१ सामुए़ल 12 - लिम्बुसामुए़लरे़ मनाहाॽ उवा चोगुसिबा 1 सामुए़लरे़ खे़प्मो इस्राइलिहाॽ अक्खे मे़त्तुसि, “खे़निॽ के़बाःत्तुम्बा के़रे़क् पाःन्हाॽ आङ्गाॽ खे़प्सुङ्, खे़ब्याङ् खे़निॽलुम्मो हाङ्युक् के़जोःक्पा हाङ्ङिन् युक्तिङ् चोगुङ्ङाङ् वाॽ॥ 2 हाबा खे़न् हाङ्ङिन् खे़निॽ लाम्लोबा पोःक्खे़आङ् वाॽ॥ आङ्गाॽग काप्पोबा तुम्साङ्ङाङ् वाॽआ, खे़ब्याङ् आधे़गेक् मुरिक्काङ् फुत्ते़ चुरे़आङ् वाॽ॥ आङ्गाॽ आस्साहाॽआङ् खे़निॽनुए मे़वाॽ॥ आङ्गाॽग चुःक्ताङ्आङ्धो आल्लो थे़म्बा खे़निॽ लाम्लोबा पोःक्खाङ् थाङाङ्ङाङ् वाॽआ॥ 3 आङ्गाॽ आम्भा कप्मो वाॽआ॥ आङ्गाॽनु खे़निॽ सिराॽमे़न्धाङ्मनाबा पाःन्हाॽ पाःप्मा के़गत्तुम्ने़भग्र कप्मो यहवे दाङ्बान् नु खुने़ॽ सेःन्दुबा कुमनाःल्ले़ कुदगि पाःत्ताम्मे़ॽ॥ आङ्गाॽ हाःत्ले़ कुबित्ते़न् तेॽरुङ् पिरुङ्ङाङ् वाॽआ? हाःत्ले़ कुअदङ्ङिन् तेॽरुङ् पिरुङ्ङाङ् वाॽआ? आङ्गाॽ आत्तिन् इङ्ले़क्तुङ्ङाङ् वाआ? आङ्गाॽ हाःत्ले़ ताप्फे़ःम्बा कुयाःम्बक्किन् माॽमारे़ लागि याङ् ते़म्सुङ्ङाङ् वाॽआ? आङ्गाॽ आमे़त्ताम्मे़ॽ, खे़न् हान्ति के़बोङ्बाहाॽ आङ्गाॽ नुःक्तुङ्ॽ॥” 4 खे़ङ्हाॽरे़ नोगप् मे़बिरु, “आदाङ्बारे़ आनिगे याप्मि इङ्मे़ल्ले़क्के के़वाॽरो॥ आदाङ्बारे़ आनिगे़नु तुक्खे चाःप्मा निङ्घुम्बा याःम्बक्हाॽ थेआङ् मे़न्जोःक्के के़वाॽरो॥ आदाङ्बारे़ मनाहाॽरे़ खुनिॽ थेआङ् के़देॽरु के़बिरुसिबा होप्लो॥” 5 खे़न् एगाङ् सामुए़लरे़ खे़न् इस्राइलिहाॽ मे़त्तुसि, “आङ्गाॽ आदक्ले़ङ्वाओ खे़निॽ थेआङ् पाःन्हाॽ के़ङ्घोसुम्मिन् फाॽआङ् आइन्बा ये़न्नो यहवे दाङ्बे़न् के़निबा तोःन्दि वाॽ, हे़क्क्याङ् खुने़ॽ सेःन्दुबा मनाःन्नाङ् तोःन्दि वाॽरो॥” हे़क्क्याङ् खे़ङ्हाॽरे़ मे़बाःत्तु, “ओरो, खुने़ॽ के़निबा तोःन्दि वाॽरो॥” 6 सामुए़लरे़ याम्मो खे़ङ्हाॽ मे़त्तुसि, “यहवे दाङ्बे़ल्ले़ए खे़निॽ मोसान् नु हारुने़न् के़बिरि, हे़क्क्याङ् खे़निॽ पाधे़बाहाॽ मिस्र लाजेॽलाम् लःत्तु फे़त्तुसि॥ 7 आल्ल खे़निॽ कप्मो ये़बाम्मे़ॽ, थेआङ्भे़ल्ले़ यहवे दाङ्बाल्ले़ कुदगि खे़निॽ नु खे़निॽ पाधे़बाहाॽरे़ खुनिॽ लागि खुने़ॽ चोगुबा के़रे़क् साम्योबा याःम्बक्हाॽ आङ्गाॽ मे़त्निङ्॥ 8 “याकुबे़न् मिस्रलाजेॽ पेआङ् खुने़ॽ कुस्सा कुम्मे़न्छाॽ इस्राइलिहाॽ के़साक्पा तुक्खेओ मे़ध्ये़॥ हे़क्क्याङ् खे़ङ्हाॽरे़ यहवे दाङ्बान् पेलि मे़भाक्तु, खे़ब्याङ् खुने़ॽ मोसान् नु हारुने़न् पाङ्घुसि॥ खे़न् ने़प्फुहाॽरे़ खे़निॽ पाधे़बाहाॽ मिस्रलाम् लःत्ते़सुआङ् खे़ङ्हाॽ कन् ते़न्नो युक्खुसि॥ 9 “कर खे़ङ्हाॽरे़ खुनिॽ निङ्वाॽफुमाङ् यहवे दाङ्बान् निङ्वाॽ मे़मुःत्छु, खे़ल्ले़चोगुल्ले़ खुने़ॽ खे़ङ्हाॽ हासोरबा थक्सुबाहाॽरे़ खुनिॽ थक्पेबा सिसेरारे़ कुहुक्को, पलिस्तिहाॽरे़ खुनिॽ हुक्को नु मोआबबा हाङ्ङिल्ले़ कुहुक्को मे़ध्ये़र याःन्दुसि॥ हे़क्क्याङ् खे़ङ्हाॽरे़ इस्राइलिहाॽ मे़नाःन्दुसि॥ 10 हे़क्क्याङ् खे़निॽ पाधे़बा इस्राइलिहाॽरे़ से़क्खा निस्सेरे़ लागि यहवे दाङ्बान् पेलि मे़भाक्तुआङ् मे़बाःत्तु, ‘आनिगे लायो चोःक्मना, आनिगे यहवे दाङ्बे़न् ले़रुम्बे़आङ् बाल माङ्ङिन् नु अस्तोरेत माङ्हाॽ से़वा मे़त्तुम्सिम्बे़॥ कर आल्ल आनिगे निङ्मिहाॽरे़ खुनिॽ हुक्को थामालाम् आसे़ःप्ते़ॽ, हे़क्क्याङ् आनिगे खे़ने़ॽओ माङ्से़वा चोगुम्बे़॥’ 11 खे़न् एगाङ् यहवे दाङ्बाल्ले़ गिदोन, बाराक, यिप्ता नु सामुए़लले़न् पाङ्घुसि॥ हे़क्क्याङ् खे़ङ्हाॽरे़ के़रे़क् पिसाङ्बा खे़निॽ निङ्मिहाॽलाम् के़म्से़ःप्ति, खे़ल्ले़चोगुल्ले़ खे़निॽ नुरिक् तारिक्काङ् युङ्मा के़हेःक्ति॥ 12 “कर खे़न् एगाङ् अम्मोनिहाॽरे़ खुनिॽ हाङ् नाहासे़न् खे़निॽ तक्ले़ङ्वाओ थङ् चोःक्से़ फे़रे़र पत्छे़बा के़निसुम्॥ यहवे दाङ्बा खे़निॽ निङ्वाॽफुमाङ्ङिन्ने खे़निॽ हाङ् वये़साङ् खे़निॽ आङ्गाॽ याप्मि के़मे़त्ते़, ‘मेःन्, आनिगे़ओ हाङ् के़जोःक्पा हाङ् चाहाब् चोगिगे़॥’ 13 “आल्ल, खे़निॽ के़सेगुम्बा हाङ्ङिन् कप्मो वाॽ॥ खे़निॽ हाङ् के़नाःक्तुम्, हे़क्क्याङ् यहवे दाङ्बाल्ले़ खे़निॽलुम्मो हाङ् युक्तिङ् चोगुआङ् वाॽ॥ 14 यहवे दाङ्बान् खे़निॽ मिङ्सो इङ्धाङ् के़बिरुम्माङ् खुने़ॽ कुसे़वा के़जोगुम्, हे़क्क्याङ् खुने़ॽ पाःत्तुबा पाःन्हाॽरे़ कुदक्ले़ङ्वाओ मे़म्बोःक्के इःप्मा नाःप्मा ते़न्दिङ् के़जोगुम्, हे़क्क्याङ् खे़निॽ हाङ्ङिन् नु खे़निॽ यहवे दाङ्बा निङ्वाॽफुमाङ्ङो नसाःन्साबा के़बोक्खिने़भग्र, खे़निॽ के़नुरि के़दासिॽ॥ 15 कर खे़निॽ यहवे दाङ्बाल्ले़ कुइङ्जाङ्ङिन् इःप्मा नाःप्मा ते़न्दिङ् मे़न्जोःक्के खुने़ॽ पाःत्तुबा पाःन्निल्ले़ कुदक्ले़ङ्वाओ के़बोगिने़फग्र, खे़निॽ पाधे़बाहाॽरे़ खुनिॽ तक्ले़ङ्वाओ पोगे़आङ् वये़बा हे़क्केए खे़निॽ तक्ले़ङ्वाओ खुने़ॽ पोःक्लो॥ 16 “आल्ल स्वाःत्ताङ् ये़बाम्मे़ॽ, हे़क्क्याङ् यहवे दाङ्बाल्ले़ खिनिॽ तगिए चोगुबा निङ्वाॽ के़माबा याःम्बक्किन् अमे़त्ताम्मे़ॽ॥ 17 आल्लो मासि हे़क्मा ये़म् वाॽ मेःम्बि? आङ्गाॽ यहवे दाङ्बान् पेलि फाक्तुङ्, हे़क्क्याङ् खुने़ॽ साःम्भे नु वहित् थासुर याःन्दुरो॥ खे़ब्याङ् खे़निॽ हाङ् के़नाःक्तुम्माङ् यहवे दाङ्बाल्ले़ कुदक्ले़ङ्वाओ आक्तङ्बा ताप्फे़ःम्बा याःम्बक् के़जोगुम्लछ के़लॽबा पाःन्निन् के़निसुम्ॽ॥” 18 हे़क्क्याङ् सामुए़लरे़ यहवे दाङ्बान् पेलि फाक्तु, हे़क्क्याङ् आम्भा खे़ल्ले़ याःन्दिक् खुने़ॽ साःम्भे नु वहित् थ्ये़र याःन्दु॥ खे़न् मे़निसुआङ् के़रे़क् मनाहाॽ यहवे दाङ्बान् नु सामुए़लरे़ खुन्छिॽ तगि मे़गिसे़रो॥ 19 खे़न् मनाहाॽरे़ सामुए़लले़न् मे़मे़त्तु, “सिमालाम् हिङ्मा फाॽआङ् यहवे दाङ्बा के़निङ्वाॽफुमाङ्ङिन् आनिगे के़से़वारोबाहाॽरे़ लागि पेलि फाक्ते़ॽओ॥ थेआङ्भे़ल्ले़ आनिगे हाङ् नाःक्तुम्बे़आङ् लायो सम्धाङ् लायो योॽरुम्बे़आङ् वाॽरो॥” 20 सामुए़लरे़ खे़न् मनाहाॽ मे़त्तुसि, “मे़गिसाम्मिन्ने़ॽ, खे़निॽ के़रे़क् परिक्पा फे़न्याःम्बक् के़जोगुम्साङ् यहवे दाङ्बान् नसान् चोःक्मा मे़ले़राम्मिन्ने़ॽ, कर खे़निॽ काक् निङ्वाॽ सिगाङ्लाम्बाए खुने़ॽ कुसे़वा चोगाम्मे़ॽ! 21 से़क्खा मेःम्बा माङ्हाॽओ नसान् मे़जोगाम्मिन्ने़ॽ, खे़ङ्हाॽरे़ फाॽमाआङ् आमे़न्छुक्ने़न् से़ःप्माआङ् आमे़न्छुक्ने़न्, थेआङ्भे़ल्ले़ खे़ङ्हाॽग थेसिआङ् मेःन्॥ 22 पयम् यम्बा कुमिङ्ङिल्ले़ लागि यहवे दाङ्बाल्ले़ खे़निॽ आफाल्ले़आङ् लाप्के़न्देसिन्, थेआङ्भे़ल्ले़ खे़निॽ आबाङे कुमना चोःक्मा खुने़ॽ निःन्धो चोगुआङ् वाॽ॥ 23 खे़निॽ लागि तुवा चोःक्मा ले़प्माआङ् यहवे दाङ्बाल्ले़ कुदक्ले़ङ्वाओ लायो चोःक्मा पान् आङ्गाॽलाम् माःङ्घा पोङ्ल॥ हे़क्क्याङ् थेःन् नुबा नु कुदोःप्मा चोक् खे़न्निन्ने ओसेःन्धाक्निङ्॥ 24 कर खे़निॽ निङ्वाॽ सिगाङ्लाम्मे यहवे दाङ्बे़न् मिङ्सो इङ्धाङ् पिराम्मे़ॽ, हे़क्क्याङ् नसाःन्साबा पोःक्खे़म्मे़ॽआङ् कुसे़वा चोगाम्मे़ॽ॥ खे़निॽ लागि खुने़ॽ आक्तङ्बा पयम् यम्बा याःम्बक् चोगुआङ् वाॽ खे़न्निन् निङ्वाॽ इःत्ताम्मे़ॽ॥ 25 कर खे़निॽ आभे़ल्ले़साङ् फे़न् याःम्बक्लक् के़जोगुम्ने़फग्र खे़निॽ के़रे़क् के़मे़गिॽ हे़क्क्याङ् खे़निॽ हाङ्ङिन्नाङ् मे़क्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.