१ सामुए़ल 1 - लिम्बुसिलोओ एल्काना नु खुने़ॽ कुहिम्सयङ् 1 एफ्राइम सुवाङ्समा एल्काना मे़प्मनाबा मनाधिक् वये़॥ खुने़ॽ एफ्राइम लाजेॽबा कोःक्माओ के़ने़बा रामाह पाङ्जुम् के़युङ्बा मना वये़॥ खुने़ॽ यरोहामरे़ कुस्सा, एलिहुरे़ कुम्मे़न्छाॽ वये़, तोहुरे़ कुजक्मे़न्छाॽ, सुपरे़ कुबे़म्मे़न्छाॽ वये़रो॥ 2 खुने़ॽ कुमेत् ने़त्छि वये़सि, तुम्मे़ल्ले़ कुमिङ् हन्ना नु पाःक्मे़ल्ले़ कुमिङ् पे़निन्ना वये़॥ पे़निन्नारे़ कुस्साकुए मे़वये़ कर हन्नारे़ कुस्साकुए मे़होःप्ते़॥ 3 एल्कानान् तङ्बेधक्मा कुहिम्सयङ्नु सोरिक् मुक्साम्दाङ्बा निङ्वाॽफुमाङ्ङो माङ्से़वा चोःक्से़ हे़क्क्याङ् सिदुङ्जभा तोःन्छे़ रामाह पाङ्जुम्लाम् सिलो पेर वये़॥ खे़न् ये़म्मो एलिन् निङ्वाॽफुमाङ्ङो माङ्से़वा के़जोःक्पा निङ्वाॽफुसाम्बा वये़ हे़क्क्याङ् खुने़ॽ कुस्सा होप्निन् नु पिनहासे़न् खुने़ॽनु सोरिक् से़वा चोःक्मा के़भाॽबा निङ्वाॽफुसाम्बा वये़सि॥ 4 ए़ल्कानाःल्ले़ सिलोओ वयागे़न् सिदुङ्जभा चोगुल्ले़ सिदुङ्जभाओबा सालक्हाॽ चबे़ःत्छिक् कुमेत् पे़निन्नाःन् नु कुस्साहाॽ पिरुसि॥ 5 कर खुने़ॽ कुमेत् हन्नाःन् कुलक् ने़त्छि यारिक् पिरु थेआङ्भे़ल्ले़ खे़न् साॽरिक् लुङ्माॽ तुक्तु॥ हे़क्क्याङ् यहवे दाङ्बाल्ले़ हन्नाःल्ले़ कुसायाङ्दाङ्ङिन् साक्तुआङ् वये़॥ 6 हे़क्क्याङ् यहवे दाङ्बाल्ले़ हन्नाःन् सामे़गत्ते़ल्ल याःन्दुबाल्ले़ चोगुल्ले़ कुल्लाॽमा पे़निन्नाःल्ले़ खुने़ॽ कुनामे़न्छाॽ मे़त्तुर तुक्खे चाःत्तु॥ 7 हे़क्केलॽरिक्के तङ्बेधक्मा एल्कानान् कुहिम्सामाहाॽनु माङ्हिम्मो मे़बेर मे़वये़॥ यहवे दाङ्बाल्ले़ कुहिम्मो एल्कानाःन् वयागे़न् सिदुङ्जभा चोःक्से़ पेधक्मा पे़निन्नाःल्ले़ हन्नाःन् हाःप्सुआङ् थेआङ् मे़न्जामनामा पोःक्खे़र थारिक् चोगु॥ 8 खे़ल्ले़चोगुल्ले़ ए़ल्कानाःल्ले़ कुमेःत्तिन् सेःन्दोसु, “हन्नाए! खे़ने़ॽ थेआङ् के़हाःप्पाबे? खे़ने़ॽ थेआङ् कुजा के़न्जने़म्बाबे? थेआङ् खे़ने़ॽ खे़म्याक् साॽरिक् के़निङ्वाॽ तुगे़बाबे? आङ्गाॽ थे थिबोङ् के़स्साके़एनुःल्ले़आङ् यम्बा पान् मे़ःन्नाबि?” हन्नान् नु एलिन् 9 थिक्ले़ङ् सिलोओ सिदुङ्जभा तोःम्मा चुरे़ हे़क्क्याङ् खे़ङ्हाॽरे़ तःक् चामा थुङ्मा मे़सुरुआङ् हन्नाःन् पोगे़॥ खे़म्भे़ल्ले़ निङ्वाॽफुसाम्बा एलिन् माङ्हिम्मो तुवा चोःक्से़ पेआङ् सेसे माङ्से़वा चोःक्मा ते़न्निल्ले़ कुबेसाङ्बा लाम्धेःप्पोबा एःक्नाःम्भेॽओ युङे़गरे़॥ 10 हन्नान् साॽरिक् कुनिङ्वाॽ तुगे़ हे़क्क्याङ् यहवे दाङ्बान् पेलि फाक्तुर उःक्काङ् उःक् हाबे़॥ 11 खुने़ॽ अक्खेलॽरिक् माङ्हुप् चोगु, “मुक्साम्दाङ्बा यहवे दाङ्बाए, इक्सादिङ् खाम्बेःक्कोबा आङ्गाॽ आदुक्खेन् ओगे़मे़त्तुआङ् पेलि फाक्ने़बान् के़घे़प्सु हे़क्क्याङ् लुङ्माॽ के़दुक्काआङ् नोगप् के़बिआ, खे़ब्याङ् निङ्वाॽ मे़भेःत्छाङ्ङिन्ने़ॽओ, हे़क्क्याङ् निङ्वाॽ इःत्ताङ्ङे़ॽओ॥ खे़ने़ॽ ये़म्बित्छा साधिक् के़बिॽआने़भग्र खे़न् कुहिङ्हिङ् थारिक् आङ्गाॽ आदाङ्बा यहवे दाङ्बान्ने पिने़रो॥ हे़क्क्याङ् खे़ल्ले़ कुधे़गेक् इःन् आभे़ल्ले़आङ् मे़नःक्खुल्लो॥” 12 हे़क्केलॽरिक् हन्नाःल्ले़ यहवे दाङ्बाल्ले़ कुदगि चक्मे़न्लॽए इरिक् थारिक् पेलिगे़न् तुवा चोगु, कर एलिःल्ले़ हन्नाःल्ले़ कुम्ब्रा मुसिक् मुसिक् मुन्दे़बाल्लक् स्वाःत् ओमे़त्तु॥ 13 हन्नाःन् कुनिङ्वाॽओ स्वाःत् पेलि फाक्नु युङे़, हे़क्क्याङ् खे़ल्ले़ कुम्ब्राःन् मुन्दे़साङ् पाःत्तुबा इक्लान् मे़घे़प्सुन्नाङ् एलिरे़ कङ्ग सेजङ्वाःल्ले़ मयुरे़छ फाॽआङ् निङ्वाॽ इःत्तु॥ 14 खे़ल्ले़चोगुल्ले़ एलिरे़ मे़त्तु, “आभे़ल्ले़ थारिक् खे़ने़ॽ हाबा अक्खेलॽरिक् सेजङ्वाःल्ले़ के़मआङ् के़युङ्बाबे? खे़ने़ॽ के़सेजङ्वान् थुङ्मा ले़रे़ॽ॥” 15 हन्नाःल्ले़ मे़त्तु, “हे़क्के मेःन्, आदाङ्बे! आङ्गाॽग निङ्वाॽओ पयम् यम्बा तुक्खे के़जामा मे़न्छुमाआ॥ सेजङ्वाःल्ले़ मयाङ्बा मेःन्॥ आङ्गाॽ सेजःङ्वा मे़न्धुङ्ङे वाॽआ कर आङ्गाॽग यहवे दाङ्बान् आदुक्खे आलाक्खेहाॽ चे़क्तुङ्ल पत्ता॥ 16 आदाङ्बे, आङ्गाॽ कुसुम्मे़न्दम्नामा मे़न्छुमा मे़लेःत्ताङ्ङिन्ने़ॽ॥ थेआङ्भे़ल्ले़ आङ्गाॽ पयम् यम्बा आदुक्खे आलाक्खेःल्ले़ चोगुल्ले़ पेलिगे़न् तुवा चोगुङ्ल पत्ता॥” 17 हे़क्केःल्ले़ एलिःल्ले़ मे़त्तु, “के़निङ्वाॽ तुक्खे मे़न्जाए सनारुङ्ङाङ् पेगे़ॽओ, हे़क्क्याङ् खे़ने़ॽ इस्राइलबा निङ्वाॽफुमाङ्ङिन् के़नाःक्तुबान् खुने़ॽ के़बिररो॥” 18 हन्नाःल्ले़ मे़त्तु, “आदाङ्बे, नोगे़न्लो! खे़ने़ॽ के़बाःत्तुबा हे़क्केए पोङ्ल॥” हे़क्क्याङ् खे़न् नुःक्खे़ पेआङ् कुभा कुजाजि च, खे़ब्याङ् याम्मो आप्फाल्ले़आङ् कुनिङ्वाॽ तुक्खे मे़ज्ये़ने़न्॥ हन्नाःल्ले़ सामुए़ले़न् कत्तु 19 कुदाःन्दिक्मा तानाम् एल्कानान् नु कुहिम्सामाहाॽ मे़बोगे़ हे़क्क्याङ् यहवे दाङ्बान् सेसे माङ्से़वा मे़मे़त्तु॥ हे़क्क्याङ् रामाबा आबाङे खुनिॽ हिम्मो मे़नुःक्खे़॥ हे़क्क्याङ् से़न्दिक् एल्कानाःन् कुमेत् हन्नाःन्नु इप्से़, खे़म्भे़ल्ले़ यहवे दाङ्बाल्ले़ हन्नाःल्ले़ कुबेलिन् निङ्वाॽ इःत्तु॥ 20 हे़क्केलॽरिक् हन्नाःन् मे़न्छुक्मा पोःक्खे़, हे़क्क्याङ् ये़म्बित्छा साधिक् सावाःन्दु॥ खुने़ॽ खे़ल्ले़ कुमिङ् सामुए़ल मिङ् वाःत्तु, हे़क्क्याङ् याम्मो पाःत्तु, “थेआङ्भे़ल्ले़ यहवे दाङ्बे़न् नाःक्तुङ्ङाङ्ङे कन् ये़म्बित्छा सान् पोःक्खे़बारो॥” 21 तङ्बेधिक् एगाङ् एल्कानान् हे़क्क्याङ् खुने़ॽ कुस्साहाॽ यहवे दाङ्बाओ माङ्हे़क् मे़जोगुबा कुइसिक् तङ्बेधक्माबा वयागे़न् सिदुङ्जभा तोःन्छे़ सिलोओ मे़बे॥ 22 कर हन्नाःन् खे़ङ्हाॽनु मे़बेने़न्॥ खे़ल्ले़ कुये़म्बान् मे़त्तु, “अङे़ःक्वाःल्ले़ नुधुङ्मा ले़रुआङ् तःक् चामा हेःक्तुर थारिक् हाङ्मा पोङ्, हे़क्क्याङ्लक् आङ्गाॽ यहवे दाङ्बाल्ले़ कुदगि तेॽरुङ्आङ् तोःन्दुङ्॥ हे़क्क्याङ् कुहिङ्हिङ् थारिक् खे़प्मोए यहवे दाङ्बे़न्नु वाॽरो॥” 23 कुये़म्बा ए़ल्कानाःल्ले़ खुने़ॽ मे़त्तु, “खे़ने़ॽ निङ्वाॽ के़इःत्तुबा पाःन्निङ्ग नुबाएरो॥ अङे़ःक्वाःल्ले़ नुधुङ्मा मे़ल्ले़त्ते थारिक् खे़ने़ॽ हिम्मोए युङे़ॽ॥ खे़ने़ॽ माङ्हे़क् के़जोगुबाओ यहवे दाङ्बे़ल्ले़ कुभाॽ के़बिर॥” खे़ल्ले़चोगुल्ले़ हन्नाःन् हिम्मोए युङे़, हे़क्क्याङ् खुने़ॽ अङे़ःक्वाःल्ले़ नुधुङ्मा मे़न्नाॽए थारिक् पोरे़र याःन्दु॥ 24 हन्नाःल्ले़ अङे़ःक्वान् नुधुङ्मा ले़रुर याःन्दु, हे़क्क्याङ् खुने़ॽ अङे़ःक्वान् सिलोओ तेॽरुआङ् पे॥ खुने़ॽ तङ्बे सुम्सि के़गे़प्पा पित्सात्, फोलक् ङासि फेॽरुम् हे़क्क्याङ् सिहोॽबा सुक्वाधिक् कुले़म् चे़ल्ले़क्सेॽ थि तेॽरुआङ् यहवे दाङ्बाल्ले़ कुहिम्मो पे॥ अङे़ःक्वान् चुःक्ते़साङ् खुने़ॽ खे़न् यहवे दाङ्बे़ल्ले़ कुहिम्मो तेॽरुआङ् पे॥ 25 खे़ङ्हाॽरे़ खे़न् कुम्बाबा पित्ते़न् मे़से़रु हे़क्क्याङ् अङे़ःक्वान् एलिरे़ॽओ मे़दारु॥ 26 हन्नाःल्ले़ एलिन् मे़त्तु, “आदाङ्बे, कुसिङ् के़निःत्ताङ्बि? कुभा तङ्बेॽ तगि के़बेसाङ् दाङ्बान् पेलि फाक्नु के़ये़प्मा मे़न्छुमान् आङ्गाॽएरो॥ 27 हाबा कन् अङे़ःक्वान् आङ्गाॽ कत्तुङ्ल फाॽआङ् यहवे दाङ्बान् पेलि फाक्तुङ्ङाङ् वयाङ्, हे़क्क्याङ् कन् अङे़ःक्वान् खुने़ॽ पिराङ्बारो॥ 28 आल्ल आङ्गाॽ कन् अङे़ःक्वान् यहवे दाङ्बान्ने पिरुङ्ल पत्तारो॥ हे़क्क्याङ् कन् अङे़ःक्वान् कुहिङ्हिङ् थारिक् यहवे दाङ्बाले़न्नेरो॥” हे़क्क्याङ् खे़ङ्हाॽरे़ खे़प्मो यहवे दाङ्बे़न् सेसे माङ्से़वा मे़मे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.