१ साप्मुःन्धुम् 10 - लिम्बुसाउल हाङ्ङिन् मासिङ् ( १ सामु ३१:१-१३ ) 1 आल्ल पलिस्तिहाॽरे़ इस्राइलिहाॽरे़ खुन्छिॽ तक्ले़ङ्वाओ ते़न्धङ् मे़जोगु, हे़क्क्याङ् इस्राइलिहाॽरे़ खुन्छिॽ के़सिबा मनाहाॽ मे़ले़रुसिआङ् गिल्बो कोःक्माओलाम् मे़घे़त्छिङ् मे़बे॥ 2 पलिस्तिहाॽरे़ साउले़न् नु कुस्साहाॽ पुबेलाप्सा मे़नाःत्तुसि, हे़क्क्याङ् खुने़ॽ कुस्सा जोनाथन, अबिनादाब नु मल्किसुअ सुम्ब्राङ् मे़से़रुसि॥ 3 साउलरे़ कुलागि ते़न्धङ्ङिन् साॽरिक् के़साक्पा पोःक्खे़, थेआङ्भे़ल्ले़ लि नु तोङ् के़गप्पाहाॽरे़ खुने़ॽ मे़सिॽरु, हे़क्क्याङ् खे़ङ्हाॽरे़ खुने़ॽ मे़घाःन्दु॥ 4 कल्ले़चोगुल्ले़ साउलरे़ कुभे़जुम् कुभे़या के़बङ्बा मनान् मे़त्तु, “के़दाभेन् तरप् फिःक्खे़ॽआङ् आङ्गाॽ थुबाङ्ङे़ॽआङ् से़राङ्ङे़ॽ, हे़क्क्याङ् कन् हर्दो मे़न्हे़क्मनाबाहाॽरे़ आङ्गाॽ मे़दे़म्माआङ् लमित्ता चोःक्मा मे़ङ्घोआन्ल॥” कर खे़न् फे़जुम्भे़या खजुम्घया के़बङ्बे़न् साॽरिक् किसे़आङ् हे़क्के चोःक्मा मे़दे़न्दे़न्॥ कल्ले़चोगुल्ले़ साउलरे़ आप्फेक् कुदाभेन् फिःक्खुआङ् हाक्तु हे़क्क्याङ् खे़न् सम्धाङ् तिःङ्सिङ्ङाङ् स्ये़॥ 5 आल्ल खे़न् खजुम्घया फे़जुम्भे़या के़बङ्बे़ल्ले़ साउले़न् स्ये़बा निसुआङ् खुने़ॽआङ् आप्फेक् कुदाभेओ तिःङ्सिङ् से़त्छिङ्॥ 6 कम्भलॽरिक् साउले़न् नु कुस्सा सुम्सि मे़स्ये़॥ खुने़ॽ के़रे़क् कुहिम्सयङ्हाॽ थिक्ले़ङ्ले़ मे़स्ये़॥ 7 आल्ल ने़ने़बादे़न्नो के़वाॽबा के़रे़क् इस्राइलिहाॽरे़ खुन्छिॽ थक्सुबाहाॽ मे़घे़त्छिङ्बा हे़क्क्याङ् साउल नु खुने़ॽ कुस्साहाॽ मे़स्ये़रुसिबा मे़निसुसि, खे़ब्याङ् खे़ङ्हाॽआङ् हाबा हे़क्केलॽरिक्के खुन्छिॽ ये़क्यक्हाॽ मे़ले़रुआङ् मे़घे़त्छिङ्॥ खम्भ्याङ् पलिस्तिहाॽ खे़प्मो मे़बेआङ् मे़युङ्सिङ्॥ 8 आल्ल कुदाःक्दिक्मा मे़से़रुसिबाहाॽरे़ खुन्छिॽ नाप्से़ पलिस्तिहाॽ मे़गे़रे़ मे़द्ये़ःल्ले़ खे़ङ्हाॽरे़ साउले़न् नु खुने़ॽ कुस्सा सुम्सिहाॽ गिल्बो कोःक्माओ मे़स्ये़आङ् मे़ने़स्से़बा मे़निसुसि॥ 9 खे़ङ्हाॽरे़ साउले़न् ले़क्चाॽबुधुक् मे़जोगुआङ् खुने़ॽ कुधे़गेक्पान् फुॽयाक् मे़भुन्दु, हे़क्क्याङ् खुने़ॽ कुभे़जुम् कुभे़याहाॽ मे़देॽरु मे़बिरु॥ खे़न् एगाङ् खे़ङ्हाॽरे़ पलिस्तिहाॽरे़ खुन्छिॽ लाजेॽओबा के़रे़क् पिसाङ् खुन्छिॽ नावाइत्लाहाॽ नु मनाहाॽ कन् इङ्घङ्ङिन् चे़क्मासिरे़ लागि इङ्साबाहाॽ मे़बाङ्घुसि॥ 10 खे़ङ्हाॽरे़ साउलरे़ कुभे़जुम् कुभे़याहाॽ खुन्छिॽ माङ्हाॽरे़न् माङ्हिम्मो मे़ने़स्सु, हे़क्क्याङ् कुधे़गेक्पान् दागोन माङ्हिम्मो मे़भोन्दु॥ 11 आल्ल पलिस्तिहाॽरे़ साउले़न् खुन्छिॽ पाःप्पाःत् मे़मे़त्तुबा के़रे़क् पाःन्हाॽ याबेस गिलादबा मनाहाॽरे़ मे़घे़प्सु, 12 खे़ब्याङ् साउले़न् नु खुने़ॽ कुस्साहाॽरे़ खुन्छिॽ चेहाॽ थाक्मारे़ लागि खुन्छिॽ के़रे़क् के़धुम्बा के़धुम्बा मनाहाॽ सोसोरिक् मे़बे॥ खे़ङ्हाॽरे़ खे़न् चेहाॽ याबेस मे़धाक्तुसि, हे़क्क्याङ् खे़ङ्हाॽरे़ खुन्छिॽ ये़प्पाहाॽ हाबा खे़न् हुम्बे़प्पा यहिबा सिङ्बुङ् सिगाङ् मे़लुप्तु, हे़क्क्याङ् नुसि ये़न् थारिक् मे़रिङ्ङो ने़त् मे़युङे़॥ 13 साउले़न् यहवे दाङ्बाओ नसाःन्साबा मे़बोःक्खे़म्बाल्ले़ चोगुल्ले़ खुने़ॽ सिमा के़बोङ्बा पोःक्खे़॥ खुने़ॽ यहवे दाङ्बे़ल्ले़ कुबाःन्निन् खे़म्मा मे़दे़न्दे़न्नाङ् साम्माङ्च्याःङ् के़याङ्मे़न् सुजा नाःक्तुआङ् वये़॥ 14 खुने़ॽ यहवे दाङ्बे़न् सुजा मे़नाःक्तुन्॥ कल्ले़चोगुल्ले़ खुने़ॽ साउले़न् मे़क्खु, हे़क्क्याङ् हाङ्जुम्मिन् यिसैरे़ कुस्सा दाउदे़न् हुक्सुप्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.