Biblia Todo Logo
Bib sou entènèt

- Piblisite -


१ साप्‍मुःन्‍धुम् 16 - लिम्‍बु

1 हे़क्‍क्‍याङ् खे़ङ्‌हाॽरे़ निङ्‌वाॽफुमाङ्‌ङिल्‍ले़ कुमाङ्‌हुप् सन्‍दोक्‍किन् मे़दारुआङ् खे़ल्‍ले़ लागि दाउदरे़ खिङ्‌घुबा साःङ्‌गाहिम् सिगाङ् मे़युक्‍खु, खे़ब्‍याङ् खे़ङ्‌हाॽरे़ निङ्‌वाॽफुमाङ्‌ङो मिधिङ्‌मनादेमनाबा वयागे़न् सिदुङ्‌जभा नु तङ्‌जुम् वयागे़न् सिदुङ्‌जभा मे़दोन्‍दु॥

2 आल्‍ल दाउदरे़ कन् वयागे़न् सिदुङ्‌जभाहाॽ तोःन्‍दु सुरुआङ् खुने़ॽ यहवे दाङ्‌बे़ल्‍ले़ कुमिङ्‌ङो मनाहाॽ हाङ्‌वागे़न् मुॽइसाम् पिरुसि,

3 हे़क्‍क्‍याङ् के़रे़क् इस्राइलि ये़म्‍बित्‍छा नु मे़न्‍छुमाहाॽ कुले़प् थिक्‍थिक् खरे़ःङ्, कुगाक्‍मा थिक् खे़बक्‍सिङ्‌ङिल्‍ले़ कुजाॽ नु खे़ङ्‌मनाबा कुगाक्‍मा चे़ल्‍ले़क्‍सेॽहाॽ चामा पिरुसि॥

4 यहवे दाङ्‌बे़ल्‍ले़ कुमाङ्‌हुप् सन्‍दोक्‍किल्‍ले़ कुदगि, यहवे दाङ्‌बा इस्राइलबा निङ्‌वाॽफुमाङ्‌ङिन् इःप्‍मा, नुगे़न् पिमा, नु कुनारा फोमा, पेलि फाक्‍मा हे़क्‍क्‍याङ् इङ्‌धाङ् पिमामारे़ लागि दाउदरे़ कुभा ले़बिहाॽ युक्‍तिङ् चोगुसि॥

5 खे़ङ्‌हाॽरे़ खुन्‍छिॽ लाम्‍लोबा आसापे़न् वये़, खुने़ॽ कुएगाङ् जकरिया, खे़ब्‍याङ् खे़न् एगाङ् अन्‍मे नु तुःङ्‌गे के़मुङ्‌बा यिएल, समिरामोत, यहिएल, मत्तित्‍याह, एलिआब, बनायाह, ओबेद-एदोम नु यिएल मे़वये़॥ आसापरे़ग साप्‍फङ्‌गाहाॽ लाइःक्‍खु॥

6 हे़क्‍क्‍याङ् निङ्‌वाॽफुमाङ्‌ङिल्‍ले़ कुमाङ्‌हुप् सन्‍दोक्‍किल्‍ले़ कुदगि चक्‍मे़ल्‍लॽए सादाङ्‌हाॽ मुःप्‍मारे़ लागि बनायाह नु यहासेल निङ्‌वाॽफुसाम्‍बाहाॽ युक्‍तिङ् पोःक्‍खे़सिआङ् वये़सिरो॥


दाउदरे़ नुगे़न् कुदोःम्‍मा निङ्‌वाॽफु साम्‍लोसुम्
( निङ् सुम् १०५:१-१५ , ९६:१-१३ , १०६:१ , ४७-४८ )

7 खे़ल्‍ले़ याःन्‍दिक् आसाप नु खुने़ॽ कुगाॽइहाॽ यहवे दाङ्‌बे़ल्‍ले़ कुलागि नुगे़न् तोःन्‍छे़ दाउदे़ल्‍ले़ थिक्‍सिगेक्‍पा ले़ङ् युक्‍तिङ् चोगुसिरो—

8 यहवे दाङ्‌बान् नोगे़न् पिरे़म्‍मे़ॽओ, खुने़ॽ पयम् यम्‍बा चोक् फाॽआङ् यम्‍बा इक्‍लाओ इङ्‌भोसे़म्‍मे़ॽओ॥ खुने़ॽ चोगुबा याःम्‍बक्‍किन् इक्‍सादिङ् खाम्‍बेःक्‍कोबा मे़न्‍छाम् सुवाङ्‌हाॽ चे़क्‍ते़म्‍सिम्‍मे़ॽओ॥

9 खुने़ॽ कुलागि साम्‍लोरे़म्‍मे़ॽओ, खुने़ॽ कुनारा फोमा साम्‍लोन् साम्‍मे़त्ते़म्‍मे़ॽओ, खुने़ॽ निङ्‌वाॽ के़माबा के़रे़क् कुयाःम्‍बक्‍हाॽ पाःत्ते़म्‍मे़ॽओ॥

10 खुने़ॽ कुसेसे मिङ्‌ङो खिनिॽ ने़बो फोसे़म्‍मे़ॽओ, यहवे दाङ्‌बे़न् के़गोःप्‍पाहाॽरे़ खुन्‍छिॽ निङ्‌वाॽ ताररो॥

11 यहवे दाङ्‌बे़न् नु खुने़ॽ कुमुक्‍साम्‍मिन् हक्‍से़म्‍मे़ॽओ, खुने़ॽ कुनारान् ओमे़प्‍मा चक्‍मे़ल्‍लॽए कोःत्ते़म्‍मे़ॽओ॥

12 खुने़ॽ चोगुबा निङ्‌वाॽ के़माबा याःम्‍बक्‍हाॽ इःत्ते़म्‍मे़ॽओ, ने़हिनिङ्‌वाॽरे़ मे़न्‍धाप्‍मनाबा कुयाःम्‍बक्‍हाॽ नु खुने़ॽ के़जे़क्‍तिबा कुघासे़न्‍हाॽ निङ्‌वाॽ इःत्ते़म्‍मे़ॽओ,

13 खुने़ॽ कुसे़वारोबा इस्राइलबा थाःक्‍के, याकुबरे़ कुस्‍सासे, खुने़ॽ के़सेगिबासे॥

14 खुने़ॽग यहवे दाङ्‌बा आनिॽ निङ्‌वाॽफुमाङ्‌लो, काक् इक्‍सादिङ् खाम्‍बेःक्‍मो खुने़ॽ कुघासे़न्‍हाॽ वाॽरो॥

15 खुने़ॽ चोगुबा माङ्‌हुप्‍पिन् सदादिङ् निङ्‌वाॽ इःत्तुरो, हे़क्‍क्‍याङ् कुबाःन्‍जाक्‍किन् हे़न्‍छिङ् हे़न्‍छिङ् मे़न्‍छाम् थाःक् थारिक् वाॽरो॥

16 हाबा खे़न् माङ्‌हुप्‍पिन्, खुने़ॽ अब्राहामनु चोगुआङ् वये़रो, आम्‍भा माङ्‌हे़क्‍किन्, खुने़ॽ इसहाकनु चोगुआङ् वये़रो,

17 खुने़ॽ खे़न् इङ्‌जाङ् कुइसिक् याकुबे़न्‍नु निःन्‍धो चोगुरो, हे़क्‍क्‍याङ् इस्राइले़न्‍नु खुने़ॽ अक्‍खे पाःत्तुआङ् आप्‍फाल्‍ले़आङ् मे़न्‍नुप्‍मनाबा माङ्‌हुप् कुइसिक् हुप्‍तुरो

18 खुने़ॽ पाःत्तु, “खे़ने़ॽ कनान लाजेन् पिने़रो, हे़क्‍क्‍याङ् खे़न् खे़ने़ॽ के़लक् पोङ्‌लो॥”

19 निङ्‌वाॽफुमाङ्‌ङिल्‍ले़ कुमनाहाॽ साॽरिक् मे़सुःन्‍दे़रो, खे़ङ्‌हाॽ कनान लाजेॽओ ताक्‍कन्‍निबा मे़वये़रो॥

20 खे़ङ्‌हाॽ थिक् लाजेॽ नु वेॽ लाजेॽहाॽओ ताक्‍मे़गन्‍दे़रो, थिक् हाङ्‌जुम् नु वेॽ हाङ्‌जुम्‍हाॽओ मे़वये़रो॥

21 कर यहवे दाङ्‌बाल्‍ले़ आत्तिन्‍हाॽआङ् खे़ङ्‌हाॽ तुक्‍खे चाःप्‍मा मे़भाःक्‍तुसिन्‍लो॥ खे़ङ्‌हाॽ से़ःप्‍मासिरे़ लागि हाङ्‌हाॽआङ् खुने़ॽ अक्‍खेलॽरिक् फे़ःक्‍तुसिरो—

22 “आङ्‌गाॽ आमाङ्‌थोःक्‍ना के़बोङ्‌बाहाॽ मे़सुसे़म्‍मिन्‍ने़ॽओ, हे़क्‍क्‍याङ् माङ्‌निङ्‌वाॽपान् के़बाःप्‍पा आमनाहाॽ थेआङ् हान्‍ति मे़जोगे़म्‍सिम्‍मिन्‍ने़ॽओ॥”

23 काक् इक्‍सादिङ् खाम्‍बेःक्‍कोबा मनासे, यहवे दाङ्‌बे़ल्‍ले़ कुलागि साम्‍लोरे़म्‍मे़ॽओ, खुने़ॽ से़न्‍लप् आबिरे़बा पाःन्‍निन् थिक्‌याःन्‍धक् इङ्‌भन्‌ चोगे़म्‍मे़ॽओ॥

24 मे़न्‍छाम् सुवाङ्‌हाॽरे़ खुन्‍छिॽ लुम्‍मो खुने़ॽ कुमिङ्‌सो कुधाःङ्‌सोःन् इक्‍सादिङ् खाम्‍बेःक्‍मोबा के़रे़क् मे़न्‍छाम् सुवाङ्‌हाॽ मे़त्ताम्‍सिम्‍मे़ॽओ, खुने़ॽ चोगुबा निङ्‌वाॽ के़माबा याःम्‍बक्‍हाॽ के़रे़क् मनाहाॽ चे़क्‍ताम्‍सिम्‍मे़ॽओ॥

25 थेआङ्‌भे़ल्‍ले़ यहवे दाङ्‌बे़न् पयम् यम्‍बा चोक्‍लो, खुने़ॽ कुनारा फोमा साॽरिक् लाॽरुरो, के़रे़क् माङ्‌हाॽनुःल्‍ले़ खुने़ॽए चाॽरिक् किप्‍मा पोङ्‌लो॥

26 थेआङ्‌भे़ल्‍ले़ मे़न्‍छाम् सुवाङ्‌हाॽरे़ खुन्‍छिॽ के़रे़क् माङ्‌हाॽग नावाइत्‍लासिरक्‍लो, कर यहवे दाङ्‌बे़ल्‍ले़ग साङ्‌ग्राम्‍पेदाङ्‌ङिन् नावागे़न् चइःत् चोगुरो॥

27 हाङ्‌वा माङ्‌वा नु मिमिदिङ्‌ङिन् खुने़ॽ कुदगि वाॽरो, खुने़ॽ कुयुङ्‌मादे़न्‍नो मुक्‍साम् नु सःप्‍मा वाॽरो॥

28 इक्‍सादिङ् खाम्‍बेःक्‍मोबा के़रे़क् मे़न्‍छाम् सुवाङ्‌से, यहवे दाङ्‌बे़ल्‍ले़ कुनारा फोसे़म्‍मे़ॽओ, यहवे दाङ्‌बान् मिमिदिङ् पिरे़म्‍मे़ॽआङ् कुमुक्‍साम्‍मिन् इङ्‌भोसे़म्‍मे़ॽओ॥

29 यहवे दाङ्‌बान् लाॽरुबा मिमिदिङ् पिरे़म्‍मे़ॽओ, हुक्‍सोयाङ् तारे़म्‍मे़ॽआङ् खुने़ॽ कुदगि त्‍ये़म्‍मे़ॽओ, यहवे दाङ्‌बे़ल्‍ले़ सेसेगे़न् कुमिमिदिङ्‌ङो माङ्‌से़वा मे़त्ते़म्‍मे़ॽओ॥

30 के़रे़क् इक्‍सादिङ् खाम्‍बेःक्‍मोबा मनासे, खुने़ॽ कुदगि थे़गक्‍कक्‍ना यक्‍खे़ॽओ! योॽबा लाजेन् थधप् मे़ल्‍लॽए युङ्‌सिङ्‌ङाङ् युङ्‌लो, हे़क्‍क्‍याङ् खे़न् हाःत्‍ले़आङ् मुम्‍मा मे़सुक्‍तुन्‍लो॥

31 साङ्‌ग्राम्‍पेदाङ्‌ङिन् कुनिङ्‌वा ताररो, हे़क्‍क्‍याङ् इक्‍सादिङ् खाम्‍बेःक्‍मान् पसःत् सःत्‍लरो, मे़न्‍छाम् सुवाङ्‌हाॽरे़ खुन्‍छिॽ लुम्‍मो मनाहाॽरे़ अक्‍खे मे़लॽआङ् इङ्‌भन्‌ मे़जोगुररो, “यहवे दाङ्‌बे़ल्‍ले़ए हाङ्‌युक् चोगुरो॥”

32 वरःङ्‌ङिन् नु खे़प्‍मो के़याक्‍पा के़रे़क् मे़सःक्‍लरो, इक्‍ताप् नु खे़प्‍मो के़याक्‍पा काक् कुजाहाॽ मे़सःत्‍लरो॥

33 खे़ब्‍याङ् ताम्‍भुङ्‌ङो के़युङ्‌बा सिङ्‌बुङ्‌हाॽ साम्‍मे़लोरो, खे़ङ्‌हाॽ यहवे दाङ्‌बे़ल्‍ले़ कुदगि मे़सःत्ताङ् साम्‍मे़लोरो, थेआङ्‌भे़ल्‍ले़ खुने़ॽ इक्‍सादिङ् खाम्‍बेःक्‍मे़न् खासे़न् चोःक्‍से़ युरो॥

34 यहवे दाङ्‌बे़न् नुगे़न् पिरे़म्‍मे़ॽओ, थेआङ्‌भे़ल्‍ले़ खुने़ॽ के़नुॽबा चोक्‍लो, खुने़ॽ कुमिःम्‍जिन् आप्‍फाल्‍ले़साङ् हाबा वाॽरो॥

35 अक्‍खे लॽरे़म्‍मे़ॽआङ् अःक्‍ते़म्‍मे़ॽओ, “आनिगे से़न्‍लप्‍दाङ्‌बा निङ्‌वाॽफुमाङ्‌ङे, आनिगे याप्‍मि ताङ्‌आसे़ःप्‍ते़ॽओ॥ आनिगे याप्‍मि सोरिक् आभुक्‍खे़ॽओ, हे़क्‍क्‍याङ् मे़न्‍छाम् सुवाङ्‌हाॽलाम् आसे़ःप्‍ते़ॽओ, हे़क्‍केलॽरिक् के़सेसे मिङ्‌ङो नुगे़न् तोःम्‍मा सुक्‍तुम्‍बे़ररो, हम्‍भ्‍याङ् के़नारा फोमाओ आनिगे ने़बो पत्‍लरो॥”

36 यहवे दाङ्‌बा इस्राइलबा निङ्‌वाॽफुमाङ्‌ङिल्‍ले़ सदादिङ् आभे़ल्‍ले़साङ् कुनारा पोररो॥ खे़ब्‍याङ् के़रे़क् मनाहाॽरे़ अक्‍खे मे़बाःत्तुरो, “आमिन्, हे़क्‍क्‍याङ् यहवे दाङ्‌बे़ल्‍ले़ कुमिङ्‌सो पोङ्‌लरो॥”


यरुसले़म नु गिबोनओ माङ्‌से़वा

37 दाउदे़ल्‍ले़ थिक्‌याःन्‍धक्‍पा याःम्‍बक् कुइसिक् चक्‍मे़ल्‍लॽएबा माङ्‌से़वा चोःक्‍मारे़ लागि खे़प्‍मो यहवे दाङ्‌बे़ल्‍ले़ कुमाङ्‌हुप् सन्‍दोक्‍किल्‍ले़ कुदगि आसाप नु खुने़ॽ कुगाॽइहाॽ युक्‍तिङ् चोगुसिआङ् युक्‍खुसि॥

38 खुने़ॽ ओबेद-एदोमे़न् हे़क्‍क्‍याङ् होसान् आसापे़न्‍नु माङ्‌से़वा चोःक्‍मारे़ लागि तुक्‍पोङ्‌ङाङ् ये़त्‍छि कुगाॽइहाॽ युक्‍तिङ् चोगुसि॥ यदुतुनरे़ कुस्‍सा ओबेद-एदोमे़न् नु होसान् लाम्‍धेत् के़गोबा वये़सि॥

39 इस्राइलिहाॽरे़ साम्‌योथिम् इङ्‌जाङ्‌ङो साप्‍ते़आङ् पप्‍पा कुइसिक् तानाम् नु युःन्‍छिक् यहवे दाङ्‌बे़ल्‍ले़ कुलागि मिधिङ्‌मनादेमनाबा वयागे़न् सिदुङ्‌जभान् ले़त्ति तोःम्‍मादे़न्‍नो तोःन्‍छे़

40 दाउदरे़ सादोक निङ्‌वाॽफुसाम्‍बे़न् नु खे़ल्‍ले़ कुन्‍देःङ्‌बा निङ्‌वाॽफुसाम्‍बाहाॽ गिबोनओ के़ने़बा से़वा चोःक्‍मा थे़गुओबा ले़त्ति तोःम्‍मादे़न्‍नो यहवे दाङ्‌बे़ल्‍ले़ कुसेसे साःङ्‌गाहिम्‍ले़ कुदगि वाॽमारे़ लागि युक्‍तिङ् चोगुसि॥

41 खे़ङ्‌हाॽनु सोरिक् हेमान नु यदुतुन हे़क्‍क्‍याङ् मिङ् थक्‍मा मे़सेगुसिबा मनाहाॽ यहवे दाङ्‌बाओ नुगे़न् तोःम्‍मारे़ लागि युक्‍तिङ् चोगुसि, “थेआङ्‌भे़ल्‍ले़ खुने़ॽ कुमिःन्‍जिन् सदादिङ् आभे़ल्‍ले़साङ् वाॽरो॥”

42 सेसे से़वा साम्‍लोरे़ लागि सादाङ्‌हाॽ मुःप्‍मा नु साप्‍फङ्‌गाहाॽ हिप्‍मारे़ लागि हे़क्‍क्‍याङ् वेॽ मुक्‍लाहाॽ मुङ्‌मा याःम्‍बक्‍किन् हेमान नु यदुतुने़न् मे़बिरुसिआङ् वये़॥ यदुतुनरे़ कुस्‍साहाॽरे़ यम्‍बा लाम्‍धेःत्तिन् कोमा याःम्‍बक् मे़जोगु॥

43 खे़ब्‍याङ् के़रे़क् मनाहाॽ खुन्‍छिॽ आप्‍फेक् आप्‍फेक् हिम्‍मो मे़नुःक्‍खे़ मे़बे, हे़क्‍क्‍याङ् दाउदे़न् आप्‍फेक् कुहिम्‍सयङ्‌हाॽ हाङ्‌वागे़न् मुॽइसाम् पिसे़ पेरो॥

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite