१ पत्रुस 2 - लिम्बु1 खे़ल्ले़चोगुल्ले़ खिनिॽग मना तुक्खे के़जाःप्पा काक् फे़न् याःम्बक्हाॽ ले़रे़म्देःसे़म्मे़ॽओ॥ इङ्ले़क् थेआङ् मे़बाःत्ते़म्मिन्ने़ॽ, साम्योबा मे़ले़ङ्ङासिम्मे़न्ने़ॽ, नाहे़म्मा याःम्बक् मे़जोगे़म्मिन्ने़ॽ हे़क्क्याङ् काक् परिक्पा चे़ॽयापान् मे़बारे़म्मिन्ने़ॽओ॥ 2 खारक् सागे़वाःन्छिङ्बा अङे़ःक्वाःल्ले़ नुःन् थुङ्मा कोःत्तुबा कुइसिक् निङ्वाॽफु पाःन्जाक्किल्ले़न् सुत्थो याम्साम्गे़न् नुःन् थुङ्मा निङ्वाॽ चोगे़म्मे़ॽओ, हे़क्केलॽरिक् खे़न्लाम्बा खिनिॽ से़न्लप्पो के़बोरिर के़बेगिॽरो॥ 3 थेआङ्भे़ल्ले़ खिनिॽग दाङ्बान् नुबा चोक् फाॽआङ् निङ्वाॽ के़घोसुम्माङ् के़वयिॽरो॥ कुहिङ्वे़त् लुङ्हाॽरे़न् याम्साम्गे़न् माङ्हिम् 4 मनाहाॽरे़ मे़नाॽरुबा कर निङ्वाॽफुमाङ्ङिल्ले़ सेगुबा इमे़ल्लुङ्बा कुहिङ्वे़त् लुङ् ख्रिस्तओ के़द्ये़ॽइल्ले़ 5 खिनिॽआङ् कुहिङ्वे़त् लुङ् कुइसिक् निङ्वाॽफुमाङ्ङिल्ले़ याम्साम्गे़न् माङ्हिम् के़जोगिॽरो॥ खिनिॽग ये़सु ख्रिस्तलाम्बा निङ्वाॽफुमाङ्ङिल्ले़ कुनिङ्वाॽ के़दाबा याम्साम्गे़न् सिदुङ्जभा के़दोम्बा सेसे निङ्वाॽफुसाम्बानिङ्लो॥ 6 थेआङ्भे़ल्ले़ साम्योसाप्लाओ अक्खेलॽरिक् साप्ते़आङ् पत्, “ओमे़त्ते़म्मे़ॽओ, इङ्गाॽ सेःक्मनाबा नु इमे़ल्लुङ्बा कुम्मालुङ्ङिन् यरुसले़म्मो ने़स्सुङ्लो, हे़क्क्याङ् खुने़ॽ सम्दाङ् नसान् के़जोःक्पाङ्ग आप्फाल्ले़आङ् सिरिङ्ममो मे़धाने़न्लो॥” 7 आल्ल खिनिॽ नसान् के़जोःक्पाहाॽरे़ लागि खुने़ॽ इमे़ल्लुङ्बा लुङ् चोक्लो, कर नसान् मे़न्जोःक्मनाबाहाॽरे़ लागिग साम्योसाप्लाओ अक्खे साप्ते़आङ् पत्, “लुङ् के़गाम्बाहाॽरे़ मे़नाॽरुबा लुङ्ङिन् कुम्मालुङ् पोःक्खे़आङ् वाॽरो॥” 8 हे़क्क्याङ् “खे़न् लुङ्ङिल्ले़ मनाहाॽ खसुसिआङ् मे़जोन्लो॥” खे़ङ्हाॽरे़ निङ्वाॽफु पाःन्जाक्किन् मे़न्इःत्तुन् मे़न्नाःत्तुन्बाल्ले़ चोगुल्ले़ मे़जोन्लो॥ हे़क्तङ्बा मनाहाॽ मे़जोःन् फाॽआङ् निङ्वाॽफुमाङ्ङिल्ले़ तगिसा निःन्धो चोगुआङ् वये़॥ 9 कर खिनिॽग निङ्वाॽफुमाङ्ङिल्ले़ के़सेगिबा मना, हाङ् निङ्वाॽफुसाम्बा, सेसे सुवाङ् हे़क्क्याङ् निङ्वाॽफुमाङ्ङिल्ले़ कुमनानिङ्लो॥ खिनिॽग निङ्वाॽफुमाङ्ङिल्ले़ चोगुबा निङ्वाॽ के़माबा याःम्बक्हाॽ इङ्गे़भोसुम्ल फाॽआङ् माक्चिगे़न् खादाम्मोलाम् निङ्वाॽ के़माबा से़न्दाङ्गे़न् ओःत्तिओ खिनिॽ के़उःत्तिआङ् के़वयिॽरो॥ 10 तगिग खिनिॽ कुमना के़होःप्ति, कर आल्लग निङ्वाॽफुमाङ्ङिल्ले़ कुमना के़बोःक्खिआङ् के़वयिॽ॥ तगि खिनिॽ निङ्वाॽफुमाङ्ङिल्ले़ लुङ्माॽ मे़न्दुक्के के़वयि, कर आल्ल निङ्वाॽफुमाङ्ङिल्ले़ लुङ्माॽ के़दुक्तिआङ् के़वयिॽरो॥ निङ्वाॽफुमाङ्ङिल्ले़ कुसे़वारोबा हे़क्के वये़म्मे़ॽ 11 आमिःम् फुॽनुसाॽ नु ने़ॽनुसाॽसे, खिनिॽग कप्मो वे़प्मिबा नु माःङ्घा लाजेॽबा कुइसिक् के़वयिबाल्ले़ चोगुल्ले़ लायोबा फे़न् निङ्वाॽलाम् लाःत्लाःत् वये़म्मे़ॽ फाॽआङ् पेलि फाक्निङ्लो॥ खे़न् लायोबा फे़न् निङ्वाॽइङ्ग खिनिॽ याम्साम्मिल्ले़ कुदक्ले़ङ्वाओ पोःक्लो॥ 12 खिनिॽग ख्रिस्ते़न् नसान् मे़न्जोःक्मनाबाहाॽनु नुरिक्काङ् नुबा हिङ्मन्नो वये़म्मे़ॽओ, थेआङ्भे़ल्ले़ खे़ङ्हाॽरे़ खिनिॽ फे़न् पाःन्हाॽ के़जोगुम् लॽरिक् पान् के़म्धिक्तिसाङ् खिनिॽ के़जोगुम्बा नुबा याःम्बक्हाॽ मे़निसुर, खासे़न् चोःक्से़ युबा ये़न्नो कुनारा मे़भोसुॽरो॥ 13 काक् मे़न्छाम् युक्साबाहाॽ हे़क्क्याङ् काक्नु यम्बा युक् के़गप्पा हाङ्ङिल्ले़ कुयुक्को वये़म्मे़ॽ के़लॽबा दाङ्बाल्ले़ निङ्वाॽ चोगुॽरो॥ 14 खिनिॽग काक् सुहाङ्युक्पाहाॽरे़ खुनिॽ पाःन्हाॽ ते़न्दिङ् चोःक्मा पोङ्लो, थेआङ्भे़ल्ले़ निङ्वाॽफुमाङ्ङिल्ले़ खे़ङ्हाॽ फे़न् याःम्बक् के़जोःक्पाहाॽ खुम्दिङ् पिमासि नु नुबा याःम्बक् के़जोःक्पाहाॽ नाराफोमा पाङ्घुसिबारो॥ 15 थेआङ्भे़ल्ले़ खिनिॽ के़जोगुम्बा नुबा याःम्बक्हाॽरे़ पान् कुसिङ् मे़न्निःप्मनाबाहाॽरे़ खुनिॽ मुरान् हुॽरे़म् पिरे़म्सिम्मे़ॽ के़लॽबा निङ्वाॽफुमाङ्ङिल्ले़ कुनिङ्वाॽ वाॽरो॥ 16 खिनिॽग चोःक्युम्भोबानिङ्साङ् निङ्वाॽफुमाङ्ङिल्ले़ कुसेवारोबानिङ्लो, कर चोःक्युम्भोबासिगे़ फाॽआङ् फे़न् याःम्बक् मे़जोगे़म्मिन्ने़ॽ॥ 17 काक् मनाहाॽ मिङ्सो इङ्धाङ् पिरे़म्सिम्मे़ॽ, वेॽ नसानिबा फुॽनुसाॽ नु ने़ॽनुसाॽहाॽ लुङ्माॽ तुक्ते़म्सिम्मे़ॽ, किसे़म्मे़ॽर निङ्वाॽफुमाङ्ङिन् इङ्धाङ् पिरे़म्मे़ॽ हे़क्क्याङ् हाङ् के़जोक्पे़न् मिङ्सो इङ्धाङ् पिरे़म्मे़ॽओ॥ दाङ्बाहाॽरे़ खुनिॽ युक्को वाॽमा पोङ् 18 सेवारोबासे, खिनिॽ दाङ्बाहाॽरे़न् काक् युक्को वये़म्मे़ॽओ॥ नुबा नु कुनिङ्वाॽ के़बाःङ्बाहाॽरे़न्लक् मेःन्, कर के़आःम्बा हिम्दाङ्बाहाॽरे़न्नाङ् खुनिॽ युक्को वये़म्मे़ॽओ॥ 19 थेआङ्भे़ल्ले़ निङ्वाॽफुमाङ्ङिन् इङ्धाङ् पिरुङ् फाॽआङ् मे़ल्लाॽमनाबा इनोगे़न् तुक्खेहाॽ के़धम्बाल्ले़ निङ्वाॽफुमाङ्ङिल्ले़ कुनिङ्वाॽ तासुॽ॥ 20 खिनिॽ याःम्बक् के़भेःन्दुम्माङ् के़म्लःप्सिने़ फाॽग्र थेआङ् यम्बा याःम्बक् के़न्जोगुम्मिन्लो॥ कर नुबा याःम्बक् के़जोगुम्माङ् इनोगे़न् तुक्खेन् के़धरुम्ने़ फाॽग्र निङ्वाॽफुमाङ्ङिन् खिनिॽनु कुनिङ्वाॽ तारो॥ 21 बा खे़ल्ले़ लागि खिनिॽ के़उःत्तिआङ् वाॽरो, थेआङ्भे़ल्ले़ ख्रिस्तरे़आङ् खिनिॽ लागि इनोगे़न् तुक्खेन् थरुआङ् खिनिॽ लागि कुबि पोःक्खे़आङ् वाॽ॥ खिनिॽआङ् खुने़ॽ कुलाङ्योःक्किन् के़दिम्दुम्ल पोङ्लो॥ 22 “खुने़ॽग थेआङ् लायो लासोत् मे़जोगुन्, हे़क्क्याङ् थेआङ् इङ्ले़क् पाःन्नाङ् मे़बारे़न्लो॥” 23 खुने़ॽ मनाहाॽरे़ कुजाःत्थि मे़देसुल्ले़ खे़ङ्हाॽओ याङ्ना पान् मे़नुःक्तुन्लो॥ खुने़ॽ तुक्खे चे़ःल्ले़ मना मे़भे़ःक्तुन्छिन्लो॥ कर नुबा खासे़न्दाङ्बा निङ्वाॽफुमाङ्ङोए आबाङे हुक्सुप्सिङ्लो॥ 24 खुने़ॽ आनिॽ लायो लासोःत्तिन् आले़रुम्माङ् साम्योबा हिङ्मन्नो आहिङ्ल फाॽआङ् आनिॽ लायोन् सिलाम्साक्मा सिङ्सम्दाङ् आबाङे नासिङ्गे़न् कुधक्को कुयुदेॽरुरो॥ खुने़ॽ कुगाःम्माओलाम् खिनिॽ के़वेःत्तिआङ् के़वयिॽरो॥ 25 थेआङ्भे़ल्ले़ खिनिॽग ताप्के़बे़ॽबार के़वाॽबा मे़ल्लुक्हाॽ कुइसिक् के़वयि, कर आल्लो खिनिॽ याम्साम्मिन् के़गम्बा नु कम्ब्राङ् के़मे़प्पा दाङ्बाओ के़नुःक्खि के़द्ये़ॽइआङ् के़वयिॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.