Joannostir 21 - Joannostir Svencono lačopheniben 1933 (Latvia)

Džeļ, 21.

¹ Pošļe dava noko sikadžapes Iisusos Peskīre sikļaibnangīrenge ko Tiberiatskako moros. Sikadžapes jake:

² Isis khetane Simanis Petris, te Foma, dīno goli dvoikos, te Nafanailos Gaļileiskakīre Kānatir, te Sevedejoskīre čhāve, te dui vār Leskīre sikļaibnangīrendir.

³ Simanis Petris rakirla lenge: džava uhtilav mačen. Rakirna leske: javen me nin tusa. Gīne, te zaras gīne ane laiva, te niso nauhtilde an do rat.

⁴ Ne kedi javdža tašarla, Iisusos tardija pe berga; ne sikļaibnangīre napinčkirdle, so dava Iisusos.

⁵ Iisusos rakirla lenge: čhāve! isi hobi tumenge savo hāben? Jone otphendle Leske: nāni.

⁶ Jov phendža lenge: thurden mačenge uhtilbnaskīri pe lači rīg laivake, te uhtilen. Jone zathurdīne, te uže naštandīne vitirden mačenge uhtilbanaskīri vašo mačengo būtipen.

⁷ Togi sikļaibnangīro, sajes miļinis Iisusos, rakirla Petriske: dava Raij. Simanis Petris, šunindoi, so dava Raij, obphandžapes idžensa (hai jov isis nango), te thudijapes ano moros.

⁸ Ne vār sikļaibnangīre dodīne plima ane laiva (hai nadur isis phujatir, sai dui šel kuņa), tirdīndoi mačenge uhtilbnaskīri mačensa.

⁹ Kedi vijavdle pe phu, dikhena kerdi jāg te pe lake čhudle mače te māro.

¹⁰ Iisusos rakirla lenge: janen mačen, sajen kana tume uhtilde.

¹¹ Simanis Petris gija te vitirdija pe phu mačenge uhtilbnaskīri, pherdi bāre mačensa, saje isis šel te pandžvardeš te trin; te ke jake būtipen napšeriskandija mačenge tirdipnaskīri.

¹² Iisusos rakirla lenge: javen, han, sikļaibnangīrendir nikon našmijandija Lestir phučel: kon Tu?, džinindoi, so dava Raij.

¹³ Iisusos jāvela, lela māro, te dela lenge, jake nin mačen.

¹⁴ Dava uže ano trito molos sikadžapes Iisusos Peskīre sikļaibnangīrenge pošļi Peskīro opreuštiben mulendir.

¹⁵ Kedi jone pohane, Iisusos rakirla Simaniske Petriske: Simani Ioannosko čhāvo! mīļinesa hobi tu Man butir, nasir jone? Petris rakirla Leske: jake, Raija! Tu džines, so me mīļina Tūt. Iisusos rakirla leske: paščakir Mīre jerhen.

¹⁶ Oščo rakirla leske ano vār molos: Simani Joannosko čhāvo! mīļinesa hobi tu Man? Petris rakirla Leske: jake, Raija! Tu džines, so me mīļina Tut. Iisusos rakirla leske: paščakir Mīre bakren.

¹⁷ Rakirla leske ano trito molos: Simani Ioannosko čhāvo! miļinesa hobi tu Man? Petris obsmetņandija, so ano trito molos phučja lestir, mīļinesa hobi Man?, te phendža Leske: Raija! Tu sāro džines; Tu džines, so me miļina Tut. Iisusos rakirla leske: paščakir Mīre bakren.

¹⁸ Lašņes, lašņes rakirava tuke: kedi tu isanas tarno, togi pšephandžantut kokoro te gijan, kai kamdžan; ne kedi phurjosa, togi vidžinčkiresa tīre vasta, te vār pšephandela tut, te lidžala, kai nakamesa.

¹⁹ Phendža dijindoi dava, mehaļol sai šmerčasa Petris vislavini Davles. Te, zāras pošļi da pheniben, rakirla leske: Jov pal Mange.

²⁰ Petris, rišindoi pāle, dikhela so javela pal lenge sikļaibnangīro, sajes miļinis Iisusos te savo pe beļveļakīro, doklonindoipes ko kolin Iisuskīro Leskīro, phendža: Raija! kon pšedela Tut?

²¹ Les dikhindoi, Petris rakirla Iisuske: Raija! ne jov so?

²² Iisusos rakirla leske: keļi Me kama, sobi jov mejačel, poskil javava, so tuke ke dova? tu jov pal Mange.

²³ Te vilidžijapes da lav maškir pšalenge, so sikļaibnangīro dova namerla. Ne Iisusos naphendža leske, so namerla, ne: keļi Me kama, sobi jov mejačel, poskil javava, so tuke ke dova?

²⁴ Sikļaibnangīro dava švatkini dalestir, te čhindža dava; te džinas, so lašņo leskīro švatkuma.

²⁵ Būt nin vār kerdža Iisusos; ne, keļi čhinen dolestir sāro so, togi dufinava, so kokore svetoske nazačhuvel an začhindle lila. Amin.