Joannostir 18 - Joannostir Svencono lačopheniben 1933 (Latvia)

Džeļ, 18.

¹ Dava pheni, Iisusos vigija Peskīre sikļaibnangīrensa pekorīg reka Kedron, kai isis bār, an saji zagija Kokoro te sikļaibnangīre Leskīre.

² Džindža nin da stetos Ijuda, Lesko nodibnaskīro; vašo dova so Iisusos sajek doi zakedelaspes Peskīre sikļaibnangīrensa.

³ Te jake Ijuda, lel džeļ voiskakīre muršen te slugen rašangīre bāredīrendir te farisejen, te javel doi jāgengīrensa te švatlo momoļensa te voiskakīre kotirensa.

⁴ Iisusos, sāro džinidoi so lensa jāla, vigija, te phendža lenge: kones tume rodena?

⁵ Leske otphendle: Iisusos Nazaraņinos. Iisusos rakirla lenge: dava Me. Te lensa tardija nin Ijuda, bikibnaskīro Les.

⁶ Te kedi phendža lenge: dava Me, jone otļipindle pāle te pēne pe phu.

⁷ Noko phuča len: kones tume rodena? Jone phendle: Iisusos Nazaraņinos.

⁸ Iisusos otphendža: Me phendžom tumenge, so dava Me; te jake, keļi Man rodena, otmukhen len, medžan, —

⁹ Mejālpes lav, rakirdo lenge dolendir, sajen Tu Mange dijan, Me nikones nazgiņakirdžom.

¹⁰ Simanoske Petriske, isis kurtala, te tirdija avri la, te mardža rašenge bāredīreske bučkirdes, te otčingirdža leske lačo kan. Lav bučkirdeskīro isis Malah.

¹¹ Ne Iisusos phendža Petriske: čhu kurtala pāle; hobi Mange napjav kupka, saji dija Mange Dād?

¹² Togi voiskakīre murša te deše šelengo bāredīr te Judengīre slugi līne Iisusos, te phandle Les.

¹³ Te lidžīne Les vāgo ko Annos; hai jov isis romņako dād Kaiafoske, sav isis an do berš rašango bāredīr.

¹⁴ Dava isis Kaiafos, sav dija godi Judenge, so fedīr jeke mānušeske mērel vaše mānušenge.

¹⁵ Pale Iisuske gīne Simonos Petris te vār sikļaibnangīro; da sikļaibnangīro isis pinčkirdo rašange bāredīreske, te zagija Iisusosa ano rašango bāredīresko khēr.

¹⁶ Ne Petris tardija avri palo udār. Togi do vār sikļaibnangīro, savo isis pinčkirdo rašange bāredīreske, vigija, te phendža do udārenge rakhibnaskīrjake, te zajandža Petris.

¹⁷ Te doi bučkīrdi udārenge rakhibnaskīri rakirla. Petriske: te tu feņu na da manušeskīre sikļaibnagīrendir? Jov phendža: na.

¹⁸ Te bučkirde te do slugi, zakērde jāg, vašo dova so isis šil, tardīne te tačkirdepen. Petris nin tardija lensa te tačkirdžapes.

¹⁹ Rašango bāredīr phuča Iisusstir vaš Leskīre sikļaibnangīrenge te vaš Lesko sikļaiben.

²⁰ Iisusos otphendža leske: Me rakirdžom svetoske čistes; Me sajek sikļakirdžom ano sinagogi te ane Davlesko tremos, kai sajek Judi zadžanapen, te čhorahanes narakirdžom niso.

²¹ So tu Mandir phučesa? phuč šunibnagīredir, so Me rakiržom lenge; dik, jone džinen, so Me rakirdžom.

²² Kedi Jov phendža dava, jek slugendir, paše tardindoi, mardža Iisusos pire ščoka, phenidoi: jake Tu otphenesa rašange bāredīreske?

²³ Iisusos otphendža leske: keļi Me phendžom hindes, posiskav, so hindo; ne keļi mišto, so tu māresa Man?

²⁴ Anna bičadža Les phandles ko rašango bāredīr Kaiafos.

²⁵ Simionos Petris tardija te tatija. Doi phendle leske: naisan Leskīre sikļaibnangīrendir nin Tu? Jov otpendžapes te phendza: na.

²⁶ Jek rašange bāredīreskīre bučkirdendir, semenca doleske, sajeske Petris otčingirdža kan, rakirla: hobi me tut nadikšom Lesa ane bār?

²⁷ Petris noko otpendžapes; te zārās zagabadža bašno.

²⁸ Kaiafostir lidžīne Iisusos ane pretorija, Isis tašarla; te jone nazagīne ane pretorija, sobi jān ražume, te vaštuven han Patradžinakīre jerhos.

²⁹ Pilatos vigija ke jone te phendža: pe so tume dena da mānušeskīri bang?

³⁰ Jone phendle leske otpeniben: keļi Jov najavdžasis hindo kēribnaskīro, me nanodijamas Les tuke.

³¹ Pilatos phendža lenge: len Les tume, te pe tumāro dopheniben sendinen Les. Judi phendle leske: menge nāni otmukhlo pšedas pe šmerč nikones, —

³² Mejal Iisuskīro lav pšečkirdo, savo Jov phendža, dijindoi mehaļon, saje šmerčasa Jov merla.

³³ Togi Pilatos noko zagija ane pretorija, te kherdža Iisusos, te phendža Leske: Tu Judengīro Kraļis?

³⁴ Iisusos otphendža Leske: tu tutir dava rakiresa, vai vār tuke phendle Mandir?

³⁵ Pilatos otphendža: hobi me isom Judos? Tīre mānuša te rašange bāredīra pšedīne Tut mange; so Tu kērdžan?

³⁶ Iisusos otphendža: Mīro kraļuma nāni da svetostir; keļi da svetostir jāl Mīro kraļuma, togi slugi Mīre zatardīnesis vaš Mange, sobi Me najavav pšedīno Judenge; ne kana kraļuma Mīro nāni dārig.

³⁷ Pilatos phendža Leske: tejake Tu kraļis? Iisusos otphendža: tu rakiresa, so Me kraļis. Me pe dova ločijom te pe dova jāvdžom ano svetos, sobi švatkinav vašo čačipen; svako, kon isi lašņumastir, šunela glos Mīri.

³⁸ Pilatos phendža Leske: so isi lašņuma? kedi phendža dava, noko vigija ko Judi te phendža lenge: Me nisai bang na lačava an Leske.

³⁹ Tumenge isi ponoš, sobi me jekhes otmukhav tumenge pe Patradžin; hobi kamena, otmukha tumenge Judengīre Kraļis?

⁴⁰ Togi noko zadīne glos sāre, rakirindoi: na Les, ne Varavas. Varavos isis rozboiņikos.