१ हाङ् 2 - लिम्बुदाउदरे़ सोलोमने़न् कुनुप्मा खाहुन् पिरुॽ 1 आल्ल दाउदरे़ कुसिमा ये़म्मिन् निःत्ताङ् के़रे़ल्ले़, खुने़ॽ कुस्सा सोलोमने़न् कन् कुनुप्मा खाहुन्ने़न् पिरु॥ 2 खुने़ॽ मे़त्तु, “आल्ल आङ्गाॽ के़रे़क् मे़न्छाम् याप्मिहाॽ पेःक्मा के़बोङ्बा लाम्मो पेःक्कार पत्ता॥ कल्ले़चोगुल्ले़ खे़ने़ॽ ये़म्बित्छा हे़क्के हाङ्हाङ् लॽरे़ॽ, 3 हे़क्क्याङ् यहवे दाङ्बा खे़ने़ॽ के़निङ्वाॽफुमाङ्ङिल्ले़ कुयाःम्बक्हाॽ के़त्ल चोगे़ॽ—खुने़ॽ कुलाम्मो लाङ्घेगे़ॽ, मोसाःल्ले़ कुसाम्योथिम् इङ्जाङ्ङो साप्ते़आङ् के़बप्पा खुने़ॽ कुधिम्हाॽ नु कुइङ्जाङ्हाॽ, खुने़ॽ कुभाङ्हाॽ नु कुइङ्जाङ्हाॽ इःत्ते़ नाःत्ते़ॽ, हे़क्केलॽरिक् खे़ने़ॽ थेधे के़जोगुॽ हे़क्क्याङ् आत्तान् आत्तान् के़बेक्, खे़प्मो खे़ने़ॽ के़नुॽ के़दाररो, 4 हे़क्क्याङ् यहवे दाङ्बे़ल्ले़ अक्खे मे़त्ताङ्ङाङ् आङ्गाॽनु चोगुबा माङ्हुप्पिन् के़त्लरो—‘खे़ने़ॽ के़मुॽइदाङ्हाॽरे़ आक्खेलॽरिक् वाॽमा पोङ्ॽ फाॽआङ् निङ्वाॽ मे़इःत्तु हे़क्क्याङ् खे़ङ्हाॽरे़ खुन्छिॽ के़रे़क् सिक्लुङ्माॽ नु निङ्वाॽरे़ आङ्गाॽ आमिक्साओ नसाःन्साबा मे़बोङ्ङाङ् लाङ्मे़घेःक्ने़भग्र, इस्राइलबा हाङ्युक्नाओ युङ्मारे़ लागि खे़ने़ॽ आभे़ल्ले़आङ् मनामे़ःन्ने के़म्बोङ्ने़न्॥’ 5 “खे़म्म्याक्लक् मेःन्, सरुयाहरे़ कुस्सा योआबरे़ आङ्गाॽ थे मे़त्ताङ्, इस्राइलबा ने़प्फु थक्मोबा नेररे़ कुस्सा अबनेर नु येतेररे़ कुस्सा अमासान् खे़ल्ले़ थे मे़त्तुसि खे़न् पाःन्निन् खे़ने़ॽ आप्फेक् के़निसुआङ्ङे वाॽ॥ थङ्ङोबा ये़म् कुइसिक् सनारुङ् पोःक्खे़आङ् वये़साङ् खुने़ॽ खे़न् ने़प्माङ् से़रुसि॥ हाबा खे़न् माक्खिल्ले़ खुने़ॽ कुभॽइःन् नु कुलाङ्ङोबा लाङ्सुःप्पिन् चिःन्दु॥ 6 खे़ने़ॽ के़सिक्कुम् निङ्वाॽरे़ थेधे के़मे़त्, खे़न् हे़क्केए खुने़ॽनु याःम्बक् चोगे़ॽ, कर खुने़ॽ कुधे़गेक् फुप्मानु सोरिक् खे़मा यङ्सङ्ङो सनारुङ्ङाङ् पेःक्मा मे़घोने़न्ल॥ 7 “कर गिलादबा बर्जिल्लैरे़ कुस्साहाॽग लुङ्माॽ तुक्ते़से़ॽ, हे़क्क्याङ् खे़ने़ॽ खे़ङ्हाॽ ओमे़त्ते़ चोगे़से़ॽ॥ खे़ने़ॽ के़म्भुॽ अब्सालोमलाम् आङ्गाॽ खे़त्छिङ्ङाङ्ङाङ् वयाङ्ङिल्ले़ खे़ङ्हाॽ आङ्गाॽनुए सोरिक् मे़वये़॥ 8 “हे़क्क्याङ् खे़ने़ॽनु के़वाॽबा बहुरिमबा बेन्यामिनि गेरारे़ कुस्सा सिमिन्नु खे़ने़ॽ सिङ्सिङ् लॽरे़ॽ॥ आङ्गाॽ महनोमओ पेगाङ्बा ये़न्नो खे़ल्ले़ आङ्गाॽ साॽरिक् माङ्देसाङ्ङाङ् वये़॥ आङ्गाॽ नुःक्साङ्ङे़ल्ले़ खे़न् आङ्गाॽ आदुम्से़ यर्दन वहःङ्ङो ये़, खुने़ॽ कुलागि यहवे दाङ्बे़ल्ले़ कुमिङ्ङो आङ्गाॽ अक्खेलॽरिक् माङ्हे़क्सिङ्ङाङ्, ‘आङ्गाॽ खे़ने़ॽ ताभेःल्ले़ मे़से़त्ने़न्ॽ॥’ 9 कर आल्ल खे़ने़ॽ खे़न् कुदोःप्मा मे़लेःत्ते़न्ने़ॽ॥ खे़ने़ॽ सिक्कुम्साबा मना के़जोक् हे़क्क्याङ् खे़न् आक्खे मे़प्मा पोङ् के़लॽबा पाःन्निन् खे़ने़ॽ के़निसुॽ॥ खुने़ॽ कुधे़गेक् फुप्मानु सोरिक् माक्खिॽनु खे़मा यङ्सङ्ङो पेःक्लरो॥” दाउद हाङ्ङिन् मासिङ् 10 खे़ब्याङ् दाउदे़न् कुधाःक्थे़बाहाॽनु तङ्सिङ्से़ पे, हे़क्क्याङ् खुने़ॽ दाउदरे़ कुये़क्यक्को मे़जिक्खु॥ 11 हेब्रोनओ तङ्बे नुसि नु यरुसले़ःम्मो सुम्बोङ्ङाङ् सुम्सि तङ्बे के़रे़क्ले़ खुने़ॽ लिबोङ् तङ्बे थारिक् इस्राइलओ हाङ्युक् चोगु॥ 12 हे़क्क्याङ् सोलोमने़न् खुने़ॽ कुम्बा दाउदरे़ कुहाङ्युक्नाओ युङ्सिङ्, हे़क्क्याङ् खुने़ॽ कुहाङ्जुम्मिन् थधप् मे़ल्लॽए युक्सिङ् पोःक्खे़रो॥ अदोनियाहन् मासिङ् 13 आल्ल हग्गितरे़ कुस्सा अदोनियाहन् सोलोमनरे़ कुम्मा बतसेबाओ पे॥ बतसेबाःल्ले़ खुने़ॽ सेःन्दोसु, “थे खे़ने़ॽ नुबा के़इःत्तुआङ् के़दे़बि?” खुने़ॽ नोगप् पिरु, “ओवा, नुबाए इःत्तुङ्लो॥” 14 खे़ब्याङ् खे़ल्ले़ आल्लसाङ् पाःत्तु, “आङ्गाॽ खे़ने़ॽ थे़माइ पान् मे़प्मा कत्ने़॥” खुने़ॽ मे़त्तु, “पाःत्ते़ॽ॥” 15 अदोनियाहरे़ खुने़ॽ मे़त्तु, “हाङ्जुम्मिन् आङ्गाॽए खोमा के़बोङ्बा वये़ फाॽआङ् खे़ने़ॽ के़निसुआङ् वाॽ॥ आङ्गाॽए हाङ् पोङ्ङा फाॽआङ् के़रे़क् इस्राइलिहाॽरे़ मे़इःत्तुआङ् वये़॥ हाङ्जुम्मिन् आङ्गाॽ आन्साॽरे़न् पोःक्खे़॥ कर के़रे़क् पाःन्हाॽ ताङ्ग्रात्चि वग्रात्चि पोःक्खे़॥ थेआङ्भे़ल्ले़ यहवे दाङ्बे़ल्ले़ इःत्तुबा कुइसिक् खे़न् हाङ्जुम्मिन् खुने़ॽइन्ने वये़॥ 16 आल्ल आङ्गाॽ खे़ने़ॽ लत्छा पान् पेलि फाक्मा के़बोङ्बा पोःक्खे़आङ् वाॽ॥ खे़न् मे़बोङ्ने़न् मे़बाःत्ते़न्ने़ॽओ॥” खुने़ॽ मे़त्तु, “खे़न् थेबे?” 17 खे़ल्ले़ मे़त्तु, “आङ्गाॽ सुनम्मि अबिसगे़न् मेःक्खिम् मे़प्मा खोसुङ्ल फाॽआङ् सोलोमन हाङ्ङिन् पेलि फाक्ताङ् पिराङ्ङे़ॽ॥ खुने़ॽ मेःन् के़म्मेत्ने़न् फाॽआङ् आङ्गाॽ निसुङ्ॽ॥” 18 बतसेबारे़ नोगप् पिरु, “पोङ्ॽ, खे़ने़ॽ के़लागि आङ्गाॽ हाङ्ङिन् ताॽजे़क्तुङ्ॽ॥” 19 आल्ल अदोनियाहरे़ कुलागि पान् के़मा फाॽआङ् बतसेबान् हाङ्ङे़ओ पेःल्ले़, खुने़ॽ लाम्दाःक्मारे़ लागि हाङ्ङिन् पोगे़ हे़क्क्याङ् साम्बोन् फन्छिङ्ङाङ् खुने़ॽ से़वा मे़त्तुआङ् हाङ्युक्नाओ युङ्सिङ्॥ कुम्मारे़ कुलागि सोलोमन हाङ्ङिल्ले़ हाङ्युक्ना थिक् ताःप्मा पाङ्घुसि, हे़क्क्याङ् खुने़ॽ हाङ्ङिल्ले़ कुजुप्साङ् ले़प्माङ् युङ्सिङ्॥ 20 खुने़ॽ मे़त्तु, “आङ्गाॽ खे़ने़ॽ चुक्सा पेलि थिक् फाक्मा के़बोङ्बा पोःक्खे़आङ् वाॽ॥ खे़न् मे़बोङ्ने़न् मे़मे़त्ताङ्ङिन्ने़ॽओ॥” हाङ्ङिल्ले़ नोगप् पिरु, “आम्मारे़ थे पाःप्मा के़गत्तुबे? आङ्गाॽ खे़न् मे़बोङ्ने़न् मे़मे़त्ने़न्ॽ॥” 21 खुने़ॽ मे़त्तु, “सुनम्मि अबिसगे़न् खे़ने़ॽ के़म्भुॽ अदोनियाहःन्नु मेःक्खिम् मे़त्ते़ॽ॥” 22 सोलोमन हाङ्ङिल्ले़ कुम्मा नोगप् पिरु, “सुनम्मि अबिसगे़न् अदोनियाहःन्नु मेःक्खिम् मे़प्मारे़ लागि खे़ने़ॽ थेआङ् पेलि के़भाक्काबाबे? ओवा, खुने़ॽ आङ्गाॽ आम्भुॽएसबा, थेआङ्भे़ल्ले़ खुने़ॽ कुलागि, निङ्वाॽफुसाम्बा अबियाथाररे़ कुलागि नु सरुयाहरे़ कुस्सा योआबरे़ कुलागिआङ् खे़ने़ॽ हाङ्जुम्मिन्ने के़नाःक्तुसाङ् पोःक्खे़बा वये़!” 23 खे़ब्याङ् यहवे दाङ्बे़ल्ले़ कुमिङ्ङो सोलोमन हाङ्ङिल्ले़ माङ्हे़क्सिङ्ङाङ् पाःत्तु, “कन् पेलिःल्ले़ लागि अदोनियाहरे़ खुने़ॽ कुहिङ्मे़न् मे़मासुन्ने़भग्र यहवे दाङ्बे़ल्ले़ आङ्गाॽ साॽरिक् ताप्फे़ःल्लिक् मे़त्तार! 24 आल्ल आम्बा दाउदरे़ कुहाङ्युक्नाओ आङ्गाॽ युक्तिङ् के़जोःक्पा नु खुने़ॽ कुमाङ्हुप् कुइसिक् आङ्गाॽ आहिम्सयङ् के़भोङ्बा आम्भा कन् यहवे दाङ्बे़न् कुहिङ्वे़त् वाॽबा कुइसिक् आइन्छा अदोनियाहन् से़प्मा पोङ्ॽ फाॽआङ् पाःत्तुङ्ॽ!” 25 खे़ब्याङ् सोलोमन हाङ्ङिल्ले़ यहोयादारे़ कुस्सा बनायाहन् इङ्जाङ् पिरु, हे़क्क्याङ् खुने़ॽ अदोनियाहन् लःप्सुसे़रुरो॥ अबियाथारे़न् मे़नाःत्तु मे़देसुबा नु योआबे़न् स्ये़बा 26 सोलोमन हाङ्ङिल्ले़ निङ्वाॽफुसाम्बा अबियाथारे़न् मे़त्तु, “खे़ने़ॽ आप्फेक् के़लाजेॽ सिङ्बुङ् अनातोतओ पेगे़ॽ॥ खे़ने़ॽग सिमा के़यारुॽ, कर आङ्गाॽ आल्लोसा खे़ने़ॽ मे़से़त्ने़न्ॽ, थेआङ्भे़ल्ले़ खे़ने़ॽ आङ्गाॽ आम्बा दाउदरे़ कुदगि यहवे दाङ्बे़ल्ले़ कुसन्दोःक्किन् पङ्मा याःम्बक् के़जोगुआङ् वये़, हे़क्क्याङ् आम्बारे़ तुमुबा तुक्खेओ खे़ने़ॽआङ् के़वये़॥” 27 कल्ले़चोगुल्ले़ यहवे दाङ्बे़ल्ले़ कुलागि निङ्वाॽफुसाम्बा याःम्बक् चोःक्मालाम् सोलोमनरे़ अबियाथारे़न् लःत्तुदेसु॥ कम्भलॽरिक्के सिलोओ एलिरे़ कुहिम्सयङ्ङिल्ले़ कुयाःम्बेओ यहवे दाङ्बे़ल्ले़ पाःत्तुआङ् वये़बा पाःन्निन् के़रे़रो॥ 28 आल्ल कन् इङ्घङ्ङिन् योआबरे़ओ के़रे़, खे़ब्याङ् खुने़ॽ यहवे दाङ्बे़ल्ले़ कुसेसे साःङ्गाहिम्मो खे़त्छिङ् पेआङ् ले़त्ति तोःम्मादे़न्निल्ले़ कुदाङ्हाॽ ते़म्सुआङ् ये़बे़ थेआङ्भे़ल्ले़ अब्सालोमरे़ दाउदरे़ कुदक्ले़ङ्वाओ चे़म्भन् चोगुल्ले़ खुने़ॽ अब्सालोमनु मेःन्, कर अदोनियाहःन्नु चे़म्भन् चोगुआङ् वये़॥ 29 योआबे़न् यहवे दाङ्बे़ल्ले़ कुसेसे साःङ्गाहिम्मो खे़त्छिङ् पेआङ् ले़त्ति तोःम्मादे़न्निल्ले़ कुबेसाङ् युङ्ॽ के़लॽबा पाःन्निन् आल्ल सोलोमनरे़ खे़प्सु, खे़ब्याङ् खुने़ॽ योआबे़न् थक्मा से़प्मारे़ लागि सोलोमनरे़ यहोयादारे़ कुस्सा बनायाहन् मुरा मे़त्तुआङ् पाङ्घुदेसु॥ 30 कल्ले़चोगुल्ले़ बनायाहन् यहवे दाङ्बे़ल्ले़ कुसेसे साःङ्गाहिम्मो लासे़आङ् योआबे़न् मे़त्तु, “हाङ्ङिल्ले़ पाःत्तुॽ, ‘खे़ने़ॽ लाःक्कात् के़लःम्मु॥’” कर योआबरे़ नुगप् पिरु, “नाॽआ, आङ्गाॽ कप्मोए सिआ॥” बनायाहरे़ योआबरे़ कुबाःन्निन् हाङ्ङिन् चे़क्तु॥ 31 खे़ब्याङ् सोलोमनरे़ बानायाहःन् इङ्जाङ् पिरु, “योआबरे़ पाःत्तुबा हे़क्केए चोगे़ॽ॥ खे़न् से़रे़ॽआङ् लुप्ते़ॽ, हे़क्क्याङ् कम्भलॽरिक् योआबरे़ कुदोःप्मा मनाःल्ले़ कुमाक्खिॽ से़सुबा आप्तिक्किन् आङ्गाॽ नु आङ्गाॽ आम्बारे़ कुहिम्सयङ्लाम् ले़प्मि नाःक्ताङ् पिराङ्ङे़ॽ॥ 32 योआबरे़ माक्खिॽ से़सुबाल्ले़ कुले़क्वा यहवे दाङ्बे़ल्ले़ खुने़ॽए नुःक्तु पिरु, थेआङ्भे़ल्ले़ आङ्गाॽ आम्बा दाउदरे़ निङ्वाॽए मे़ङ्घोए योआबरे़ खुने़ॽनुःल्ले़ आल्लसाङ् नुबा नु कुदोःप्मा इस्राइलबा थक्मोबा नेररे़ कुस्सा अबनेरे़न् नु यहुदाबा थक्मोबा येतेररे़ कुस्सा अमासान् फत्तुसिआङ् ताभेःल्ले़ से़रुसि॥ 33 खे़न् ने़प्फुरे़ खुन्छिॽ माक्खिल्ले़ आभे़ल्ले़साङ् योआबे़न् नु खुने़ॽ कुस्साहाॽ ते़त्तुसिर॥ कर दाउदे़न् नु खुने़ॽ कुहाङ्युक्नाओ यहवे दाङ्बालाम् के़दाबा नुॽमादामे़न् सदादिङ् वाॽररो॥” 34 कल्ले़चोगुल्ले़ यहोयादारे़ कुस्सा बनायाहन् ले़त्ति तोःम्मादे़न्नो थोःक्सिङ् पे, हे़क्क्याङ् योआबे़न् थगुसे़रु, खम्भ्याङ् मुरे़क् खारे़क् थेआङ् के़होप्पादे़न्नो के़ने़बा खुने़ॽ आप्फेक् कुलाजेॽओ लुप्तु॥ 35 हाङ्ङिल्ले़ यहोयादारे़ कुस्सा बनायाहन् योआबरे़ कुले़क्वाओ थक्मोबा युक्तिङ् चोगु, हे़क्क्याङ् अबियाथाररे़ कुले़क्वाओ सादोके़न् निङ्वाॽफुसाम्बा युक्तिङ् चोगुरो॥ सिमिन् मासिङ् 36 खे़न् एगाङ् हाङ्ङिल्ले़ सिमिन् उःप्मादाःप्मा पाङ्घुसिआङ् खुने़ॽ मे़त्तु, “यरुसले़ःम्मो आप्फेक् के़लागि हिम् चोगे़ॽआङ् खे़ने़ॽ हाबा खे़प्मोए युङे़ॽ॥ ये़क्यक्किन् मे़ले़रे़न्ने़ॽआङ् वेॽ आत्तिन् ते़न्नोआङ् मे़बेगे़न्ने़ॽ॥ 37 ये़क्यक्किन् के़ले़रुआङ् किद्रोन ने़ने़बादे़न्निन् के़गाःक्तुआङ् के़बेःक्ने़भग्र खे़ने़ॽ के़सिरो॥ हे़क्के के़जोगुने़भग्र खे़ने़ॽ के़माक्खिॽ से़बा आप्तिक्किन् खे़ने़ॽ आप्फेक् के़सम्धाङ्ङे थारो॥” 38 सिमिरे़ हाङ्ङिन् नोगप् पिरु, “आदाङ्बारे़ च्या के़बाःत्तुॽ, खे़न् नुबाए चोक्॥ आङ्गाॽ आदाङ्बा हाङ्ङिल्ले़ के़से़वारोबान् के़मे़त्ताबा कुइसिक् आङ्गाॽ चोगुङ्ॽ॥” हे़क्क्याङ् यरिक् ये़म् थारिक् सिमिन् यरुसले़ःम्मोए युङे़॥ 39 कर तङ्बे सुम्सि एगाङ् सिमिरे़ कुयोःग्बा ने़प्फु गातबा हाङ् माकारे़ कुस्सा आकिसओ खे़त्ने़सि पेसि॥ आल्ल खे़न् ने़प्फु कुयोःग्बाहाॽ गातओ वाॽसि फाॽआङ् सिमिरे़ खे़प्सु, 40 खे़ब्याङ् खुने़ॽ कुअदङ्ङो सिङ्दाःक्खोःन् युक्नान् इसिक्खुआङ् खुने़ॽ कुयोःग्बाहाॽ कोःप्मासिरे़ लागि गातबा आकिसओ पे॥ कम्भलॽरिक् सिमिन् पेआङ् गातलाम् खे़न् ने़प्फु कुयोःग्बाहाॽ फे़त्तुसि, 41 आल्ल सिमिन् यरुसले़मलाम् गात पेआङ् नुःक्खे़बा इङ्घङ्ङिन् सोलोमन हाङ्ङिन् मे़जे़क्तु॥ 42 खे़ब्याङ् खुने़ॽ सिमिन् उःप्मादाःप्मा पाङ्घुसिआङ् खे़न् मे़त्तु, “थे आङ्गाॽ खे़ने़ॽ यहवे दाङ्बे़ल्ले़ कुमिङ्ङो माङ्हे़क्सिङ्मा पाङ्ने़आङ् अक्खे मे़मे़त्ने़न्नाङ् साम्दिङ् पिने़आङ् मे़वये़न्ने़म्बि? ‘कुभा वेॽ ते़न्नो पेःक्मारे़ लागि खे़ने़ॽ कन् ते़न्निन् के़ले़रुआङ् के़बेःक्पा ये़न्नो से़क्खाए के़सिरो॥’ खे़न् ये़म्मो खे़ने़ॽ अक्खे के़मे़त्ताङ्, ‘आदाङ्बारे़ च्या के़बाःत्तु, खे़न् नुबाए चोक्॥ आदाङ्बारे़ के़इङ्जाङ्ङिन् आङ्गाॽ इःत्तुङ् नाःत्तुङ्ॽ॥’ 43 यहवे दाङ्बाओबा माङ्हे़क्किन् नु आङ्गाॽ पिने़बा इङ्जाङ्ङिन् खे़ने़ॽ थेआङ् के़न्इःत्तुन् के़न्नाःत्तुन्?” 44 खे़ब्याङ् हाङ्ङिल्ले़ सिमिन् अक्खेआङ् मे़त्तु, “आङ्गाॽ आम्बा दाउदरे़ कुदक्ले़ङ्वाओ खे़ने़ॽ के़जोगुबा के़रे़क् फे़न्याःम्बक्हाॽ खे़ने़ॽ आप्फेक् के़निसुआङ्ङे वाॽ॥ आल्ल यहवे दाङ्बे़ल्ले़ खे़न् के़भे़न्याःम्बक्किल्ले़ कुले़क्वा नुःक्तुॽ॥ 45 कर आङ्गाॽ सोलोमन हाङ्ङिन् मुॽइसाबा पोङ्ङा हे़क्क्याङ् यहवे दाङ्बे़ल्ले़ कुदगि दाउदरे़ कुहाङ्युक्नान् आभे़ल्ले़साङ् कम्ब्राङ् पोङ्ॽ॥” 46 खे़ब्याङ् हाङ्ङिल्ले़ यहोयादारे़ कुस्सा बनायाहन् इङ्जाङ् पिरुआङ् खुने़ॽ लाःक्कात् लःन्दे़ पे, हे़क्क्याङ् बनायाहःल्ले़ सिमिन् थगुआङ् से़रु॥ कम्भलॽरिक् आल्ल सोलोमन हाङ्ङिल्ले़ कुहुक्को कुहाङ्जुम्मिन् थधप् मे़ल्लॽए युक्सिङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.