१ साप्मुःन्धुम् 12 - लिम्बुदाउदे़न्नु के़भुङ्सिङ्बा थक्लिहाङ्हाॽ 1 किसरे़ कुस्सा साउललाम् दाउदे़न् चिङ्सिङ्ङाङ् वये़ल्ले़ सिक्लगओ कन् मु साप्ते़आङ् के़बप्पा मनाहाॽ दाउदे़न्नु फुङ्सिङ्से़ मे़द्ये़॥ कन्हाॽ थङ्ङो मुक्के़गुबा थक्लिहाङ् मनाहाॽरे़ खुने़ॽ थङ्ङो मे़भाॽरुआङ् वये़॥ 2 कन्हाॽ तोङ् लिरे़ काप्तुसिबा मे़वये़, हे़क्क्याङ् चुक्वा इग्र फे़ङ्वा हुक्किल्ले़ अर्दो याङ्मा नु तोङ् आप्मा के़सुक्पा मे़वये़॥ कन्हाॽ बेन्यामिनि थाःक्कोबा साउलरे़ कुगाॽइ मे़वये़रो॥ 3 खे़ङ्हाॽरे़ खुन्छिॽ तुम् लाम्लोबा अहिएजेर नु योआस वये़सि, (खुन्छिॽ गिबियाति सेमाहरे़ कुस्सा वये़सि), अज्मावेतरे़ कुस्साहाॽ यजिएल नु पलेत, अनातोति बराकाह, येहु, 4 गिबोनि यिस्मायाह, (खुने़ॽ खे़न् सुम्बोङ् मनाहाॽओबा लत्छा मुक्के़गुबा नु खे़ङ्हाॽरे़ खुन्छिॽ तुम् लाम्लोबा वये़), यर्मिया, यहासेल, योहानान नु गदेराति योजाबाद, 5 एलुजै, यरिमोत, बाल्याह, समरयाह, हारुपि सपत्याह, 6 एल्काना, यिस्याह, अज्रेल, योएजेर नु (यासोबाम खे़ङ्हाॽ कोरह थाःक् मे़वये़), 7 योएलह नु जबदियाह (खुन्छिॽ गदोरबा यरोहामरे़ कुस्सा वये़सिरो)॥ दाउदे़न्नु के़भुङ्सिङ्बा गादिहाॽ 8 गादबा कुभा कुभा मनाहाॽआङ् मुरे़क् खारे़क् थेआङ् के़होप्पा ये़ःङ्घादे़न्नो के़ने़बा यक्को दाउदे़न्नु फुङ्सिङ्से़ मे़द्ये़॥ खे़ङ्हाॽ मुक्के़गुबा थक्लिहाङ् मनाहाॽ मे़वये़ हे़क्क्याङ् थङ् चोःक्मारे़ लागि ताम्सिङ् मे़जोगे़आङ् मे़वये़, खे़ङ्हाॽरे़ खो नु लाःक् याङ्मा मे़सुक्तु॥ खे़ङ्हाॽ खिरिङ्बा कुइसिक् किप्मा के़घुबा नु कोःक्माहाॽओ पे़ःङ्वा हे़क्के के़जप्पा मे़जोगे़रो॥ 9 एसेरे़न् खे़ङ्हाॽरे़ खुन्छिॽ तुम् लाम्लोबा वये़, निसिगेक्पा ओबदिया, सुम्सिगेक्पा एलिआब, 10 लिसिगेक्पा मिस्मन्ना, ङासिगेक्पा यर्मिया, 11 तुक्सिगेक्पा अत्तै, नुसिगेक्पा एलिएल, 12 ये़त्छिगेक्पा योहानान, फाङ्सिगेक्पा एल्जाबाद, 13 थिबोङ्गेक्पा यर्मिया नु थिबोङ्ङाङ् थिक्सिगेक्पा मकबन्ने वये़॥ 14 कन् गादिहाॽ थक्सुबाहाॽरे़ खुन्छिॽ थक्मोबा मे़वये़॥ खे़ङ्हाॽओबा के़रे़क्नुःल्ले़ चुक्पा किप् थिक् लाम्लोमा के़सुक्पा नु के़रे़क्नुःल्ले़ यम्बाग हे़न्छिङ् थिक् लाम्लोमा के़सुक्पा मे़वये़॥ 15 थिक्सिगेक्पा लाओ आल्ल यर्दन वहःङ्ङिन् खे़प्मोबा के़रे़क् कुयाओ थारिक् तिम्से़ थाङे़ल्ले़ यर्दन वहःङ्ङिन् के़गाःक्पाआङ् खे़प्मोबा नाङ्गे़न् नु नाम्धाबा ने़ने़बादे़न्हाॽओ के़युङ्बा के़रे़क् मनाहाॽ के़घे़प्पाआङ् के़नाःप्पा के़देबा हाबा कन् मनाहाॽए मे़वये़रो॥ 16 बेन्यामिन नु यहुदा थाःक्कोलाम् कुभा मना सुम्हाॽआङ् दाउदरे़ कुयक्को मे़द्ये़॥ 17 दाउदे़न् खे़ङ्हाॽरे़ खुन्छिॽ तुम्से़ लाःक्कात् लःन्दे़आङ् मे़त्तुसि, “खिनिॽ आङ्गाॽ ले़प्माङ् पप्मारे़ लागि सनारुङ्ङाङ् के़द्ये़ॽइबाने़भग्र आङ्गाॽ ले़प्माङ् पत्छे़म्मे़ॽ, हे़क्क्याङ् आङ्गाॽ खिनिॽ लाम्दाःक्निङ्ॽ॥ कर आङ्गाॽ मना के़से़प्पा थेआङ् आआप्तिक् मे़ःन्नेसाङ् खिनिॽ इङ्ले़क् के़जोगिआङ् आङ्गाॽ आनिङ्मिहाॽरे़ खुन्छिॽ हुक्को पिमारे़ लागि के़द्ये़ॽइबाने़भग्र, आनिॽ पाधे़बाहाॽरे़ खुन्छिॽ निङ्वाॽफुमाङ्ङिल्ले़ कन् ओमे़त्तुआङ् खासे़न् चोगुर॥” 18 आम्भा खे़न् ये़म्मो खे़न् सुम्बोङ् मनाहाॽओबा तुम् लाम्लोबा अमासैन् याम्साम्मिल्ले़ थुक्तु, हे़क्क्याङ् खुने़ॽ अक्खे पाःत्तुरो, “दाउदए, आदाङ्बानु आनिगे फुङ्ङासिरो! यिसैरे़ कुस्साए, आदाङ्बानु आनिगे वयिगे़रो! आदाङ्बा के़नुॽ के़दाररो, के़नुॽ के़दाररो, हे़क्क्याङ् खे़ने़ॽ के़भाॽबाङ्हाॽ मे़नुॽमे़दाररो, थेआङ्भे़ल्ले़ आदाङ्बारे़ के़निङ्वाॽफुमाङ्ङिन्ने आदाङ्बारे़ के़भाॽबाङ् वाॽरो॥” कल्ले़चोगुल्ले़ दाउदरे़ खे़ङ्हाॽ लाङ्दाक् मे़त्तुसि, हे़क्क्याङ् के़नाप्पा के़हिप्पा कुमना सुम्हाॽओबा लाम्लोबा चोगुसिरो॥ 19 आल्ल दाउदे़न् साउलरे़ कुदक्ले़ङ्वाओ थङ् थक्से़ पलिस्तिहाॽनु पेःल्ले़ मनस्सेबा कुभा मनाहाॽ दाउदे़न्नु मे़भुङ्सिङ्॥ हे़क्केसाङ् से़क्खाःल्ले़ खुने़ॽ पलिस्तिहाॽ ले़प्माङ् मे़बत्छे़न्नाङ् ते़न्धङ्ग मे़जोगे़न्, थेआङ्भे़ल्ले़ पलिस्तिहाॽरे़ खुन्छिॽ युक्साबाहाॽ खुन्छिॽ लुम्मो अक्तङ्बा पाःन्दङ् मे़जोगे़आङ् खुने़ॽ मे़नुःक्तु मे़देसु, “खुने़ॽ आनिॽ थे़गेःक्हाॽ फुन्दु तेॽरुआङ् कुन्दाङ्बा साउले़न्नु तङ्सिङ्से़ पेक्॥” 20 दाउदे़न् सिक्लग पेःल्ले़ खुने़ॽनु फुङ्सिङ्से़ के़दाबा मनस्सेबा मनाहाॽ आम्भा कन्हाॽए मे़वये़—अदनाह, योजाबाद, येदिएल, मिखाएल, योजाबाद, एलिहु नु सिल्लतै॥ कन्हाॽ मनस्सेबा हे़न्छिङ् थिक्थिक् थक्मोबा लाम्लोबा मे़वये़॥ 21 कन्हाॽरे़ए के़नाप्पा के़हिप्पाहाॽरे़ खुन्छिॽ तक्ले़ङ्वाओ दाउदे़न् मे़भाॽरु, थेआङ्भे़ल्ले़ खे़ङ्हाॽ के़रे़क् मुक्के़गुबा थक्लिहाङ् मे़वये़, हे़क्क्याङ् खे़ङ्हाॽ दाउदरे़ कुधक्सुबाहाॽओ याङ्सो युक्तिङ् मे़जोगुसि॥ 22 दाउदरे़ यरिक् थक्सुबा सुम्हाॽ निङ्वाॽफुमाङ्ङिल्ले़ यरिक् कुधक्सुबाहाॽ हे़क्तङ्बा मे़जोगुसिन्ल थारिक् मनाहाॽ थिक्याःन्धक्मा खुने़ॽ कुभाॽसे़ मे़द्ये़रो॥ वेॽहाॽ हेब्रोनओ दाउदे़न्नु मे़भुङ्सिङ् 23 यहवे दाङ्बे़ल्ले़ पाःत्तुबा कुइसिक् साउलरे़ कुहाङ्जुम् युक्किन् दाउदे़न् पिमारे़ लागि फे़जुम्भे़या खजुम्घया के़गाप्सिङ्बाआङ् हेब्रोनओ दाउदे़न्नु फुङ्सिङ्से़ के़दाबा मनासुम्हाॽरे़ खुन्छिॽ खानिःत्तिन् हाबा कन्लो— 24 यहुदालाम्—खो के़बङ्बाआङ् लाःक् के़याङ्बा ६,८०० थक्लिहाङ् मनाहाॽ॥ 25 सिमियोनलाम्—ते़न्धङ् चोःक्मा के़सुक्पा ७,१०० थक्लिहाङ्हाॽ॥ 26 ले़बिलाम्—४,६००, 27 खे़न्नु सोरिक् हारुनरे़ कुहिम्सयङ्बा लाम्लोबा यहोयादान्नु सोरिक् ३,७०० मनाहाॽ मे़वये़, 28 हे़क्क्याङ् मुक्के़गुबा थाङ्बे़न् सादोके़न्नु सोरिक् आबाङे कुहिम्सयङ्ङोबा २२ सुहाङ्युक्पाहाॽ मे़वये़॥ 29 साउलरे़ कुगाॽइ बेन्यामिनलाम्—३,०००॥ खे़ङ्हाॽओलाम् यरिक् कुसिङ् खे़न् ये़म्मो थारिक् साउलरे़ कुहिम्सयङ्ङो मे़घे़ःम्सिङ्ङाङ् मे़वये़॥ 30 एफ्राइमलाम्—२०,८०० मुक्के़गुबा थक्लिहाङ् मनाहाॽ, खे़ङ्हाॽ खुन्छिॽ आप्फेक् हिम्सयङ्ङो खुन्छिॽ मिङ् के़इङ्बा मे़वये़॥ 31 मनस्सेरे़ कुभ्रे़ःङ् कुधाःक्कोलाम्—१८,०००॥ दाउदे़न् हाङ् चोःक्मारे़ लागि कन्हाॽए मे़सेगुसिआङ् मे़वये़॥ 32 इस्साखारलाम्—खे़न् थाःक्कोबा मनाहाॽरे़ ये़म्मिन् कुसिङ् मे़निःत्तु हे़क्क्याङ् इस्राइलरे़ आत्तिन् लाम्मिन् नाःप्मा तिम्मा के़बोङ्बा वाॽ फाॽआङ् के़ले़बा २०० मनाहाॽ नु खे़ङ्हाॽरे़ खुन्छिॽ पाःन्गे़घे़म्बा काॽइहाॽ मे़द्ये़॥ 33 जबुलुनलाम्—ते़न्धङ्ले़ लागि यारिप् के़बोङ्बा के़रे़क् परिक्पा खजुम्घया फे़जुम्भे़या याङ्मा के़सुक्पा तगिआङ् के़धाबा, कुगिमा के़होप्पा नु निङ्वाॽ थे़इॽ के़बप्पा ५०,००० थक्लिहाङ्हाॽ॥ 34 नप्तालिलाम्—१,००० सुहाङ्युक्पाहाॽ, हे़क्क्याङ् खो नु लाःक् के़बङ्बा ३७,००० मनाहाॽ॥ 35 दानलाम्—थङ्ले़ लागि यारिप् के़बोङ्बा २८,६०० मनाहाॽ॥ 36 आसेरलाम्—थङ्ले़ लागि यारिप् के़बोङ्बा तगि के़धाबा ४०,००० थक्लिहाङ्हाॽ॥ 37 हे़क्क्याङ् रुबेन, गाद नु यर्दन नाङ्गे़न् पिसाङ्बा मनस्सेरे़ कुभ्रे़ःङ् थाःक्लाम्—के़रे़क् परिक्पा फे़जुम्भे़या खजुम्घयारे़ काप्तुसिबा १,२०,००० मनाहाॽ॥ 38 कन् थक्लिहाङ्हाॽ, ते़न्धङ् चोःक्मा फे़जुम्भे़या खजुम्घयारे़ काप्तुसिबा मनाहाॽ के़रे़क् इस्राइलओ दाउदे़न् हाङ्चोःक्मा निङ्वाॽ मे़जोगुआङ् हेब्रोनओ मे़द्ये़॥ वेॽ इस्राइलिहाॽरे़आङ् खुने़ॽ हाङ्चोःक्मा के़लॽबा लत्छा निङ्वाॽ वये़॥ 39 खे़ङ्हाॽरे़ खे़प्मो मे़जर मे़धुङुर सुम्यान् थारिक् दाउदे़न्नु मे़वये़, थेआङ्भे़ल्ले़ खे़ङ्हाॽरे़ खुन्छिॽ काॽइहाॽरे़ खुन्छिॽ लागि चामा थुङ्मा मे़हिसु मे़दङ्घुआङ् वये़॥ 40 खे़ङ्हाॽरे़ खुन्छिॽ के़रे़क् पिसाङ्बा हिम्बेसाङ्बाहाॽरे़ इस्साखार, जबुलुन नु नप्तालि थारिक् माःङ्घालाम् उमे, अन्योक्, पित्हाॽ मे़गुःत्तुसिआङ् चामा कुजा मे़दारु॥ यरिक् फेॽरुम्, पःत्छेॽ काक्मा, मे़घे़क्सुबा चे़ल्ले़क्सेॽ कुबजा, चे़ल्ले़क्सेॽ सेजःङ्वा, निःङ्गेॽ, कुम्मामा कुम्बाबा पित्हाॽ, मे़ल्लुक्हाॽ आत्तातान्ने यरिक् मे़वये़, खे़ल्ले़चोगुल्ले़ इस्राइलओ निङ्वाॽ तामारे़ कुधिम् पोःक्खे़आङ् ने़स्से़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.