१ हाङ् 3 - लिम्बुसोलोमनरे़ सिक्कुम्दिङ् निङ्वाॽरे़ लागि पेलिगे़न् तुवा चोगु ( २ साप्मु १:३-१२ ) 1 सोलोमनरे़ मिस्र लाजेॽबा फारो हाङ्ङिन्नु तङ्मा काॽइ चोगु, हे़क्क्याङ् खे़ल्ले़ कुस्सा मे़न्छुमान्नु ते़न्धाम् मेःक्खिम् चोगु॥ खुने़ॽ कुहाङ्हिम्मिन् नु यहवे दाङ्बे़ल्ले़ कुहिम्मिन् चोःक्मा मे़न्छुःत्ते थारिक् हे़क्क्याङ् यरुसले़म के़रे़क् पिसाङ्बा लुङ्धाक्किन् से़प्मा मे़न्छुःत्ते थारिक् सोलोमन हाङ्ङिल्ले़ खे़न् मे़न्छुमान् थाक्तुआङ् दाउदरे़ कुये़क्यक्को युक्खु॥ 2 मनाहाॽरे़ ग उःक्चम्जम्बा चोःक्मनादे़न्हाॽओ आल्लसाङ् सिदुङ्जभा मे़दोन्दुर मे़वये़, थेआङ्भे़ल्ले़ खे़न् ये़म्मो थारिक् यहवे दाङ्बे़ल्ले़ कुमिङ्ङिल्ले़ लागि कुभा माङ्हिम् मे़न्जोःक्के मे़वये़॥ 3 सोलोमनरे़ आप्फेक् चैँ कुम्बा दाउदरे़ चोगुबा साम्योथिम् इङ्जाङ्हाॽ इःत्तु नाःत्तुर यहवे दाङ्बे़न्ने मिःम्जि मे़त्तुबा ओसेःन्धाङ् चोगु॥ कर खुने़ॽ उःक्चम्जम्बा चोःक्मनादे़न्हाॽओ सिदुङ्जभा तोःन्दुआङ् सुक्पा हाःन्दु॥ 4 सोलोमन हाङ्ङिन् गिबोनओ सिदुङ्जभा तोःम्मारे़ लागि पे, थेआङ्भे़ल्ले़ उःक्चम्जम्बा चोःक्मनादे़न्हाॽओ वेॽ के़रे़क्नुःल्ले़ यम्बा कप्मोए ने़स्से़॥ हे़क्क्याङ् खे़प्मोबा ले़त्ति तोःम्मादे़न्नो खुने़ॽ हे़न्छिङ् थिक् मिधिङ्मनादेमनाबा सिदुङ्जभाहाॽ तोःन्दु॥ 5 गिबोनओ यहवे दाङ्बा निङ्वाॽफुमाङ्ङिन् से़न्दिक् से़प्माङ्मो ओःन्धाक्सिङ्ङाङ् खुने़ॽ मे़त्तु, “खे़ने़ॽ आङ्गाॽ थे़मा के़नाःक्का, आङ्गाॽ खे़न् पिने़रो॥” 6 सोलोमनरे़ नोगप् पिरु, “खे़ने़ॽ के़से़वारोबा आङ्गाॽ आम्बा दाउदे़न् साॽरिक् लुङ्माॽ के़दुक्तु, थेआङ्भे़ल्ले़ खुने़ॽ खे़ने़ॽनु नसाःन्साबा वये़, हे़क्क्याङ् साम्योबा नु कुसिक्लुङ्मो कुदोःप्मा वये़॥ खुने़ॽ आल्लोआङ् चक्मे़ल्लॽए लुङ्माॽ के़दुक्तुर के़वाॽ, हे़क्क्याङ् आल्ल खुने़ॽ कुएगाङ् हाङ्युक्नाओ युङ्मारे़ लागि खुने़ॽ आइन्बा ये़न्नो ये़म्बित्छा साधिक् के़बिरुआङ् वाॽ॥ 7 “आल्ल यहवे दाङ्बा आनिङ्वाॽफुमाङ्ङे, आम्बा दाउदरे़ कुले़क्वाओ आङ्गाॽ खे़ने़ॽ के़से़वारोबे़न् हाङ् के़जोगाङ्ङाङ् वाॽ॥ कर आङ्गाॽग चुक्सा अङे़ःक्वा वाॽआ हे़क्क्याङ् आङ्गाॽ चोःक्मा के़बोङ्बा आयाःम्बक्हाॽ चोःक्मा मे़ले़आन्॥ 8 आङ्गाॽ खे़ने़ॽ के़से़वारोबान् कप्मो खे़ने़ॽ के़सेगुसिबा खे़ने़ॽ के़मनाहाॽरे़ खुन्छिॽ लुम्मो वाॽआ, खे़ङ्हाॽ निःप्मे़न्दे़त् नु आत्तातान्ने यरिक् मे़वाॽ॥ 9 कल्ले़चोगुल्ले़ खे़ने़ॽ के़मनाहाॽओ के़वाॽबा हाङ्युक् चोःक्मारे़ लागि खे़ने़ॽ के़से़वारोबे़न् ने़हिनिङ्वाॽ पिराङ्ङे़ॽ, हे़क्क्याङ् नुबा नु ताप्फे़ःम्बा आङ्गाॽ से़म्मा सुक्तुङ्ल॥ थेआङ्भे़ल्ले़ खे़ने़ॽ कम्म्याक् यरिक् के़मनाहाॽओ हाःत्ले़ युक् चोःक्मा सुक्तुबे?” 10 सोलोमनरे़ कन् पाःन्निन् नाःक्तुबाओ यहवे दाङ्बे़न् कुनिङ्वाॽ त्ये़॥ 11 कल्ले़चोगुल्ले़ यहवे दाङ्बे़ल्ले़ खुने़ॽ मे़त्तु, “खे़ने़ॽ कन् पाःन्निन् के़नाःक्तुबा नु खे़ने़ॽ आप्फेक् के़लागि थाःक् चाॽमा इग्र याङ्साकुन्धे इग्र खे़ने़ॽ के़निङ्मिहाॽ से़प्मासि के़ङ्गोःत्तुसिन्, कर कुदोःप्मा खासे़न् चोःक्मारे़ लागि सिक्कुम् निङ्वाॽ के़नाःक्तुबाल्ले़ चोगुल्ले़, 12 से़क्खासाङ् खे़ने़ॽ के़नाःक्तुबे़न् आङ्गाॽ के़त्तुङ् पिने़॥ आङ्गाॽ खे़ने़ॽ सिक्कुम्साबा नु निःन्धो चोःक्मा के़सुक्पा निङ्वाॽ पिने़, हे़क्केलॽरिक् खे़ने़ॽनुःल्ले़ तगि खे़ने़ॽ हे़क्तङ्बा आभे़ल्ले़आङ् हाःत्ताङ् मे़म्बोङ्ङे वाॽ, हे़क्क्याङ् खे़ने़ॽ के़एगाङ्ङाङ् आप्फाल्ले़आङ् हाःत्ताङ् मे़बोङ्ने़न्॥ 13 कन्नुःल्ले़ वेॽ खे़ने़ॽ के़न्नाःक्तुम्बा खे़न् पाःन्हाॽ, इग्र खे़ने़ॽ के़हिङ्बा ये़म्मो आत्तिन् हाङ्हाॽआङ् खे़ने़ॽनु कुदङ्बा मे़म्बोङ्ने़न्ल थारिक् आङ्गाॽ खे़ने़ॽ याङ्साकुन्धे नु मिङ्सो इङ्धाङ् पिने़रो॥ 14 हे़क्क्याङ् खे़ने़ॽ के़म्बा दाउदरे़ चोगुबा कुइसिक् खे़ने़ॽ आङ्गाॽ आलाम्मो लाङ्गे़घेःक्काङ् आङ्गाॽ आसाम्यो थिम्हाॽ नु आइङ्जाङ्हाॽ के़इःत्तु के़नाःत्तुने़भग्र आङ्गाॽ के़धाःक् चाॽर चोगुङ्ॽ॥” 15 खे़ब्याङ् सोलोमने़न् सोरे़आङ् कङ्ग से़प्माङ्निरत्छ फाॽआङ् खुने़ॽ निङ्वाॽ खोसु॥ खे़न् एगाङ् खुने़ॽ यरुसले़म नुःक्खे़, हे़क्क्याङ् यहवे दाङ्बे़ल्ले़ कुमाङ्हुप् सन्दोक्किल्ले़ कुदगि ये़म्सिङ्, हे़क्क्याङ् मिधिङ्मनादेमनाबा वयागे़न् सिदुङ्जभा नु तङ्जुम् वयागे़न् सिदुङ्जभा तोःन्दु॥ खम्भ्याङ् खुने़ॽ के़रे़क् कुसुहाङ्गे़म्बाहाॽ साभःङ्जा चाःत्तुसिरो॥ सोलोमनरे़ कुसिक्कुम् निङ्वाॽलाम् कुदोःप्मा खासे़न् लोःन्दु 16 खे़न् एगाङ् के़त्निमा ने़त्छि सोलोमन हाङ्ङिल्ले़ कुदगि त्ये़सिआङ् ये़म्ने़सि॥ 17 खे़न् ने़त्छिओ थिक्पारे़ पाःत्तु, “आदाङ्बे, कन् मे़न्छुमान्नु आङ्गाॽ लत्छा हिम्मो युङ्सिगे़॥ हे़क्क्याङ् खे़प्मो कन् आङ्गाॽनु वये़ल्ले़ आङ्गाॽ अङे़ःक्वा थिक् सागत्तुङ्॥ 18 आङ्गाॽ अङे़ःक्वान् कत्तुङ्बा सुम्यान् एगाङ् खुने़ॽआङ् अङे़ःक्वा थिक् सागत्तु॥ खे़प्मो आन्छिगे़रक् वये़सिगे़, खे़न् हिम्मो आन्छिगे़नुःल्ले़ वेॽ हाःत्ताङ् होःप्ते़॥ 19 “से़न्दिक् कन् मे़न्छुमाःल्ले़ खुने़ॽ कुस्सान् फे़ङ्दु से़रुरे़त्छ॥ 20 से़न्दिक् से़त्लुम्भक्ते़ल्ले़ खुने़ॽ पोगे़आङ् आङ्गाॽ आदाङ्बारे़ के़से़वारोमे़न् इप्साङ्बा ये़म्मो आङ्गाॽ आबेसाङ्लाम् आस्सा अङे़ःक्वान् तेॽरुआङ् खुने़ॽ कुभक्तुङ्ङो ने़स्सुरे़त्छ, हे़क्क्याङ् खुने़ॽ कुसिवे़त् कुस्सा अङे़ःक्वान् आङ्गाॽ आभक्थुङ्मो ने़स्सु पिराङ्रे़त्छ॥ 21 कुदाःन्दिक्मा तानाम्सा आस्सा अङे़ःक्वान् नुधुक्से़ आङ्गाॽ पोगाङ्ङिल्ले़ग आस्सान् स्ये़आङ् ने़स्से़बा निसुङ्॥ कर तानाम्बा खागे़ओःप्पो आङ्गाॽ खे़न् नुरिक् ओमे़त्तुङ्ङिल्ले़ग खे़न् आङ्गाॽ कत्तुङ्बा आस्सान् मे़ःन्लत्छ॥” 22 खे़न् वेॽ मे़न्छुमाःल्ले़ पाःत्तु, “मेःन्लो, कुहिङ्वे़त्ते़न् आङ्गाॽए आस्सारो, खे़ने़ॽ के़स्सान्ग स्ये़बारो॥” कर तगिमे़ल्ले़ हादिङ् थक्ते़र मे़त्तु, “मेःन्लो, कुसिवे़त्ते़न् खे़ने़ॽइन्, कुहिङ्वे़त्ते़न् आङ्गाॽइन्॥” कम्भलॽरिक् हाङ्ङिल्ले़ कुदगि खे़न्हाॽ पाःन्थक्ते़सि॥ 23 हाङ्ङिल्ले़ मे़त्तुसि, “कन् मे़न्छुमाःल्ले़ पाःत्तुॽ, ‘कुहिङ्वे़त् अङे़ःक्वान् आङ्गे़न्॥ कुसिवे़त्ते़न् खे़ने़ॽइन्॥’ हे़क्क्याङ् वेॽ मे़न्छुमाःल्ले़ पाःत्तुॽ, ‘मेःन्, खे़ने़ॽ के़स्सान् स्ये़बा, कुहिङ्वे़त्ते़न्ग आङ्गाॽइन्लो॥’” 24 खे़ब्याङ् हाङ्ङिल्ले़ मे़त्तुसि, “आङ्गाॽ ताभेधिक् तारे़ आबिरे़ॽ॥” हे़क्क्याङ् हाङ्ङिल्ले़ कुलागि ताभेधिक् मे़दारु मे़बिरु॥ 25 खे़ब्याङ् खुने़ॽ अक्तङ्बा इङ्जाङ् पिरुसि, “खे़न् कुहिङ्वे़त् अङे़ःक्वान् कुआत् ने़त्छि पोङ्ल खक्ते़म्मे़ॽ, हे़क्क्याङ् कुभ्रे़ःङ् थिक्पा पिरे़म्मे़ॽ, कुभ्रे़ःङ् वेॽइन् पिरे़म्मे़ॽ॥” 26 खे़ब्याङ् आप्फेक् कुस्सान् लुङ्माॽ तुक्तुआङ् खे़न् कुहिङ्वे़त् अङे़ःक्वाःल्ले़ कुम्मारे़ हाङ्ङिन् मे़त्तु, “आदाङ्बे, खे़न् कुहिङ्वे़त् अङे़ःक्वान् खे़न् मे़न्छुमान्ने पिरे़म्देसे़म्मे़ॽ॥ खे़न् अङे़ःक्वान् मे़से़रे़म्मिन्ने़ॽ॥” कर वेॽ मे़न्छुमाःल्ले़ पाःत्तु, “आङ्गाॽआङ् तेॽमा मे़घोआन्ल, खे़ल्ले़आङ् तेॽमा मे़घोसुन्ल॥ खे़न् अङे़ःक्वान् कुआःत् ने़त्छि पोङ्ल खक्ते़म्मे़ॽ॥” 27 खे़ब्याङ् हाङ्ङिल्ले़ खुने़ॽ कुघासे़न् निःन्धोन् अक्खेलॽरिक् खे़ङ्हाॽ मे़त्तुसि, “खे़न् कुहिङ्वे़त् अङे़ःक्वान् खे़न् तगिमा मे़न्छुमान् पिरे़म्देसे़म्मे़ॽ॥ खे़न् अङे़ःक्वान् मे़से़रे़म्मिन्ने़ॽ॥ खे़ल्ले़ कुम्मा खे़न्नेरो॥” 28 आल्ल हाङ्ङिल्ले़ कुघासे़न् निःन्धो पाःन्निन् के़रे़क् इस्राइलिहाॽरे़ मे़घे़प्सु, खे़ब्याङ् खे़ङ्हाॽरे़ हाङ्ङिन् मिङ्सो इङ्धाङ् मे़बिरु, थेआङ्भे़ल्ले़ खासे़न् लोःम्मा पिमासिरे़ लागि खुने़ॽ यहवे दाङ्बालाम् के़दाबा सिक्कुम् निङ्वाॽ कत्तुरे़त्छ फाॽआङ् खे़ङ्हाॽरे़ मे़निसुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.