१ साप्मुःन्धुम् 22 - लिम्बु1 खे़ब्याङ् दाउदरे़ मे़त्तु, “यहवे दाङ्बे़ल्ले़ कुहिम् युक्नादे़न् चोःक्मारे़ लागि आम्भा कप्मो पोङ्ॽ, हे़क्क्याङ् आम्भा कप्मोए इस्राइलरे़ लागि मिधिङ्मनादेमनाबा वयागे़न् सिदुङ्जभा ले़त्ति तोःम्मादे़न् पोङ्लो॥” माङ्हिम् चोःक्मा यारिप् 2 खम्भ्याङ् दाउदरे़ इस्राइलओ के़युङ्बा के़रे़क् वेॽ लाजेॽबा मनाहाॽ चुम्मारे़ लागि इङ्जाङ् पिरुसि, हे़क्क्याङ् यहवे दाङ्बे़ल्ले़ कुहिम् चोःक्मारे़ लागि खे़ङ्हाॽरे़ लुङ्हाॽ मे़घक्तुआङ् यारिप् मे़जोगुर फाॽआङ् याःम्बक्को फत्छुसि॥ 3 खुने़ॽ फे़न्तिङ् नु लाम्धेत् कुभिःप्मा कार्वाहाॽ चोःक्मारे़ लागि यरिक् फे़न्जेॽ पिरुसि, हे़क्क्याङ् थाङ्मा सुक्मे़न्दे़त्ते यारिक् कासाआङ् पिरुसि॥ 4 हे़क्क्याङ् साम्माङ्सिङ् हे़क्मनाबा सिङ्हाॽ निःप्मे़न्दे़त्ते लुप्सु, सिदोन नु तुरोसबा मनाहाॽरे़ दाउदरे़ कुलागि वे़त्ते़सरे़ साम्माङ्सिङ्हाॽ मे़युरु मे़बिरु॥ 5 दाउदरे़ पाःत्तु, “यहवे दाङ्बे़ल्ले़ कुलागि चोःक्मा के़बोङ्बा हिम्मिन् साॽरिक्के के़घे़म्सिङ्बा नु काक् लाजेॽहाॽओ के़इङ्बा नु कुमिङ् के़दिःप्पा पोङ्मा पोङ्ॽ कर आङ्गाॽ आस्सा सोलोमने़न् सेःप्मा वाॽ॥ कल्ले़चोगुल्ले़ खे़न् चोःक्मारे़ लागि आङ्गाॽए हिसुङ् तङ्घुङ्ॽ॥” कल्ले़चोगुल्ले़ दाउदरे़ खुने़ॽ कुसिमानुःल्ले़ तगि आत्तातान्ने यरिक् सामाहाॽ यारिप् चोःक्मा हेःक्तु॥ 6 खुने़ॽ कुस्सा सोलोमने़न् उःत्तु, हे़क्क्याङ् यहवे दाङ्बा इस्राइलबा निङ्वाॽफुमाङ्ङिल्ले़ कुलागि लत्छा हिम् चोःक्मा इङ्जाङ् पिरु॥ 7 खुने़ॽ सोलोमने़न् मे़त्तु, “आस्साए, यहवे दाङ्बा आनिङ्वाॽफुमाङ्ङिल्ले़ कुमिङ्ले़ लागि लत्छा हिम् चोःक्मा आङ्गाॽ आनिङ्वाॽ वये़॥ 8 कर यहवे दाङ्बे़ल्ले़ हे़क्के चोःक्मा मे़भाःक्ताङ्ङिन्नाङ् पाःत्तु, ‘खे़ने़ॽ यरिक् माक्खिॽसिवा के़से़सुआङ् वाॽ हे़क्क्याङ् यम्बयम्बा थङ् के़जोगुआङ् वाॽ॥ आङ्गाॽ आमिङ्ङिल्ले़ लागि खे़ने़ॽ कन् हिम्मिन् चोःक्मा के़ङ्घोसुन्ॽ, थेआङ्भे़ल्ले़ आङ्गाॽ आमिक्साओ खे़ने़ॽ इक्सादिङ् खाम्बेःक्मो यरिक् माक्खिॽ के़से़सुआङ् वाॽ॥ 9 कर खे़ने़ॽ के़स्सा थिक् वाॽ, खे़न् सनारुङ्बा मना पोङ्ॽ॥ आङ्गाॽ के़रे़क् पिसाङ् खुने़ॽ के़रे़क् कुनिङ्मिहाॽलाम् कम्ब्राङ् मे़त्तुङ्ॽ॥ खे़ल्ले़ कुमिङ् सोलोमन पोङ्ॽ॥ खुने़ॽ कुहाङ्युक् ये़म्मो आङ्गाॽ इस्राइले़न् सनारुङ् नु चिजि ये़म्ये़म् पिरुङ्ॽ॥ 10 खे़ल्ले़ए आङ्गाॽ आमिङ्ङो लत्छा हिम् चोगुॽ॥ खे़न् आङ्गाॽ आस्सा पोङ्ॽ, हे़क्क्याङ् आङ्गाॽ खे़ल्ले़ कुम्बा पोङ्ङा॥ खम्भ्याङ् आङ्गाॽ इस्राइलओ सदादिङ्ले़ लागि खुने़ॽ कुहाङ्जुम्मोबा हाङ्युक्नान् थधप् मे़ल्लॽमनाबा चोगुङ्ॽ॥’ 11 “आल्ल आस्सा सोलोमनए, यहवे दाङ्बे़न् खे़ने़ॽनु वाॽररो॥ खुने़ॽ कुहिम्मिन् खे़ने़ॽए के़जोगुर फाॽआङ् खुने़ॽ के़याःम्बेओ पाःत्तुबा कुइसिक् खे़ने़ॽ के़नुॽ के़दार, हे़क्क्याङ् खे़ने़ॽ यहवे दाङ्बा के़निङ्वाॽफुमाङ्ङिल्ले़ कुहिम् चोगे़ॽओ॥ 12 यहवे दाङ्बे़ल्ले़ खे़ने़ॽ सिक्कुम्दिङ् निङ्वाॽ नु ने़हिनिङ्वाॽ के़बिॽर, हे़क्केलॽरिक् खुने़ॽ इस्राइलओ युक् के़बिःल्ले़ खे़ने़ॽ यहवे दाङ्बा के़निङ्वाॽफुमाङ्ङिल्ले़ कुइङ्जाङ्ङिन् इःत्ते़ नाःत्ते़ॽओ॥ 13 इस्राइलरे़ कुलागि यहवे दाङ्बे़ल्ले़ मोसान् इङ्जाङ् पिरुबा कुइसिक् खे़ने़ॽ खुने़ॽ कुइङ्जाङ्हाॽ नु कुधिम्हाॽ इःप्मा नाःप्मारे़ लागि सिङ्सिङ् ये़क्ये़क् के़लॽने़भग्र खे़ने़ॽ के़नुॽ के़दारो॥ के़धुम्बा नु हाङ्हाङ् के़लॽबा पोःक्खे़ॽ, मे़गिसे़न्ने़ॽ हे़क्क्याङ् कुनिङ्साङ् के़बुक्पा मे़बोःक्खे़न्ने़ॽ॥ 14 “साॽरिक् तुक्खे चोगुङ्ङाङ् आङ्गाॽ यहवे दाङ्बे़ल्ले़ कुहिम्मिल्ले़ लागि १,००,००० तोरा साम्म्याङ्, १०,००,००० तोरा युप्पा, थाङ्मा सुक्मे़न्दे़प्मनाबा कासा नु फे़न्जेॽ ताङ्घुङ्ङाङ् वाॽ॥ सिङ्हाॽ नु लुङ्हाॽआङ् लुप्सुङ्ङाङ् ने़रो॥ खे़प्मो खे़ने़ॽ वेॽ योॽमा के़सुक्तुॽ॥ 15 खे़न्नुःल्ले़ वेॽ खे़ने़ॽनु यरिक् चोबेगुहाॽ, लुङ्गाम्बाहाॽ, लुङ्गे़घक्पाहाॽ, सिङ्गाम्बाहाॽ, 16 हे़क्क्याङ्, साम्म्याङ्, युप्पा, कासा नु फे़न्जेःल्ले़न् के़रे़क् परिक्पा याःम्बक् के़जोःक्पा निःत्मे़न्दे़त् कुहुक्चो के़नुॽबा मनाहाॽआङ् मे़वाॽ॥ कल्ले़चोगुल्ले़ आल्ल याःम्बक्किन् हेःक्ते़ॽ, हे़क्क्याङ् यहवे दाङ्बे़न् खे़ने़ॽनु वाॽररो॥” 17 दाउदरे़ इस्राइलबा के़रे़क् लाम्लोबाहाॽ खुने़ॽ कुस्सा सोलोमने़न् फाॽराम्मे़ॽ फाॽआङ् अक्तङ्बा इङ्जाङ् पिरुसि, 18 “थे यहवे दाङ्बा खिनिॽ निङ्वाॽफुमाङ्ङिन् खिनिॽनु होःप्पि? खुने़ॽ के़रे़क् पिसाङ् खिनिॽ ताप्थेक् याम्धेक् के़गत्तिबा होःप्पि? खुने़ॽ कन् लाजेॽओबा मनाहाॽ आङ्गाॽ आयुक्को युक्खुसिआङ् वाॽ॥ खे़ङ्हाॽ यहवे दाङ्बान् नु खुने़ॽ कुमनाहाॽरे़ खुन्छिॽ युक्को मे़वाॽ॥ 19 आल्ल यहवे दाङ्बा खिनिॽ निङ्वाॽफुमाङ्ङिन् खिनिॽ के़रे़क् निङ्वाॽ नु सिक्लुङ्माॽरे़ कोःत्ते़म्मे़ॽ॥ खुने़ॽ कुसेसेदे़न् चोःक्मा हेःक्ते़म्मे़ॽ, हे़क्केलॽरिक् यहवे दाङ्बे़ल्ले़ कुमाङ्हुप् सन्दोक्किन् नु निङ्वाॽफुमाङ्ङिल्ले़ कुसेसे खप्प्या सामाहाॽ खुने़ॽ कुमिङ्ङिल्ले़ लागि के़जोगुम्बा माङ्हिम्मो खिनिॽ फे़प्मा के़सुक्तुम्लरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.