YOSHU 12 - Lacid Common Language Bible

Moshe wigi Khaid Oung: Pyam Bye: Da" Khokham Yi

¹ Israela byumyu" yigi Yodan gyid lang bidthu shoid- Arnon janggyoin: mo Yodan janggyoin: yo' moug zhung: shoid Hermon boem ju" sho' da" mougmyid ri oung: pyam wigi seing: yu to" gu nghoid bye:. Nyangnu" gi khokham eig yug ri khaid oung: pyam bye:.

² Dayug gi Heshbon moo: vhoeb nyid da" Amori khokham Sihon nghoid da:. Nya: mung" gi Gilead mung" agung dayi" bo jo, da:. Aroera (Arnon janggyoin: yam moo: jo,) yo' hau: janggyoin: agung moo: jo, da" voomoo" mo Amon mougkyoo" nghoid da" Yabug gyid lang ju" sho' nghoid da:.

³ Hau: zigi Yodan janggyoin: mo Galile mougpyi: shoid Bed Yeshimod (Thoem" Shid: da" bidthu shoid) ju" sho' yo' Pisga boem khyid: ju" sho' nghoid da:.

⁴ Nyangnu" gi Rephim byumyu" mo lo" thang yug nghoid da" Bashan khokham Oga ri we' oung: pyam ago". Nyang: gi Ashtarod yo' Edrei moo: vhoeb su: nghoid.

⁵ Nya: mungdain: moo: Hermon boem- Saleka yo' Geshuri yo' Makhathi mougkyoo" ju" sho' da" Bashan mung" dangain" Gilead moug: agung dayi" ju" sho' Heshbon khokham Sihon da" moug: ju" sho' nghoid da:.

⁶ He: khokham eig yug gi Moshe yo' Israela byumyu" yi wigi khaid zain: oung: pyam zi shau" ago". Aseing da" dei zoo Moshe gi nya: tang: da" moug: ri nyangnu" jonu" khyo" Ruben- Gad byumyu" yo' Manashe byumyu" agung dayi" bang: ri byid: bye:.

Yoshu wigi Zain: Oung: Lo Da" Khokham Yi

⁷ Yoshu yo' Israela byumyu" yigi Yodan gyid lang bidvang shoid mougmyid mo khokham dangain" ri khaid zain: oung: pyam ago". Hau: joem gi Lebanon janggyoin: moo jo, da" Balagad mo zi mougpyi: shoid Edom nam moo jo, da" Halag boem ju" sho' nghoid da:. Yoshu gi hau: mougmyid joem ri akung: ako' yiri kho' gam byid: wigi hau: ziri dapyaid goin" seing: wa mougmyid jonu" khyo" ab byid: bye:.

⁸ Hid: moo: boem moug:- bidvang shoid boem khyid: joem Yodan gyid lang janggyoin: yo' houg: mo boem khyid: joem bidthu shoid bau zoin" joem mougpyi: shoid mo moug: kyug joem we' bo da:. He: mougmyid gi Hiti- Amori- Khanan- Perizi- Hivi- yo' Yebusi byumyu" yi da" yhoem: moug: nghoid lid lo boem da:.

⁹ Israela byumyu" yigi vhoo: moo: lhid" to" da" voomoo" joem mo khokham yiri khaid oung: pyam ago". Hau: bang: gi Yerikho- Ai (Bethela nam mo)-

¹⁰ Yerusalem - Hebron-

¹¹ Yamud - Lakhisha-

¹² Eglon - Gezera-

¹³ Debira - Gedera-

¹⁴ Horma - Arad-

¹⁵ Libna - Adulam-

¹⁶ Makeda - Bethela-

¹⁷ Tapua - Hephera-

¹⁸ Apheg - Lasharon

¹⁹ Madon - Hazora-

²⁰ Shinron Meron - Akhashab

²¹ Tanag - Megido-

²² Kedesha - Yokneam (Khamela mo)

²³ Dora (panglai: yam mo) Goiim (Galile mo)

²⁴ Tirza voomoo" joem nghoid wigi khokham dangain" soem" xe: dayug nghoid da:.