१ साप्मुःन्धुम् 5 - लिम्बुरुबेनरे़ कुमुॽइदाङ्साहाॽ 1 इस्राइलरे़ कुस्साहाॽओ के़रे़क्नुःल्ले़ तुम्बा रुबेनरे़ कुस्साहाॽ, से़क्खाःल्ले़ खे़न् तगि सावाःन्छिङ्ङाङ् वये़, कर खुने़ॽ आप्फेक् कुम्बारे़ लत्छा कुजक्मेःत् थिक्नु याम्बोःप्मा याःम्बक् चोगुबाल्ले़ चोगुल्ले़ खे़ल्ले़ कुघोमा तुम्बा लक्किन् इस्राइलरे़ कुस्सा योसेफरे़ कुस्साहाॽ मे़बिरुसि, हे़क्क्याङ् मिङ्नाःत्तो खे़न् तुम्बा मे़ल्लेःत्तुन्॥ 2 हे़क्क्याङ् यहुदान् खुने़ॽ आप्फेक् कुन्साॽहाॽओ के़रे़क्नुःल्ले़ के़धुम्बा वये़साङ्, हे़क्क्याङ् खुने़ॽलाम् लत्छा युक्साबा लःन्दे़साङ् तुम्बा लक्खोमा युक्किन् योसेफरे़ए खोसु॥ 3 इस्राइलरे़ कुस्सा तुम्बा रुबेनरे़ कुस्साहाॽ— हानोक, पल्लु, हेस्रोन नु कर्मि॥ 4 योएलरे़ कुस्साहाॽ— खुने़ॽ कुस्सा समायाह, समायाहरे़ कुस्सा गोग, गोगरे़ कुस्सा सिमि, 5 सिमिरे़ कुस्सा मिका, मिकारे़ कुस्सा रायाह, रायाहरे़ कुस्सा बाल, 6 हे़क्क्याङ् बालरे़ कुस्सा बिरह, खुने़ॽ अस्सुरबा हाङ् तिग्लत-पिलेसररे़ ते़म्सुआङ् तेॽरु॥ बिरहन् रुबेनिहाॽरे़ खुन्छिॽ लाम्लोबा वये़॥ 7 खे़ङ्हाॽरे़ खुन्छिॽ काॽइहाॽ, थाःक्थाःक् मे़जोगुसिआङ् खुन्छिॽ मिङ्स्रा मिङ्नाःत्तो मे़साप्तुआङ् पत्— तुम्बा लाम्लोबा यिएल, जकरिया, 8 हे़क्क्याङ् अजाजरे़ कुस्सा बेला, सेमारे़ कुम्मे़न्छाॽ नु योएलरे़ कुजक्मे़न्छाॽ वये़॥ खे़ङ्हाॽ अरोएरओ मे़युङे़, हे़क्क्याङ् खुन्छिॽ ते़ङ्गप्पिन् नेबो नु बाल-मोन थारिक् के़रे़॥ 9 नाङ्गे़न् पिसाङ् खे़ङ्हाॽरे़ युफ्रेतिस वहःङ् थारिक् के़बोबा मुरे़क् खारे़क् थेआङ् के़होप्पा ये़ःङ्घादे़न्निल्ले़ कुयाओ थे़म्बा लत्छा ते़ङ्गप्पिन् मे़युक्तुआङ् ने़स्से़, थेआङ्भे़ल्ले़ गिलादओ खे़ङ्हाॽरे़ खुन्छिॽ पित्थक्साहाॽ यरिक् मे़बोन्दे़आङ् वये़॥ 10 साउलरे़ कुहाङ्युक् ये़म्मो खे़ङ्हाॽ हग्रिहाॽनु थङ् मे़धक्ते़आङ् खुन्छिॽ मे़नाःन्दुसि, हे़क्क्याङ् गिलाद नाङ्गे़न् पिसाङ्बा के़रे़क् लाजेॽहाॽओ के़युङ्बाहाॽरे़ खुन्छिॽ साःङ्गाहिम्हाॽ मे़युक्तु मे़देॽरुरो॥ गादरे़ कुमुॽइदाङ्साहाॽ 11 गादिहाॽ रुबेनिहाॽरे़ कुदोःप्मा थोहाङ् ले़प्माङ् बासानबा सलका थारिक्के मे़युङे़रो— 12 योएले़न् तुम् लाम्लोबा वये़, ताक्फाओ निसिगेक्पा सापामे़न् वये़, खे़न् एगाङ् बासानओ यानैन् नु साफाते़न् वये़सि॥ 13 खे़ङ्हाॽरे़ खुन्छिॽ काॽइहाॽ— मिखाएल, मसुल्लाम, सेबा, योरै, यकान, जिआ नु एबेर—के़रे़क्ले़ नुसि मे़वये़॥ 14 अबिहेलरे़ कुमुॽइदाङ्साहाॽ कन्हाॽए मे़वये़॥ अबिहेले़न् हुरिरे़ कुस्सा वये़, हुरिन् यारोहरे़ कुस्सा वये़, यारोहन् गिलादरे़ कुस्सा वये़, गिलादे़न् मिखाएलरे़ कुस्सा वये़, मिखाएले़न् यसिसैरे़ कुस्सा वये़, यसिसैन् यहदोरे़ कुस्सा वये़, यहदोन् बुजरे़ कुस्सा वये़॥ 15 गुनिरे़ कुस्सा अबदिएलरे़ कुस्सा अहिन् खे़ङ्हाॽरे़ खुन्छिॽ हिम्सयङ्बा तुम् लाम्लोबा वये़॥ 16 गादिहाॽ गिलाद, बासान नु खे़प्मोबा पाङ्भेॽहाॽओ, हे़क्क्याङ् सारोनबा के़रे़क् थक्सा चाराम्मादे़न्हाॽ के़बोबाआङ् के़ने़बा ते़न्हाॽओ थारिक्के मे़युङे़॥ 17 यहुदाबा हाङ् योताम नु इस्राइलबा हाङ् यारोबामरे़ खुन्छिॽ हाङ्युक् ये़म्मो कन् के़रे़क् मिङ्हाॽ खुन्छिॽ मिङ्स्रा मिङ्नाःत्तो मे़साप्तुआङ् पत्लो॥ नाङ्गे़न् पिसाङ् थाःक्कोबा थक्सुबाहाॽ 18 रुबेनिहाॽ, गादिहाॽ नु मनस्सेरे़ कुभ्रे़ःङ् थाःक्हाॽरे़ खुन्छिॽ थक्सुबाहाॽ ४४,७६० मे़वये़॥ खे़ङ्हाॽ खोहाॽ, ताभेहाॽ नु तोङ् लिहाॽ थङ्ङो नुरिक्काङ् याङ्मा के़ले़बा मे़वये़॥ 19 कन्हाॽ हग्रिहाॽ, यतुर, नापिस हे़क्क्याङ् नोदाबहाॽनु थङ् मे़जोगे़॥ 20 खे़ङ्हाॽरे़ निङ्वाॽफुमाङ्ङिल्ले़ कुलाम् ओमे़मे़त्तुआङ् पेलि मे़भाक्तुबाल्ले़ चोगुल्ले़ खुने़ॽ खुन्छिॽ पेलिन् खे़प्सु हे़क्क्याङ् खे़ङ्हाॽ थङ् चोःक्मा के़नाःम्बा मे़बोःक्खे़॥ हे़क्क्याङ् हग्रिहाॽ नु खुन्छिॽ के़रे़क् तेःङ्जुम्बा लाजेॽहाॽ खे़ङ्हाॽरे़ खुन्छिॽ हुक्को मे़ध्ये़॥ 21 खे़ङ्हाॽरे़ खुन्छिॽ पित्थक्साहाॽ, ५०,००० उमे, २,५०,००० मे़ल्लुक् नु २,००० अदङ्हाॽ हुक्काप् मे़जोगुसि, हे़क्क्याङ् १,००,००० मनाहाॽ मे़दे़म्सु मे़देॽरुसि॥ 22 वेॽ यरिक् मनाहाॽ मे़से़रुसि, थेआङ्भे़ल्ले़ कन् थङ्ङिन् निङ्वाॽफुमाङ्लाम् पोःक्खे़आङ् वये़॥ अस्सुरिहाॽरे़ खे़ङ्हाॽ मे़न्दे़म्सुसिन्नाङ् मे़न्देॽरुसिन्ल थारिक् खे़ङ्हाॽ खे़न् लाजेॽओ मे़युङे़रो॥ नाङ्गे़न् पिसाङ् मनस्सेरे़ कुभ्रे़ःङ् थाःक्हाॽ 23 मनस्सेबा कुभ्रे़ःङ् थाःक्हाॽ बासानलाम् बाल-हेर्मोन, सेनिर (हेर्मोन कोःक्मा) थारिक्पा लाजेॽओ मे़युङे़, हे़क्क्याङ् खे़ङ्हाॽ खानिःत्तो आत्तातान्ने यरिक् मे़बोःक्खे़॥ 24 खे़ङ्हाॽरे़ खुन्छिॽ हिम्सयङ्बा कुधे़गेक् मनाहाॽ हाबा कन्हाॽरो—एपेर, यिसि, एलिएल, अज्रिएल, यर्मिया, होदबिया नु यहदिएल॥ खे़ङ्हाॽ के़रे़क् मुक्के़गुबा थङ्गे़जोःक्पा नु खुन्छिॽ मिङ् के़दिःप्पा हे़क्क्याङ् खे़ङ्हाॽरे़ खुन्छिॽ हिम्सयङ्हाॽओबा कुधे़गेक् लाम्लोबा मे़वये़रो॥ नाङ्गे़न्बा थाःक्हाॽ लाजेॽलाम् मे़लःत्तुसि 25 कर खे़ङ्हाॽरे़ खुन्छिॽ पाधे़बाहाॽरे़ खुनिॽ निङ्वाॽफुमाङ्ङिल्ले़ कुदक्ले़ङ्वाओ लायो मे़जोगु, हे़क्क्याङ् निङ्वाॽफुमाङ्ङिल्ले़ खुन्छिॽ तगिलाम् मे़क्खुसिबा मनाहाॽरे़ खुन्छिॽ माङ्हाॽ माङ्से़वा मे़मे़त्तुसिआङ् के़त्निमा याःम्बक् के़जोःक्मानु कुदङ्बा मे़जोःक्सिङ्॥ 26 कल्ले़चोगुल्ले़ इस्राइलबा निङ्वाॽफुमाङ्ङिल्ले़ अस्सुरबा हाङ् पुल इग्र अस्सुरबा हाङ् तिग्लत-पिलेसेरे़न् हुसु, खम्भ्याङ् खुने़ॽ रुबेन, गाद नु मनस्सेरे़ कुभ्रे़ःङ् थाःक्कोबा मनाहाॽ ते़म्सुदेॽरुसि॥ खुने़ॽ खे़ङ्हाॽ हलह, हाबोर, हारा नु गोजान वहःङ्ङिल्ले़ कुयाओ तेॽरुसि, हे़क्क्याङ् खे़ङ्हाॽ खे़प्मो आइन्बा ये़न् थारिक् मे़युङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.