१ सामुए़ल 13 - लिम्बुपलिस्तिहाॽनु ते़न्धङ् पोःक्खे़बा 1 सावले़न् हाङ् पोःक्खे़ल्ले़ सुम्बोङ् तङ्बेॽ योरे़आङ् वये़॥ हे़क्क्याङ् खुने़ॽ इस्राइलओ लिबोङ्ङाङ् तङ्बेॽ ने़त्छि थारिक् हाङ् चोगु॥ 2 सावलरे़ हे़न्छिङ् सुम्सि इस्राइलबा मनाहाॽ सेगुसि—मिकमास नु बेथेलबा कोःक्मा फाङ्जङ् थे़गु माङ्वा लाजेॽओ खुने़ॽनु हे़न्छिङ् ने़त्छि मे़वये़, हे़क्क्याङ् बेन्यामिन्बा गिबाओ जोनाथाने़न्नु हे़न्छिङ्धिक् मे़वये़॥ के़नम्बा कुभाॽ मनाहाॽग खुनिॽ हिम्मो पाङ्घुदेसुसि॥ 3 जोनाथाने़ल्ले़ गिबाओ के़ने़बा पलिस्ति थक्सुबाहाॽ थङ् चोःक्से़ फत्तुसि, हे़क्क्याङ् पलिस्तिहाॽरे़ खे़न् पाःन्निन् मे़घे़प्सु॥ हे़क्क्याङ् सावलरे़ लाजेॽओबा के़रे़क् पिसाङ् के़युङ्बा “हिब्रुहाॽरे़ मे़घे़प्सुर” फाॽआङ् थुत्तुरिःप्पान् मुप्पाङ्घुसि॥ 4 खे़ल्ले़चोगुल्ले़ “सावले़न् पलिस्तिहाॽनु थङ् चोःक्मा हेःक्ते़रे़छ, हे़क्क्याङ् आल्ल पलिस्तिहाॽरे़ इस्राइलिहाॽ मे़जिःत्तुसि के़लॽबा इङ्घङ्ङिन् के़रे़क् इस्राइलिहाॽरे़ मे़घे़प्सु॥” आम्भा कन् थुत्तुरिःप्पालाम् मे़घे़प्सुबा इङ्घङ्ङिल्ले़ चोगुल्ले़ खे़ङ्हाॽ गिलगालबा सावलरे़ओ मे़जुप्से़ मे़द्ये़॥ 5 पलिस्तिहाॽ इस्राइलिहाॽनु थङ् चोःक्से़ मे़जुप्से़॥ खे़ङ्हाॽनु हे़न्छिङ् सुम्बोङ् अन्लाधा नु अन्लाधा के़लोङ्बा हे़न्छिङ् तुक्सि मे़वये़॥ हे़क्क्याङ् वरःङ्ङिल्ले़ कुयाओबा ये़ःङ्घा कुइसिक् आत्तातान्ने यरिक् निःप्मा सुक्मे़न्दे़त्ते खाम्मो के़धक्पा तिल्लिङ्गाहाॽ मे़वये़॥ खे़ङ्हाॽ बेथहावनबा नाम्गे़त् पिसाङ् मिकमासओ थो मे़बेआङ् मे़युङ्सिङ्॥ 6 इस्राइलिहाॽ साॽरिक् के़जाॽबा तुक्खेओ मे़ध्ये़, थेआङ्भे़ल्ले़ खे़ङ्हाॽ मे़भत्तु मे़भे़त्तुसि॥ खे़ल्ले़चोगुल्ले़ खे़ङ्हाॽ फुक्कुओ, याःन्सुङ् सिगाङ्, याक्पेॽफिःप्मो, हे़क्क्याङ् लुम्बाःत्हाॽओ नु वबाक्हाॽओ मे़जिङ्सिङ्॥ 7 कुभा इस्राइलिहाॽ यर्दन यङ्घङ्ङिन् मे़गाःक्तुआङ् गाद नु गिलाद लाजेॽबा थुम्हाॽओ चिङ्सिङ्से़ मे़घे़त्छिङ् मे़बे॥ कर सावले़न् गिल्गालओए युङे़ याःक्ते़ हे़क्क्याङ् खुने़ॽनु के़वाॽबा के़रे़क् मनाहाॽ किमा यङ्मा मे़हेःक्ते़॥ 8 सामुए़लरे़ पाःत्तुबा कुइसिक् सावलरे़ नुसि ये़न् थारिक् हाङ्घुआङ् युङे़, कर सामुए़ले़न् गिलगाल के़प्मा मे़सुक्ते़न्॥ हे़क्केःल्ले़ सावलरे़ कुमनाहाॽ खे़त्छिङ्मा मे़हेःक्ते़॥ 9 खे़ल्ले़चोगुल्ले़ सावलरे़ मे़त्तुसि, “मिधिङ्मनादेमनाबा सिदुङ्जभा नु सनारुङ् सिदुङ्जभारे़ थक्साहाॽ ताराम्से़ॽ” हे़क्क्याङ् खुने़ॽए मिधिङ्मनादेमनाबा सिदुङ्जभा तोःन्दु॥ 10 खुने़ॽ खा सिदुङ्जभा तोःन्दुसुरुर पत्छे़ल्ले़ सामुए़ले़न् के़रे़द्ये़, हे़क्क्याङ् सावले़न् खुने़ॽ कुलाङ्दाःक्से़ पे॥ 11 सामुए़लरे़ मे़त्तु, “खे़ने़ॽ कन् थे के़जोगुबाबे?” सावलरे़ नोगप् पिरु, “मनाहाॽरे़ आङ्गाॽ मे़ले़राङ्ङाङ् मे़घे़त्छिङ्ल मे़बत्छे़बा निसुङ्सिङ्, हे़क्क्याङ् के़बाःत्तुबा ये़म्मो आदाङ्बाआङ् के़ङ्गे़रे़न्, खे़म्ब्याङ् पलिस्तहाॽआङ् मिकमासओ मे़जुप्से़र मे़बत्छे़॥ 12 आल्ल पलिस्तिहाॽ आदक्ले़ङ्वाओ थङ् चोःक्से़ गिलगालओ मे़दा के़लॽबा आङ्गाॽ निङ्वाॽ इःत्तुङ्॥ हे़क्क्याङ् यहवे दाङ्बान्नाङ् फाॽराङ्ङे़ॽ फाॽआङ् पेलि फाक्तुङ्बा होप्॥ खे़ल्ले़चोगुल्ले़ कन् मिधिङ्मनादेमनाबा सिदुङ्जभान् आङ्गाॽ आबाङे चोःक्माए के़बोङ्बा निङ्वाॽ खोसुङ्॥” 13 सामुए़लरे़ सावले़न् मे़त्तु, “खे़ने़ॽ अदङ् याःम्बक् के़जोगु॥ यहवे दाङ्बा के़निङ्वाॽफुमाङ्ङिल्ले़ के़बिरे़बा इङ्जाङ्ङिन् इःप्मा नाःप्मा ते़न्दिङ् के़न्जोगुन्॥ खे़न् इङ्जाङ्ङिन् इःप्मा नाःप्मा ते़न्दिङ् के़जोगुल्ले़ग इस्राइल लाजेॽओ के़हाङ्जुम्मिन् सदादिङ्ले़ लागि पोःक्खे़बामे़न्॥ 14 कर आल्ल खे़ने़ॽ के़हाङ्जुम्मिन् सदादिङ्ले़ लागि मे़बोङ्ने़म्बा पोःक्खे़॥ यहवे दाङ्बाल्ले़ आबाङे कुसिराॽ के़धाङ्बा नु खुने़ॽ कुनिङ्वाॽ इसिःक् याःम्बक् के़जोःक्पा मनाधिक् कोःत्तुआङ् वाॽ॥ हाबा खे़न्ने खुने़ॽ कुमनाहाॽओ लाम्लोबा पोङ्मारे़ लागि युक्तिङ् चोगुआङ् वाॽ, थेआङ्भे़ल्ले़ खे़ने़ॽ यहवे दाङ्बाल्ले़ कुइङ्जाङ्ङिन् के़न्इःत्तुन् के़न्नाःत्तुन्॥” 15 हे़क्क्याङ् गिलगाल ते़न्निन् ले़रुआङ् बेन्यामिन्बा गिबा ले़प्साङ् थासिङ्॥ हे़क्क्याङ् सावलरे़ खुने़ॽनु के़वाॽबा मनाहाॽ निरुसिल्ले़ खे़ङ्हाॽ किप् तुक्सि यारिक् मे़वये़॥ 16 सावले़न् नु कुस्सा जोनाथने़न् हे़क्क्याङ् खे़ङ्हाॽनु के़वाॽबा मनाहाॽरे़ बेन्यामिन्बा गिबाओ तुराहिम् मे़जोगु॥ पलिस्तिहाॽग मिकमासओ तुराहिम् मे़लेःत्तुआङ् मे़युङ्सिङ्॥ 17 पलिस्ति थक्सुबाहाॽ मे़युङ्बा ते़न्नोलाम् चिगक्वा के़नाप्पा मनालुप् सुम्सि मे़लःन्दे़ मे़भे़रे़॥ थिक्सिगेक्पा लुप्हाॽ सुआल ते़ङ्गप्पो के़ने़बा ओप्रा ले़प्माङ् मे़लासे़॥ 18 निसिगेक्पा लुप्हाॽ बे़थ-हे़रोन ले़प्माङ् मे़लासे़॥ हे़क्क्याङ् सुम्सिगेक्पा लुप्हाॽ सबोइन ते़म्बेॽ नु मुरे़क् खारे़क्पा ये़ःङ्घादे़न्निल्ले़ कुबेसाङ्बा कोःक्मा ले़प्माङ् मे़लासे़॥ 19 खे़न् ये़म्मो इस्राइलओ के़रे़क् पिसाङ् फे़न्जेॽ के़धक्पा हाःत्ताङ् खोमे़न्दे़त्ते़न्, थेआङ्भे़ल्ले़ पलिस्तिहाॽरे़ इस्राइलिहाॽ ताभे नु लाःक्हाॽ थक्मा मे़म्बाङ्घुन्छिन्॥ 20 खे़ल्ले़चोगुल्ले़ के़रे़क् इस्राइलिहाॽ फालि, काःङ्, तःन्दिॽ नु कात्च्याहाॽआङ् हासे़म्से़ पलिस्तिहाॽरे़ओ पेःक्मा के़बोङ्बा वये़॥ 21 लत्छा फालि या काःङ् हासे़म्मे़ल्ले़ कुमे़ल्लुङ् याङ्इत्छेधिक् वये़, हे़क्क्याङ् पित् नाःप्मारे़ लागि अःक्खुॽखुॽबान् हासम्सम्बा चोःक्मा नु तःन्दिॽ हासे़म्मा कुमे़ल्लुङ् याङ्इत्छे ने़त्छि वये़॥ 22 खे़ल्ले़चोगुल्ले़ थङ् पोङ्मा हेःक्ते़ल्ले़ सावले़न् नु जोनाथाने़न् थङ् चोःक्मा के़भाॽबा मना आत्तिन्हाॽरे़आङ् ताभे नु लाःक् मे़ङ्गत्तुन्॥ कर सावले़न् नु जोनाथानने़ल्ले़रक् फे़जुम् फे़या कत्ते़सु॥ 23 खे़न् ये़म्मो मिकमासबा चिभिःप्फिःप्पा लाम्मिन् कम्ब्राङ् मे़त्छे़ पलिस्ति थक्सुबाहाॽ मे़बेआङ् मे़वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.