१ हाङ् 8 - लिम्बुमाङ्हुप् सन्दोक्किन् माङ्हिम्मो मे़दारु ( २ साप्मु ५:२–६:२ ) 1 खे़ब्याङ् सोलोमनरे़ इस्राइलबा लाम्लोबाहाॽ नु थाःक्थाःक्कोबा लाम्लोबाहाॽ हे़क्क्याङ् इस्राइलि हिम्सयङ्ङोबा कुधे़गेक् कुधे़गेक् मनाहाॽ दाउदरे़ कुये़क्यक्, इग्र सियोनलाम् यहवे दाङ्बे़ल्ले़ कुमाङ्हुप् सन्दोक्किन् ताःप्मारे़ लागि यरुसले़म ये़क्यक्को चुम्मारे़ लागि उःत्तुसि॥ 2 एतानिम ला, इग्र नुसिगेक्पा लाओ के़दाबा तङ्नाम्मोबा ये़म्मो इस्राइलबा के़रे़क् मनाहाॽ सोलोमन हाङ्ङो मे़जुप्से़॥ 3 आल्ल इस्राइलबा के़रे़क् लाम्लोबाहाॽ मे़द्ये़ मे़जुरे़, खे़ब्याङ् निङ्वाॽफुसाम्बाहाॽरे़ यहवे दाङ्बे़ल्ले़ कुमाङ्हुप् सन्दोःक्किन् मे़भोःक्खु॥ 4 हे़क्क्याङ् खे़ङ्हाॽरे़ यहवे दाङ्बे़ल्ले़ कुमाङ्हुप् सन्दोक्किन् नु तुम्मादे़न् साःङ्गाहिम्मिन् हे़क्क्याङ् खे़प्मो के़वाॽबा के़रे़क् सेसे सामाहाॽ मे़बक्खुआङ् थो मे़देॽरु॥ निङ्वाॽफुसाम्बाहाॽ नु ले़बिहाॽरे़ खे़न् मे़बक्खुआङ् थो मे़देॽरु, 5 हे़क्क्याङ् सोलोमन हाङ्ङिन् नु खे़ङ्हाॽरे़ खुन्छिॽ तगि के़जुम्बाआङ् के़वाॽबा इस्राइलबा के़रे़क् सङ्जुम्भोहाॽरे़ निःप्मे़न्दे़त् आत्तातान्ने यरिक् मे़ल्लुक्हाॽ नु से़गम्बा पित्हाॽ सिदुङ्सभा मे़दोन्दुसिर सन्दोक्किल्ले़ कुदगि मे़वये़॥ 6 खे़ब्याङ् निङ्वाॽफुसाम्बाहाॽरे़ यहवे दाङ्बे़ल्ले़ कुमाङ्हुप् सन्दोक्किन् माङ्हिम्मोबा सिगाङ्बा सेसेबादे़न्नो, इग्र के़रे़क्नुःल्ले़ साॽरिक् सेसेबादे़न् खे़न् ते़न्नोए मे़दारुआङ् करुबहाॽरे़ खुन्छिॽ लाप्सिगाङ् मे़युक्खु॥ 7 सन्दोक् मे़युक्खुबादे़न्नो थाःङ् करुबहाॽरे़ खुन्छिॽ लाप्हाॽ फे़सिङ्ङाङ् पत्छे़, हे़क्क्याङ् सन्दोक्किन् नु खे़ल्ले़ कुदॽलाङ्हाॽरे़ कुसम्धाङ् करुबहाॽरे़ खुन्छिॽ लाप्हाॽरे़ इःप्तुआङ् पत्छे़॥ 8 कन् तॽलाङ्हाॽरे़ कुसम्हाॽ सिगाङ् सेसेदे़न्निल्ले़ कुदगाङ्बा सेसेदे़न्लाम् निमा सुक्ते़त्ते़र यारिक् साॽरिक् केःम्बा चोगे़, कर सेसेदे़न्नोबा लाःक्कात्लाम् निमे़दे़त्ते़न्, हे़क्क्याङ् खे़ङ्हाॽ आइन् थारिक्साङ् खे़प्मो युङ्॥ 9 खे़न् सन्दोक्को साप्लुङ् ने़त्छिरक् यागे़, वेॽ थेआङ् मे़यागे़न्, होरेब कोःक्माओ मोसाःल्ले़ खे़न् साप्लुङ्हाॽ सन्दोक्को याक्तुआङ् यागे़, इस्राइलिहाॽरे़ मिस्र लाजेन् मे़ले़रुआङ् मे़धाङे़ल्ले़ खे़प्मो यहवे दाङ्बे़ल्ले़ खुन्छिॽनु माङ्हुप् चोगुआङ् वये़॥ 10 आल्ल निङ्वाॽफुसाम्बाहाॽ सेसेदे़न्नोलाम् लाःक्कात् मे़लःन्दे़, खे़ब्याङ् यहवे दाङ्बे़ल्ले़ कुहिम्मिन् खाॽमिःत्ते़ल्ले़ तिम्से़॥ 11 हे़क्क्याङ् खे़प्मो खाॽमित् यागे़बाल्ले़ चोगुल्ले़ निङ्वाॽफुसाम्बाहाॽरे़ माङ्से़वा चोःक्मा मे़न्छुक्तुन्, थेआङ्भे़ल्ले़ यहवे दाङ्बे़ल्ले़ कुमिमिदिङ्ङिल्ले़ माङ्हिम्मिन् तिम्से़आङ् युङे़रो॥ सोलोमनरे़ यहवे दाङ्बे़ल्ले़ कुनारा फोसु 12 खे़ब्याङ् सोलोमनरे़ पाःत्तु—“यहवे दाङ्बे़ल्ले़ पाःत्तुआङ् वाॽ, खुने़ॽग माक्स्दिःङ् क्याःप्पा खाॽमिःप्पो याङ्धोक्लो॥ 13 खे़ने़ॽ सदादिङ् आभे़ल्ले़साङ् युङ्मारे़ लागि आङ्गाॽ खे़ने़ॽ के़लागि लत्छा के़लाॽबा के़घे़म्बा माङ्हिम् थिक् चोगुङ्ङाङ् युङ्लो॥” 14 आल्ल इस्राइलबा के़रे़क् सङ्जुम्भोहाॽ खे़प्मो मे़ये़म्सिङ्ङाङ् मे़ये़बे़, खे़ब्याङ् सोलोमन हाङ्ङिन् हिसिङ्ङाङ् खे़ङ्हाॽ हाङ्वागे़न् मुॽइसाम् पिरुसि, 15 हे़क्क्याङ् खुने़ॽ पाःत्तु—“यहवे दाङ्बा इस्राइलबा निङ्वाॽफुमाङ्ङिल्ले़ कुनारा पोररो, खुने़ॽ आङ्गाॽ आम्बा दाउदे़न्नु खुने़ॽ आप्फेक् कुम्ब्राःल्ले़ पाःत्तुबा माङ्हुप्पिन् खुने़ॽ कुहुक्किल्ले़ के़त्तुआङ् वाॽरो॥ थेआङ्भे़ल्ले़ खुने़ॽ अक्खे पाःत्तु, 16 ‘आङ्गाॽ आमना इस्राइलिहाॽ मिस्र लाजेॽलाम् लःत्तुङ् थाक्तुङ्सिङ्बा ये़न्नाङ्धो इस्राइलिहाॽओबा के़रे़क् थाःक्हाॽरे़ खुन्छिॽ आत्तिन् ये़क्यक्किन्नाङ् आङ्गाॽ आमिङ् युङ्मारे़ लागि लत्छा माङ्हिम् चोःक्मा पोङ्ॽ फाॽआङ् आङ्गाॽ सेगुङ्बा होप्, कर आङ्गाॽ आमना इस्राइलिहाॽओ युक् चोःक्मारे़ लागि आङ्गाॽ दाउदे़न् सेगुङ्ङाङ् वाॽ॥’” 17 “यहवे दाङ्बे़ल्ले़ कुमिङ्ङिल्ले़ लागि, इस्राइलबा निङ्वाॽफुमाङ्ङिल्ले़ कुलागि माङ्हिम् थिक् चोःक्मारे़ लागि आङ्गाॽ आम्बा दाउदरे़ कुनिङ्वाॽओ वये़॥ 18 कर यहवे दाङ्बे़ल्ले़ आङ्गाॽ आम्बा दाउदे़न् मे़त्तु, ‘आङ्गाॽ आमिङ्ङिल्ले़ लागि लत्छा माङ्हिम् चोःक्मा के़इःत्तुबा खे़ने़ॽ के़निङ्वाॽओबा पाःन्निन् नुबाए चोक्॥ 19 हे़क्केसाङ् खे़ने़ॽ कन् माङ्हिम्मिन् के़न्जोगुन्ॽ, कर खे़ने़ॽ आप्फेक् के़ने़क्सा नु के़माक्खिॽ लाम्बाबा के़स्साःल्ले़ए आङ्गाॽ आमिङ्ङिल्ले़ लागि माङ्हिम् चोगुॽ॥’ 20 “यहवे दाङ्बे़ल्ले़ चोगुबा माङ्हुप्पिन् खुने़ॽ के़त्तु॥ आङ्गाॽ आम्बा दाउदरे़ कुलक्खोबा पोःक्खाङ्ङाङ् वाॽ, हे़क्क्याङ् यहवे दाङ्बे़ल्ले़ माङ्हुप् चोगुबा कुइसिक् आम्बारे़ कुले़क्वाओ इस्राइलबा हाङ्युक्नाओ आङ्गाॽ युङ्ङाॽ, खम्भ्याङ् यहवे दाङ्बे़ल्ले़ कुमिङ्ङिल्ले़ लागि, इस्राइलबा निङ्वाॽफुमाङ्ङिल्ले़ कुमिङ्ङिल्ले़ लागि आङ्गाॽ कन् माङ्हिम्मिन् चोगुङ्ङाङ् युङ्ॽ॥ 21 आङ्गाॽ खे़प्मो यहवे दाङ्बे़ल्ले़ कुमाङ्हुप् सन्दोक्किल्ले़ लागि लत्छा ते़न् थिक् ने़स्सुङ्ङाङ् ने़रो, खुने़ॽ आनिॽ पाधे़बाहाॽ मिस्र लाजेॽलाम् लःत्तु थाक्तुसिल्ले़ खुन्छिॽनु माङ्हुप् चोगुबा माङ्हुप्पिन् खे़प्मो याक्लो॥” सोलोमनरे़ कुबेलि ( २ साप्मु ६:१२-४२ ) 22 खे़ब्याङ् के़रे़क् इस्राइलबा सङ्जुम्भोःल्ले़ खुन्छिॽ तगि यहवे दाङ्बाङ्बाओ ले़त्ति तोःम्मादे़न् तगि ये़म्सिङ्ङाङ् सोलोमनरे़ कुहुक्हाॽ थाःङ् फोःक्खु, 23 हे़क्क्याङ् खुने़ॽ पाःत्तुरो, “यहवे दाङ्बा, इस्राइलबा निङ्वाॽफुमाङ्ङे, थाःङ् साङ्ग्राम्पेदाङ्ङो नु मु इक्सादिङ् खाम्बेःक्मो खे़ने़ॽ हे़क्तङ्बा वेॽ निङ्वाॽफुमाङ् हाःत्ताङ् होप्लो—के़रे़क् सिक्लुङ्माॽरे़ चक्मे़ल्लॽए खे़ने़ॽ के़लाम् के़दिम्बा, खे़न् के़से़वारोबाहाॽनु खे़ने़ॽ माङ्हुप् के़जोगुआङ् चक्मे़ल्लॽए लुङ्माॽ के़दुक्तुसिॽ॥ 24 खे़ने़ॽ के़से़वारोबा आङ्गाॽ आम्बा दाउदे़न्नु के़जोगुबा खे़ने़ॽ के़माङ्हुप्पिन् के़गे़त्तुआङ् वाॽरो॥ आइन् पोःक्खे़आङ् वाॽबा कुइसिक् खे़ने़ॽ आप्फेक् के़म्ब्राःल्ले़ माङ्हुप् के़जोगुबारो हे़क्क्याङ् खे़ने़ॽ आप्फेक् के़हुक्किल्ले़ खे़न् के़गे़त्तुबारो॥ 25 “कल्ले़चोगुल्ले़ आल्ल यहवे दाङ्बा इस्राइलबा निङ्वाॽफुमाङ्ङे, खे़ने़ॽ के़से़वारोबा दाउद आङ्गाॽ आम्बानु अक्खेलॽरिक् माङ्हुप् के़जोगुआङ् के़बाःत्तुबान् के़त्ते़ॽओ, ‘खे़ने़ॽ लाङ्गे़घेबा कुइसिक् खे़ने़ॽ के़स्साहाॽ खुन्छिॽ ये़प्ले़क्को सिङ्सिङ्ङाङ् आङ्गाॽ आदगि लाङ्मे़घेःक्ने़भग्ररक्, इस्राइलबा हाङ्युक्नाओ युङ्मारे़ लागि आभे़ल्ले़आङ् मना मे़न्छुःन्ने़न्ॽ॥’ 26 हे़क्क्याङ् आल्ल इस्राइलबा निङ्वाॽफुमाङ्ङे, खे़ने़ॽ के़से़वारोबा आङ्गाॽ आम्बा दाउदे़न् के़मे़त्तुबा के़बाःन्जाःक्किन् के़त्ते़ॽओ॥ 27 “कर थे निङ्वाॽफुमाङ्ङिन् से़क्खाए इक्सादिङ् खाम्बेःक्मो याङ्धोःक्पि? साङ्ग्राम्पेदाङ्हाॽ, साम्ग्राम्पेदाङ्नुःल्ले़ थाःङ्धाक्पा साङ्ग्राम्पेदाङ्ङो खे़ने़ॽ के़न्हत्ने़न्ने़ल्ले़, आङ्गाॽ चोगुङ्बा कन् माङ्हिम्मोग आक्खेलॽरिक् के़हत्ताङ्बे! 28 हे़क्केसाङ् यहवे दाङ्बा आङ्गाॽ आनिङ्वाॽफुमाङ्ङे, खे़ने़ॽ के़से़वारोबे़ल्ले़ कुबेलिन् नु लुङ्माॽ तुक्मारे़ लागि खुने़ॽ चोगुबा तुवाओ निङ्वाॽ पिरे़ॽओ॥ आइन्बा ये़न्नो खे़ने़ॽए के़दगि के़से़वारोबे़ल्ले़ चोगुबा पेलिन् नु तुवान् खे़प्से़ॽओ॥ 29 कन् माङ्हिम्मिन् खे़ने़ॽ से़न्दिक् ले़न्दिक् ओमे़त्ते़आङ् पत्छे़ॽओ, कन् ते़न्नो, कल्ले़ कुयाःम्बेओ खे़ने़ॽ अक्खे के़बाःत्तुआङ् वये़, ‘आङ्गाॽ आमिङ्ङिन् हाबा खे़प्मोए वाॽ’ हे़क्केलॽरिक् खे़ने़ॽ के़से़वारोबे़ल्ले़ कन् ते़न्नो हिसिङ्ङाङ् पेलि फाक्तुल्ले़ खे़ने़ॽ खे़प्से़ॽओ॥ 30 खे़ने़ॽ के़से़वारोबान् नु के़मना इस्राइलिहाॽरे़ कन् ते़न्नो ले़प्माङ् मे़हिसिङ्ङाङ् तुवा मे़जोःक्किल्ले़ खे़ङ्हाॽरे़ खुन्छिॽ चुङ्जिगे़न् नःम्नःम्बा पेलिन् खे़प्से़ॽओ॥ खे़ने़ॽ के़युक्नादे़न् साङ्ग्राम्पेदाङ्लाम् खे़प्से़ॽओ, खम्भ्याङ् आल्ल खे़ने़ॽ के़घे़प्सुल्ले़, खे़ङ्हाॽ ले़प्मि पिरे़से़ॽओ॥ 31 “कुभा मनाःल्ले़ कुहिम्बेसाङ्बे़न् मे़न्वाॽमना मे़त्तुआङ् माङ्हे़क्सिङ्मा पाङ्घुने़भग्र, हे़क्क्याङ् कन् माङ्हिम् सिगाङ् आदाङ्बारे़ॽओ ले़त्ति तोःम्मादे़न्निल्ले़ कुबेसाङ् माङ्हे़क्सिङ्ने़भग्र, 32 आल्ल खे़ने़ॽ साङ्ग्राम्पेदाङ्लाम् खे़प्से़आङ् खासे़न् चोगे़ॽओ॥ आप्तिक्साबे़न् आप्तिक्साबा लेःत्ते़ॽ हे़क्क्याङ् खे़ल्ले़ कुयाःम्बक्हाॽरे़ कुले़क्वा खुने़ॽए कुधे़गेःक्पो थासे़ॽर खे़ने़ॽ के़से़वारोबाहाॽरे़ खुन्छिॽ लुम्मो खासे़न् चोगे़ॽओ॥ कुदोःप्मान् कुदोःप्माए लेःत्ते़ॽओ, हे़क्क्याङ् खे़न् कुदोःप्मा कुयाःम्बक्कोए थधप् मे़ल्लॽए के़वाॽबा चोगे़ॽओ॥ 33 “आल्ल आदाङ्बारे़ के़मना इस्राइलिहाॽरे़ आदाङ्बारे़ के़दक्ले़ङ्वाओ लायो मे़जोगुआङ् खे़ङ्हाॽ खुन्छिॽ निङ्मिहाॽलाम् हारिमे़द्ये़आङ् मे़वाॽ, हे़क्क्याङ् खे़ङ्हाॽरे़ आदाङ्बारे़ के़मिङ्ङिन् मे़बाःत्तुर कन् माङ्हिम्मो तुवा नु चुङ्जिगे़न् नःम्नःम् पेलि फाक्कि आदाङ्बा ले़प्माङ् मे़नुःङ्ने़भग्र, 34 खम्भ्याङ् आदाङ्बारे़ साङ्ग्राम्पेदाङ्लाम् खे़ङ्हाॽरे़ खुन्छिॽ पेलिन् खे़प्से़ॽआङ् खे़ने़ॽ के़मना इस्राइलिहाॽरे़ खुन्छिॽ लायोन् ले़प्मि चोगे़ पिरे़से़ॽओ, हे़क्क्याङ् खे़ङ्हाॽरे़ खुन्छिॽ पाधे़बाहाॽ के़बिरुसिबा लाजेॽओ खे़ङ्हाॽ नुःक्ते़ तारे़से़ॽओ॥ 35 “आदाङ्बारे़ के़मनाहाॽरे़ आदाङ्बारे़ के़दक्ले़ङ्वाओ लायो मे़जोगुबाल्ले़ चोगुल्ले़ ताङ्साङ्बे़न् सुप्सिङ्ङाङ् वहित् मे़न्धाए वाॽ, हे़क्क्याङ् आदाङ्बारे़ खे़ङ्हाॽ तुक्खे के़जाःत्तुसिबाल्ले़ चोगुल्ले़ आदाङ्बारे़ के़मिङ्ङिन् पाःप्मा मे़दे़न् हे़क्क्याङ् खुन्छिॽ लायोलाम् खे़न् ते़न्नो मे़नुःङ् मे़दाआङ् पेलिगे़न् तुवा मे़जोःक्किल्ले़, 36 साङ्ग्राम्पेदाङ्लाम् खे़ङ्हाॽरे़ खुन्छिॽ पेलिन् खे़प्से़ॽओ, खम्भ्याङ् खे़ने़ॽ के़से़वारोबा, खे़ने़ॽ के़मना इस्राइलिहाॽरे़ खुन्छिॽ लायोन् ले़प्मि पिरे़से़ॽओ॥ खे़ङ्हाॽ लाङ्घेःक्मा के़बोङ्बा नुबा ये़प्ले़क्किन् खे़ने़ॽ हुॽरे़से़ॽओ, हे़क्क्याङ् खे़ने़ॽ के़मनाहाॽ खुन्छिॽ लक्खोमारे़ लागि के़बिरुसिबा लाजेॽओ वहित् थासुर याःन्दे़ पिरे़से़ॽओ॥ 37 “आल्ल लाजेॽओ साक् पोक् इग्र तुक्खे लाक्खे ताःल्ले़, किग्र सिङ्सेॽहाॽ हेसि इग्र खुक्वामेःत् के़धाबा ये़म् किग्र निःङ्घुक्वाहाॽ नु फेॽबाःत्हाॽ तामा ये़म् ताःल्ले़, इग्र निङ्मिहाॽरे़ खे़ङ्हाॽरे़ खुन्छिॽ कुभा ये़क्यक्किन् मे़गबुॽ, आक्तङ्बा तुक्मा लाःक्मा इग्र मे़क्मासिमा तासाङ् 38 हे़क्क्याङ् आल्ल खे़ने़ॽ के़मना इस्राइलिहाॽओ कुभारे़ तुवा मे़जोगुॽ इग्र चुङ्जिगे़न् नःम्नःम्माङ् पेलि मे़दोन्दुॽ खे़ब्याङ् के़रे़क्ले़ खुन्छिॽ निङ्वाॽओबा तुक्खेन् मे़इःत्तुआङ् खुन्छिॽ हुक्हाॽ कन् माङ्हिम् ले़प्माङ् मे़भोःक्खुल्ले़ खे़ने़ॽ के़युक्नादे़न् साङ्ग्राम्पेदाङ्लाम् खे़प्से़ॽ॥ हे़क्क्याङ् ले़प्मि पिरे़से़ॽआङ् याःम्बक् चोगे़ॽओ॥ 39 खे़ने़ॽ के़रे़क् मनाहाॽरे़ खुन्छिॽ निङ्वाॽ के़निसुबाल्ले़ चोगुल्ले़ खे़ङ्हाॽ खुन्छिॽ याःम्बक् कुइसिक् मे़त्ते़से़ॽओ (थेआङ्भे़ल्ले़ खे़ने़ॽरक् के़रे़क् मनाहाॽरे़ खुन्छिॽ निङ्वान् के़निसुरो), 40 हे़क्केलॽरिक् खे़ने़ॽ आनिगे पाधे़बाहाॽ के़बिरुसिबा लाजेॽओ खुन्छिॽ हिङ्हिङ्ङे खे़ने़ॽ के़म्गित्लरो॥ 41 “खे़ने़ॽ के़मना इस्राइलिहाॽनुःल्ले़ लाःत्कात्पा कुभा वेॽ लाजेॽबा मनाःल्ले़ 42 खे़ने़ॽ पयम् यम्बा के़मिङ्ङिन् नु खे़ने़ॽ मुक्साम्साबा के़हुक्किन् हे़क्क्याङ् के़सन्छुबा के़हुक्किल्ले़ कुयाःम्बेओ खे़प्सुआङ् माःङ्घाबा लाजेॽलाम् ता हे़क्क्याङ् आल्ल कन् माङ्हिम् ले़प्माङ् हिसिङ्ङाङ् खे़ल्ले़ पेलिगे़न् तुवा चोगुल्ले़ 43 खे़ने़ॽ के़युक्ना साङ्ग्राम्पेदाङ्लाम् खे़प्से़ॽओ, हे़क्क्याङ् खे़न् वेॽ लाजेॽबाल्ले़ नाःक्तुबे़न् पिरे़ॽओ, हे़क्केलॽरिक् खे़ने़ॽ के़मना इस्राइलिहाॽ कुइसिक् इक्सादिङ् खाम्बेःक्मोबा के़रे़क् मनाहाॽरे़ खे़ने़ॽ के़मिङ्ङिन् कुसिङ् मे़निःत्तुआङ् खे़ने़ॽनु मे़गिररो, हे़क्क्याङ् आङ्गाॽ चोगुङ्बा कन् माङ्हिम्मिन् खे़ने़ॽ के़मिङ्ङो चोगुङ्बा फाॽआङ् कुसिङ् मे़निःत्तुररो॥ 44 “खे़ने़ॽ के़मनाहाॽ आत्ति आत्ति के़बाङ्घुसिॽ, खे़प्मो खे़ङ्हाॽ कुभा खुन्छिॽ निङ्मिहाॽरे़ तक्ले़ङ्वाओ थङ् चोःक्से़ मे़बेःक्किल्ले़ खे़ने़ॽ के़सेगुबा कन् ये़क्यक् ले़प्माङ् नु आङ्गाॽ खे़ने़ॽ के़मिङ्ङिल्ले़ लागि चोगुङ्बा कन् माङ्हिम् ले़प्माङ् मे़हिसिङ्ङाङ् खे़ङ्हाॽ तुवा मे़जोःक्किल्ले़, 45 खे़ने़ॽ खे़ङ्हाॽरे़ मे़जोगुबा तुवान् नु पेलिन् साङ्ग्राम्पेदाङ्लाम् खे़प्से़ॽओ हे़क्क्याङ् खे़ङ्हाॽरे़ खुन्छिॽ पन्ये़म्मो पत्छे़ॽओ॥ 46 “आल्ल के़मनाहाॽरे़ खे़ने़ॽ के़दक्ले़ङ्वाओ लायो मे़जोगुॽ—थेआङ्भे़ल्ले़ लायो मे़न्जोःक्मनाबा मना हाःत्ताङ् होप्—हे़क्क्याङ् खे़ने़ॽ खे़ङ्हाॽनु के़सिक् पोःक्काङ् खे़ङ्हाॽ निङ्मिहाॽरे़ खुन्छिॽ हुक्को के़धासुसिॽ हे़क्क्याङ् खे़न् निङ्मिहाॽरे़ खे़ङ्हाॽ माःङ्घा इग्र निःत्ताङ् खुन्छिॽ लाजेॽओ मे़दे़म्सु मे़देॽरुसिॽ, 47 हे़क्क्याङ् खुन्छिॽ मे़दे़म्सु मे़देॽरुसिबा लाजेॽओ खे़ङ्हाॽरे़ तुक्खे लाक्खे मे़दुमुबाल्ले़ चोगुल्ले़ खुन्छिॽ निङ्वाॽ नुःङ्ङाङ् खे़न् लाजेॽओ खुन्छिॽ लायोलाम् मे़हिन्ॽ हे़क्क्याङ् खे़ने़ॽ पेलि के़म्भाक्काङ् ‘आनिगे लायो चोगुम्बे़, आनिगे याःम्बक् फेःन्दुम्बे़, हे़क्क्याङ् फे़न्याःम्बक् चोगुम्बे़,’ मे़बाःत्तुने़भग्र, 48 हे़क्क्याङ् खे़ङ्हाॽ के़दे़म्बा के़देॽबा खुन्छिॽ निङ्मिहाॽरे़ खुनिॽ लाजेॽओ खे़ङ्हाॽ याम्मो खुन्छिॽ के़रे़क् सिक्लुङ्माॽ नु के़रे़क् निङ्वाॽरे़ खे़ने़ॽ ले़प्माङ् मे़नुःङ्ङाङ् खुन्छिॽ पाधे़बाहाॽ खे़ने़ॽ के़बिरुसिबा लाजेॽओ नु खे़ने़ॽ के़सेगुबा कन् ये़क्यक्को हे़क्क्याङ् खे़ने़ॽ के़मिङ्ङिल्ले़ लागि आङ्गाॽ चोगुङ्बा कन् माङ्हिम् ले़प्माङ् मे़हिसिङ्ङाङ् खे़ने़ॽ पेलि के़म्भाक्ने़भग्र, 49 खे़ने़ॽ के़युक्नादे़न् साङ्ग्राम्पेदाङ्लाम् खे़ङ्हाॽरे़ मे़जोगुबा तुवान् नु पेलिन् खे़प्से़ॽओ खम्भ्याङ् खे़ङ्हाॽरे़ खुन्छिॽ पन्ये़म्मो पत्छे़ॽओ॥ 50 हे़क्क्याङ् खे़ने़ॽ के़दक्ले़ङ्वाओ लायो के़जोःक्पा खे़ने़ॽ के़मनाहाॽ ले़प्मि पिरे़से़ॽओ, हे़क्क्याङ् खे़ङ्हाॽरे़ खुन्छिॽ के़रे़क् फे़न्याःम्बक्हाॽ ले़प्मि पिरे़से़ॽओ, खे़ब्याङ् खुन्छिॽ के़नाःम्बाहाॽरे़ खे़ङ्हाॽ लुङ्माॽ मे़दुक्तुसिर याःन्दे़से़ॽओ॥ 51 थेआङ्भे़ल्ले़ खे़ङ्हाॽ खे़ने़ॽ मिस्र लाजेॽलाम्, इग्र फे़न्जेॽ योःम्मा मिदःत्तोलाम् के़लःत्तु के़धाक्तुसिबा खे़ने़ॽए के़लक्खोबा, खे़ने़ॽए के़मनासिरो॥ 52 “खे़ने़ॽ के़से़वारोबे़ल्ले़ कुबेलिगे़न् तुवा नु खे़ने़ॽ के़मना इस्राइलिहाॽरे़ खुन्छिॽ पेलिगे़न् तुवाःल्ले़ लागि खे़ने़ॽ के़मिक्हाॽ हङ् लॽररो, हे़क्क्याङ् खे़ङ्हाॽरे़ पेलि के़म्भाक्किल्ले़ खे़ने़ॽ निङ्वाॽ पिरे़ॽआङ् खे़प्से़ॽओ॥ 53 थेआङ्भे़ल्ले़ यहवे दाङ्बा निङ्वाॽफुमाङ्ङे, आनिगे पाधे़बाहाॽ, मिस्र लाजेॽलाम् के़लःत्तु के़धाक्तुसिल्ले़ खे़ने़ॽ के़से़वारोबा मोसालाम्बा उवा के़जोगुआङ् वये़बा हे़क्केए खे़ने़ॽ खे़ङ्हाॽ आप्फेक् के़लक्खोबा पोङ्मारे़ लागि इक्सादिङ् खाम्बेःक्मोबा के़रे़क् मे़न्छाम् सुवाङ्हाॽरे़ खुन्छिॽ लुम्मोलाम् एःक् के़से़न्दुसिरो॥” कुनुप्मा पेलि 54 आल्ल सोलोमनरे़ यहवे दाङ्बाओ कन् तुवान् नु चुङ्जिगे़न् नःम्नःम्बा पेलिन् चोगुसुरुआङ् वये़, खे़ब्याङ् खुने़ॽ यहवे दाङ्बाओ ले़त्ति तोःम्मादे़न्निल्ले़ कुदगिलाम् पोगे़, खुने़ॽ खे़प्मो साङ्ग्राम्पेदाङ् ले़प्माङ् कुहुक्हाॽ फोःक्खुआङ् थुङ्बोहजॽ युङ्सिङ्ङाङ् युङे़॥ 55 खुने़ॽ पोगे़आङ् यम्बा इक्लाओ अक्खे पाःत्तुर इस्राइलबा के़रे़क् सङ्जुम्भोहाॽ मुॽइसाम् पिरुसिरो— 56 “खुने़ॽ माङ्हुप् चोगुबा कुइसिक् खुने़ॽ कुमना इस्राइलिहाॽ नाःम्सिङ्मा के़बिबा यहवे दाङ्बे़ल्ले़ कुनारा पोररो॥ खुने़ॽ कुसे़वारोबा मोसान् लाम्बा चोगुबा के़रे़क् नुबा माङ्हुप्हाॽओ लत्छाआङ् मे़ङ्गे़प्मनाबा मे़म्बोङ्ङे वाॽ॥ 57 आनिॽ थाःक्थे़बाहाॽनु वये़बा कुइसिक् यहवे दाङ्बा आनिॽ निङ्वाॽफुमाङ्ङिन् आनिॽनु वाॽर॥ खुने़ॽ आनिॽ आप्फाल्ले़आङ् आल्ले़त्ने़न्ल हे़क्क्याङ् लाप्पाङ् आम्भुने़न्लरो॥ 58 खुने़ॽ आनिॽ पाधे़बाहाॽ पिरुसिबा माङ्हुप्हाॽ, इङ्जाङ्हाॽ नु थिम्हाॽ इःप्मा नाःप्मार खुने़ॽ के़रे़क् कुलाम्हाॽओ लाङ्घेःक्मारे़ लागि खुने़ॽ आनिॽ सिक्लुङ्माहाॽ खुने़ॽ ले़प्माङ् हिसुर॥ 59 हे़क्क्याङ् यहवे दाङ्बे़ल्ले़ कुदगि आङ्गाॽ कन् आबाःन्जाःक्हाॽ तोःन्दुङ्ङाङ् वाॽ, से़न्दिक् ले़न्दिक् यहवे दाङ्बा आनिॽ निङ्वाॽफुमाङ्ङो वाॽर, थिक्याःन्धक् चाहा चोःक्पा कुइसिक् खुने़ॽ कुमना इस्राइलिहाॽरे़ मे़जोगुल्ले़ खुने़ॽ कुसे़वारोबाहाॽ ले़प्माङ् वाॽ, 60 हे़क्केलॽरिक् यहवे दाङ्बे़न्ने निङ्वाॽफुमाङ् नु खुने़ॽनुःल्ले़ वेॽ हाःत्ताङ् होप् फाॽआङ् इक्सादिङ् खाम्बेःक्मोबा के़रे़क् मनाहाॽरे़ कुसिङ् मे़निःत्तुर॥ 61 कर आइन्बा ये़म् हे़क्के खुने़ॽ कुइङ्दत्हाॽलाम् हिङ्मा नु खुने़ॽ कुइङ्जाङ्हाॽ इःप्मा नाःप्मारे़ लागि खिनिॽ सिक्लुङ्मान् यहवे दाङ्बा निङ्वाॽफुमाङ्ङो के़रे़क् परिक्ले़ तोःम्माए पोङ्लो॥” माङ्हिम्मिन् मे़दोन्दु ( २ साप्मु ७:४-१० ) 62 खे़ब्याङ् सोलोमन हाङ्ङिन् हे़क्क्याङ् खुने़ॽनु के़वाॽबा के़रे़क् इस्राइलिहाॽरे़ यहवे दाङ्बे़ल्ले़ कुदगि सिदुङ्जभाहाॽ मे़दोन्दु॥ 63 सोलोमनरे़ २२,००० पित्थक्साहाॽ नु १,२०,००० मे़ल्लुक् मे़ःन्दाहाॽ यहवे दाङ्बाओ तङ्जुम् सिदुङ्जभारे़ लागि तोःन्दुसि॥ कम्भलॽरिक्के हाङ्ङिन् नु के़रे़क् इस्राइलिहाॽरे़ यहवे दाङ्बे़ल्ले़ कुहिम्मिन् मे़दोन्दु॥ 64 आम्भा कल्ले़ याःन्दिक् हाङ्ङिल्ले़ यहवे दाङ्बे़ल्ले़ कुहिम् तगिबा लक्खुम्मोबा कुलुम् लक्किन् तोःन्दु, हे़क्क्याङ् खुने़ॽ खे़प्मो मिधिङ्मनादेमनाबा सिदुङ्जभा, पोगुगे़न् कुजा सिदुङ्जभा नु तङ्जुम् सिदुङ्जभाःल्ले़ कुसोःत्तिन् तोःन्दु, थेआङ्भे़ल्ले़ मिधिङ्मनादेमनाबा वयागे़न् सिदुङ्जभा, पोगुगे़न् कुजा सिदुङ्जभा नु तङ्जुम् वयागे़न् सिदुङ्जभाःल्ले़ कुसोत् याङ्मारे़ लागि यहवे दाङ्बे़ल्ले़ कुदगि के़युङ्बा कासा ले़त्ति तोःम्मादे़न्निन् साॽरिक् चुःक्पा चोगे़॥ 65 खम्भ्याङ् सोलोमन हे़क्क्याङ् खुने़ॽनु के़वाॽबा के़रे़क् इस्राइलिहाॽरे़, ले़बो-हमातलाम् मिस्र लाजेबा ताङ्साङ्वा थारिक्पा के़रे़क् लाजेॽलाम् लत्छा यरिक् के़योबा सङ्जुम्भोहाॽरे़ हाबा खे़न् ये़म्मो तङ्नाम् मे़दोसु॥ खे़ङ्हाॽरे़ नुसि ये़न् थारिक् नु आल्लसाङ् नुसि ये़न् थे़म्बा काक्ले़ थिबोङ्ङाङ् लिसि ये़न् थारिक् यहवे दाङ्बा आनिॽ निङ्वाॽफुमाङ्ङिल्ले़ कुदगि तङ्नाम् मे़दोसुआङ् मे़यागे़॥ 66 खे़ल्ले़ कुदाःन्दिक्मा खुने़ॽ मनाहाॽ लाम्मे़त्तुसि॥ खे़ङ्हाॽरे़ हाङ्ङिन् हाङ्वागे़न् मुॽइसाम् मे़बिरु, हे़क्क्याङ् यहवे दाङ्बे़ल्ले़ कुसे़वारोबा दाउदे़न् नु कुमना इस्राइलिहाॽरे़ खुन्छिॽ लागि चोगुबा के़रे़क् नुबा याःम्बक्हाॽरे़ चोगुल्ले़ सिक्लुङ्माॽओ मे़सःत्ते़र हे़क्क्याङ् निङ्वाॽ ये़ये़ लॽरे़र खे़ङ्हाॽ खुन्छिॽ आप्फेक् आप्फेक् हिम्मो मे़बेरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.