥ थङ् पोःक्खे़आङ् एगाङ्बा हिन्दोक्हाॽ 24 खे़ल्ले़ याःन्दिक् इस्राइलबा मनाहाॽ ये़त्तुक्खे मे़दुमे़आङ् साॽरिक् मे़नासे़आङ् मे़वये़, थेआङ्भे़ल्ले़ सावलरे़ “निङ्मिहाॽ मे़म्मे़ङ्सिङ्ङे थारिक् युःन्छिक् पोङ्मा तगि कुजा के़जाबा हाःत्छाङ् माङ्दे साक्मुरा तुम्ल” लॽरिक् माङ्हे़क् चोक् पाङ्घुसिआङ् वये़॥ 25 के़रे़क् इस्राइलि थक्सुबाहाॽ ताम्भुङ्ङो मे़लासे़, हे़क्क्याङ् खे़प्मोबा खाम्बाङ्ङो खे़ङ्हाॽरे़ यरिक् सक्वाघु मे़निसु॥ 26 अक्खेलॽरिक् खे़ङ्हाॽरे़ यरिक् सक्वाघुन् होरे़र पत्छे़बा मे़निसुसाङ् साक्मुरा मे़दुम्ल के़लॽबा माक्हे़क्किल्ले़ चोगुल्ले़ हाःत्ले़आङ् सक्वाघुन् मे़न्छुसुन्॥ 27 कर सावलरे़ कुमनाहाॽनु माङ्हे़क् चोगुबा पाःन्निन् कुस्सा जोनाथानरे़ खे़म्मै मे़ङ्घे़म्मे वये़, खे़ल्ले़चोगुल्ले़ कुहुक्कोबा तक्कातिल्ले़ सक्वाले़क्किन् चिरक् लक्तु॥ हे़क्क्याङ् कुघुन् लागुआङ् च, हे़क्क्याङ् खुने़ॽ कुसक्मा के़रे़ खे़ब्याङ् चाङ्जाङ् लॽरे़आङ् के़धुम्बा पोःक्खे़॥ 28 हे़क्क्याङ् थक्सुबाथिक्ले़ जोनाथाने़न् मे़त्तु, “खे़ने़ॽ के़म्बारे़ अक्खे चोःक्मा मे़नुॽने़न् पाःत्तुआङ् वाॽ॥ खुने़ॽ अक्खे पाःत्तुआङ् वाॽ, ‘आइन्बा ये़न्नो कुजा के़जाबा मनान् साक्मुरा माङ्दे तुम्ल॥’ खे़ल्ले़चोगुल्ले़साॽ मनाहाॽ साक्किल्ले़ यक्खुसिआङ् मे़वाॽ॥” 29 जोनाथानरे़ खे़न्निन् मे़त्तु, “आम्बारे़ अक्तङ्बा याःम्बक् चोगुआङ् लाजेॽरे़ लागि नुबा मे़बोःक्खे़न्॥ ओमे़त्ते़ॽ, आङ्गाॽ आजे़ःत्छिक् सक्वाघुन् साॽरुङ्ङाङ्लक् वयाङ् आक्खे़न् चाःत्चाःप्पा पोःक्खाङ्ङाङ् वाॽआ॥ 30 निङ्मिहाॽलाम् नाप्मनासिबा कुजाहाॽ आइन् मनाहाॽरे़ चामा मे़घोसुल्ले़ग छे़न्ना आक्खे़न् नुबा पोःक्खे़बामे़न्॥ हे़क्क्याङ् पलिस्तिहाॽ आल्लसाङ् यरिक् से़प्मा मे़सुक्तुसिबामे़न्॥” 31 खे़न् ये़न्नो इस्राइलिहाॽरे़ पलिस्तिहाॽ मिक्मासलाम्बानु आयालोन थारिक् मे़नाःत्तुसिर मे़से़रुसि॥ हे़क्क्याङ् खे़न् इस्राइलिहाॽ साक्किल्ले़ खुन्छिॽ थना ले़क्खे़आङ् वये़॥ 32 खे़ङ्हाॽ सामाहाॽ नाप्मासि ले़प्माङ् मे़लासे़, हे़क्क्याङ् मे़ल्लुक् पित्हाॽ मे़दे़म्सुसि, हे़क्क्याङ् खाम्बाङ्ङोए मे़से़रुसिआङ् माक्खिॽनुसोरि सा मे़ज॥ 33 “मनाहाॽरे़ माक्खिॽ सोरि सा मे़जआङ् यहवे दाङ्बाल्ले़ कुदक्ले़ङ्वाओ लायो मे़जोगुर मे़याक्” के़लॽबा पाःन्निन् आत्तिल्ले़इ सावलले़न् मे़त्तु॥ सावलरे़ मे़त्तुसि, “खे़निॽ नसाःन्निन् आबाङे के़ले़क्खुम्॥ लत्छा यम्बा लुङ्धिक् हारा कप्मो ताराम्मे़ॽ॥” 34 खुने़ॽ याम्मो मे़त्तुसि, “मनाहाॽरे़ खुनिॽ लुम्मो पेगाम्मे़ॽआङ् खे़ङ्हाॽ मे़त्ताम्सिम्मे़ॽ, ‘आबाङे खे़निॽ मे़ल्लुक् नु पित्हाॽ कप्मो ताराम्सिम्मे़ॽ हे़क्क्याङ् से़रे़म्सिम्मे़ॽआङ् च्ये़म्मे़ॽ॥ अक्खेलॽरिक् खे़निॽ माक्खिॽ सोरिबा सा के़जाम्माङ् निङ्वाॽफुमाङ्ङिल्ले़ कुदक्ले़ङ्वाओ लायो मे़जोगे़म्मिन्ने़ॽ?’” खे़ल्ले़चोगुल्ले़ खे़न् से़न्दिक् के़रे़क्ले़ खुनिॽ पित्हाॽ खे़प्मो मे़दारुसि, हे़क्क्याङ् खे़ङ्हाॽ खे़प्मोए मे़से़रुसि॥ 35 खे़म्ब्याङ् सावलरे़ यहवे दाङ्बाल्ले़ कुलागि लत्छा ले़त्ति तोःम्मादे़न् चोगु॥ खे़ङ्ग यहवे दाङ्बाल्ले़ कुलागि सावलरे़ चोगुबा के़रे़क्नुःल्ले़ तगिबा ले़त्ति तोःम्मादे़न् वये़॥ 36 हे़क्क्याङ् सावलरे़ मे़त्तुसि, “आनिॽ यो पलिस्तिहाॽरे़ओ से़न्दिक् थङ् चोःक्से़ पेगि, हे़क्क्याङ् खामे़न्ओःत्ते थारिक् खे़ङ्हाॽ नाःत्तुम्सिम्॥ खे़ङ्हाॽरे़ खुनिॽ मनाधिक्काङ् ले़प्मासिमे़ःन्, कर के़रे़क् से़प्मासि॥” कुमनाहाॽरे़ मे़मे़त्तु, “खे़ने़ॽ थे चोःक्मा के़सिराॽधाङ् चोगे़ॽ॥” कर निङ्वाॽफुसाम्बाल्ले़ पाःत्तु, “तगि निङ्वाॽफुमाङ्ङिन् आनिॽ सुजा नाःक्तुम्॥” 37 हे़क्केःल्ले़ सावलरे़ यहवे दाङ्बे़न् सेःन्लाप्तु, “आङ्गाॽ पलिस्तिहाॽ नाःत्तुङ्सिङ्बि? आदाङ्बारे़ खे़ङ्हाॽ इस्राइलिहाॽरे़ खुनिॽ हुक्को के़धासुसिबि?” कर खे़न् ये़म्मो यहवे दाङ्बे़ल्ले़ सावले़न् नोगप् मे़बिरुन्लो॥ 38 खे़ल्ले़चोगुल्ले़ सावलरे़ मे़त्तुसि, “आइन् थे लायो पोःक्खे़आङ् वाॽ खे़न् निङ्वाॽ खोसुम्॥ 39 इस्राइले़न् ताङ्गे़से़ःप्पा यहवे दाङ्बे़न् से़क्खाए कुहिङ्वे़त् चोःक्पा कुइसिक्, खुने़ॽ कुमिङ्ङो माङ्हे़क्सिङाआङ् पाःत्तुङ्लो, आङ्गाॽ आस्सा जोनाथानरे़ए लायो चोगुसाङ् खे़न्निन् सिरो॥” कर खे़प्मो के़वाॽबा आतिन्हाॽरे़आङ् थेआङ् खुने़ॽ मे़म्मे़तुन्॥ 40 हे़क्क्याङ् सावलरे़ के़रे़क् इस्राइलिहाॽ मे़त्तुसि, “खे़निॽ के़रे़क् थिक्ले़प्माङ् युङे़म्मे़ॽ, हे़क्क्याङ् आङ्गाॽ नु आस्सा जोनाथाने़न् वेॽ ले़प्माङ् युङ्सिगे़॥” इस्राइलिहाॽरे़ मे़मे़त्तु, “आदाङ्बारे़ थेःन् नुबा फाॽआङ् के़इःत्तु खे़न्ने चोगे़ॽओ॥” 41 खे़ब्याङ् सावलरे़ यहवे दाङ्बा इस्राइलबा निङ्वाॽफुमाङ्ङो अक्खेलॽरिक् पेलिगे़न् तुवा चोगु, “आइन् आदाङ्बारे़ आङ्गाॽ के़से़वारोबान् थेआङ् नोगप् के़म्बिराङ्ङिन्? कन् लायोन् आङ्गाॽ इग्र आस्सा जोनाथानलाम्बा वाॽने़फग्र, यहवे दाङ्बा इस्राइलबा निङ्वाॽफुमाङ्ङे, तॽयाःन्सोन् मे़गे़सुल्ले़ खे़ल्ले़ कुलक्को ‘उरिम’ थाररो॥ कन् लायोन् आदाङ्बारे़ के़मना इस्राइलिलाम्बा पोःक्खे़बाने़फग्र खे़ल्ले़ कुलक्को ‘तुम्मिम’ थाररो॥” जोनाथान नु सावले़न् तॽयाःन्सोःन्निल्ले़ एॽए से़न्दुसि, हे़क्क्याङ् इस्राइलिहाॽ मे़दाङे़॥ 42 हे़क्क्याङ् सावलरे़ मे़त्तुसि, “आङ्गाॽ नु आस्सा जोनाथानरे़ कुमिङ्ओ सिङ्जेःक् से़क्खाम्मे़ॽ॥” हे़क्क्याङ् जोनाथाने़न् मे़सेगु॥ 43 खे़म्ब्याङ् सावलरे़ जोनाथाने़न् मे़त्तु, “खे़ने़ॽ थे के़जोगुआङ् वाॽ? आङ्गाॽ मे़त्ताङ्ङे़ॽ॥” खे़ल्ले़चोगुल्ले़ जोनाथानरे़ पाःत्तु, “आङ्गाॽ आदक्काःत्तिल्ले़ कुसम्मिल्ले़ सक्वाघुन् लक्तुङ्ङाङ् चुबे़त्छिक् चाङ्ङाङ् वये़॥ थे आल्ल आङ्गाॽ सिमा पोङ्बाबि?” 44 सावलरे़ मे़त्तु, “जोनाथाने, खे़ने़ॽ के़सिर पोङ्, कन् लायोल्ले़ कुले़क्वा सिमा खुम्दिङ् के़ङ्घोसुन्ने फग्र यहवे दाङ्बाल्ले़ आङ्गाॽ से़त्तार॥” 45 कर इस्राइलिहाॽरे़ सावले़न् मे़मे़त्तु, “थे जोनाथाने़न् सिबाबि? आम्भा खुने़ॽए थङ्ङो निङ्मिहाॽ नाःन्दुसिआङ् इस्राइलिहाॽ से़ःप्तुसिबा मेःम्बि? अक्तङ्बा मे़बोङ्ने़ल्ल॥ यहवे दाङ्बे़न् से़क्खाए कुहिङ्वे़त् वाॽबा कुइसिक् आनिगे पाःत्तुम्बे़, जोनाथाने़ल्ले़ कुधे़गेक् इधिक्काङ् खाम्बाङ्ङो लुःक्मा थामा मे़घोने़न्, थेआङ्भे़ल्ले़ खे़ल्ले़ यहवे दाङ्बाल्ले़ कुभाॽलाम् कम्भ्यारिक् यम्बा याःम्बक् चोगुआङ् वाॽ॥” अक्खेलॽरिक् खे़न् इस्राइलिहाॽरे़ जोनाथाने़न् मे़से़ःप्तु हे़क्क्याङ् खुने़ॽ सिमा मे़बोःक्खे़न्॥ 46 हे़क्क्याङ् सावलरे़ पलिस्तिहाॽ नाःप्मा ले़रुसि, हे़क्क्याङ् खुन्छिॽ आबाङे लाजेॽओ मे़नुःक्खे़ मे़बेरो॥ सावलरे़ कुयुक् नु कुहिम्सयङ् 47 सावले़न् इस्राइलबा हाङ् पोःक्खे़आङ् खुने़ॽ कुघिरिबा के़रे़क् कुनिङ्मिहाॽनु के़रे़क् पिसाङ् थङ् थक्ते़॥ खुने़ॽ मोआब, अम्मोन, एदोमबा मनाहाॽ, सोबाबा हाङ्हाॽ हे़क्क्याङ् पलिस्तिहाॽनु थङ् चोगे़॥ खुने़ॽ आत्तो आत्तो थङ् चोःक्से़ पे, खे़ॽयो के़युङ्बाहाॽ खुने़ॽ नाःन्दुसि॥ 48 खुने़ॽ मे़ङ्गिए थङ् थक्ते़, हे़क्क्याङ् अमाले़किहाॽ नाःन्दुसि॥ हे़क्क्याङ् चिगक्वा के़नाप्पाहाॽरे़ खुनिॽ हुक्लाम् इस्राइलिहाॽ ताङ्से़ःप्तुसि॥ 49 सावलरे़ कुस्सा ये़म्बित्छाहाॽ जोनाथान, यिस्बि नु मल्किसुअ मे़वये़॥ खुने़ॽ कुस्सा मे़न्छुमा तुम्मे़ल्ले़ कुमिङ् मे़राब नु फोःक्वामाल्ले़ कुमिङ् मिकल वये़॥ 50 खुने़ॽ कुमेःत्तिन् अहिमासरे़ कुस्सा अहिनोम वये़॥ हे़क्क्याङ् खुने़ॽ कुधक्पे़बान् खुने़ॽ कुम्भङा नेररे़ कुस्सा अबनेरे़न् वये़॥ 51 सावलरे़ कुम्बा किससे़न् नु अबनेररे़ कुम्बा नेरे़न् अबिए़लरे़ कुस्सा वये़सि॥ 52 सावलरे़ कुहिङ्हिङ् थारिक्के पलिस्तिहाॽनु पयम् यम्बा थङ् पोःक्खे़आङ् पत्छे़॥ खुने़ॽ तुमुसिबा के़धुम्बा नु मे़ङ्गिमनाबा मनाहाॽ सावलरे़ खुने़ॽ कुयाःम्बक्को हारावरा युक्तिङ् चोगुदेसुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.