१ सामुए़ल 11 - लिम्बुसावलरे़ अम्मोनिहाॽ नाःन्दुसिबा 1 लाधिक् एगाङ् आम्मोनबा हाङ् नाहासरे़ कुधक्सुबाहाॽ तेॽरुसिआङ् इस्राइलिहाॽरे़ खुनिॽ ये़क्यक् याबेस-गिलाद पे, हे़क्क्याङ् खे़न् ते़न्निन् किर्गप् कबु॥ याबेसबा के़रे़क् मनाहाॽरे़ नाहासे़न् मे़मे़त्तु, “आनिगे़नु के़दङ्ग्र आनिगे खे़ने़ॽ के़से़वा के़जोःक्पा के़मना पोःक्खिगे़॥” 2 कर अम्मोनि नाहासरे़ खे़ङ्हाॽ मे़त्तुसि, “आङ्गाॽ लत्छा पाःन्नोरक् खे़निॽनु तङ्ङा॥ खे़न् तङ्मा पाःन्हाॽ अक्तङ्बा वाॽ, खे़निॽ के़रे़क्ले़ चुक्वा ले़प्साङ्बा मिक्किन् लःत्तुङ्देसुङ् पिनिङ्, हे़क्क्याङ् खे़ल्ले़ के़रे़क् इस्राइलिहाॽरे़ खुनिॽ चाःत्थि पेक्॥” 3 याबेसबा लाम्लोबाहाॽरे़ मे़मे़त्तु, “इस्राइलबा के़रे़क् पिसाङ् कन् इङ्घङ्ङिन् से़मारे़ लागि नुसि ये़न् थारिक् ये़म् याप्मि के़बिर पोङ्॥ हे़क्क्याङ् आनिगे से़ःप्से़ हाःत्ताङ् मे़दाने़न्ने़फग्र आनिगे खे़ने़ॽओए हुक्सुप्पासिगे़॥” 4 इङ्घङ् के़साबाहाॽ गिबाबा सावलरे़ओ मे़गे़रे़ मे़द्ये़, हे़क्क्याङ् कन् इङ्घङ्ङिन् मनाहाॽ मे़मे़त्तुसिल्ले़ के़रे़क् साॽरिक् मे़हाबे़ मे़जिःक्ते़॥ 5 खे़न् ये़म्मो सावले़न् प्याङ्सिओलाम् पित्हाॽ नाःत्तुसिआङ् नुःक्खे़ त्ये़र पत्छे़॥ हे़क्क्याङ् “थे पोःक्खे़? थेआङ् मनाहाॽ मे़हाःप्पा?” फाॽआङ् सेःन्दोसुसि॥ हे़क्क्याङ् याबेसबा मनाहाॽरे़ मे़बाःत्तुबा पाःन्हाॽ खुने़ॽ मे़मे़त्तु॥ 6 सावलरे़ खे़ङ्हाॽरे़ खुनिॽ पाःन्हाॽ खे़प्सुल्ले़, खिमो निङ्वाॽफुमाङ्ङिल्ले़ कुयाम्साम्मिन् खुने़ॽओ त्ये़, हे़क्क्याङ् खुने़ॽ कुस्साक्के़न्निल्ले़ मि पोःक्खे़॥ 7 खे़ब्याङ् खुने़ॽ कुम्बाबा पित् ने़त्छि तारुसिआङ् खे़ङ्हाॽ चाक्खक् चाक्खक् खक्तुसि, हे़क्क्याङ् इङ्घङ् के़दाःप्पा मनाहाॽ खे़न् चाक्खक् चाक्खक् खक्तुबा सान् पिरुसि, खम्ब्याङ् इस्राइलओ के़रे़क् पिसाङ् अक्खे मे़त्तुसिआङ् पाङ्घुदेसुसि, “सावल नु सामुए़लरे़ खुन्छिॽ फाॽसे़ थङ् चोःक्से़ तामा मे़न्दे़म्मनाबा मनाहाॽरे़ खुनिॽ पित्हाॽआङ् हाबा अक्खेलॽरिक्के चाक्खक् चाक्खक् खक्मासि पोङ्॥” हे़क्क्याङ् मनाहाॽ यहवे दाङ्बान्नु मे़गिसे़आङ् खे़ङ्हाॽ थिक्हुप् मे़बोःक्खे़आङ् मे़लःन्दे़ मे़द्ये़॥ 8 सावलरे़ खे़ङ्हाॽ थङ् थक्मा फाॽआङ् बेजेक्को सुप्सुसि॥ हे़क्क्याङ् खे़ङ्हाॽ निरुसिल्ले़ इस्राइलबा मनाहाॽ लाङे़न्छिङ् सुम्सि नु यहुदाबा मनाहाॽ हे़न्छिङ् सुम्बोङ् मे़वये़॥ 9 खे़ङ्हाॽरे़ इङ्घङ् के़दाःप्पा मनाहाॽ मे़मे़त्तुसि, “याबेस गिलादबा मनाहाॽ अक्खे मे़त्ताम्सिम्मे़ॽ, ‘ताःन्दिक् ले़न्दिक् नाम्लाःङ् थारिक्ले़ खे़निॽ चोःक्युम्भो के़घोसुम्॥’” इङ्घङ् के़साबाहाॽ मे़बेआङ् कन् पाःन्निन् याबेसबा मनाहाॽ मे़मे़त्तुसि, हे़क्केःल्ले़ खे़ङ्हाॽरे़ खुनिॽ सक्मा के़रे़॥ 10 हे़क्क्याङ् याबेसबा मनाहाॽरे़ नाहासे़न् मे़मे़त्तु, “ताःन्दिक् आनिगे आबाङे खे़ने़ॽ के़हुक्को हुक्सुप्पासिगे़, हे़क्क्याङ् आनिगे़नु खे़ने़ॽ थे चोःक्मा के़सिराॽधाङ् खे़न् चोगे़ॽओ॥” 11 हे़क्क्याङ् कुदाःन्दिक्मा सावलरे़ कुमनाहाॽ कुलुप् सुम्सि चोगुसि॥ तानाम्सा इस्राइलिहाॽ अम्मोनि थक्सुबाहाॽरे़ खुनिॽ तुरायक् सिगाङ् मे़लासे़आङ् ले़न्जो थारिक्ले़ यरिक् अम्मोनिहाॽ मे़स्ये़रुसि॥ खे़न् एगाङ् के़हिङ्बा के़याःक्पाहाॽ ने़प्फु सोरिक् पोङ्मा मे़ङ्घोए फुत्चिङ्ज्याःङ् मे़बोःक्खे़॥ 12 खे़न् एगाङ् मनाहाॽरे़ सामुए़ले़न् मे़मे़त्तु, “सावलरे़ आनिॽ लुम्मो हाङ् मे़जोगुन्ल फाॽआङ् के़बाःप्पाहाॽ हाःत्छिबे? खे़ङ्हाॽ कप्मो ताराम्सिम्मे़ॽ आनिगे खे़ङ्हाॽ से़रुम्सिम्बे़॥” 13 कर सावलरे़ मे़त्तुसि, “हे़क्के मेःन्, यहवे दाङ्बाल्ले़ इस्राइलिहाॽ कम्भलॽरिक् से़ःप्तुसिबा ये़न्नो आत्तिन्हाॽआङ् से़प्मासि मे़नुॽने़न्॥” 14 खे़ब्याङ् सामुए़लरे़ मनाहाॽ मे़त्तुसि, “त्ये़म्मे़ॽ, आनिॽ गिलगाल पेगिआङ् खे़प्मो सावले़न् हाङ् युक्तिङ् चोगुम्॥” 15 खे़ल्ले़चोगुल्ले़ के़रे़क् मनाहाॽ गिलगाल मे़बेआङ् यहवे दाङ्बाल्ले़ कुदगि सावले़न् हाङ् युक्तिङ् मे़जोगु॥ हे़क्क्याङ् खे़प्मो खे़ङ्हाॽरे़ यहवे दाङ्बाओ सनारुङ्गे़न् सिदुङ्जभा मे़दोन्दु॥ खे़न् ये़न्नो सावल नु के़रे़क् इस्राइलिहाॽ पसःत् मे़सःत्ते़आङ् यम्बा ससाङ्स्रोत् मे़जोगे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.