१ साप्मुःन्धुम् 11 - लिम्बुदाउदे़न् इस्राइल नु यहुदाबा हाङ् पोङ्ॽ ( २ सामु ५:१-१० ) 1 खे़न् एगाङ् के़रे़क् इस्राइलिहाॽ सोरिक् मे़बोःक्खे़आङ् हेब्रोनओ दाउदरे़ओ मे़द्ये़॥ खे़ङ्हाॽरे़ खुने़ॽ मे़मे़त्तु, “आनिगे़ग आदाङ्बारे़ए के़गाॽइदिगे़रो॥ 2 आल्ल पेये़म्मो साउले़न् हाङ् वये़ल्ले़सा आदाङ्बारे़ इस्राइलबा थक्सुबाहाॽ थङ्ङो तगि लाम्गे़लोसुसि॥ हे़क्क्याङ् यहवे दाङ्बा आदाङ्बारे़ के़निङ्वाॽफुमाङ्ङिल्ले़ आदाङ्बा अक्खे के़मे़त्ते़, ‘खे़ने़ॽ आमना इस्राइलिहाॽरे़ खुन्छिॽ मे़ल्लुक्कम्बा के़बोङ्ॽ, खे़ने़ॽ खे़ङ्हाॽरे़ खुन्छिॽ युक्साबा के़बोङ्ॽ॥’” 3 आल्ल इस्राइलबा के़रे़क् लाम्लोबाहाॽ हेब्रोनबा हाङ्ङे़ओ मे़द्ये़, खे़ब्याङ् आम्भा खे़प्मोए खुने़ॽ यहवे दाङ्बे़ल्ले़ कुदगि खे़ङ्हाॽनु माङ्हुप् चोगु॥ यहवे दाङ्बे़ल्ले़ सामुए़लरे़ कुम्ब्राओलाम् पाःत्तुबा कुइसिःक्के खे़ङ्हाॽरे़ दाउदे़न् इस्राइलओ हाङ् पोङ्मारे़ लागि माङ्थोःक्ना मे़बिरुरो॥ दाउदरे़ यरुसले़म ये़क्यक्किन् नाःन्दु ( २ सामु २३:८-३९ ) 4 दाउदे़न् नु के़रे़क् इस्राइलिहाॽ यरुसले़म मे़बे, कन् यबुसआङ् मे़मे़त्तु॥ खे़प्मो के़युङ्बा यबुसिहाॽरे़ 5 दाउदे़न् मे़मे़त्तु, “आदाङ्बा कप्मो आभे़ल्ले़आङ् थाङ्मा के़न्छुक्ने़न्॥” हे़क्केसाङ् दाउदे़ल्ले़ सियोनबा यक्किन् हुक्काप् चोगुदेॽरु, खे़न् आल्लो दाउदरे़ कुये़क्यक् मे़मे़त्तु॥ 6 दाउदरे़ अक्खे पाःत्तुआङ् वये़, “यबुसिहाॽ थङ्ङो के़भप्पा थिक्सिगेक्पा मनान् लत्छा थक्मोबा पोङ्ॽ॥” खे़प्मो के़धोःक्सिङ्बा थिक्सिगेक्पा मनान् सरुयाहरे़ कुस्सा योआबे़न् पोःक्खे़॥ कल्ले़चोगुल्ले़ खे़न् थक्मोबा पोःक्खे़॥ 7 दाउदे़ल्ले़ खे़न् यक्किन्ने खुने़ॽ कुयुङ्मादे़न् चोगु॥ कल्ले़ चोगुल्ले़ए मनाहाॽरे़ खे़न् दाउदरे़ कुये़क्यक् मे़मे़त्तु॥ 8 कुदक्मा थुप्थाॽहाॽलाम् खुने़ॽ के़रे़क् पिसाङ्बा लुङ्धाक्को थारिक् यक् कब्रिङ् ये़क्यक् चोगु, हे़क्क्याङ् योआबरे़ के़नम्बा ये़क्यक्किन् याम्मो चोगु॥ 9 हे़क्क्याङ् दाउदे़न् आल्लसाङ् साॽरिक् साॽरिक् मुक्के़गुबा पोःक्खे़र पे, थेआङ्भे़ल्ले़ मुक्साम्दाङ्बा यहवे दाङ्बे़न् खुने़ॽनु वये़रो॥ दाउदरे़ मुक्के़गुबा कुमनाहाॽ 10 दाउदरे़ मुक्के़गुबा तुम् कुमनाहाॽ कन्हाॽए मे़वये़ (यहवे दाङ्बे़ल्ले़ माङ्हुप् चोगुबा कुइसिक्, खे़ङ्हाॽरे़ खुने़ॽ हाङ् चोःक्मारे़ लागि के़रे़क् इस्राइलिहाॽनु सोसोरिक् मे़भाॽरु)— 11 हक्मोनि थाःक्कोबा यासाबाम खुने़ॽ सुहाङ्युक्पाहाॽओ तुम् लाम्लोबा वये़॥ थिक्ले़ङ् खे़ल्ले़ लाःक्किन् याङ्सिङ्ङाङ् किप् सुम्सि मनाहाॽ थुबु स्ये़रुसिआङ् वये़॥ 12 खुने़ॽ कुएगाङ् अहोहि थाःक्कोबा दोदैरे़ कुस्सा एलाजारे़न् खे़न् सुम्सि मुक्के़गुबाहाॽओ लत्छा वये़॥ 13 खुने़ॽ दाउदे़न्नु सोरिक् पास-दम्मिमओ वये़, खे़प्मो हःक्सि इक्ताप्पो पलिस्तिहाॽ ते़न्धङ् चोःक्मारे़ लागि मे़जुप्से़आङ् मे़वये़॥ 14 मनाहाॽ पलिस्तिहाॽरे़ खुन्छिॽ तगिलाम् मे़घे़त्छिङ्, कर खुने़ॽ नु दाउदे़न् लक् खे़न् इक्ताप्पिल्ले़ कुलुम्मो थक्ते़सिर यागे़सि, हे़क्क्याङ् खे़न् इक्ताप्पिन् से़ःप्ते़सुआङ् खुन्छिॽ पलिस्तिहाॽ नाःन्दे़सुसि॥ कम्भलॽरिक् यहवे दाङ्बे़ल्ले़ लत्छा यम्बा थङ् के़नाःम्बा चोगुसि॥ 15 खे़न् सुम्बोङ् कुधे़गेक् मनाहाॽओलाम् सुम्सि मना अदुल्लाम याक्पेःल्ले़ कुबेसाङ् लुङ्फुक्कोओबा याक्केःक्को दाउदे़न्नु फुङ्सिङ्मारे़ लागि मे़बेआङ् मे़वये़॥ खे़न् ये़म्मो रपाइबा ने़ने़बादे़न्नो पलिस्तिहाॽरे़ खुन्छिॽ लत्छा मनासुम्हाॽरे़ साःङ्गाहिम्हाॽ मे़घिङ्घुआङ् मे़युङे़॥ 16 खे़न् ये़म्मो दाउदे़न् लत्छा कम्ब्राङ्बा यक्को वये़ हे़क्क्याङ् पलिस्तिबा थक्सुबाहाॽ बेथले़हे़मओ मे़वये़॥ 17 दाउदे़न् चाॽरिक् कुवामिसे़आङ् खुने़ॽ पाःत्तु, “ए! बेथले़हे़मबा यम्बा लाम्धेःत्तिल्ले़ कुयाओ के़ने़बा वबाक्कोबा च्वाःत्तिन् थुङ्मा खोसुङ्ङिल्ले़ग नुरे़बामे़न्!” 18 कल्ले़चोगुल्ले़ खे़न् सुम्सि मुक्के़गुबाहाॽ पलिस्तिहाॽरे़ खुन्छिॽ तिःक्लाओलाम् मे़भिःन्छिङ् मे़बे हे़क्क्याङ् बेथले़हे़म लाम्धेत् कुबेसाङ्बा वाबाक्कोलाम् च्वाःत्तिन् मे़युरुआङ् दाउदे़न् मे़बिरु॥ कर खे़न् च्वाःत्तिन् दाउदे़न् थुङ्मा मे़दे़न्दे़न्॥ परुमाल्ले़ खुने़ॽ खे़न् च्वाःत्तिन् यहवे दाङ्बे़ल्ले़ कुदगि हुक्खुदेसुआङ् पाःत्तु, 19 निङ्वाॽफुमाङ्ङिल्ले़ अक्तङ्बा याःम्बक् चोःक्मालाम् आङ्गाॽ थेःक्कार! “खुन्छिॽ हिङ्मन्निन् के़साक्पो के़धाबा कन् मनाहाॽरे़ खुन्छिॽ माक्खिन् थे आङ्गाॽ थुङुङ्बाबि?” खे़ङ्हाॽरे़ग कन् च्वाःत्तिन् खुन्छिॽ हिङ्मे़न् के़साक्पो मे़धासुआङ् मे़युरुबारो! कल्ले़चोगुल्ले़ खुने़ॽ खे़न् च्वाःत्तिन् थुङ्मा मे़दे़न्दे़न्॥ कन् सुम्सि मुक्के़गुबा ये़म्बित्छाहाॽरे़ मे़जोगुबा मुक्साम्बा याःम्बक्के़न् अक्तङ्बाए वये़॥ 20 योआबरे़ कुन्साॽ अबिसैन् खे़न् सुम्सिहाॽओ लाम्लोबा वये़॥ थिक्ले़ङ् खुने़ॽ किप् सुम्सि मनाहाॽरे़ खुन्छिॽ लुम्मो लाःक्किन् याङुआङ् खे़ङ्हाॽ थुबु से़रुसि, हे़क्क्याङ् कम्भलॽरिक् खे़न् सुम्सि मनाहाॽ कुइसिक् खुने़ॽ कुमिङ् के़इङ्बा पोःक्खे़॥ 21 खे़न् सुम्सि मनाहाॽनुःल्ले़ यरिक् खुने़ॽ मिङ्सो इङ्धाङ् खोसुआङ् खे़ङ्हाॽरे़ खुन्छिॽ थक्पेबा पोःक्खे़, करसाङ् खुने़ॽ खे़न् सुम्सि मनाहाॽ यारिक् कुमिङ् मे़इङे़न्॥ 22 यहोयादारे़ कुस्सा कब्सेलबा बनायाहन् यरिक् पयम् यम्बा याःम्बक् के़जोःक्पा लत्छा के़दम्बा थक्लिहाङ् पोःक्खे़॥ मोआबबा ने़त्छि मुक्साम्बा मना के़से़प्पा खुने़ॽए वये़॥ नाःङ् थ्ये़बा ये़न्नो खुने़ॽ लत्छा लुम्बाःत्तो लासे़आङ् खिरिङ्बा थिक् स्ये़रुआङ् वये़॥ 23 खुने़ॽ हुक्सिक् ङासि यारिक् केःम्बा मिस्रबा होरुधिक् स्ये़रु, खे़न् मिस्रबा होरुःल्ले़ कुलाःक्किन् थाक् किप्मा सिङ्लःङ्सा याःप्पा चोगे़॥ बनायाहःल्ले़ कुहुक्को तक्कात् थिक् याङ्सिङ्ङाङ् थक्से़ पे, हे़क्क्याङ् खे़न् मिस्रिःल्ले़ कुहुक्कोलाम् लाःक्किन् नाप्तुआङ् हाबा खे़न् लाःक्किल्ले़ फनॽ थुबु से़रुआङ् वये़॥ 24 यहोयादाःल्ले़ कुस्सा बनायाहःल्ले़ कुयाःम्बक् हाबा अक्तङ्बाए वये़॥ खे़न् सुम्सि मनाहाॽ हे़क्केए खुने़ॽ कुमिङ् के़इङ्बा पोःक्खे़॥ 25 खे़न् सुम्बोङ् मनाहाॽनुःल्ले़ यरिक् खुने़ॽ मिङ्सो इङ्धाङ् खोसु, करसाङ् खुने़ॽ खे़न् सुम्सि मनाहाॽ यारिक् कुमिङ् मे़इङे़न्॥ दाउदे़ल्ले़ खे़न् खुने़ॽ कुधक् कम्ब्राङ् के़मे़प्पाहाॽरे़ खुन्छिॽ लाम्लोबा चोगुरो॥ 26 दाउदरे़ मुक्के़गुबा कुमनाहाॽ कन्हाॽए मे़वये़रो— योआबरे़ कुन्साॽ असाहेल, बेथले़हे़मबा दोदैरे़ कुस्सा एल्हानान, 27 हारोरि सम्मोत, पेलोनि हेलेस, 28 तकोबा इक्केसरे़ कुस्सा इरा, अनातोतबा अबिएजेर, 29 हुसाति सिब्बकै, अहोहि इलै, 30 नतोपाति महरै, नतोपाति बानाहरे़ कुस्सा हेलेद, 31 बेन्यामिन गिबाबा रिबैरे़ कुस्सा इथै, पिरातोनि बनायाह, 32 गासबा हःङ्गुहाॽओबा हुरै, अर्बाति अबिएल, 33 बहुरिमि अज्मावेत, साल्बोनि एल्याहबा, 34 गिजोनि हासेम, हरारि सागेरे़ कुस्सा जोनाथन, 35 हरारि साकाररे़ कुस्सा अहिआम, उररे़ कुस्सा एलिपाल, 36 मकेराति हेपेर, पेलोनि अहियाह, 37 कर्मेलि हेस्रो, एज्बैरे़ कुस्सा नारै, 38 नातानरे़ कुन्साॽ योएल, हग्रिरे़ कुस्सा मिभार, 39 अम्मोनि सेलेक, बेरोति नहरै, खे़न् सरुयाहरे़ कुस्सा योआबरे़ कुभे़जुम् कुभे़या के़बङ्बा वये़, 40 यित्रि इरा, यित्रि गारेब, 41 हित्ति उरियाह, अहलैरे़ कुस्सा जाबाद, 42 रुबेनि सिजारे़ कुस्सा अदिना, खे़न् रुबेनिहाॽरे़ खुन्छिॽ लत्छा लाम्लोबा वये़, खुने़ॽनु सुम्बोङ् मनाहाॽ मे़वये़, 43 माकारे़ कुस्सा हानान, मित्नि योसापात, 44 अस्तेराति उज्जिया, अरोएरि होतामरे़ कुस्साहाॽ समा नु यिएल, 45 सिम्रिरे़ कुस्सा येदिएल, खुने़ॽ कुन्साॽ तिजि योहा, 46 महाबि एलिएल, एल्नामरे़ कुस्साहाॽ यरिबै नु योसब्याह, मोआबि यित्मा, 47 एलिएल, ओबेद नु मेजोबि यासिएल॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.