१ साप्मुःन्धुम् 18 - लिम्बुदाउदरे़ थक्सुबाहाॽलाम् थङ् नाःन्दुबाहाॽ ( २ सामु ८:१-१८ ) 1 कुभा ये़म् एगाङ् दाउदरे़ पलिस्तिहाॽ थङ्ङो फत्तुसिआङ् नाःन्दुसि, हे़क्क्याङ् खे़ङ्हाॽलाम् गात नु खे़न् कब्रिङ्बा पाङ्भेॽहाॽ हुक्काप् चोगु॥ 2 खुने़ॽ मोआबिहाॽआङ् नाःन्दुसि, हे़क्क्याङ् खे़ङ्हाॽ खुने़ॽ कुयुक्को मे़वये़आङ् खुने़ॽओ एःङ्याङ् मे़हुङु॥ 3 खे़न् एगाङ् दाउदे़ल्ले़ हमात लाजेॽ कुयाओ के़ने़बा अरामि लाजेॽ सोबाबा हाङ् हददेजेरे़न् थङ्ङो फत्तु थेआङ्भे़ल्ले़ हददेजेरे़ल्ले़ थोसमा युफ्रेतिस वहःङ्ङिल्ले़ कुया ले़प्माङ्बा ते़ङ्गप्पिन् हुक्काप् चोःक्मा निङ्वाॽ चोगु॥ 4 खे़न् लाम्बा दाउदरे़ हे़न्छिङ् थिक् अन्लाधाहाॽ, हे़न्छिङ् नुसि अन्लाधा के़लोङ्बाहाॽ नु निबोङ् हे़न्छिङ् खाम्बाङ्ङो थङ् के़जोःक्पा थक्सुबाहाॽ ते़म्सुसि॥ खुने़ॽ किप् थिक् अन्लाधाहाॽ लोःङ्मारे़ लागि किप् थिक् अन्हाॽरक् ताङ्घुसिआङ् वेॽ के़रे़क् अन्हाॽरे़ खुन्छिॽ लाङ्साॽइ खक्तु पिरुसिआङ् लाङ्सक्पा चोगुसि॥ 5 आल्ल सोबाबा हाङ् हददेजेरे़न् फाॽमारे़ लागि दमस्कसलाम् आरामिहाॽ मे़भे़रे़ल्ले़ दाउदरे़ खे़ङ्हाॽरे़ खुन्छिॽ निबोङ्ङाङ् ने़त्छि हे़न्छिङ् खुन्छिॽ थक्सुबाहाॽ मे़क्खुसि॥ 6 हे़क्क्याङ् खे़न् आरामिहाॽरे़ खुन्छिॽ हाङ्जुम् दमस्कसओ थक्सुबाहाॽ ने़स्सुसि॥ खे़न् आरामिहाॽ खुने़ॽ कुयुक्को मे़वये़आङ् एःङ्याङ् मे़हुङु॥ कम्भलॽरिक् दाउदे़न् आत्तान् पेसाङ् यहवे दाङ्बे़ल्ले़ खुने़ॽ थङ् के़नाःम्बा चोगु॥ 7 हददेजेररे़ कुसुहाङ्युक्पाहाॽरे़ मे़हेसुबा साम्म्याङ् खोहाॽ दाउदरे़ नाप्तुसिआङ् यरुसले़म फे़त्तु॥ 8 खुने़ॽ हददेजेररे़ कुये़क्यक् तेबह नु कुन लाम्बाआङ् साॽरिक् यरिक् कासाहाॽ फे़त्तु॥ आम्भा कन्लाम् सोलोमनरे़ लत्छा साॽरिक् यम्बा कासा फसि थिक्, सित्लाङ्हाॽ नु परिक् परिक्पा कासा सामाहाॽ थगुसि॥ 9 आल्ल दाउदे़ल्ले़ सोबाबा हाङ् हददेजेररे़ के़रे़क् कुधक्सुबाहाॽ थङ् थक्मा नाःन्दुसि के़लॽबा पाःन्निन् हमातबा हाङ् तोउःल्ले़ खे़प्सु, 10 खे़ब्याङ् दाउदे़ल्ले़ हददेजेरे़न् थङ्ङो नाःन्दुबाल्ले़ चोगुल्ले़ खुने़ॽ से़वा मे़प्मा नु हाङ्से़म्भोना पिमारे़ लागि खे़ल्ले़ आप्फेक् कुस्सा हदोरमे़न् दाउद हाङ्ङे़ओ पाङ्घुदेसु, थेआङ्भे़ल्ले़ हददेजेरे़न् नु तोउःल्ले़ खुन्छिॽ लुम्मो थङ् पोःक्खे़आङ् वये़॥ हदोरमे़ल्ले़ के़रे़क् परिक्पा साम्म्याङ्, युप्पा नु कासा खप्प्या सामाहाॽ फे़त्तु॥ 11 दाउद हाङ्ङिल्ले़ कन् खप्प्या सामाहाॽ यहवे दाङ्बाओ तोःन्दु॥ खुने़ॽ वेॽ के़रे़क् मे़न्छाम् सुवाङ् ए़दोम, मोआब, अम्मोनि, पलिस्ति नु अमाले़किहाॽ लाम्बा तेॽरुबा साम्म्याङ् नु युप्पाहाॽआङ् तोःन्दु॥ 12 एदोमिहाॽ सरुयाहरे़ कुस्सा अबिसैःल्ले़ नाःन्दुसि॥ खुने़ॽ युम्लाःक्खाङ् ने़ने़बादे़न्नो खे़ङ्हाॽरे़ खुन्छिॽ थिबोङ्ङाङ् ये़त्छि हे़न्छिङ् मनाहाॽ मे़क्खुसि॥ 13 एदोमओ कुधक्सुबाहाॽ ने़स्सुसि, के़रे़क् एदोमिहाॽ आल्ल दाउदरे़ कुहुक्को मे़ध्ये़॥ आत्ति आत्ति दाउदे़न् पे खे़ङ्हाॽओ यहवे दाङ्बे़ल्ले़ खुने़ॽ थङ् के़नाःम्बा चोगुरो॥ दाउदरे़ कुसुहाङ्युक्पाहाॽ 14 दाउदरे़ के़रे़क् इस्राइलिहाॽओ हाङ्युक् चोगु, हे़क्क्याङ् खुने़ॽ के़रे़क् कुमनाहाॽओ के़वाॽबा नु कुदोःप्मा खासे़न् पोःक्खे़र चोगु॥ 15 खे़न् ये़म्मो सरुयाहरे़ कुस्सा योआबे़न् थक्सुबाहाॽरे़ खुन्छिॽ लाम्लोबा वये़॥ हे़क्क्याङ् अहिलुदरे़ कुस्सा यहोसापाते़न् खानिःत् के़युङ्बा वये़॥ 16 अहितुबरे़ कुस्सा सदोके़न् नु अबियाथाररे़ कुस्सा अहिमेलेके़न् निङ्वाॽफुसाम्बा वये़सि॥ सब्सान् सुहाङ्मिबा वये़॥ 17 यहोयादारे़ कुस्सा बनायाहन् करेति नु पेलेथिहाॽरे़ खुन्छिॽ लक्पे़न्साबा वये़॥ दाउदरे़ कुस्साहाॽ हाङ्ङिल्ले़ मा कुसुहाङ्युक्पा मे़वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.