१ सामुए़ल 10 - लिम्बु1 हे़क्क्याङ् सामुए़लरे़ कान्द्याधिक निःङ्गेॽ याङ्सिङ्ङाङ् खे़न्निन् सावलरे़ कुधे़गेक् सम्धाङ् हुक्खु॥ हे़क्क्याङ् चुप् मे़त्तुआङ् अक्खे मे़त्तु, “यहवे दाङ्बाल्ले़ खे़ने़ॽ इस्राइलि कुमनाहाॽओ लाम्लोबा याःम्बक् चोःक्मारे़ लागि के़सेःन्दे़आङ् वाॽ॥ 2 आइन् आङ्गाॽओलाम् खे़ने़ॽ के़बेःक्काङ् बुन्यामिन थुम्मिल्ले़ इःन्दोओ के़ने़बा राहेलरे़ कुइपुङ् पेसाङ् सेल्सहओ ने़त्छि मना के़दुमुसिॽ॥ खे़न् ने़प्फु मनाहाॽरे़ खे़ने़ॽ अक्खे के़म्मे़त्, ‘खे़ने़ॽ के़गोःत्तुसिर के़वाॽबा अदङ्हाॽ खोमे़दे़त्ते़आङ् मे़वाॽ॥ हे़क्क्याङ् के़म्बारे़ खे़न् अदङ्हाॽ निङ्वाॽ इःप्मा ले़रुसिआङ् वाॽ, खे़ब्याङ् खे़ने़ॽ के़इःत्ल खुने़ॽ कुनिङ्वाॽ तुक्खे चार “आल्ल आस्साःल्ले़ कुलागि थे चोगुङ्बाबे?”’ पाःत्तुर वाॽ॥ 3 “खे़म्ब्याङ् खे़प्मोनु ताबोरबा यम्बा सिङ्बुङ्ङो के़गे़त्तिल्ले़ बेथेलओ निङ्वाॽफुमाङ्ङिन् माङ्से़वा मे़प्मारे़ लागि के़बेःक्पार के़बप्पा सुम्सि मना के़दुमुसिॽ॥ थिक्सिगेक्पाल्ले़ मे़ःन्दासाःत् सुम्सि, निसिगेःक्पाल्ले़ खरे़ःङ् सुम्सि, हे़क्क्याङ् वेॽइल्ले़ सेहोॽ सुक्वाधिक् कुले़ःम् चे़ल्ले़क्सेॽ सेजःङ्वा मे़गुयुआङ् मे़बेःक्ल मे़बप्पा के़दुमुसिरो॥ 4 खे़ङ्हाॽरे़ खे़ने़ॽ से़वा के़म्मे़त् हे़क्क्याङ् खरे़ःङ् ने़त्छि के़म्बि, खे़ङ्हाॽलाम् खे़ने़ॽ खे़न् के़दाःक्तुरो॥ 5 “खे़न् एगाङ् खे़ने़ॽ गिबा मे़प्मनाबा ते़न्नोबा निङ्वाॽफुमाङ्ङिल्ले़ कुगोःक्माओ के़बेःक्, खे़ॽयो पलिस्ति थक्सुबाहाॽरे़ खुनिॽ तुरायक् ने़ःॽ॥ खे़ने़ॽ पाङ्जुम्मो के़प्मा के़जोःक्किल्ले़, कोःक्माओबा ले़त्ति तोःम्मादे़न्लाम् खित्चिङ् खित्चिङ् के़लॽबा मुक्ला, मुफ्रामा नु तुःङ्गे के़मुङ्बार के़नुःङ्बा के़युबा माङ्निङ्वाॽपान् के़बाःप्पा मनालुप्हाॽ के़दुमुसिॽ, हे़क्क्याङ् खे़ङ्हाॽरे़ माङ्निङ्वाॽपान् मे़बाःत्तुर मे़युर मे़बत्॥ 6 खिमो यहवे दाङ्बाल्ले़ कुयाम्साम्मिन् मुक्साम्नु के़सम्धाङ् चुक्, खे़ब्याङ् खे़ने़ॽआङ् खे़ङ्हाॽनुए माङ्निङ्वाॽपान् के़बाःत्, हे़क्क्याङ् खे़ने़ॽ के़ले़ङ्सिङ्ङाङ् वेॽ कुसङ् मना के़बोङ्लो॥ 7 कन् मिक्सेःन्हाॽ पोङ्जुःत्, हे़क्क्याङ् खे़ने़ॽ सिङ्सिङ् ये़क्ये़क्काङ् याःम्बक् चोगे़ॽ, थेआङ्भे़ल्ले़ निङ्वाॽफुमाङ्ङिन् खे़ने़ॽनु वाॽ॥ 8 “खे़ने़ॽ आङ्गाॽनुःल्ले़ तगि यो गिलगाल थासिङ् पेगे़ॽ, हे़क्क्याङ् आजे़त् एगाङ् आङ्गाॽ मिधिङ्मनादेमनाबा सिदुङ्जभा नु सनारुङ् सिदुङ्जभा तोःन्छे़ युआ॥ कर खे़ने़ॽ नुसि ये़न् थारिक् के़हाङ्ङार पोङ्॥ खे़ब्याङ् आङ्गाॽ के़त्ता युआआङ् खे़ने़ॽ थे चोःक्मा के़बोङ्बा वाॽ खे़न् मे़त्ने़॥” 9 सावले़न् सामुए़लरो पेआङ् नुःक्खे़र पत्छे़ल्ले़ निङ्वाॽफुमाङ्ङिल्ले़ सावलरे़ कुनिङ्वाॽइन् ले़क्खुआङ् कुसङ् चोगुबिरु॥ हे़क्क्याङ् कन् के़रे़क् मिक्सेःन्हाॽ हाबा खे़ल्ले़ याःन्दिक् पोःक्खे़॥ 10 सावले़न् नु कुसे़वारोबान् गिबा के़रे़सिल्ले़, खे़प्मो माङ्निङ्वाॽपान् के़बाःप्पा मनालुप्हाॽरे़ खुने़ॽ मे़दुमु॥ आम्भा खे़न् ये़म्मो निङ्वाॽफुमाङ्ङिल्ले़ कुयाम्साम्मिन् मुक्साम्नु खुने़ॽओ त्ये़, हे़क्क्याङ् खुने़ॽआङ् खे़न् माङ्निङ्वाॽपान् के़बाःप्पाहाॽनु सोरिक् माङ्निङ्वाॽपान् पाःप्मा हेःक्ते़॥ 11 हे़क्क्याङ् तगिआङ्धो खुने़ॽ कुसिङ् के़निःप्पा के़रे़क्ले़ माङ्निङ्वाॽपान् के़बाःप्पाहाॽनु सोरिक् माङ्निङ्वाॽपान् पारे़बा मे़निसुआङ् खे़ङ्हाॽरे़ मे़बाःत्तु, “किसरे़ कुस्सा सावले़न् थे़मा पोःक्खे़बे? खुने़ॽआङ् माङ्निङ्वाॽपान् के़बाःप्पाहाॽरे़ खुनिॽ लुप्पोबाबि?” 12 खे़प्मो के़ये़प्पा मनाधिक्ले़ अक्खे मे़त्तुसिॽ, “खे़ङ्हाॽरे़ खुनिॽ पानुदिङ् पा आत्तिङ्ग?” खे़ब्याङ्धो अक्खे पाःप्मा मे़हेःक्तु, “थे सावले़न्नाङ् माङ्निङ्वाॽपान् के़बाःप्पा पोःक्खे़बाबि?” 13 सावलरे़ माङ्निङ्वाॽपान् पाःप्मा सुरुआङ्, खुने़ॽ ले़त्ति तोःम्मादे़न् के़ने़बा थो कोःक्माओ पे॥ 14 आल्ल सावलरे़ कुम्भङारे़ खुने़ॽ नु कुसे़वारोबे़न् सेःन्दोसुसि, “खे़न्छिॽ आत्तान् के़बेसिआङ् के़वये़सि?” सावलरे़ कुम्भङा मे़त्तु “अदङ् कोःत्छे़ आन्छिगे पेसिगे़आङ् वये़सिगे़॥ कर अदङ्हाॽ खोमा मे़सुक्तुसिगे़न्नाङ् सामुए़लरे़ओ पेसिगे़आङ् वये़सिगे़॥” 15 हे़क्क्याङ् खुने़ॽ कुम्भङारे़ मे़त्तु, “सामुए़लरे़ थे के़जे़क्ते़सि? आङ्गाॽ आमे़त्ते़ॽ॥” 16 हे़क्क्याङ् सावलरे़ मे़त्तु, “अदङ्हाॽ मे़घोसुसिआङ् वाॽ फाॽआङ् खुने़ॽ आन्छिगे मे़त्ते़छिगे़॥” कर खुने़ॽ हाङ् पोःक्खे़आङ् वाॽ लॽरिक् सामुए़लरे़ पाःत्तुबा पाःन्निन् खुने़ॽ कुम्भङा मे़मे़त्तुन्॥ सावले़न् हाङ् पोङ्ॽ 17 आल्ल सामुए़लरे़ इस्राइलि मनाहाॽ यहवे दाङ्बाओ चुम्से़ मिस्पा मे़प्मनाबा ते़न्नो उःत्तुसि, 18 हे़क्क्याङ् खे़ङ्हाॽ मे़त्तुसि, “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘आङ्गाॽ इस्राइलिहाॽ मिस्र लाजेॽलाम् लःत्तुङ् फे़त्तुङ्सिङ्॥ खे़निॽ तुक्खे के़जाःप्पा मिस्रिहाॽ नु के़रे़क् हाङ्जुम्हाॽलाम् खे़निॽ से़ःप्निङ्ङाङ् वाॽ॥’ 19 कर खे़निॽ के़रे़क् तुक्खे लाक्खेलाम् ताङ्गे़से़ःप्पा निङ्वाॽफुमाङ्ङिन् कन् ये़म्मो खे़निॽ के़नाॽरुम्माङ् के़वयि॥ हे़क्क्याङ् खे़निॽ अक्खेआङ् के़बाःत्तुम् ‘मेःन्, आनिॽ लुम्मो लत्छा हाङ्युक् के़जोःक्पा हाङ्धिक् युक्तिङ् चोगे़ॽ॥’ कल्ले़चोगुल्ले़ आल्ल यहवे दाङ्बाल्ले़ कुदगि थाःक्थाःक् नु पासिङ् पासिङ् पोःक्खे़म्मे़ॽआङ् आबाङे आबाङे ते़न्हाॽओ चुप्साम्मे़ॽ॥” 20 हे़क्क्याङ् सामुए़लरे़ के़रे़क् इस्राइलि थाःक्हाॽ थाःक् थाःक् सुप्सुसि, हे़क्क्याङ् तॽयाःन्सोन् मे़गे़सुल्ले़ बिन्यामिन्ले़ कुधाःक्किन् मे़सेगु॥ 21 खे़ब्याङ् खुने़ॽ बुन्यामिन थाःक्कोबा के़रे़क् हिम्सयङ्बा मनाहाॽ तगि तारुसि, हे़क्क्याङ् मत्रि ले़प्माङ्बा हिम्सयङ्ङिन् मे़सेगु॥ हे़क्क्याङ् कुनुप्मो किसरे़ कुस्सा सावले़न् मे़सेगु॥ कर मनाहाॽरे़ खे़न् मे़गोःत्तुल्ले़ खुने़ॽ खोमा मे़न्छुक्तुन्॥ 22 खे़ल्ले़चोगुल्ले़ खे़ङ्हाॽरे़ यहवे दाङ्बान् सेःन्मे़दोसु, “खे़न् मनान् कप्मो वाॽबि?” हे़क्केःल्ले़ यहवे दाङ्बाल्ले़ नोगप् पिरुसि, “वाॽ, खे़न् मनान् चिगक्वा सामाहाॽरे़ कुलुम्मो चिङ्सिङ्ङाङ् युङ्॥” 23 खे़ङ्हाॽ मे़लोःक्ते़र मे़बेआङ् खुने़ॽ मे़भे़त्तुआङ् मे़भे़रे़, हे़क्क्याङ् खुने़ॽ मनाहाॽरे़ खुनिॽ लुम्मो मे़ये़प्सु हे़क्केःल्ले़ के़रे़क् मनाहाॽ खुने़ॽ कुभक्ताङ्नुःल्ले़ ताङ्सारक् मे़वये़॥ 24 हे़क्क्याङ् सामुए़लरे़ के़रे़क् मनाहाॽ मे़त्तुसि, “ओमे़त्ते़म्मे़ॽ, यहवे दाङ्बे़ल्ले़ सेगुबा मनान् के़निसुम्बि? के़रे़क् मे़न्छाम् सुवाङ्लुम्मो खुने़ॽ कुसिक्ताङ्बा मना आत्तिन्हाॽआङ् मे़होप्॥” हे़क्क्याङ् खे़न् के़रे़क् मनाहाॽ यम्बा इक्लाओ अक्खेलॽरिक् मे़अःक्ते़, “हाङ्ङिन् सदादिङ् हिङ्लरो!” 25 खे़न् एगाङ् सामुए़लरे़ मनाहाॽ हाङ्ङिल्ले़ चोःक्मा के़बोङ्बा याःम्बक्हाॽरे़ कुयाःम्बेओ मे़त्तुसि, हे़क्क्याङ् लत्छा साप्लाओ साप्तुआङ् यहवे दाङ्बाल्ले़ कुदगि ने़स्सु पिरुसि॥ खे़म्ब्याङ् खुने़ॽ मनाहाॽ आबाङे खुनिॽ हिम् हिम्मो नुःक्खाम्मे़ पेगाम्मे़ॽ मे़त्तुसि॥ 26 सावले़न्नाङ् गिबाबा कुहिम्मो पे, हे़क्क्याङ् निङ्वाॽफुमाङ्ङिल्ले़ थङ्ङो लाम्लोसुसिबा मनाहाॽआङ् खुने़ॽनुए मे़बे॥ 27 कर खे़प्मो सावलरे़ कुदक्ले़ङ्वाओ के़बाःप्पा मनाहाॽआङ् मे़वये़, खे़ङ्हाॽरे़ अक्खेआङ् मे़बाःत्तु, “कन् मनाःल्ले़ आभेलॽरिक् आनिॽ से़ःप्मा आसुक्पे?” खे़ङ्हाॽरे़ सावले़न् कुनामे़न्छाॽ मे़मे़त्तुर किनाःन्दि मे़बिरु, हे़क्क्याङ् खुने़ॽ कुलागि थेआङ् सुङ् मे़न्दारुन्॥ कर सावलरे़ थेआङ् मे़बाःत्तुन्॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.