१ साप्मुःन्धुम् 23 - लिम्बुले़बिहाॽरे़ खुन्छिॽ याःम्बक् 1 आल्ल दाउदे़न् काप्पोबा तुम्से़आङ् यरिक् तङ्बे योरे़आङ् वये़, खे़ब्याङ् खुने़ॽ कुस्सा सोलोमने़न् इस्राइलओ हाङ् चोगु॥ 2 दाउदरे़ इस्राइलबा के़रे़क् थाःक्लाम्लोबाहाॽ, निङ्वाॽफुसाम्बाहाॽ नु ले़बिहाॽ फुक्खुसि॥ 3 ले़बिहाॽओ तङ्बे सुम्बोङ् के़गे़प्पा नु खे़न्नुःल्ले़ यरिक् तङ्बे के़योबाहाॽ मे़निरुसि॥ खे़ङ्हाॽरे़ खुन्छिॽ ये़म्बित्छा मनाहाॽ के़रे़क्ले़ ३८,००० मे़वये़॥ 4 खे़ङ्हाॽओबा २४,००० यहवे दाङ्बे़ल्ले़ कुहिम्मो याःम्बक् ओगे़मे़प्पा ६,००० सुहाङ्युक्पाहाॽ नु खासे़न्लोःम्बाहाॽ, 5 ४,००० लाम्धेत् के़गोबाहाॽ, हे़क्क्याङ् ४,००० मनारे़ मुक्लाहाॽ मुङ्माआङ् यहवे दाङ्बे़ल्ले़ कुनारा फोमारे़ लागि दाउदरे़ मुरा मे़त्तुसि॥ 6 दाउदरे़ ले़बिहाॽ खुन्छिॽ हिम्सयङ् कुइसिक् गेर्सोन, कहात नु मरारिन् कुलुप् सुम्सिओ से़न्दुसिरो॥ गेर्सोनिहाॽ 7 गेर्सोनिहाॽरे़ खुन्छिॽ मुॽइदाङ्साहाॽ— लादान नु सिमि॥ 8 लादानरे़ कुस्साहाॽ— कुस्सा तुम्बा यहिएल, जेताम नु योएल के़रे़क्ले़ सुम्सि॥ 9 सिमिरे़ कुस्साहाॽ— सलोमोत, हजिएल नु हारान के़रे़क्ले़ सुम्सि॥ लादानरे़ कुहिम्सयङ्ङोबा लाम्लोबाहाॽ आम्भा कन्हाॽए मे़वये़॥ 10 हे़क्क्याङ् सिमिरे़ कुस्साहाॽ— यहत, जिजा, येउस नु बरिआ॥ सिमिरे़ कुस्साहाॽ के़रे़क्ले़ लिसि हाबा कन्हाॽए मे़वये़॥ 11 यहते़न् कुस्सा तुम्बा वये़, निसिगेक्पा जिजा, कर येउस नु बरिआरे़ सुःल्लिक्लक् खुन्छिॽ साएहाॽ मे़वये़बाल्ले़ चोगुल्ले़ खे़ङ्हाॽ लत्छा हिम्सयङ्ङो मे़निरुसिरो॥ कहातिहाॽ 12 कहातरे़ कुस्साहाॽ— अम्राम, यिसहार, हेब्रोन नु उज्जिएल के़रे़क्ले़ लिसि॥ 13 अम्रामरे़ कुस्साहाॽ हारुन नु मोसा॥ हारुने़न् लाःत्लाःत् मे़से़न्दुआङ् वये़॥ खे़न् नु खुने़ॽ कुमुॽइदाङ्साहाॽ सदादिङ्ले़ लागि हे़क्क्याङ् के़रे़क्नुःल्ले़ सेसे पाःन्हाॽ तोःम्मारे़ लागि, यहवे दाङ्बे़ल्ले़ कुदगि सिदुङ्जभाहाॽ तोःम्मारे़ लागि नु खुने़ॽ कुदगि माङ्से़वा चोःक्मारे़ लागि हे़क्क्याङ् खुने़ॽ कुमिङ्ङो आभे़ल्ले़साङ् हाङ्वागे़न् मुॽइसाम् पिमासिरे़ लागि मे़वये़॥ 14 यहवे दाङ्बे़ल्ले़ कुमना मोसाःल्ले़ कुस्साहाॽ ले़बिरे़ कुधाःक्कोबा मे़लेःत्तुसि॥ 15 मोसाःल्ले़ कुस्साहाॽ— गेर्सोम नु एलिएजर॥ 16 गेर्सोमरे़ कुमुॽइदाङ्साहाॽ— सुबाएले़न् तुम्बा वये़॥ 17 एलिएजररे़ कुमुॽइदाङ्साहाॽ— रहब्याहन् तुम्बा सा वये़॥ एलिएजररे़ वेॽ कुस्साहाॽ मे़होःप्ते़, कर रहब्याहरे़ कुस्साहाॽ साॽरिक् यरिक् मे़वये़॥ 18 यिसहाररे़ कुस्साहाॽ— सलोमिते़न् कुस्सा तुम्बा वये़॥ 19 हेब्रोनरे़ कुस्साहाॽ— यरियाहन् कुस्सा तुम्बा वये़, निसिगेक्पान् अमर्याह, सुम्सिगेक्पान् यहासेल नु लिसिगेक्पान् यकमाम वये़॥ 20 उज्जिएलरे़ कुस्साहाॽ— मिकान् कुस्सा तुम्बा नु निसिगेक्पान् यिसियाह वये़रो॥ मरारिहाॽ 21 मरारिरे़ कुस्साहाॽ— महलि नु मुसि॥ महलिरे़ कुस्साहाॽ— एलाजारे़न् नु किस॥ 22 एलाजारे़न् मासिङ्ङिल्ले़ खुने़ॽ कुस्सा मे़न्छुमारक् मे़वये़, कुस्सा ये़म्बित्छा मे़होःप्ते़॥ कल्ले़चोगुल्ले़ खुन्छिॽ फुॽनुसाॽ, इग्र किसरे़ कुस्साहाॽरे़ खे़ङ्हाॽ मेःक्खिम् मे़मे़त्तुसि॥ 23 मुसिरे़ कुस्साहाॽ— महलि, एदेर नु यरिमोत के़रे़क्ले़ सुम्सि मे़वये़रो॥ 24 खे़ङ्हाॽरे़ खुन्छिॽ थामिङ्ङो हिम्सयङ् हिम्सयङ् मे़से़न्दुसिबा कुइसिक् ले़बिरे़ कुमुॽइदाङ्साहाॽ, खुन्छिॽ आप्फेक् आप्फेक् हिम्सयङ्ङोबा लाम्लोबाहाॽओ तङ्बे निबोङ् के़गे़प्पा नु खे़न्नुःल्ले़ यरिक् के़गे़प्पाहाॽरे़ यहवे दाङ्बे़ल्ले़ कुहिम्मो माङ्से़वा याःम्बक् मे़जोगु, खे़ङ्हाॽ अक्तङ्बाए मे़वये़॥ 25 थेआङ्भे़ल्ले़ दाउदरे़ पाःत्तुआङ् वये़, “यहवे दाङ्बा इस्राइलबा निङ्वाॽफुमाङ्ङिल्ले़ कुमनाहाॽ ताप्थेक् याम्धेक् कत्तुसिआङ् वाॽ, हे़क्क्याङ् यरुसले़ःम्मो खुने़ॽ सदादिङ् वाॽ॥ 26 कल्ले़चोगुल्ले़ सेसे साःङ्गाहिम्मो इग्र खे़प्मो माङ्से़वा याःम्बक्ले़ लागि याङ्मनाबा खप्प्या सामाहाॽ ले़बिहाॽरे़ याम्मो आभे़ल्ले़आङ् पङ्मा मे़बोङ्ने़न्॥” 27 दाउदरे़ आम्भा कन् याङ्सिबा कुबाःन्हाॽलाम् निबोङ् तङ्बे नु खे़न्नुःल्ले़ यरिक् तङ्बे के़योबा ले़बिहाॽ मे़निरुसि॥ 28-29 ले़बिहाॽरे़ खुन्छिॽ याःम्बक्के़न् यहवे दाङ्बे़ल्ले़ कुहिम्मोबा माङ्से़वाओ हारुनरे़ कुमुॽइदाङ्साहाॽ फाॽमासि के़बोङ्बा वये़॥ लक्खुम् नु याक्फाङ्हाॽ ओमे़प्मा, के़रे़क् सेसे पाःन्हाॽ सुत्थो चोःक्मा, निङ्वाॽफुमाङ्ङिल्ले़ कुहिम्मोबा माङ्से़वा याःम्बक्कोबा वेॽ याःम्बक् चोःक्मा, हे़क्क्याङ् चप्ते़न्नो ने़मनाबा खरे़ःङ्हाॽ पे़न्बे़न् तङ्मा, पोगुगे़न् कुजाःल्ले़ फेॽदुम्मिन्, खरे़ःङ् के़भङ्बा सिदाॽ मे़न्याक्केबा सेसे खरे़ःङ्ङिन्, ओॽमनाबा नु निःङ्गेॽओ ले़ःङ्मनाबा चारःप्पा हे़क्क्याङ् कुसिःक्मा नु कुधाङ्मा ते़म्दुरिन् यारिप् चोःक्मा, कन् के़रे़क् याःम्बक्हाॽ ओमे़प्मा खे़ङ्हाॽरे़ खुन्छिॽ लक्पे़न् वये़॥ 30 हे़क्क्याङ् खे़ङ्हाॽरे़ यहवे दाङ्बे़न् तानाम् थक्मा ये़प्माआङ् नुगे़न् पिमा नु कुनारा फोमा के़बोङ्बा वये़, हे़क्केलॽरिक्के युःन्छिक्, 31 यहवे दाङ्बे़ल्ले़ कुदगि चाहा के़जोःक्पा यारिक् थिम् के़प्माआङ् चक्मे़ल्लॽए सबाथ, लादुप् नु निःन्धो के़बोङ्बा तङ्नाम्हाॽओ यहवे दाङ्बे़ल्ले़ कुलागि मिधिङ्मनादेमनाबा वयागे़न् सिदुङ्जभा तोःम्मा के़बोङ्बा वये़॥ 32 कम्भलॽरिक् ले़बिहाॽरे़ तुम्मादे़न् साःङ्गाहिम्मिन् नु सेसेदे़न्निन् ओमे़प्मा याःम्बक्, हे़क्क्याङ् खे़ङ्हाॽरे़ खुन्छिॽ काॽइ हारुनरे़ कुधिन्दाङ् सायोबोराहाॽरे़ खुन्छिॽ युक्सिगाङ् यहवे दाङ्बे़ल्ले़ कुहिम्मोबा माङ्से़वाओ याःम्बक् चोःक्मा के़बोङ्बा वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.