१ साप्मुःन्धुम् 26 - लिम्बुमाङ्हिम् लाम्धेत् के़गोबाहाॽ 1 लाम्धेत् के़गोबा मनासुम्हाॽ— कोरहिहाॽलाम्—कोरेरे़ कुस्सा मेसेलेम्याह, कोरे़न् आसापरे़ कुस्साहाॽओ थिक्पा वये़॥ 2 मेसेलेम्याहरे़ कुस्साहाॽ— तुम्बा जकरिया, सरुम्बा येदिएल, हाङ्सरुम्बा जबदियाह, थाङ्सरुम्बा यत्निएल, 3 यत्निएलरे़ कुसिःक्तोबा एलाम, एलामरे़ कुसिःक्तोबा येहोहानान नु फोॽबान् एल्यहोएनै॥ 4 ओबेद-एदोमरे़ कुस्साहाॽ— तुम्बा समायाह, सरुम्बा यहोजाबाद, हाङ्सरुम्बा योआ, थाङ्सरुम्बा साकार, साकाररे़ कुसिःक्तोबा नतनेल, 5 नतनेलरे़ कुसिःक्तोबा अम्मिएल, अम्मिएलरे़ कुसिःक्तोबा इस्साखार नु फोःक्वाबा पुल्लतै॥ कम्भलॽरिक् निङ्वाॽफुमाङ्ङिल्ले़ ओबेद-एदोमे़न् हाङ्वागे़न् मुॽइसाम् पिरुआङ् वये़रो॥ 6 ओबेद-एदोमरे़ कुस्सा तुम्बा समायाहरे़ कुस्साहाॽआङ् मे़वये़॥ खे़ङ्हाॽ खुन्छिॽ पानुदिङ् पाःल्ले़ कुहिम्सयङ्ङो लाम्लोबा मे़वये़, थेआङ्भे़ल्ले़ खे़ङ्हाॽ साॽरिक् कुस्सिगे़याःम्बा मना मे़वये़॥ 7 समायाहरे़ कुस्साहाॽ—ओत्नि, रपाएल, ओबेद नु एल्जाबाद॥ खे़ल्ले़ कुगाॽइ एलिहु नु समक्याहःन्नाङ् के़दम्बा सुम्बोधासाबा मना वये़सि॥ 8 कन्हाॽ के़रे़क् ओबेद-एदोमरे़ कुधिन्दाङ् सायोबोरा मे़वये़॥ खे़ङ्हाॽ नु खे़ङ्हाॽरे़ खुन्छिॽ साहाॽ हे़क्क्याङ् खे़ङ्हाॽरे़ खुन्छिॽ काॽइहाॽ के़दम्बा कुस्सिगे़याःम्बा मना मे़वये़, खम्भ्याङ् याःम्बक् चोःक्मारे़ लागि खुन्छिॽ चाॽरिक् के़धुम्बा मे़जोगे़॥ खे़ङ्हाॽ के़रे़क्ले़ ६२ मना मे़वये़॥ 9 मेसेलेम्याहरे़ कुस्साहाॽ नु कुगाॽइहाॽ के़रे़क् के़दम्बा १८ मना सुम्बोधासाबा मे़वये़रो॥ 10 मरारि होसारे़ कुस्साहाॽ—तुम्बे़न् सिम्रि (खुने़ॽ तुम्बा मे़वये़ने़न्, खुने़ॽ कुम्बारे़ खे़न् तुम्बा चोगुआङ् वये़), 11 सरुम्बा हिल्कियाह, हाङ्सरुम्बा तबलियाह नु फोॽबान् जकरिया वये़॥ होसारे़ कुस्साहाॽ नु कुगाॽइहाॽ के़रे़क्ले़ १३ मे़वये़॥ 12 हिम्सयङ् हिम्सयङ् कुइसिक् कुलुप् कुलुप्पो मे़से़न्दुसिबा माङ्हिम् लाम्धेत् के़गोबा कन् तुम् लाम्लोबा ये़म्बित्छाहाॽ खुन्छिॽ काॽइहाॽ कुइसिक् यहवे दाङ्बे़ल्ले़ कुहिम्मोबा माङ्से़वा याःम्बक्ले़ लागि मे़से़न्दुसिआङ् वये़॥ 13 थाङ्बे़न् नु खदाक्मि ने़प्माङ्बा के़रे़क्ले़ खुन्छिॽ आप्फेक् आप्फेक् हिम्सयङ् कुइसिक् यम्बा लाम्धेत् थक्मारे़ लागि तॽयाःन्सोन् मे़गे़सु॥ 14 नाङ्गे़न् पिसाङ्बा लाम्धेःत्तिल्ले़ लागि सेलेम्याहरे़ कुमिङ्ङो थ्ये़॥ खे़न् एगाङ् खुने़ॽ कुस्सा सिक्कुम्साबा सुजादाङ्बा जकरियाःल्ले़ कुमिङ्ङो थाङ्गे़त् ले़प्माङ्बा लाम्धेःत्तिन् थ्ये़॥ 15 ओबेद-एदोमरे़ कुलागि लाङ्गे़त् पिसाङ्बा लाम्धेःत्तिन् थ्ये़, हे़क्क्याङ् खुने़ॽ कुस्साहाॽरे़ लागि चाधाःङ्ङिन् थ्ये़॥ 16 सुप्पिम नु होसाःल्ले़ खुन्छिॽ लागि नाम्धा पिसाङ्बा लाम्धेःत्तिन् नु थाम्माङ् के़हिसिङ्बा लाम्मोबा सल्केत मे़प्मनाबा लाम्धेःत्तिन् थ्ये़॥ लाम्धेत् के़गोबा थिक्के़न् वेॽ लाम्धेत् के़गोबाल्ले़ कुनिःत्ताङ्ङे ये़बे़॥ 17 तुक्सि ले़बिहाॽ थिक्याःन्धक् नाङ्गे़न् पिसाङ्, लिसि थाङ्गे़त् ले़प्माङ्, लिसि लाङ्गे़त् पिसाङ् नु ने़त्छि ने़त्छि मना चाधाःङ्हाॽ के़गोबा मे़ये़बे़॥ 18 हे़क्क्याङ् नाम्धा लक्खुम्मो पेःक्मा लाम्मो लिसि नु लक्खुम्मोए ने़त्छि मना ये़बे़सि॥ 19 कोरह नु मरारिःल्ले़ खुन्छिॽ मुॽइदाङ्साहाॽओबा लाम्धेत् के़गोबाहाॽ कन्हाॽए मे़वये़रो॥ माङ्हिम्मोबा याङ्सुम्बा नु वेॽ सुहाङ्युक्पाहाॽ 20 खे़ङ्हाॽरे़ खुन्छिॽ ले़बि तेःङ्जुम्हाॽ यहवे दाङ्बे़ल्ले़ कुहिम्मोबा थाःङ्हाॽ नु मे़दोन्दुबा चिगक्वा युङ्मा थाःङ्हाॽ ओमे़प्मा लक्पे़न् मे़बिरुसिआङ् वये़॥ 21 लादानरे़ कुमुॽइदाङ्साहाॽग लादानलाम् सागे़वाःन्छिङ्बा गेर्सोनिहाॽ मे़वये़ हे़क्क्याङ् गेर्सोनि लादानरे़ कुहिम्सयङ्बाहाॽरे़ खुन्छिॽ पाधे़बा मे़वये़— 22 यहिएल नु खुने़ॽ कुस्साहाॽ, हे़क्क्याङ् जेताम नु खुने़ॽ कुन्साॽ योएल॥ खे़ङ्हाॽ यहवे दाङ्बे़ल्ले़ कुहिम्मोबा थाःङ्हाॽ ओगे़मे़प्पा लक्पे़न्साबा मे़वये़॥ 23 अम्रामिहाॽ, यिसहारिहाॽ, हेब्रोनिहाॽ नु उज्जिएलिहाॽलाम्— 24 मोसारे़ कुस्सा गेर्सोमरे़ कुमुॽइदाङ्सा सुबाएले़न् थाःङ्हाॽओबा सुहाङ्युक्पा वये़॥ 25 एलिएजरलाम् खुने़ॽ कुगाॽइहाॽ—खुने़ॽ कुस्सा रहब्याह, रहब्याहरे़ कुस्सा यसयाह, यसयाहरे़ कुस्सा योराम, योरामरे़ कुस्सा जिक्रि, जिक्रिरे़ कुस्सा सलोमित वये़॥ 26 दाउद हाङ्ङिन् नु हिम्सयङ् हिम्सयङ्बा लाम्लोबाहाॽ, हे़न्छिङ् हे़न्छिङ् नु किप् थिक् किप् थिक् थक्सुबाहाॽरे़ खुन्छिॽ सुहाङ्युक्पा के़वाॽबा हे़क्क्याङ् वेॽ थक्मोबाहाॽरे़ मे़दोन्दुबा हुक्वाहाॽ सलोमिते़न् नु खुने़ॽ कुगाॽइहाॽरे़ ओमे़प्मा के़बोङ्बा लक्पे़न् वये़॥ 27 खे़ङ्हाॽरे़ थङ्ङो मे़नाप्तुसिबा कुभा चिगक्वा सामाहाॽ यहवे दाङ्बे़ल्ले़ कुहिम्मिन् चाःङ्वा मे़प्मारे़ लागि खे़ङ्हाॽरे़ मे़दोन्दुआङ् वये़॥ 28 खागे़इक्पा सामुए़ल, किसरे़ कुस्सा साउल, नेररे़ कुस्सा अबनेर नु सरुयाहरे़ कुस्सा योआबसिरे़ मे़दोन्दुबा के़रे़क् सामाहाॽ, हे़क्क्याङ् हुक्वा मे़दोन्दुबा वेॽ सामाहाॽ खक्पे़त् सलोमित नु खुने़ॽ कुगाॽइहाॽरे़ खुन्छिॽ लक्पे़न्नो वये़रो॥ वेॽ ले़बिहाॽरे़ खुन्छिॽ याःम्बक् 29 यिसहारिहाॽलाम्—कनन्याह नु खुने़ॽ कुस्साहाॽ माङ्हिम्मोबा याःम्बक्नुःल्ले़ वेॽसमा याःम्बक्को, सुहाङ्युक्पा नु इस्राइलबा खासे़न्लोःम्बा हे़क्तङ्बा याःम्बक्को मुरा मे़मे़त्तुसिआङ् वये़॥ 30 हेब्रोनिहाॽलाम्—हसब्याह नु खुने़ॽ कुगाॽइहाॽ, १,७०० के़दम्बा सुम्बोधासाबा मनाहाॽ यर्दन वहःङ् लाम्बा नाम्धा ले़प्माङ्बा इस्राइलओ यहवे दाङ्बे़ल्ले़ के़रे़क् कुयाःम्बक् नु हाङ्ङिल्ले़ कुसे़वा याःम्बक् ओगे़मे़प्पा के़जोःक्पा मे़वये़॥ 31 हेब्रोनबा हिम्सयङ्हाॽरे़ खुन्छिॽ मिङ्स्रा कुइसिक् यरियाहःन् तुम् लाम्लोबा वये़॥ दाउदरे़ हाङ्युक् चोगुबा लिबोङ्गेक्पा तङ्बेओ हेब्रोनिहाॽरे़ खुन्छिॽ मिङ्स्राओ मे़गोःत्तु मे़हक्सु, हे़क्क्याङ् गिलादबा याजेरओ खे़ङ्हाॽरे़ के़दम्बा सुम्बोसाधाबा मनाहाॽ मे़घोसुसि॥ 32 यरियाहबा २,७०० के़दम्बा सुम्बोसाधाबा काॽइहाॽ मे़वये़, खे़ङ्हाॽ हिम्सयङ् हिम्सयङ्हाॽओबा लाम्लोबा मे़वये़॥ कन्हाॽ दाउद हाङ्ङिल्ले़ रुबेनिहाॽ, गादिहाॽ नु मनस्सेरे़ कुभ्रे़ःङ् कुधाःक्हाॽओ निङ्वाॽफुमाङ्ङिल्ले़ कुयाःम्बेओ के़रे़क् पाःन्हाॽ नु हाङ्याःम्बक् ओगे़मे़प्पा के़जोःक्पा चोगुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.