१ कोरन्थि 12 - लिम्बुसेसेमाङ्लाम् याम्साम्गे़न् पर्धाःम्हाॽ 1 आल्ल आमिःम् फुॽनुसाॽ नु ने़ॽनुसाॽसे, सेसेमाङ्लाम्बाबा याम्साम्गे़न् पर्धाःम्हाॽरे़ कुयाःम्बेओ निङ्वाॽ मे़ङ्घोए के़वयिबा आनिङ्वाॽ होप्लो॥ 2 दाङ्बा ये़सुन् खिनिॽ नसान् मे़न्जोःक्के के़वयिल्ले़ कुबान् मे़न्लःम्ना यरिक् परिक्पा नावाइत्लाहाॽ माङ्गे़घयुम्ल ताप्के़बे़ॽरिआङ् के़वयिॽरो॥ 3 खे़ल्ले़चोगुल्ले़ निङ्वाॽफुमाङ्ङिल्ले़ कुयाम्साम्मिल्ले़ लाम्लोसुबा आत्तिल्ले़आङ् ये़सुन् साङ्ग्रा मे़प्मा मे़सुक्तुन्लो, हे़क्केलॽरिक् सेसेमाङ्ङिल्ले़ लाम्मे़ल्लोःए थारिक् आत्तिल्ले़आङ् ये़सुन् ने दाङ्बारो पाःप्मा मे़सुक्तुन् फाॽआङ् कुसिङ् निःत्ते़म्मे़ॽ के़लॽबा आनिङ्वाॽ वाॽ॥ 4 आल्ल यरिक् परिक्पा याम्साम्गे़न् पर्धाःम्हाॽ मे़वाॽ, कर पर्धाःम् के़बिबा सेसेमाङ्ङिन् लत्थिक्लक् वाॽरो॥ 5 हे़क्केलॽरिक्के यरिक् परिक्पा माङ्सेवाहाॽ मे़वाॽ, कर दाङ्बाग लत्थिक्लक् वाॽरो॥ 6 हे़क्केलॽरिक्के यरिक् परिक्पा याःम्बक् चोःक्मा आसुक्तुम्, कर बा लत्छा निङ्वाॽफुमाङ्ङिल्ले़ आनिॽ के़रे़क्लाम् याःम्बक् चोगुॽरो॥ 7 आल्ल सेसेहुप्लक्को कुभाॽ पिसिङ्मारे़ लागि सेसेमाङ्ङिल्ले़ कुयाःम्बक्किन् थाःप्ल फाॽआङ् याम्साम्गे़न् पर्धाःम्हाॽ काक् मनाहाॽ लत्छाआङ् मे़न्छे़न्छिङ्ङे पिरे़आङ् वाॽरो॥ 8 आल्ल सेसेमाङ्ङिल्ले़ थिक्किन् सिक्कुम् निङ्वाॽले़न् पाःन्जाक् पिरुॽ, वेॽसमान् हाबा खे़न् सेसेमाङ्ङिल्ले़ ने़हि निङ्वाॽरे़न् पाःन्जाक् पिरुॽ॥ 9 वेॽसमान् हाबा खे़न् सेसेमाङ्ङिल्ले़ नसाःन्ले़न् याःम्बक् चोःक्मा, हे़क्क्याङ् वेॽइन् के़दुक्पा वेःम्मा पर्धाःम्हाॽ बा खे़न् लत्छा सेसेमाङ्ङिल्ले़ पिरुॽ॥ 10 वेॽसमान् निङ्वाॽ के़माबा याःम्बक् चोःक्मा पर्धाःम् पिरुॽ, वेॽसमान् माङ्निङ्वाॽपान् पाःप्मा पर्धाःम् पिरुॽ, वेॽसमान् नुबा नु ताप्फे़ःम्बा याम्साम्हाॽ से़म्मा पर्धाःम् पिरुॽ, परिक् परिक्पा वेॽ पाःन्दाङ्हाॽ पाःप्मा पर्धाःम् पिरुॽ, हे़क्क्याङ् वेॽसमान् खे़न् पाःन्दाङ्हाॽ ले़ङ्मा पर्धाःम् पिरुॽरो॥ 11 कङ्हाॽ के़रे़क् लत्छा सेसेमाङ्ङिल्ले़ कुयाःम्बक्सिरो॥ हे़क्क्याङ् खुने़ॽग कुनिङ्वाॽ कुइसिक् कन् याम्साम्गे़न् पर्धाःम्हाॽ लत्छाआङ् मे़न्छे़न्छिङ्ङे के़रे़क् पिरुसिॽरो॥ लत्थिक् थक्को यरिक् याम्लक्हाॽ 12 नासिङ्गे़न् थक्को यरिक् याम्लक्हाॽ मे़बत्लो॥ कन् वेॽ वेॽ याम्लक्हाॽलाम् लत्छा नासिङ्गे़न् थक् पोङ्लो॥ हे़क्केलॽरिक् ख्रिस्तरे़ कुधक्किन्नाङ् बा हे़क्तङ्बाए चोक्लो॥ 13 बा हे़क्केलॽरिक् आनिॽ यहुदि, थिम्मे़न्दङ् सुवाङ्बा, योक् इग्र चोःक्युम्भोबा आत्तिन्छाङ् थिक् सेसेमाङ्ङिल्ले़ थिक् थक्को बप्तिस्मा आजोगे़आङ् वाॽ॥ हे़क्क्याङ् आनिॽ के़रे़क्ले़ लत्छा सेसेमाङ् आघोसुम्माङ् आवाॽरो॥ 14 आल्ल नासिङ्गे़न् थक्किङ्ग लत्थिक् याम्लक्ले़रक् मेःन्, कर यरिक् याम्लक्हाॽरे़ चोगे़आङ् वाॽरो॥ 15 आल्ल लाङ्ङिल्ले़ “इङ्गाॽ हुक् मेःन्आ, हे़क्केलॽरिक् कन् थक्कोबा याम्लक् मे़ःन्नारो” पाःत्तुॽसाङ् खे़न् नासिङ्गे़न् थक्कोबा याम्लक् मे़बोङ्ने़न्बि? 16 हे़क्केलॽरिक्के ने़क्खोॽइल्ले़ “इङ्गाॽ मिक् मेःन्आ, खे़ल्ले़चोगुल्ले़ कन् थक्कोबा याम्लक् मे़ःन्नारो” पाःत्तुॽसाङ् खे़न् नासिङ्गे़न् थक्कोबा याम्लक् मे़बोङ्ने़न्बि? 17 काक् नासिङ्गे़न् थक्किन्ने मिक् पोःक्खे़ल्ले़ग, थेःल्ले़ खे़म्मनाबाबे? काक् नासिङ्गे़न् थक्किन्ने ने़क्खोॽ पोःक्खे़ल्ले़ग, थेःल्ले़ नाम्मनाबाबे? 18 कर निङ्वाॽफुमाङ्ङिल्ले़ कुनिङ्वाॽ कुइसिक् काक् याम्लक्हाॽ आबाङे ते़न्नो फत्छुसिआङ् पत्लो॥ 19 काक् याम्थक्किन्ने थिक् याम्थक्लक् पोःक्खे़ल्ले़ग, नासिङ्गे़न् थक्किन् आत्तो वये़बाबे? 20 कर आल्ल यरिक् याम्लक्हाॽ मे़बत्छाङ् नासिङ्गे़न् थक्किङ्ग लत्थिक्लक् वाॽरो॥ 21 मिक्किल्ले़ हुक्किन् “इङ्गाॽ खे़ने़ॽ चाहाबा मे़जोःक्कान्लो” मे़प्मा मे़सुक्तुन्लो॥ हे़क्क्याङ् थे़गेःक्किल्ले़आङ् लाङ्ङिन् “इङ्गाॽ खे़ने़ॽ चाहाबा मे़जोःक्कान्लो” मे़प्मा मे़सुक्तुन्लो॥ 22 से़क्खाःल्ले़ नासिङ्गे़न् थक्को ये़ःङ्घिःक्खिःक्पा के़धाःप्पा याम्लक्हाॽग साॽरिक् चाहाबा के़जोःक्पा चोक्लो, 23 हे़क्क्याङ् नासिङ्गे़न् थक्को आनिॽ साॽरिक् के़ये़क्पा मे़जोक्ने़न् लॽरिक् आइःत्तुम्बा याम्लक्हाॽग आनिॽ साॽरिक्काङ् कम्ब्राङ् आमे़त्तुम्लो॥ हे़क्क्याङ् वेॽहाॽ ओसेःन्धाक्मा मे़न्नुॽमना याम्लक्हाॽ नुरिक्काङ् आनिॽ आदे़प्तुम्लो, 24 कर निमा सुक्के़दे़प्पा याम्लक्हाॽ खे़म्म्याक् साॽरिक् कम्ब्राङ् आम्मे़त्तुम्मिन्लो॥ कर निङ्वाॽफुमाङ्ङिल्ले़ग साॽरिक् के़ये़क्पा निमे़न्धाःप्मनाबा याम्लक्हाॽरे़ नुरिक्काङ् कम्ब्राङ् मे़घोसुनि फाॽआङ् नासिङ्गे़न् थक्को फत्छुसिआङ् पत्॥ 25 हे़क्केलॽरिक् नासिङ्गे़न् थक्को ये़मे़न्दङ् मे़बोङ्ने़न्ल, कर थिक् याम्लक्किल्ले़ वेॽ याम्लक्किन् कम्ब्राङ् चोगुनि के़लॽबा कुनिङ्वाॽ वाॽरो॥ 26 नासिङ्गे़न् थक्को लत्छा याम्लक्किन् तुक्खे चाने़ फाॽग्र खे़न्नुए वेॽ काक् याम्लक्हाॽआङ् सोसोरिक् तुक्खे मे़जारो॥ हे़क्क्याङ् लत्छा याम्लक्किल्ले़ मिङ्सो इङ्धाङ् खोसुॽने़ फाॽग्र खे़न्नु वेॽ काक् याम्लक्हाॽआङ् सोसोरिक् मे़सःत्लो॥ 27 आल्ल खिनिॽग ख्रिस्तरे़ नासिङ्गे़न् कुधक्निङ्लो, हे़क्क्याङ् खिनिॽ के़रे़क् कुधक्किल्ले़ कुयाम्लक्निङ्लो॥ 28 निङ्वाॽफुमाङ्ङिल्ले़ ख्रिस्तरे़ कुधक् सेसेहुप्लक्को अक्खेलॽरिक् सेःक्युक् चोगुसिआङ् वाॽरो— थिक्सिगेःक्पो सेःक्युक्मिबाहाॽ, निसिगेःक्पो माङ्निङ्वाॽपान् के़बाःप्पाहाॽ, सुम्सिगेःक्पो सिक्साम्बाहाॽ, हे़क्क्याङ् निङ्वाॽ के़माबा याःम्बक् के़जोःक्पाहाॽ, के़दुक्पा मनाहाॽ के़वेःम्बाहाॽ, कुभाॽ के़बिबाहाॽ, लाम्गे़लोबाहाॽ, हे़क्क्याङ् परिक्परिक्पा वेॽ पाःन्दाङ् के़बाःप्पाहाॽ॥ 29 हे़क्केःल्ले़ के़रे़क् सेःक्युक्मिबासिबि? के़रे़क् माङ्निङ्वाॽपान् के़बाःप्पासिबि? के़रे़क् सिक्साम्बासिबि? के़रे़क् निङ्वाॽ के़माबा याःम्बक् के़जोःक्पासिबि? 30 थे के़रे़क्ले़ के़दुक्पा मनाहाॽ वेःम्मा पर्धाःम्हाॽ मे़गत्तुबि? के़रे़क् वेॽ पाःन्दाङ् मे़बाःप्पि? के़रे़क्ले़ खे़न् पाःन्दाङ्हाॽ ले़ङ्मा मे़सुक्तुबि? 31 कर सेसेमाङ्ङिल्ले़ आबिबा के़रे़क्नुःल्ले़ नुबा पर्धाःम्हाॽ खोमा निङ्वाॽ चोगे़म्मे़ॽओ॥ हे़क्क्याङ् आल्ल इङ्गाॽ के़रे़क्नुःल्ले़आङ् नुबा लाम् ओसेःन्धाक्निङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.