Joannostir 19 - Joannostir Svencono lačopheniben 1933 (Latvia)

Džeļ, 19.

¹ Togi Pilatos lija Iisusos te čhudža māren Les.

² Te voiskakīre murša, khudle kolkos ērkšķendir, te čhudle pe Lesko šēro, te uradle Les ane bagraņica,

³ Te rakirdle: radintut, Judengo Kraļi! te marde Les piro ščoki.

⁴ Pilatos noko vigija te phendža lenge: dikhen, me vilidza Les ke tume, sobi tume medžinen, so me nalatha ke Jov nisai bang.

⁵ Togi vijavdža Iisusos ano ērčengo kolkos te ane bagraņica. Te phendža lenge Pilatos: dava mānuš!

⁶ Kedikhne Les rašangīre bāredīra te slugi, zadīne glosa: mār ko trušul, Les, mār ko trušul! Pilatos rakirla lenge: len Les tume, te māren ko trušul; hai me nalatha an Leske bang.

⁷ Judi otphendle leske: menge isi dopheniben, te po māro dopheniben Jov čhebi mērel, vašo dova so kērdžapes Davleskīre Čhāveske.

⁸ Kedi Pilatos šundža da lav, togi butir strahandija.

⁹ Te noko zagija ane pretorija, te phendža Iisuske: kārig Tu? Ne Iisusos leske naotphendža.

¹⁰ Pilatos rakirla Leske: hobi mange naotphenesa? hobi nadžines, so mange isi moca mārav Tut ko trušul te isi mange moca otmukhav Tut?

¹¹ Iisusos otphendža: tuke najālas pe Mange nisai moca, keļi tuke opraturestir najāl dīno; vašadava butir grehos pe doleske, kon pšedija Man tuke.

¹² Da brīžatir Pilatos rodija sir otmukhel Les. Judi hadīne glosa: keļi otmukhesa Les, tu nasan pšečeļos kraļiske: svako, kon kerlapes kraļiske, dova isi preču kraļiske.

¹³ Kedi Pilatos, da lav šundša, lidžija Iisusos avri, te bešča pe sendosko štetos, so dena goli Lifostroton, Juditkes Gabatu.

¹⁴ Togi isis pančto dīves ano kurko angil Patradžin, te šovto štunda, te phendža Pilatos Judenge: dava, tumāro kraļis!

¹⁵ Ne jone zadīne glosa: le, le, mār Lel ko trušul! Pilatos rakirla lenge: hobi tumāre Kraļis māra ko trušul? Rašangīre bāredīra otphedle: nāni menge kraļis, sir seņu kesaros

¹⁶ Togi jov pšedija Les lenge po māriben po trušul. Te līne Iisusos, te līdžīne.

¹⁷ Te, līdžindoi Peskīro trušul, Jov vigija pe do štetos, sav dena goli Čekateskīro, ne Juditkes Golgofa.

¹⁸ Doi mardle Les po trušul te Lesa dui vāvren, pe jek te pe vār rīg, ne maškiral Iisusos.

¹⁹ Pilatos čhindža oprečhiniben, te čhudža opre po trušul. Čhindlo isis: Iisusos Nazarejos, Kraļis Judengīro.

²⁰ Da čhiniben kedīne būt Judendir, vašo dova so štetos, kai isis mardo po trušul Iisusos isis nadūr forostir, te čhindlo isis Juditkes, Grieķitkes, Rimskitkes.

²¹ Juditka rašange bāredīra phendle Pilatoske: na čhin: Kraļis Judengīro, ne so Jov phendža: Me Kraļis Judengīro.

²² Pilatos otphendža: so me čhindžom dova čhindžom.

²³ Kedi voiskakīre murša, marde po trušul Iisusos, līne Leskīre idži, te rosčhudle po štār džeļa, svako voiskakīreske muršeske pe džeļ, te hitonos; hitonos isis nasudlo, ne sāro kerdo opratunestir.

²⁴ Tejake phendle jek vavreske; nalas rozriskiras les, ne thurdas vaš leske kokalici, koneskīro jāla, — mejāl so isi rakirdo ano čhinibena: rozčhudle idži Mīre maškir penge, te vaš Mīro opratuno idžos thurdīne kokalci (Davidoskīri gili, 21, 19). Jake obgīnepen voiskākīre murša.

²⁵ Ke Iisuskīro trušul tardīne dai Leskīri, te phen Leske dakīri, Marija Kleoposkīri romni, te Marija Magdaļina.

²⁶ Iisusos, dikša da te sikļaibnangīres doi tardes, sajes miļindža, rakirla Peskīri dake: džūli! dava, tīro čhāvo.

²⁷ Togi rakirla sikļaibnangīreske: daja, daij tīri! te da brīžatir sikļaibnangīro dava lija la ke pe.

²⁸ Pošļi dava Iisusos, džinindoi, so uže sāro pšečkirdo, mejāl čhinibena pherde, rakirla: pjav.

²⁹ Doi tardija jek khoro, pherdo šutasa. Voiskakīre murša, zamočidle šutasa gubka te čhudle po isoposko kašt, te hadīne ke Leskīre ušta.

³⁰ Kedi Iisusos šut lija, te phendža: phečkirdo! te, nomukša šēro, pšedija duhos.

³¹ Ne sir togi isis pančto dīves, togi Judi, sobi namukhen masa ko trušul ano savatunesko dīves (hai do savato isis dīves bāro), mangle Pilatos, sobi pšemāren lenge pīrenge kokali te lēn len tēlle.

³² Te jake javdle voiskakīre murša, te pšeršoneske pšemardle pīrengīre kokali, te vavreske, savo isis mardo ko trušul Lesa.

³³ Ne, kedi dojavdle ko Iisusos, te sir dikhle Les uže mēnes, napšemardle Leskīre pīrengīre kokali;

³⁴ Ne jek voiskakīre muršendir šķeposa dija čhurje an Lesko bokos, te zāras vithadija rat te pāņing.

³⁵ Te kon dava dikša dova švatkindža, te lašņo leskīro švatkuma; jov džinel, so rakirla lašņuma, sobi tume nin mepačan.

³⁶ Hai dava javdžapes, mepherdžon Čhinibena: kokalos Leskīro menazaphadžolpes (2. Moisej. 12, 46).

³⁷ Te jake ano vār štetos Čhiniben rakirla: dikhena pe Doleske, Sajes dīne čhurje (Zaharija, 12, 10).

³⁸ Pošļi dava Iosifos Arimafejatir (sikļaibnangīro Iisuskīro, ne čhorahano strahandoi Judendir) mangja Pilatos, sobi nolen masa Iisuskīre; te Pilatos mukša, Jov gija, te nolija Iisuskīre masa.

³⁹ Javdža Nikodimos nin (jov vāgo javelas ko Iisusos rati), te jandža zakerde mirendir te alojatir, saj šel litri.

⁴⁰ Te jake jone līne Iisuskīre masa, te obpačkirdle les cerhensa te do lače khančkirbnaskīre drābensa, sir sajek garūvena Judi.

⁴¹ Pe do štetos, kai Jov isis mardo ko trušul, isis bār, te ane bār nēvo grobos, an savo nikon nasis čhudlo.

⁴² Doi čhudle Iisusos vaše Judengo pančto dīves, te vašo dova so grobos isis paše.