१ हाङ् 15 - लिम्बुअबियारे़ यहुदाओ हाङ्युक् चोगु ( २ साप्मु १३:१–१४:१ ) 1 नाबातरे़ कुस्सा यारोबामरे़ कुहाङ्युक् ये़म्मोबा थिबोङ्ङाङ् ये़त्छिगेक्पा तङ्बेओ अबियान् यहुदाबा हाङ् पोःक्खे़, 2 हे़क्क्याङ् खुने़ॽ यरुसले़ःम्मो तङ्बे सुम्सि हाङ्युक् चोगु॥ खुने़ॽ कुम्मारे़ कुमिङ् माका वये़॥ खुने़ॽ अबिसालोमरे़ कुस्सा मे़न्छुमा वये़॥ 3 खे़ल्ले़आङ् तगि खुने़ॽ कुम्बारे़ चोगुबा के़रे़क् लायोहाॽ चोगु॥ खुने़ॽ कुनिङ्वान् कुन्धे़बा कुधाःक्थे़बा दाउदरे़ कुनिङ्वान् निङ्वाॽफुमाङ् के़इःप्पा के़नाःप्पा वये़बा हे़क्के खुने़ॽ यहवे दाङ्बा कुनिङ्वाॽफुमाङ्ङिन् के़रे़क् परिक्ले़ के़इःप्पा के़नाःप्पा मे़बोःक्खे़न्॥ 4 करसाङ् दाउदरे़ कुलक्खोबा पोङ्मारे़ लागि खुने़ॽ कुस्साधिक् फोःक्खुआङ् यरुसले़ःम्मिन् के़धुम्बा चोगु हे़क्क्याङ् यहवे दाङ्बा खुने़ॽ कुनिङ्वाॽफुमाङ्ङिल्ले़ अबियान् दाउदरे़ कुलागि यरुसले़ःम्मो खुने़ॽ लत्छा सेमि हे़क्के पिरु॥ 5 थेआङ्भे़ल्ले़ हित्ति उरियाहनुःल्ले़ वेॽ पाःन्नो दाउदरे़ यहवे दाङ्बे़ल्ले़ कुनिमो आत्तिन् पाःन्निन् कुदोःप्मा चोगे़ हाबा खे़न्ने चोगुआङ् वये़, हे़क्क्याङ् कुहिङ्हिङ् खुने़ॽ आत्तिन् कुइङ्जाङ्ङिन्नाङ् फेःन्दुबा होःप्ते़॥ 6 रहबाम नु यारोबामरे़ खुन्छिॽ लुम्मो हेःक्सिङ्बा थङ्ङिन् अबियारे़ कुहिङ्हिङ् थारिक्के पोःक्खे़आङ् पत्छे़॥ 7 अबियारे़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़म्बि? अबिया नु यारोबामरे़ खुन्छिॽ लुम्मो चक्मे़ल्लॽए थङ् पोःक्खे़आङ् पत्छे़॥ 8 हे़क्क्याङ् अबियान् खुने़ॽ कुसुधे़बा कुदाक्थे़बाहाॽनु तङ्सिङ्से़ पे, खम्भ्याङ् खुने़ॽ दाउदरे़ कुये़क्यक्को मे़लुप्तु॥ हे़क्क्याङ् खुने़ॽ कुएगाङ् कुस्सा आसान् हाङ् पोःक्खे़रो॥ यहुदाओबा हाङ् आसा ( २ साप्मु १५:१६–१६:६ ) 9 इस्राइलबा हाङ् यारोबामरे़ हाङ्युक् चोगुबा निबोङ् तङ्बेओ आसान् यहुदाबा हाङ् पोःक्खे़, 10 हे़क्क्याङ् खुने़ॽ यरुसले़ःम्मो लिबोङ्ङाङ् थिक् तङ्बे हाङ्युक् चोगु॥ अबिसालोमरे़ कुस्सा माकान् खुने़ॽ कुयुमा वये़॥ 11 आसाःल्ले़ खुने़ॽ कुधाःक्थे़बा दाउदरे़ चोगुबा कुइसिक् यहवे दाङ्बे़ल्ले़ कुनिमो आत्तिन् पाःन्निन् कुदोःप्मा वये़ हाबा खे़न्ने चोगु॥ 12 खुने़ॽ माङ्धाःन्नो के़युङ्बा मे़न्छुमारे़ मे़भत्छुसिबा फे़त्के़लाॽबा ये़म्बित्छाहाॽ लाजेॽलाम् लःत्तुदेसुसि, हे़क्क्याङ् खुने़ॽ कुम्बा कुन्धे़बाहाॽरे़ मे़जोगुबा के़रे़क् नावाइत्लाहाॽ खे़त्तुदेसुसि॥ 13 खुने़ॽ आप्फेक् कुयुमा माकान् मानुदिङ् हाङ्मा ताक्फालाम् खे़त्तुदेसु, थेआङ्भे़ल्ले़ खे़ल्ले़ असेरा माङ्ङिल्ले़न् लत्छा याम्गे़सिङ्बा नावाइत्ला सित्लाङ् थिक् चोगुआङ् वये़॥ आसाःल्ले़ खे़न् च्ये़प्तुआङ् सोःन्दु, हे़क्क्याङ् किद्रोन यहःङ्ङो खे़न् मिधिक्खुदेसु॥ 14 खुने़ॽ कोःक्माहाॽओ के़युङ्बा से़वा चोःक्मादे़न् माङ्धाःन्हाॽ मे़घे़त्तुन् मे़देसुन्छाङ् आसाःल्ले़ कुसिक्लुङ्मान् खुने़ॽ कुहिङ्हिङ् थारिक्के यहवे दाङ्बाओ के़रे़क् तोःन्दुआङ् वये़॥ 15 खुने़ॽ तोःन्दुबा हे़क्क्याङ् कुम्बारे़ तोःन्दुबा युप्पा, साम्म्याङ् नु सामाहाॽ खुने़ॽ यहवे दाङ्बे़ल्ले़ कुहिम्मो तारु॥ 16 यहुदाबा हाङ् आसान् नु इस्राइलबा हाङ् बासाःल्ले़ खुन्छिॽ हाङ्युक् चोगे़सुबा ये़म् खाराक् थङ् पोःक्खे़आङ् वये़॥ 17 इस्राइलबा बासा हाङ्ङिन् पेआङ् यहुदान् थङ्ङो फत्तु, हे़क्क्याङ् यहुदाबा आसाःल्ले़ कुदे़ःङ्गप्पोलाम् लःम्मा नु सिगाङ् लाःप्मा आत्तिन्नाङ् मे़म्भाःक्मासिरे़ लागि रामाओ हाङ्यक् चोगु॥ 18 खे़ब्याङ् आसाःल्ले़ यहवे दाङ्बे़ल्ले़ कुहिम्मो नु खुने़ॽ आप्फेक् कुहाङ्हिम्मोबा थाःङ्हाॽओ के़याःक्पा के़रे़क् साम्म्याङ् युप्पाहाॽ याङ्सिङ्॥ खुने़ॽ कुसुहाङ्युक्पाहाॽ हुक्सुप्तुसिआङ् तब्रिमोनरे़ कुस्सा, हेज्योनरे़ कुम्मे़न्छाॽ अरामबा हाङ् बेन-हदे़न् अक्तङ्बा इङ्घङ् हाक्तु, खे़ल्ले़ दमस्कसओ हाङ्युक् चोगुर वये़॥ 19 “आङ्गाॽ आम्बा नु खे़ने़ॽ के़म्बारे़ कुलुम्मो पाःन्दङ् पोःक्खे़बा कुइसिक् आङ्गाॽ नु खे़ने़ॽ लुम्मोआङ् पाःन्दङ् पोङ्ल॥ ओमे़त्ते़ॽ, आङ्गाॽ साम्म्याङ् नु युप्पाःल्ले़न् कन् थोःक्लाःन् हाक्ने़र पत्ता॥ आल्ल इस्राइलबा हाङ् बासाःन्नु खे़ने़ॽ के़जोगुबा पाःन्दङ् मे़न्दङ्मनाबा चोगे़ॽ, हे़क्क्याङ् खे़न् आङ्गाॽलाम् याङ्ना नुःङ्ङाङ् पेःक्ल॥” 20 आसाःल्ले़ मे़त्तुबा पाःन्नो बेन-हददे़न् ते़न्दे़, हे़क्क्याङ् खुने़ॽ कुधक्सुबाहाॽओबा थक्मोबाहाॽ इस्राइलबा ये़क्यक्हाॽरे़ कुदक्ले़ङ्वाओ पाङ्घुदेसुसि॥ खुने़ॽ इयोन, दान, हाबिल-बेथ-माका नु नप्तालि सोसोरिक् गालिल के़रे़क् हुक्काप् मे़जोगु॥ 21 आल्ल बासाःल्ले़ कन् खे़प्सुआङ् रामाःन् हाङ्यक् चोःक्मा ले़रु, हे़क्क्याङ् तिर्सा ले़प्माङ् नुःक्खे़आङ् पे॥ 22 खे़ब्याङ् आसा हाङ्ङिल्ले़ के़रे़क् यहुदाओ लत्छा इङ्जाङ् चोगु—हे़क्क्याङ् हाःत्ताङ् मे़ल्ले़त्ते खे़ङ्हाॽरे़ खे़प्मो बासाःल्ले़ ओगप् चोगुबा लुङ् नु सिङ्हाॽ मे़देॽरु॥ खे़न् लुङ् नु सिङ्हाॽ ओगप् चोगुआङ् आसा हाङ्ङिल्ले़ बेन्यामिन गेबा नु मिस्पाःन्नाङ् चोगु॥ 23 आसारे़ हाङ्युक् चोगुबा ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् थोबोहाॽ, हे़क्क्याङ् खुने़ॽ चोगुबा के़रे़क् याःम्बक्हाॽ नु खुने़ॽ चोगुबा ये़क्यक्हाॽ थे यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़म्बि? हे़क्केसाङ् खुने़ॽ खदाक्मि तुम्से़बा ये़म्मो कुयाम् तुगे़बाल्ले़ कुलाङ् के़दुक्पा पोःक्खे़॥ 24 खे़ब्याङ् आसान् कुसुधे़बा कुदाक्थे़बाहाॽनु तङ्सिङ्से़ पे, हे़क्क्याङ् खुने़ॽ कुसुधे़बा दाउदरे़ कुये़क्यक्को खे़ङ्हाॽरे़ खुने़ॽ मे़लुप्तु॥ हे़क्क्याङ् खे़न् एगाङ् कुस्सा यहोसापाते़न् हाङ् पोःक्खे़रो॥ इस्राइलबा हाङ् नादाब 25 यहुदाबा हाङ् आसारे़ हाङ्युक् चोगुबा निसिगेक्पा तङ्बेओ यारोबामरे़ कुस्सा नादाबे़न् इस्राइलबा हाङ् पोःक्खे़॥ खुने़ॽ इस्राइलओ तङ्बे ने़त्छि हाङ्युक् चोगु॥ 26 खुने़ॽ यहवे दाङ्बे़ल्ले़ कुनिमो आत्तिन् ताप्फे़ःम्बा चोगे़ आम्भा खे़न्ने चोगु, हे़क्क्याङ् इस्राइलिहाॽ खुने़ॽ कुम्बारे़ चोःक्मा पाङ्घुसिबा लायोओ वये़आङ् खुने़ॽए कुये़प्ले़क्को लाङ्घेगे़॥ 27 इस्साखाररे़ कुहिम्सयङ्ङोबा अहियाहरे़ कुस्सा बासाःल्ले़ नादाबरे़ कुदक्ले़ङ्वाओ चे़म्भन् चोगु, हे़क्क्याङ् नादाब नु के़रे़क् इस्राइलिहाॽरे़ मे़गबु मे़ने़स्सुबा पलिस्तिहाॽरे़ खुन्छिॽ गिब्बतोन ये़क्यक्को नादाबे़न् मे़हिप्तु मे़से़रु॥ 28 यहुदाबा हाङ् आसाःल्ले़ हाङ्युक् चोगुबा सुम्सिगेक्पा तङ्बेओ बासाःल्ले़ नादाबे़न् से़रु, हे़क्क्याङ् खे़न् एगाङ् खुने़ॽ इस्राइलबा हाङ् पोःक्खे़॥ 29 खुने़ॽ हाङ् पोःक्खे़नुमे़ःन्ने यारोबामरे़ कुहिम्सयङ्हाॽ के़रे़क् से़रुसि॥ खे़ल्ले़ यारोबामरे़ कुसक्मा के़याक्पा कुहिङ्वे़त् कुधेआङ् मे़ले़रुन्, कर खे़ङ्हाॽ के़रे़क् मे़क्खुसि॥ कम्भलॽरिक् सिलोबा खुने़ॽ कुसे़वारोबा अहियाहलाम् पाःत्तुबा यहवे दाङ्बे़ल्ले़ कुबाःन्जाक्किन् के़रे़॥ 30 यारोबामरे़ चोगुबा लायोहाॽ नु खुने़ॽ इस्राइलिहाॽ चोःक्मा पाङ्घुसिबा लायोहाॽरे़ चोगुल्ले़, हे़क्क्याङ् खुने़ॽ यहवे दाङ्बा इस्राइलबा निङ्वाॽफुमाङ्ङिन् कुसिक् फोःक्खुबाल्ले़ चोगुल्ले़ कन् पोःक्खे़आङ् वये़॥ 31 नादाबरे़ हाङ्युक् चोगुबा ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ थे इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़म्बि? इस्राइलबा हाङ् बासा 32 यहुदाबा हाङ् आसान् नु इस्राइलबा हाङ् बासाःल्ले़ खुन्छिॽ हाङ्युक् चोःक्मा ये़म् खाराक् थङ् पोःक्खे़आङ् पत्छे़॥ 33 यहुदाबा हाङ् आसारे़ कुहाङ्युक् ये़म् सुम्सिगेक्पा तङ्बेओ अहियाहरे़ कुस्सा बासान तिर्साओ के़रे़क् इस्राइलबा हाङ् पोःक्खे़, हे़क्क्याङ् खुने़ॽ निबोङ्ङाङ् लिसि तङ्बे हाङ्युक् चोगु॥ 34 यारोबामरे़ए कुलाम्हाॽ नाःत्तु हे़क्क्याङ् खे़ल्ले़ इस्राइलिहाॽ चोःक्मा पाङ्घुसिबा लायोहाॽ चोगुर यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने खुने़ॽ चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.