१ साप्मुःन्धुम् 19 - लिम्बुदाउदरे़ अम्मोनि नु अरामिहाॽ थङ्ङो नाःन्दुसि ( २ सामु १०:१-१९ ) 1 कुभा ये़म् एगाङ् अम्मोनिहाॽरे़ खुन्छिॽ हाङ् नाहासे़न् मासिङ्, हे़क्क्याङ् खे़ल्ले़ कुले़क्वाओ कुस्सा हानुने़न् हाङ् पोःक्खे़॥ 2 दाउदरे़ पाःत्तु, “हानुनरे़ कुम्बा नाहासरे़ आङ्गाॽ नुरिक् मे़त्ताङ्बा कुइसिक् खुने़ॽ कुस्साःन्नु आङ्गाॽ से़क्खाबा चुम् पोङ्मा पोङ्ॽ॥” कल्ले़चोगुल्ले़ हानुनरे़ कुम्बा मासिङ्ङिल्ले़ खुने़ॽ आःन्छिङ्मा पिमारे़ लागि दाउदे़ल्ले़ इङ्साबाहाॽ पाङ्घुदेसुसि॥ आल्ल दाउदरे़ कुइङ्साबाहाॽ हानुने़न् आःन्छिङ्मा पिमारे़ लागि अम्मोनिहाॽरे़ खुन्छिॽ लाजेॽओ मे़लासे़ल्ले़, 3 अम्मोनि तुम्म्याहाङ्हाॽरे़ खुने़ॽ मे़मे़त्तु, “दाउदरे़ आदाङ्बा आःन्छिङ्मा पिसे़ मनाहाॽ पाङ्घु तासुसिल्ले़ खुने़ॽ थे आदाङ्बारे़ के़म्बा इङ्धाङ् पिरुबा फाॽआङ् के़इःत्तुबि? आदाङ्बारे़ के़लाजेन् आक्खेआङ् मे़ङ्मा फाॽआङ् निङ्वाॽ खोसे़ पाङ्घुसिबा दाउदरे़ कन् कुमनाहाॽग खुने़ॽ कुधोःम्जिवाबा मे़ःन्छिआङ्बि?” 4 कल्ले़चोगुल्ले़ हानुनरे़ दाउदरे़ कुमनाहाॽ ते़म्सुसिआङ् खे़ङ्हाॽरे़ खुन्छिॽ थे़गेःक्हाॽ नःक्खु पिरुसि, हे़क्क्याङ् मुआङ्धो खुन्छिॽ मिगक्मो थारिक् खुन्छिॽ चाङ्हाॽ कुभ्रे़ःक् खक्तुआङ् खे़ङ्हाॽ याङ्ना पाङ्घुदेसुसि॥ 5 आल्ल खे़ङ्हाॽ मे़मे़त्तुसिबा खे़न् पाःन्निन् दाउदरे़ खे़प्सु, खे़ब्याङ् खुने़ॽ खे़ङ्हाॽरे़ खुन्छिॽ तुम्से़ इङ्घङ्साबाहाॽ पाङ्घुदेसुसि, थेआङ्भे़ल्ले़ खे़ङ्हाॽ साॽरिक् कुनामे़न्छाॽ के़मे़त्तुसिआङ् वये़॥ खे़ङ्हाॽरे़ खुन्छिॽ मुयुॽहाॽ याम्मो मे़म्बोए थारिक् यरिहोओए मे़वाॽर के़लॽबा हाङ्ङिल्ले़ इङ्जाङ् पिरुसि॥ 6 आल्ल दाउदरे़ कुनिमो अम्मोनिहाॽ सिक्के़ले़ःङ्बा आजोक् फाॽआङ् खे़ङ्हाॽरे़ निङ्वाॽ मे़घोसु, खे़ब्याङ् हानुन नु अम्मोनिहाॽरे़ अराम-नाहारैम नु अराम-माका हे़क्क्याङ् सोबालाम् अन्लाधाहाॽ नु अन्लाधा के़लोङ्बाहाॽ नाम्याक्को ताःप्मासिरे़ लागि हे़न्छिङ् थिक् तोरा युप्पा मे़हाङु मे़देसु॥ 7 खे़ङ्हाॽरे़ सुम्बोङ्ङाङ् ने़त्छि हे़न्छिङ् अन्लाधा नु अन्लाधा के़लोङ्बाहाॽ, हे़क्क्याङ् माकाबा हाङ्ङिन् नु खुने़ॽ कुमनाहाॽ नाम्याक्को तारुसि, खम्भ्याङ् खे़ङ्हाॽ मे़द्ये़आङ् मेदबा तगाङ् ले़प्माङ् थक्सुबा ने़त्ना साःङ्गाहिम् मे़जोगु॥ अम्मोनिहाॽ खुन्छिॽ आप्फेक् आप्फेक् ये़क्यक्हाॽओलाम् मे़द्ये़आङ् ते़न्धङ्ले़ लागि मे़जुप्से़॥ 8 दाउदरे़ कन् पाःन्निन् खे़प्सुआङ् योआबे़न् नु के़रे़क् थक्लिहाङ् मनाहाॽ पाङ्घुदेसुसि॥ 9 अम्मोनिहाॽ ये़क्यक्को पेःक्मा यम्बा लाम्धेःत्तो मे़भे़रे़आङ् थङ् चोःक्मारे़ लागि यारिप् मे़बोःक्खे़, हे़क्क्याङ् खुने़ॽ कुन्जुम् कुन्देःङ्बा हाङ्हाॽरे़ ताम्दाम्बा ते़ल्लक्को खुन्छिॽ युक्नादे़न्नो मे़युङ्सिङ्॥ 10 आल्ल योआबरे़ खुने़ॽ कुदगि नु कुएगाङ् ने़प्माङ् पिसाङ्लाम् थङ्ङिल्ले़ कबुबा निङ्वाॽ खोसु, खे़ब्याङ् खुने़ॽ कुभा मे़सेगुसिबा के़दम्बा इस्राइलि थक्सुबाहाॽ अरामिहाॽनु थक्से़ पाङ्घुसि॥ 11 के़नम्बा थक्सुबाहाॽ खुने़ॽ आबाङे कुन्साॽ अबिसैरे़ कुयुक्को तारुसि, खुने़ॽ अम्मोनिहाॽरे़ खुन्छिॽ तगि थङ्ले़ लागि यारिप् चोगुसि॥ 12 योआबरे़ अबिसैन् मे़त्तु, “आङ्गाॽ आदगि अरामिहाॽ साॽरिक् मुक्के़गुबा मे़जोक्ने़भग्र खे़ने़ॽ आङ्गाॽ आभाॽसे़ फे़रे़ॽ॥ हे़क्क्याङ् अम्मोनिहाॽ खे़ने़ॽ के़लागि साॽरिक् मुक्के़गुबा मे़जोक्ने़भग्र आङ्गाॽ खे़ने़ॽ के़भाॽसे़ फे़न्ना॥ 13 आनिॽ आप्फेक् सुवाङ् नु आनिॽ निङ्वाॽफुमाङ्ङिल्ले़ कुये़क्यक्हाॽरे़ लागि हाङ्हाङ् लॽरिआङ् थङ् चोगि॥ हे़क्क्याङ् यहवे दाङ्बे़ल्ले़ कुनिमो आत्तिन् पाःन्निन् नुबा चोक् खुने़ॽ हाबा खे़न्ने चोगुॽ॥” 14 खम्भ्याङ् योआबे़न् नु खुने़ॽ कुधक्सुबाहाॽ अरामिहाॽनु थङ् थक्से़ तगि मे़बोरे़ हे़क्क्याङ् खुने़ॽ कुदगि अरामिहाॽ खे़त्छिङ्मा मे़हेःक्ते़॥ 15 हे़क्क्याङ् अम्मोनिहाॽरे़ अरामिहाॽ मे़घे़त्छिङ्बा मे़निसुसिआङ् खुन्छिॽआङ् खुने़ॽ कुन्साॽ अबिसैःल्ले़ कुदगिलाम् मे़घे़त्छिङ्ङाङ् ये़क्यक्को मे़लासे़॥ कल्ले़चोगुल्ले़ योआबे़न् यरुसले़म नुःक्खे़॥ 16 इस्राइलिहाॽलाम् अरामिहाॽ हारिमे़द्ये़बा पाःन्निन् निङ्वाॽ मे़घोसुआङ् खे़ङ्हाॽ युफ्रेतिस वहःङ् नाधाःम्बिनु हददेजेररे़ कुधक्सुबाहाॽरे़ खुन्छि थक्मोबा सोबाकरे़ कुयुक्को के़वाॽबा वेॽ अरामिहाॽ मे़उःत्तुसि॥ 17 कन् पाःन्निन्नाङ् दाउदरे़ खे़प्सु, खे़ब्याङ् खुने़ॽ खिमो इस्राइलबा के़रे़क् थक्सुबाहाॽ फुक्खुसिआङ् यर्दन नाधाःम्बि मे़गाःक्तु हे़क्क्याङ् अरामिहाॽनु थङ् चोःक्मारे़ लागि मे़सुम्सिङ्॥ खे़ब्याङ् अरामिहाॽ दाउदे़न्नु मे़धक्ते़॥ 18 कर खे़ङ्हाॽ इस्राइलिहाॽरे़ खुन्छिॽ तगिलाम् मे़घे़त्छिङ्॥ दाउदे़ल्ले़ अरामिहाॽरे़ खुन्छिॽ ७,००० अन्लाधा के़लोङ्बाहाॽ नु ४०,००० खाम्बाङ्ङो के़धक्पा थक्सुबाहाॽ से़रुसि हे़क्क्याङ् थक्मोबा सोपके़न्नाङ् स्ये़रु॥ 19 हददेजेररे़ कुमनाहाॽरे़ इस्राइलिहाॽरे़ हारि मे़जाःत्तुसिबा मे़निसुआङ् नादङ् चोःक्मारे़ लागि पेलि मे़भाक्तुसि, हे़क्क्याङ् दाउद हाङ्ङे़ल्ले़ कुयुक्को मे़द्ये़॥ कल्ले़चोगुल्ले़ अम्मोनिहाॽ फाॽमासिरे़ लागि अरामिहाॽ याम्मो आप्फाल्ले़आङ् मे़न्दे़न्दे़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.