Joannostir 16 - Joannostir Svencono lačopheniben 1933 (Latvia)

Džeļ, 16.

¹ Dava phendžom Me tumenge, sobi tume nalen grehinentumen.

² Vitrādena tumen sinagogendir; te javela brīža, kedi svako, kon domarla tumen, dufinela, so jov dolesa slugini Davleske.

³ Jake kērena, vašo dova so nadodžindle ni Dādes ni Man,

⁴ Ne Me phendžom tumenge dava vašo dova, sobi tume, kedi dojavela do brīža, melipiren, so Me phendžom tumenge dolestir; narakirdžom dovo tumenge pšeršumastir, vašo dova so isomas tumensa.

⁵ Ne kana džava ko bičaibnaskīro Mīro, te nikon tumendir naphučela Mandir: kai džasa?

⁶ Ne dolestir, so Me phendžom tumenge dova, smentņumasa pherdandija tumāro dži.

⁷ Ne Me lašņes rakirava tumenge: fididīr vaš tumenge, sobi Me džav; hai keļi Me nadžav. Radipnaskīro najavesa ke tume; ne keļi džava, togi bičavava Les ke tume.

⁸ Te Jov, javindoi, dosikavela svetoske, grehostir te čačipnastir te sendostir:

⁹ Grehostir, so napačana an Mange;

¹⁰ Čačipnastir, so Me džava ko Dād Mīro, te uže nadikhena tume Man.

¹¹ Sendostir, so da svetosko kraļis sendume.

¹² Oščo būt isi Mange so phenav tumenge; ne tume kana našti pojanen.

¹³ Kedi javela Jov, lašņo Duhos togi lidžala tumen po sāro lašņuma: na Pestir Jov lela rakirel, ne lela rakirel, so šunela, te so jāla kērla tumenge džinibnaskīro.

¹⁴ Jov proslavini Man, vašo dova so Mīrestir lela te tumenge kērla džinibanaskīro.

¹⁵ Sāro, so isi Dādeske, isi Mīro; vašo dova phendžom, so Mīrestir lela te kērla tumenge džinibnaskīro.

¹⁶ Ano signuma tume Man nadikhena, te noko ano signuma tume Man dikhena; hai Me džava ko Dād?

¹⁷ Doi vār Leskīre sikļaibnangīrendir phendle jek vavreske: so dava Jov rakirla menge: ano signuma tume nadikhena Man, te noko ano signuma tume Man dikhena, te: Me dživa ko Dād?

¹⁸ Te jake jone rakirdle: so dava rakirla Jov: ano signuma? Nadžinas, so rakirla

¹⁹ Iisusos, halija, so kamena phučen Les, phendža lenge: dolestir hobi phučena tume jek vavrestir, so Me phendžom: ano signuma nadikhena tume Man, te noko ano signuma tume dikhena Man?

²⁰ Lašņes, lašņes rakirava tumenge: tume rovena te henkļinena, ne svetos radinipes; tume jāna smentna, ne smentnuma tumāro ano raduma jāla.

²¹ Džūli, kedi ločakirla, čerpini tuga, vašo dova so javdža lakīri štunda; ne kedi ločkirla tiknes, uže nalipirla tuga radumastir, vašo dova so ločija mānuš ano svetos.

²² Jake kana tumenge isi tuga; ne Me dikhava tumen noko, te tumāro dži hotņakirlapes, te raduma tumāro nikon naotlela tumendir.

²³ Te an do dīves tume naphučena Man nisostir. Lašņes, lašņes rakirava tumenge: sostir feņu pomangena Dādes an Mīro lav, dela tumenge.

²⁴ Žin kana tume niso namangle an Mīro lav; mangen, te dolena, sobi raduma tumāro jāl pšečkirdo.

²⁵ Žin kana Me rakirdžom tumenge druh dolidžipena; ne javela brīža, kedi uže narakirava tumenge dolidžipnasa, ne mamui kēra džindlo tumenge Dādestir.

²⁶ An do dīves tume mangena an Mīro lav, te narakīrava tumenge, so Me lava mangav togi Dādes vaš tumenge:

²⁷ Hai samo Dād miļini tumen, vašo dova so tume miļidne Man te pačandīne, so Me vigijom Dēvelestir.

²⁸ Me vigijom Dādestir te javdžom ano svetos; te noko mukhava svetos te džava ko Dād.

²⁹ Leskīre sikļaibnangīre phendle Leske: dik, kana Tu mamui rakiresa, te dolidžipena narakiresa nisai,

³⁰ Kana dikhasa, so Tu džines sāro te načhebi Tuke, sobi kon phučel Tut. Pedava pačasa, so Tu Davlestir vigijan.

³¹ Iisusos otphendža lenge: kana tume pačana?

³² Dik, javela štunda, te javdža uže so tume rozdžanatumen svako an peskīri rīg te Man mukhena jedženes; ne Me naisom jek, vašo dova so Dād Mansa.

³³ Dava Me phendžom tumenge, sobi tumenge jāl an Mange pokoinuma. Ano svetos tumenge jāla tuga; ne kēren tumen muršikane: Me obšelijom svetos.