१ पत्रुस 4 - लिम्बुनिङ्वाॽफुमाङ्ङिल्ले़ लागि हिङ्मा 1 खे़ल्ले़चोगुल्ले़ ख्रिस्ते़न् नासिङ्गे़न् थक्को तुक्खे च्ये़, हे़क्केलॽरिक् खिनिॽआङ् बाहे़क्तङ्बा निङ्वाॽइन् कत्ते़म्मे़ॽओ, थेआङ्भे़ल्ले़ नासिङ्गे़न् थक्को तुक्खे के़जाबाल्ले़ लायो चोःक्मा ले़रुआङ् वाॽरो॥ 2 हे़क्केःल्ले़ खे़न् हिङ्ल थारिक् मनाहाॽरे़ मे़इःत्तुबा फे़न्निङ्वाॽ कुइसिक् मेःन्, कर निङ्वाॽफुमाङ्ङिल्ले़ कुनिङ्वाॽ कुइसिक् हिङ्लो॥ 3 थेआङ्भे़ल्ले़ के़बेःक्पा ये़म्मो नसान् मे़न्जोःक्मनाबाहाॽ हे़क्के याम्बोःप्मा याःम्बक् चोःक्मा, फे़न्निङ्वाॽ चोःक्मा, थिःल्ले़ मःसिङ्मा, यरिक् चामा थुङ्माआङ् याम्बोःत्छे़ चुम्मा, याम्दादाबा चामुक् थिमुक् चोःक्मा नु सिक्के़ले़ःङ्बा नावाइत्लाहाॽ से़वा चोःक्माओ यरिक् ये़म् के़देःसुम्लो॥ 4 खे़ङ्हाॽरे़ आल्लो हे़क्तङ्बा फे़न् पाःन्हाॽ खुनिॽनु सोरिक् के़म्बत्छिन्बा मे़निसुआङ् साॽरिक् खुनिॽ निङ्वाॽ मये़आङ् वाॽरो॥ हे़क्क्याङ् खे़ङ्हाॽरे़ खिनिॽ नागे़म्धासि के़म्बिरिॽरो 5 कर कुहिङ्वे़त् नु के़सिबाहाॽरे़ खासे़न् चोःक्मा यारिप् के़वाॽबा निङ्वाॽफुमाङ्ङिल्ले़ कुदगि खे़ङ्हाॽग ये़प्माए पोङ्लो॥ 6 बा खे़ल्ले़चोगुल्ले़ए आल्लो के़सिबाहाॽआङ् मे़न्छाम् याप्मि हे़क्के नासिङ्गे़न् थक्को खे़ङ्हाॽरे़ खुनिॽ खासे़न् पोङ्लो, कर याम्साम्मो निङ्वाॽफुमाङ् कुइसिक् मे़हिङ्ल फाॽआङ् सुनाइङ्ङिन् इङ्भोसे़आङ् वाॽरो॥ 7 काक् पाःन्हाॽरे़ कुनुप्मान् निःत्ताङ्ङे त्ये़आङ् वाॽरो॥ खे़ल्ले़चोगुल्ले़ खिनिॽ तुवा चोःक्मा के़सुक्तिर फाॽआङ् सेसे निङ्वाॽ नु चाङ्जाङ्ङाङ् वये़म्मे़ॽओ॥ 8 काक्नुःल्ले़ यम्बा पाःन्निङ्ग सिक्लुङ्मोलाम् लुङ्माॽ तुक्कासिम्मे़ॽओ, थेआङ्भे़ल्ले़ लुङ्माॽ तुक्माल्ले़ग यरिक् लायोहाॽ ते़प्तुॽरो॥ 9 हे़क्क्याङ् कानाक्नाक् मे़ल्लॽए तरे तोःआसिम्मे़ॽओ॥ 10 निङ्वाॽफुमाङ्ङिल्ले़ कुलुङ्गुम्लाम् परिक् परिक्पा पर्धाःम्मिन् के़घोसुम्माङ् वाॽ॥ काक्ले़ खे़न् के़घोसुम्बा पर्धाःम्मिन् कुभाॽ पिसिङ्माओ नुरिक्काङ् याङे़म्मे़ॽओ॥ 11 पाःन्जाक् के़बाःप्पाल्ले़ निङ्वाॽफुमाङ्ङिल्ले़ कुबाःन्जाक् कुइसिक् पाःत्तुर, वेॽहाॽ से़वा के़जोःक्पाल्ले़ निङ्वाॽफुमाङ्ङिल्ले़ पिरुबा थुम्मिल्ले़ से़वा चोगुररो॥ हे़क्केलॽरिक् काक् पाःन्नो ये़सु ख्रिस्तलाम् निङ्वाॽफुमाङ्ङिल्ले़ कुमिमिदिङ् पोङ्लरो॥ काक् मिमिदिङ् नु मुक्साम्मिङ्ग सदादिङ् खुने़ॽइन्नेरो॥ आमे़न्॥ ख्रिस्तरे़ लागि तुक्खे चामा पोङ् 12 आमिःम् आन्जुम्से, खिनिॽ के़साक्पा इनोगे़न् तुक्खे कुधिम्बा हङ्साॽमो के़ध्ये़ॽइल्ले़ खिनिॽनु निङ्वाॽ के़माबा पान् पोःक्खे़ फाॽआङ् खिनिॽ निङ्वाॽ मे़मये़म्मिन्ने़ॽओ, 13 कर ख्रिस्ते़न् तुक्खे च्ये़बा हे़क्के खिनिॽआङ् इनोगे़न् तुक्खेओ के़ध्ये़ॽइल्ले़ सःत्ते़म्मे़ॽओ, थेआङ्भे़ल्ले़ कुयुमा ये़न्नो कुमिमिदिङ्ङिन् ओसेःन्दाङ् पोङ्ङिल्ले़ पसःत् के़सःत्तिॽरो॥ 14 ख्रिस्ते़न् नसान् के़जोगुम्बाल्ले़ चोगुल्ले़ खिनिॽ नागे़म्धासि के़म्बिरिने़ फाॽग्र मुॽइसाबानिङ्लो, थेआङ्भे़ल्ले़ निङ्वाॽफुमाङ्ङिल्ले़ कुमिमिदिङ्गे़न् सेसेमाङ्ङिन् खिनिॽनु वाॽरो॥ 15 खिनिॽ इनोगे़न् तुक्खे के़ज्ये़ॽइल्ले़ मना के़से़प्पा, के़घुःम्बा, ताप्फे़ःम्बा याःम्बक् के़जोःक्पा हे़क्क्याङ् वेॽहाॽरे़ खुनिॽ पाःन्नो हुक् के़याक्पा मनान् तुक्खे चाःबा कुइसिक् तुक्खे मे़जे़म्मिन्ने़ॽओ॥ 16 कर ख्रिस्तानि के़बोःक्खिबाल्ले़ तुक्खे के़ज्ये़ॽइने़ फाॽग्र सिरिङ् मे़मये़म्मिन्ने़ॽओ, कर निङ्वाॽफुमाङ्ङिल्ले़ कुनारा फोसे़म्मे़ॽ, थेआङ्भे़ल्ले़ खुने़ॽ कुमिङ्ङिन् खिनिॽ के़दक्तुम्माङ् के़वयिॽरो॥ 17 आल्ल खासे़न् पोङ्मा ये़म् त्ये़आङ् वाॽ, हे़क्क्याङ् निङ्वाॽफुमाङ्ङिल्ले़ कुमनाहाॽओनु हेःक्सिङ्लो॥ आल्ल आनिॽलाम्मे खासे़न् पोङ्मा हेःक्सिङ्ने़ फाॽग्र, निङ्वाॽफुमाङ्ङिल्ले़ कुसुनाइङ् खे़म्मा मे़न्दे़म्मनाबाहाॽ थे मे़बोङ्बे? 18 आल्ल साम्योसाप्लाओ अक्खे साप्ते़आङ् पत्, “साम्योबाहाॽ ताङ्से़ःप्मासि साक्ने़ फाॽग्र, निङ्वाॽफुमाङ्ङिन् नसान् मे़न्जोःक्मनाबा नु लायोबान् थे पोङ्बाबे?” 19 खे़ल्ले़चोगुल्ले़ आत्तिन्हाॽ निङ्वाॽफुमाङ्ङिल्ले़ कुनिङ्वाॽ कुइसिक् इनोगे़न् तुक्खेओ मे़धाःॽ, खे़ङ्हाॽरे़ खुनिॽ नसाःन्साबा चइःत्दाङ्बाओ ताःक्पो मे़युक्खुर हे़क्क्याङ् चक्मे़ल्लॽए नुबा याःम्बक् मे़जोगुररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.