१ साप्मुःन्धुम् 21 - लिम्बुदाउदरे़ थङ् के़जोःक्पा मनाहाॽ निरुसि ( २ सामु २४:१-२५ ) 1 माफे़न्साम्मिन् इस्राइलरे़ कुदक्ले़ङ्वाओ पोगे़आङ् दाउदे़न् कुमनाहाॽ निःप्मासिरे़ लागि हुसु॥ 2 कल्ले़चोगुल्ले़ दाउदरे़ योआबे़न् नु खुने़ॽ कुधक्सुबाहाॽओबा सुहाङ्युक्पाहाॽ बेर्सेबाआङ् कत्थो दान थारिक्पा इस्राइलिहाॽरे़ खुन्छिॽ याम्नाःत्निःत् चोगे़म्मे़ॽ फाॽआङ् खे़ङ्हाॽ मे़त्तुसि॥ खे़ब्याङ् खे़ङ्हाॽ आक्ख्यारिक् मे़वाॽ, आङ्गाॽ आमे़त्ते़म्मे़ॽ॥ 3 योआबरे़ नुगप् पिरु, “यहवे दाङ्बे़ल्ले़ कुधक्सुबाहाॽ किप् थिक् यारिक् फोसुसिर! थे आदाङ्बा आल्लसाङ् खे़ङ्हाॽरे़ खुन्छिॽ दाङ्बा नु हाङ् के़रे़क् मनाहाॽ आदाङ्बारे़ के़से़वारोबा मे़म्बोङ्ने़न्नाङ्बि? आदाङ्बारे़ थेआङ् हे़क्के चोःक्मा पोङ्बाबे? आदाङ्बारे़ इस्राइलओ थेआङ् आप्तिक् के़दारुबाबे?” 4 कर हाङ्ङिल्ले़ कुबाःन्जाक्किल्ले़ योआबरे़ कुबाःन्निन् कुसुम् मे़न्दम्मनाबा चोगु॥ योआबे़न् थासिङ्ङाङ् पे, हे़क्क्याङ् इस्राइल के़रे़क् ताक्कन्दे़आङ् यरुसले़ःम्मो नुःक्खे़द्ये़॥ 5 खे़ब्याङ् खुने़ॽ नुःक्खे़द्ये़आङ् याम्नाःत्निःत् चोगुसिबाहाॽ कम्भलॽरिक् दाउदे़न् चे़क्तु—“फे़जुम्भे़या खजुम्घया याङ्मा के़सुक्पा इस्राइलओ ११,००,००० नु यहुदाओ ४,७०,००० मे़वाॽरे़त्छ॥” 6 कर योआबरे़ ले़बि नु बेन्यामिनिहाॽ याम्नाःत्निःत् मे़जोगुसिन्, थेआङ्भे़ल्ले़ हाङ्ङिल्ले़ कुइङ्जाङिल्ले़ चोगुल्ले़ खुने़ॽ साॽरिक् कुनिङ्वाॽ मे़न्दाए वये़॥ 7 कन् इङ्जाङ्ङिन् निङ्वाॽफुमाङ्ङिल्ले़ कुनिङ्वाॽ मे़न्दाए वये़, हे़क्क्याङ् खुने़ॽ इस्राइलिहाॽ खुम्दिङ् पिरुसि॥ 8 खे़ब्याङ् दाउदरे़ निङ्वाॽफुमाङ्ङिन् मे़त्तु, “आङ्गाॽ साॽरिक् यम्बा लायो चोगुङ्! आङ्गाॽ पेलि फाक्ने़, आङ्गाॽ के़से़वारोबे़ल्ले़ आआप्तिक्के़न् खे़त्ताङ् पिराङ्ङे़ॽ, थेआङ्भे़ल्ले़ आङ्गाॽ साॽरिक् खासिङ् मे़न्निःप्मनाबा पोःक्खाङ्ङाङ् वाॽआ॥” 9 यहवे दाङ्बे़ल्ले़ दाउदरे़ कुघागे़इक्पा गादे़न् मे़त्तु, 10 “खे़ने़ॽ पोगे़आङ् दाउदे़न् मे़त्ते़ॽ, ‘यहवे दाङ्बे़ल्ले़ अक्खे पाःत्तुॽ—आङ्गाॽ खे़ने़ॽ के़दगि सुम्सि पाःन्हाॽ युक्खुङ्ल पत्ता॥ खे़ङ्हाॽओलाम् लत्छा सेगे़ॽ, हे़क्क्याङ् आङ्गाॽ खे़न् के़सम्धाङ् तारुङ्ॽ॥’” 11 कल्ले़चोगुल्ले़ गादे़न् दाउदरे़ओ पेआङ् अक्खे मे़त्तु, “यहवे दाङ्बे़ल्ले़ हाबा कन् पाःत्तुॽ—‘खे़ने़ॽ लत्छा सेगे़ॽ— 12 तङ्बे सुम्सि थारिक् साक्वान् ताबा, इग्र ला सुम्सि थारिक् खे़ने़ॽ के़निङ्मिहाॽरे़ तुक्खे के़म्जाःप्पा, इग्र सुम्ये़न् थारिक् यहवे दाङ्बे़ल्ले़ कुमाङ्लाइङ्बे़ल्ले़ इस्राइल लाजेॽ के़रे़क् माङ्दुक्मा तारुबा॥ आङ्गाॽ के़बाङ्बा यहवे दाङ्बे़न् थे नुगप् पिरुङ्बाबे’ मे़त्ताङ्ङे़ॽ॥” 13 खे़ब्याङ् दाउदरे़ गादे़न् मे़त्तु, “आङ्गाॽ साॽरिक् के़साक्पो थ्याङ्ङाङ् वाॽआ॥ आङ्गाॽ यहवे दाङ्बे़ल्ले़ कुहुक्कोए थाआर याःन्दाङ्ङे़ॽ॥ थेआङ्भे़ल्ले़ खुने़ॽ लुङ्माॽ आदुक्तुक्पा चोक्॥ कर आङ्गाॽ मनाहाॽरे़ खुन्छिॽ हुक्को थामा मे़बोङ्ने़न्ल॥” 14 कल्ले़चोगुल्ले़ यहवे दाङ्बे़ल्ले़ इस्राइल के़रे़क्के लत्छा माङ्दुक्मा पाङ्घु तासु, हे़क्क्याङ् इस्राइलबा नुबोङ् हे़न्छिङ् मनाहाॽ मे़स्ये़॥ 15 हे़क्क्याङ् निङ्वाॽफुमाङ्ङिल्ले़ यरुसले़ःम्मिन् खाप्पुथ्यःङ् चोःक्मारे़ लागि माङ्लाइङ्बा थिक् पाङ्घुयुसु॥ कर खुने़ॽ खे़न् खाप्पुथ्यःङ् चोःक्मा चोगुल्ले़ यहवे दाङ्बे़ल्ले़ खे़न् निसुआङ् खे़न् खाप्पुथ्यःङ् चोःक्मालाम् कुनिङ्वाॽ नुःक्तुआङ् खे़न् खाप्पुथ्यःङ् के़जोःक्पा माङ्लाइङ्बे़न् मे़त्तु, “आल्ल याःक्तु! के़हुक्किन् चक् थासे़ॽ!” खे़न् ये़म्मो खे़न् माङ्लाइङ्बे़न् यबुसि अरौनाःल्ले़ कुजा थाम्मादे़न्निल्ले़ कुबेसाङ् ये़म्सिङ्ङाङ् ये़बे़॥ 16 दाउदे़न् थोहाङ् ले़प्माङ् ओमये़ल्ले़ यहवे दाङ्बे़ल्ले़ कुमाङ्ला इङ्बे़न् साङ्ग्राम्पेदाङ् नु इक्सादिङ् खाम्बेक् लुम्मो ताभेन् तरप् फिःक्खुआङ् यरुसले़म सम्धाङ् सन्छुआङ् ये़बे़गरे़बा निसु॥ खे़ब्याङ् दाउदे़न् नु साम्योसिक्साम्बाहाॽ सगितेत् मे़जाक्खुआङ् खाम्बाङ्ङो साम्बोन् हबत् मे़भन्छिङ्॥ 17 हे़क्क्याङ् दाउदरे़ निङ्वाॽफुमाङ्ङिन् मे़त्तु, “थक्लिहाङ् मनाहाॽरे़ खुन्छिॽ खानिःत् चोःक्मासिरे़ लागि आङ्गाॽनि इङ्जाङ् चोगुङ्ङाङ् वये़॥ आङ्गाॽने लायो चोगुङ्ङाङ् याःम्बक् फेःन्दुङ्ङाङ् वये़॥ कर पप्प्राॽमा खे़न् कुदोःप्मा मे़ल्लुक् हे़क्तङ्बा मनाहाॽरे़ थे मे़जोगुआङ् वये़बे? यहवे दाङ्बा, आनिङ्वाॽफुमाङ्ङे, आदाङ्बारे़ के़हुक्कोबा मिङ्देन् आङ्गाॽ नु आङ्गाॽ आहिम्सयङ् सम्धाङ् थाररो, कर कन् मे़क्मासिमान् आदाङ्बारे़ के़मनाहाॽ सम्धाङ् मे़धाने़न्लरो॥” 18 दाउदे़न् यबुसि अरौनाःल्ले़ कुजा थाम्मादे़न्नो पेगे़ॽआङ् यहवे दाङ्बे़ल्ले़ कुलागि ले़त्ति तोःम्मादे़न् थिक् चोगे़ॽ फाॽआङ् यहवे दाङ्बे़ल्ले़ कुमाङ्लाइङ्बे़ल्ले़ गादे़न् मे़त्तु॥ 19 यहवे दाङ्बे़ल्ले़ कुमिङ्ङो गादरे़ इङ्जाङ् चोगुबा कुइसिक् दाउदे़न् खे़त्थो थोःक्सिङ्ङाङ् पे॥ 20 अरौनान् मासि नुक्नु यागे़॥ खुने़ॽ अक्खे हिसिङ्ङिल्ले़ खे़न् माङ्लाइङ्बे़न् निसु॥ अरौनाःन्नु के़वाॽबा खुने़ॽ कुस्सा लिसिहाॽ मे़जिङ्सिङ्॥ 21 दाउदे़न् खे़ल्ले़ कुबेसाङ् के़रे़ल्ले़ अरौनाःल्ले़ ओमे़त्तु, हे़क्क्याङ् खुने़ॽ निसुआङ् चाधाम्मादे़न्नोलाम् पोगे़ फे़रे़आङ् खुने़ॽ कुदगि खाम्बाङ्ङो साबन् हबत् फन्छिङ्॥ 22 दाउदरे़ अरौनान् मे़त्तु, “आङ्गाॽ कन् चाधाम्मादे़न्नोबा लाजेन् पिराङ्ङे़ॽ हे़क्केलॽरिक् यहवे दाङ्बे़ल्ले़ कुलागि लत्छा ले़त्ति तोःम्मादे़न् चोःक्मा सुक्तुङ्ल, हे़क्क्याङ् मनाहाॽरे़ खुन्छिॽ सम्धाङ् के़धाबा माङ्दुक्मे़न् पेःक्ल॥ खे़ल्ले़ यारुबा कुमे़ल्लुङ्ङो आङ्गाॽओ सङ्घे़ॽ॥” 23 अरौनाःल्ले़ दाउदे़न् मे़त्तु, “खे़न् खे़ने़ॽ तेॽरे़ॽ, हे़क्क्याङ् आदाङ्बा हाङ्ङिल्ले़ थे चोःक्मा के़निङ्वाॽ वाॽ चोगे़ॽ॥ मिधिङ्मनादेमनाबा वयागे़न् सिदुङ्जभारे़ लागि कप्मो कुम्बाबा पित्हाॽ मे़ये़प्, चानुक्मा सिङ्हाॽ हाःम्मा सिङ् नु मासिन् पोगुगे़न् कुजा सिदुङ्जभारे़ लागि वाॽ॥ आङ्गाॽ के़रे़क् पाःन्हाॽ आदाङ्बा पिने़रो॥” 24 कर दाउद हाङ्ङिल्ले़ अरौनान् मे़त्तु, “मेःन्, आङ्गाॽ के़रे़क् कुमे़ल्लुङ् पिने़॥ आङ्गाॽ कुमे़ल्लुङ् मे़न्हुङ्ङेबा खे़ने़ॽ के़याङ्सा कुन्धेहाॽ ताःक्तुङ्ङाङ् मिधिङ्मनादेमनाबा वयागे़न् सिदुङ्जभा यहवे दाङ्बाओ मे़दोःन्नान्॥” 25 कल्ले़चोगुल्ले़ खे़न् लाजेःल्ले़ लागि दाउदरे़ अरौनान् किप् तुक्सि साम्म्याङ् याङ्इत्छेॽ पिरु, हे़क्क्याङ् खुने़ॽ खे़प्मो यहवे दाङ्बे़ल्ले़ कुलागि ले़त्ति तोःम्मादे़न् थिक् चोगु॥ 26 आम्भा खे़प्मो खुने़ॽ यहवे दाङ्बे़ल्ले़ कुलागि सिदुङ्जभा तोःम्मादे़न् चोगुआङ् मिधिङ्मनादेमनाबा सिदुङ्जभा नु तङ्जुम् वयागे़न् सिदुङ्जभा तोःन्दु॥ हे़क्क्याङ् यहवे दाङ्बे़ल्ले़ साङ्ग्राम्पेदाङ्बालाम् मिधिङ्मनादेमनाबा वयागे़न् सिदुङ्जभा ले़त्ति तोःम्मादे़न्नो मि थासुआङ् नुगप् पिरु॥ 27 खे़ब्याङ् यहवे दाङ्बे़ल्ले़ कुइङ्जाङ् कुइसिक् खे़न् माङ्लाइङ्बे़ल्ले़ कुदाभेन् कुसुःप्पो याक्तु॥ 28 हाबा खे़न् ये़म्मो यहवे दाङ्बे़ल्ले़ यबुसि अरौनाःल्ले़ कुजा थाम्मादे़न्नो नुगप् पिराङ् के़लॽबा निसुआङ् दाउदरे़ खे़प्मो वयागे़न् सिदुङ्जभाहाॽ तोःन्दु॥ 29 मुरे़क् खारे़क् थेआङ् के़होप्पादे़न्नो मोसाःल्ले़ चोगुबा यहवे दाङ्बे़ल्ले़ कुसेसे साःङ्गाहिम्मिन् नु मिधिङ्मनादेमनाबा वयागे़न् सिदुङ्जभा ले़त्ति तोःम्मादे़न्ग खे़न् ये़म्मो थारिक् गिबोनओबा उःक्चम्जम्बा माङ्से़वा चोःक्मादे़न्निन्ने़ ने़स्से़॥ 30 कर यहवे दाङ्बे़न् पान् सेःन्दोमारे़ लागि दाउदे़न् पेःक्मा मे़न्छुक्के वये़, थेआङ्भे़ल्ले़ खे़न् माङ्लाइङ्बे़ल्ले़ कुदाभेःल्ले़ खुने़ॽ कुसाम्मिक् मये़आङ् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.