१ साप्मुःन्धुम् 13 - लिम्बुकिर्यत-यारिमलाम् माङ्हुप् सन्दोक्किन् मे़देॽरु ( २ सामु ६:१-११ ) 1 दाउदरे़ खुने़ॽ कुसुहाङ्युक्पा थक्मा, हे़न्छिङ्रे़ खुन्छिॽ लाम्लोबाहाॽ नु किप्थिक्ले़ खुन्छिॽ लाम्लोबाहाॽ सुजा नाःक्तुसि॥ 2 खे़न् एगाङ् इस्राइलबा के़रे़क् सङ्जुम्भोबा मनाहाॽ मे़त्तुसि, “आदाङ्बासि के़दे़न्दिॽ, हे़क्क्याङ् यहवे दाङ्बा आनिॽ निङ्वाॽफुमाङ्ङिल्ले़ लाम् हन्दु आबिआङ् खिनिॽ के़दे़न्दिने़भग्र, के़रे़क् इस्राइलओ के़युङ्बा आनिॽ फुॽनुसाॽहाॽ हे़क्क्याङ् खे़ङ्हाॽरे़ खुन्छिॽ ये़क्यक् नु थक्सा चाराम्दे़न् लाजेॽहाॽओ के़युङ्बा निङ्वाॽफुसाम्बाहाॽ हे़क्क्याङ् ले़बिहाॽ आनिॽनु फुङ्सिङ्से़ मे़दार के़लॽबा इङ्घङ् हाक्तुम्सिम्ॽ॥ 3 आनिॽ निङ्वाॽफुमाङ्ङिल्ले़ कुमाङ्हुप् सन्दोक्किन् थाक्तुम्ॽ, थेआङ्भे़ल्ले़ साउलरे़ कुहाङ्युक् ये़म्मो आनिॽ खे़न् आभे़ल्ले़आङ् निनि खे़म्घे़म् आल्लाप्तुम्मिन्॥” 4 खे़ब्याङ् के़रे़क् सङ्जुम्भोबा मनाहाॽरे़ अक्खे चोःक्मा निःन्धो मे़जोगु, थेआङ्भे़ल्ले़ के़रे़क् मनाहाॽरे़ अक्खे चोःक्मा मे़भाःक्तुसि॥ 5 कल्ले़चोगुल्ले़ किर्यत-यारिमलाम् निङ्वाॽफुमाङ्ङिल्ले़ कुमाङ्हुप् सन्दोक्किन् थाक्मारे़ लागि मिस्र लाजेॽबा सिहोर वहःङ्ङोनु ले़बो-हमात थारिक्पा के़रे़क् इस्राइलिहाॽ दाउदरे़ फुक्खुसि॥ 6 खे़ब्याङ् दाउद नु के़रे़क् इस्राइलिहाॽ यहुदाओ के़ने़बा बाला, किर्यत-यारिमओ करुबहाॽरे़ खुन्छिॽ लुम्मो के़युङ्बा निङ्वाॽफुमाङ् यहवे दाङ्बाल्ले़ कुमिङ्ङोबा माङ्हुप् सन्दोक् थाक्से़ मे़बे॥ 7 खे़ङ्हाॽरे़ अबिनादाबरे़ कुहिम्मोलाम्बा निङ्वाॽफुमाङ्ङिल्ले़ कुमाङ्हुप् सन्दोक्किन् मे़याङ्सिङ्ङाङ् लत्छा कुसङ् पित्लाधाओ मे़युक्खु, हे़क्क्याङ् उज्जाह नु अहियोःल्ले़ खे़न् पित्लाधान् लोःक्खे़सुर तेॽरे़छु॥ 8 दाउदे़न् नु के़रे़क् इस्राइलिहाॽ निङ्वाॽफुमाङ्ङिल्ले़ कुदगि खुन्छिॽ सुक्सुक् साम्लो, अन्मे खिङ्मनाबा मुक्ला, तुःङ्गे, ताहिप्, साप्फङ्गा हे़क्क्याङ् सादाङ्हाॽनु सोसोरिक् साॽरिक् खुन्छिॽ सिक्समे़आङ् मे़सःत्ते़॥ 9 खे़ङ्हाॽ किदोनबा चाधाम्दे़न्नो मे़गे़रे़ मे़द्ये़ःल्ले़ खे़ङ् पित्हाॽरे़ खुन्छिॽ लाङ्हाॽ तोःक्ते़, हे़क्क्याङ् उज्जाहःल्ले़ माङ्हुप् सन्दोक्किन् ते़म्मारे़ लागि कुहुक्किन् सन्छु॥ 10 कर यहवे दाङ्बे़न् उज्जाहःन्नु साॽरिक् कुसाक्के़न् पोगे़आङ् खुने़ॽ हर्जुॽ चोःन्दे़र हिप्तुधासु॥ कल्ले़चोगुल्ले़ खे़न् निङ्वाॽफुमाङ्ङिल्ले़ कुदगि आम्भा खे़प्मोए हदॽ स्ये़॥ थेआङ्भे़ल्ले़ खे़ल्ले़ कुहुक्किन् सल्लिक् सन्छुआङ् माङ्हुप् सन्दोक्किन् सुसु॥ 11 यहवे दाङ्बे़ल्ले़ कुसाक्के़न्निन् उज्जाहओ थ्ये़बाल्ले़ चोगुल्ले़ दाउदे़न् कुनिङ्वाॽ पङे़, हे़क्क्याङ् खुने़ॽ खे़न् ते़न्निन् फारेस उज्जाह मिङ् वाःत्तु॥ खे़न् ते़न्निन् कुमिङ् आल्लोसाङ् ने़रो॥ 12 खे़न् ये़न् दाउदे़न् निङ्वाॽफुमाङ्ङिन्नु किसे़आङ् सेःन्दोसुसि, “हे़क्केने़भग्र आङ्गाॽ निङ्वाॽफुमाङ्ङिल्ले़ कुमाङ्हुप् सन्दोक्किन् आलक्पे़न्नो आक्खेआङ् थाक्मा सुक्तुङ्बे?” 13 कल्ले़चोगुल्ले़ खुने़ॽ सन्दोक्किन् खुने़ॽनु सोरिक् दाउदरे़ कुये़क्यक्को मे़देॽरुन्, कर थिक्नाहाङ् ले़प्माङ् पेआङ् गात के़युङ्बा ओबेद-एदोमरे़ कुहिम्मो तेॽरु॥ 14 कम्भलॽरिक् निङ्वाॽफुमाङ्ङिल्ले़ कुमाङ्हुप् सन्दोक्किन् ओबेद-एदोमरे़ कुहिम्सयङ्नु सोरिक् खुने़ॽए कुहिम्मो ला सुम्सि थारिक् युङे़, हे़क्क्याङ् यहवे दाङ्बे़ल्ले़ खुने़ॽ नु कुहिम्सयङ्ङो के़वाॽबा के़रे़क् पाःन्हाॽओ हाङ्वागे़न् मुॽइसाम् थासुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.