१ साप्मुःन्धुम् 15 - लिम्बुमाङ्हुप् सन्दोक्किन् यरुसले़म मे़धाक्तु 1 दाउदे़ल्ले़ खुने़ॽ कुलागि दाउदरे़ कुये़क्यक्को हिम्हाॽ चोगुसि, हे़क्क्याङ् निङ्वाॽफुमाङ्ङिल्ले़ कुमाङ्हुप् सन्दोक्किल्ले़ लागि युक्नादे़न् चोगुआङ् खे़ल्ले़ लागि लत्छा साःङ्गाहिम् खिङ्घु॥ 2 खे़न् एगाङ् खुने़ॽ मे़त्तुसि, “ले़बिहाॽरे़रक् यहवे दाङ्बे़ल्ले़ कुमाङ्हुप् सन्दोक्किन् पङ्मा पोङ्ॽ फाॽआङ् खुने़ॽ मे़त्तुसि॥ थेआङ्भे़ल्ले़ खे़न् सन्दोक्किन् पङ्मा नु आभे़ल्ले़साङ् निङ्वाॽफुमाङ्ङिन् माङ्से़वा मे़प्मारे़ लागि खे़ङ्हाॽए मे़सेगुसिआङ् वये़॥” 3 खे़ब्याङ् खे़ल्ले़ लागि यारिप् मे़जोगुबा ते़न्नो यहवे दाङ्बे़ल्ले़ कुमाङ्हुप् सन्दोक्किन् थाक्मारे़ लागि दाउदे़ल्ले़ के़रे़क् इस्राइलिहाॽ यरुसले़ःम्मो फुक्खुसि॥ 4 खुने़ॽ हारुनरे़ कुमुॽइदाङ्साहाॽ नु ले़बिहाॽ सोरिक् फुक्खुसिरो— 5 कहातरे़ कुमुॽइदाङ्साहाॽलाम्— उरिएल खुने़ॽ लाम्लोबा नु खुने़ॽ कुगाॽइहाॽ १२० मे़वये़॥ 6 मरारिरे़ कुमुॽइदाङ्साहाॽलाम्— असायाह खुने़ॽ लाम्लोबा नु खुने़ॽ कुगाॽइहाॽ २२० मे़वये़॥ 7 गेर्सोनरे़ कुमुॽइदाङ्साहाॽलाम्— योएल खुने़ॽ लाम्लोबा नु खुने़ॽ कुगाॽइहाॽ १३० मे़वये़॥ 8 एलिजापानरे़ कुमुॽइदाङ्साहाॽलाम्— समायाह खुने़ॽ लाम्लोबा नु खुने़ॽ कुगाॽइहाॽ २०० मे़वये़॥ 9 हेब्रोनरे़ कुमुॽइदाङ्साहाॽलाम्— एलिएल खुने़ॽ लाम्लोबा नु खुने़ॽ कुगाॽइहाॽ ८० मे़वये़॥ 10 उज्जिएलरे़ कुमुॽइदाङ्साहाॽलाम्— अम्मिनादाब खुने़ॽ लाम्लोबा नु खुने़ॽ कुगाॽइहाॽ ११२ मे़वये़॥ 11 हे़क्क्याङ् दाउदरे़ सादोक नु अबियाथार निङ्वाॽफुसाम्बाहाॽ कन् ले़बिहाॽनु सोरिक् उरिएल, असायाह, योएल, समायाह, एलिएल, अम्मिनादाबे़न् उःत्तुसि॥ 12 हे़क्क्याङ् खे़ङ्हाॽ मे़त्तुसि, “ले़बिहाॽरे़ खुन्छिॽ हिम्सयङ्हाॽओबा लाम्लोबा खिनिॽएरो॥ खिनिॽ नु खिनिॽ काॽइहाॽ आप्फेक् आप्फेक् सुत्थो चोःक्कासिम्मे़ॽ, हे़क्क्याङ् आङ्गाॽ खे़ल्ले़ लागि यारिप् चोगुङ्बा ते़न्नो यहवे दाङ्बा इस्राइलबा निङ्वाॽफुमाङ्ङिल्ले़ कुमाङ्हुप् सन्दोक्किन् थाक्ते़म्मे़ॽ॥ 13 थिक्सिगेक्पा ले़ङ्ङो खे़प्मो खिनिॽ के़होःप्तिबाल्ले़ चोगुल्ले़ यहवे दाङ्बा आनिॽ निङ्वाॽफुमाङ्ङिन् आनिगे़नु कुसाक्के़न् पोगे़॥ थेआङ्भे़ल्ले़ आनिगे खे़न् माङ्हुप् सन्दोक्किन् आक्खेलॽरिक् थिम् कुइसिक् थाक्मा के़बोङ्बा फाॽआङ् सेःन्मे़दोसुम्बे़न्॥” 14 कल्ले़चोगुल्ले़ यहवे दाङ्बा इस्राइलबा निङ्वाॽफुमाङ्ङिल्ले़ कुमाङ्हुप् सन्दोक्किन् थाक्मारे़ लागि निङ्वाॽफुसाम्बाहाॽ नु ले़बिहाॽ आप्फेक् आप्फेक् सेसेसाङ्साङ् मे़जोःक्सिङ्॥ 15 हे़क्क्याङ् यहवे दाङ्बे़ल्ले़ कुबाःन्जाक् कुइसिक् मोसाःल्ले़ इङ्जाङ् पिरुसिआङ् वये़बा हे़क्के खे़ङ्हाॽरे़ खुन्छिॽ फक्ताङ्ङो तक्लाङ्हाॽरे़ मे़बक्खुआङ् निङ्वाॽफुमाङ्ङिल्ले़ कुमाङ्हुप् सन्दोक्किन् मे़भोःक्खु मे़धाक्तु॥ 16 खे़न् एगाङ् दाउदे़ल्ले़ अन्मे, तुःङ्गे नु साप्फङ्गा मुक्ला सामाहाॽलाम्—ले़बिहाॽरे़ खुन्छिॽ लाम्लोबाहाॽ खुनिॽ काॽइहाॽ निङ्वाॽ के़दाबा साम्लो इक्ला लःप्मारे़ लागि युक्तिङ् चोगे़म्से़ॽ फाॽआङ् मुरा मे़त्तुसि॥ 17 कल्ले़चोगुल्ले़ ले़बिहाॽरे़ योएलरे़ कुस्सा हेमान, नु खुने़ॽ कुगाॽइहाॽलाम् बेरेक्याहःल्ले़ कुस्सा आसाप हे़क्क्याङ् खे़ङ्हाॽरे़ खुन्छिॽ काॽइ मरारिहाॽलाम् कुसायाहरे़ कुस्सा एतान, 18 खम्भ्याङ् खे़ङ्हाॽरे़ खुन्छिॽ निसिगेक्पा ताक्फाओबा काॽइहाॽ जकरिया, याजिएल, समिरामोत, यहिएल, उन्नि, एलिआब, बनायाह, मासेयाह, मत्तित्याह, एलिपलेहु, मिक्नेयाह, हे़क्क्याङ् लाम्धेत् के़गोबाहाॽ ओबेद-एदोम नु यिएले़न् युक्तिङ् मे़जोगुसि॥ 19 साम्लो इक्ला के़लःप्पा हेमान, आसाप नु एताने़न् कासा साप्फङ्गाहाॽ हिप्मारे़ लागि युक्तिङ् मे़जोगुसि॥ 20 जकरिया, अजिएल, समिरामोत, यहिएल, उन्नि, एलिएब, मासेयाह नु बनायाहन् अन्मेहाॽ मुङ्मारे़ लागि अलामोत कुइसिक् इक्ला लःप्मारे़ लागि युक्तिङ् मे़बोःक्खे़॥ 21 हे़क्क्याङ् मत्तियाह, एलिपलेहु, मिक्नेयाह, ओबेद-एदोम, यिएल नु अजज्याहन् अन्मेहाॽ मुङ्मारे़ लागि सिमिनिथ मे़प्मनाबा इक्ला लःप्मारे़ लागि युक्तिङ् मे़बोःक्खे़॥ 22 ले़बिहाॽरे़ खुन्छिॽ लाम्लोबा कनन्याहन् खुने़ॽ के़ले़बा के़निबा पोःक्खे़बाल्ले़ चोगुल्ले़ साम्लो इक्लारे़ लागि लक्पे़न् मे़बिरुआङ् वये़॥ 23 बेरेक्याहन् नु एल्कानान् माङ्हुप् सन्दोक्किल्ले़ लागि लाम्धेत् के़गोबा वये़सि, 24 हे़क्क्याङ् सबन्याह, योसापात, नतनेल, अमासै, जकरिया, बनायाहन् हे़क्क्याङ् एलिएजर निङ्वाॽफुसाम्बाहाॽ निङ्वाॽफुमाङ्ङिल्ले़ कुमाङ्हुप् सन्दोक्किल्ले़ कुदगि सादाङ्हाॽ मे़मुःत्तु॥ ओबेद-एदोम नु येहियाहःन्नाङ् माङ्हुप् सन्दोक्किल्ले़ लागि लाम्धेत् के़गोबा वये़सिरो॥ माङ्हुप् सन्दोक्किन् यरुसले़ःम्मो मे़धाक्तु ( २ सामु ६:१२-२२ ) 25 खे़ब्याङ् दाउदे़न् नु इस्राइलबा लाम्लोबाहाॽ हे़क्क्याङ् हे़न्छिङ् हे़न्छिङ्बा थक्सुबाहाॽरे़ खुन्छिॽ थक्मोबाहाॽ यहवे दाङ्बे़ल्ले़ कुमाङ्हुप् सन्दोक् लासे़ साॽरिक् मे़सःत्ते़र यो मे़बेआङ् ओबेद-एदोमरे़ कुहिम्मोलाम् मे़धाक्तु॥ 26 यहवे दाङ्बे़ल्ले़ कुमाङ्हुप् सन्दोक् के़बङ्बा ले़बिहाॽ निङ्वाॽफुमाङ्ङिल्ले़ फाॽरुसिबाल्ले़ चोगुल्ले़ खे़ङ्हाॽरे़ नुसि कुम्बाबा पित् नु नुसि थुःम्बा वयागे़न् सिदुङ्जभा मे़दोन्दुसि॥ 27 दाउदे़न् नु माङ्हुप् सन्दोक् के़बङ्बा के़रे़क् ले़बिहाॽ, साम्गे़लोबाहाॽ नु साम्गे़लोबाहाॽरे़ खुन्छिॽ लाम्लोबा कनन्याहरे़ पारान्ला चाङ् मे़जाक्खुआङ् वये़॥ दाउदरे़आङ् पारान्ला एपोद तेःत्तिन् चाक्खुआङ् वये़॥ 28 कम्भलॽरिक् के़रे़क् इस्राइलिहाॽ तियाहा लॽनु, मे़ल्लुक् ताङ्हाॽ नु थुत्थुरिःप्पाहाॽ मे़मुःत्तुर, हे़क्क्याङ् साप्फङ्गाहाॽ मे़हिप्तुर, अन्मे नु तुःङ्गे मे़मुक्खुर यहवे दाङ्बे़ल्ले़ कुमाङ्हुप् सन्दोक्किन् मे़धाक्तुआङ् मे़धाङे़॥ 29 आल्ल यहवे दाङ्बे़ल्ले़ कुमाङ्हुप् सन्दोक्किन् मे़धाक्तुआङ् दाउदरे़ कुये़क्यक्को मे़लासे़र मे़बत्छे़ल्ले़ साउलरे़ कुस्सा मे़न्छुमा मिकलरे़ पेधाःप्पोलाम् ओमे़त्तुसि, हे़क्क्याङ् दाउद हाङ्ङिन् लाःक्खे़र फे़रे़बा नु सःत्ते़बा निसुआङ् खुने़ॽ कुनिङ्वाॽओ कुनामे़न्छाॽ मे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.