१ साप्मुःन्धुम् 14 - लिम्बुयरुसले़म ये़क्यक्को दाउदरे़ चोगुबा याःम्बक्हाॽ ( २ सामु ५:११-१६ ) 1 तुरोसबा हेराम हाङ्ङिल्ले़ दाउदरे़ओ इङ्साबाहाॽ पाङ्घु युसुसि॥ खुने़ॽ साम्माङ्सिङ् सिङ्हाॽ हे़क्क्याङ् लुङ्गाम्बाहाॽ नु सिङ्गाम्बाहाॽआङ् दाउदरे़ कुहाङ्हिम् चोःक्से़ पाङ्घु युसुसि॥ 2 आल्ल यहवे दाङ्बे़ल्ले़ इस्राइलओ हाङ् चोगु हे़क्क्याङ् खुने़ॽ कुमना इस्राइलिहाॽरे़ खुन्छिॽ लागि कुहाङ्युक् मुक्साम्मिन् थाःङ्धाक् चोगु फाॽआङ् दाउदरे़ निङ्वाॽ खोसु॥ 3 यरुसले़ःम्मो दाउदरे़ आल्लसाङ् यरिक् मेःत्हाॽ तारुसि, हे़क्क्याङ् खुने़ॽ वेॽ यरिक् कुस्सा ये़म्बित्छा नु मे़न्छुमाहाॽ मे़वये़॥ 4 यरुसले़ःम्मो सावागे़वाःन्छिङ्बा खुने़ॽ कुस्सा ये़म्बित्छा मे़न्छुमाहाॽरे़ खुन्छिॽ मिङ्हाॽ हाबा कन्हाॽएरो—सम्मुअ, सोबाब, नातान, सोलोमन, 5 यिभार, एलिसुअ, एलिपेलेत, 6 नोगह, नेपेग, यापि, 7 एलिसामा, बेलियादा नु एलिपेलेत मे़वये़रो॥ दाउदरे़ पलिस्तिहाॽ नाःन्दुसि ( २ सामु ५:१७-२५ ) 8 दाउदे़न् के़रे़क् इस्राइलओ हाङ् माङ्थोःक्ना पोःक्खे़ फाॽआङ् आल्ल पलिस्तिहाॽरे़ मे़घे़प्सु, खे़ब्याङ् पलिस्तिहाॽ के़रे़क् थक्सुबाहाॽ मे़गाप्सिङ्ङाङ् खुने़ॽ कुगोःत्छे़ मे़लःन्दे़॥ दाउदरे़ कन् खे़प्सुआङ् खे़ङ्हाॽरे़ खुन्छिॽ तुम्से़ लःन्दे़॥ 9 आल्ल पलिस्तिहाॽ रपाइबा ने़ने़बादे़न्नो मे़भे़रे़आङ् मे़वये़ हे़क्क्याङ् हिप्मा नाप्मा मे़हेःक्तुसि॥ 10 कल्ले़चोगुल्ले़ दाउदे़ल्ले़ निङ्वाॽफुमाङ्ङिन् सेःन्दोसु, “थे आङ्गाॽ पलिस्तिहाॽ थङ्ङो फत्तुङ्सिङ्बि? थे आदाङ्बारे़ खे़ङ्हाॽ आङ्गाॽ आहुक्को के़धासुसिबि?” हे़क्क्याङ् यहवे दाङ्बे़ल्ले़ नुगप् पिरु, “फत्ते़से़ॽ, आङ्गाॽ खे़ङ्हाॽ खे़ने़ॽ के़हुक्को थासुङ्सिङ्ॽ॥” 11 कल्ले़चोगुल्ले़ दाउद नु खुने़ॽ कुजुम्हाॽ थो मे़धोःक्सिङ् हे़क्क्याङ् खे़ङ्हाॽ बाल-पराजिमओ मे़भत्तुसिआङ् मे़नाःन्दुसि॥ दाउदे़ल्ले़ पाःत्तु, “वहःङ्ङिल्ले़ कुयान् थुप्सुबा कुइसिःक्के निङ्वाॽफुमाङ्ङिल्ले़ आङ्गाॽलाम् थे़ःक्पे़त् के़ये़प्पा आनिङ्मिहाॽ मे़क्खुसि॥” कल्ले़चोगुल्ले़ खे़न् ते़न्निल्ले़ कुमिङ् बाल-पराजिम युक्खु॥ 12 पलिस्तिहाॽरे़ खे़प्मो खुन्छिॽ माङ्हाॽ मे़ले़रु मे़धसि, हे़क्क्याङ् दाउदे़ल्ले़ खे़ङ्हाॽ मिधिक्खे़म्सिम्मे़ॽ फाॽआङ् मुरा मे़त्तुसि॥ 13 पलिस्तिहाॽरे़ याम्मो थिक्ले़ङ् ने़ने़बादे़न्नो मे़नाप्तु मे़हिप्तुसि॥ 14 याम्मो दाउदे़ल्ले़ निङ्वाॽफुमाङ्ङिन् सेःन्दोसु, हे़क्क्याङ् निङ्वाॽफुमाङ्ङिल्ले़ खुने़ॽ मे़त्तु, “कन्छुम्मो खे़ने़ॽ खे़ङ्हाॽरे़ खुन्छिॽ एःक् ले़प्माङ् मे़बेगे़न्ने़ॽ॥ कर खे़न्हाॽ कबे़से़ॽआङ् पिपोर सिङ्बुङ्ङिल्ले़ कुदगिलाम् फत्ते़से़ॽ॥ 15 खे़न् एगाङ् पिपोर सिङ्बुङ्हाॽरे़ कुसम् कुसम्मो हुरुहुरु लॽरिक् सःक्नुमे़ःन्ने खे़ङ्हाॽनु थङ् थक्ते़ॽ, थेआङ्भे़ल्ले़ पलिस्ति थक्सुबाहाॽ थक्मासिरे़ लागि निङ्वाॽफुमाङ्ङिन् तगितगि पेःक्॥” 16 निङ्वाॽफुमाङ्ङिल्ले़ इङ्जाङ् पिरुबा कुइसिक् दाउदरे़ चोगु, खम्भ्याङ् खे़ङ्हाॽरे़ पलिस्ति थक्सुबाहाॽ गिबोनलाम् गेजेर थारिक्के मे़धगु मे़स्ये़रुसि॥ 17 कल्ले़चोगुल्ले़ दाउदरे़ कुमिङ्सो कुधाःङ्सो के़रे़क् लाजेॽहाॽओ इङे़, हे़क्क्याङ् यहवे दाङ्बे़ल्ले़ के़रे़क् मे़न्छाम् सुवाङ्हाॽओ किमा यङ्मा थे़क्तु पिरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.