DANG: ZHOEM 1 - Lacid Common Language Bible

Dang: zhoem Da" Phoug" dab, Khyoo:

¹ He: khyoo: gi David da" nya: zoo:-Israela khokham Sholumon da" dang: zhoem nghoid.

² He: da" dang: zhoem mougsoug" gi- phajhi" dang: yo' ge lho da" phajhi" byid: dang: ri: xoem" nhang: ziyo' dang: kang: no, da" dang: khyang" joem ri se' gyoo: nhang: nyid.

³ Hau: khyoo: gi nang ri nheig gyeung: nhang: ziyo' khasu" koid lho: kang: so' dei nyid wa khyoo: khasu" koid deingmain" nyid wa da" khyoo: nheigloem: dain: ziyo' jo da" nyeung veung" khyoo: ri jhau" byid: nyid.

⁴ Hau: zigi ci: athoung" shoug" yu" shi" bang: ri se' yeug byu yi bue" loo nhang: lho:- zoolu: yiri lasi phajhi" yo' nheigloem: phajhi" ri jhau" byid: nyid.

⁵ He: da" dang: zhoem joem gi- phajhi" boo su: da" lasi laleug rilang" lung: byid: nyid tho' moo: agoo- phajhi" boo mo, ri we' khyoo: yo" toin" shed byid: nyid.

⁶ Hougsu" nyangnu" gi dang: zhoem mo phajhi" boo bang: yhoem" to" da" khyoo: joem ri:-yo" se' gyo: yu boem wa nghoid.

Zoolu: Yiri Phajhi" Byid: Da" Dang:

⁷ Nang gi lasi phajhi" yo" yu wa shid re" xang: shed" moo: Aseing ri gyoug phau" nheigloem boo ca" nyid. Byugang: yigi phajhi" ri ce" aphoug" ase' tab boem ziyo'-hau: ziri jhau" yu wa khyoo: ri ngeug pyam nyid boem.

⁸ Nga" zoo: we"-re" myhi yo' phoo nang ri tid kyo" da" mungdang: moo_ nheigloem zung" zung" za: tam" gyo" nyid we'.

⁹ Nyangnu" da" jhoug" myeing" jhoug" thui: joem gi re" da" yu" yung" yu" du, nhang: da- vhu" thoeb, yo' leung zeung: moo: void ci: da" yi: thoem: ti"- re" da" asam" aved ri je" wigi young" du nhang: wa nghoid.

¹⁰ Nga" zoo: we"- yooboo dab, bang: nang ri jhu, phyo' ri abo cang yhi:.

¹¹ Nyangnu" tid zigi«Ri" we'- byu dayug ri yhe: said pyam shang. Ce: yooboo we' ayoo" bang: ri agoin: yhe: said ei" koin' shang!

¹² Nyangnu" ri nyhang" shau" myang uri nyangnu" gi dei nyid lho: yang" zain: nyid boem wa nghoid. Nghoid loug we' nyhang" nyangnu" jang" moo: ju" yhe: thang: rigi nyangnu" gi shid: lo" boem wa nghoid.

¹³ Nyhang" gi ziyoo jonu" acang: joeb, sho' shoug" yu boem wa nghoid wigi yha" da" yhoem: joem gi lhoid yu da" ziyoo jonu" joem yo' byeung" shoin: loo" wa zi nghoid.

¹⁴ Ri" ge'. Ngoonu" jhang khyoo: cang ge'. Ngoonu" khau" to" da" jonu" joem ri nyhang" dangain" bang: coem gam go" boem shang» ga: tid nghoid rigi hau: dang: ri atam" gyo: nyid.

¹⁵ Nga" zoo: we"- houg: yhang te" bang: da" thang: moo: acang yen. Nyangnu" jang" mo vi" vi: khyoo: nyid we'.

¹⁶ Nyangnu" gi akhyeing" ashoeb, da" moo" ri zei: wa shid re" atho' lang" nyid loo: nghoid ago". Nyangnu" gi byu said wa shid mo khanham we' jen" jen" nyang: nghoid nyid ago".

¹⁷ Nang kuang yu nau da" ngho' gi- nyang: yu" nyid uri goin' ri du" kaid nghoid loug we' hau: zigi akoem: za: danghoid.

¹⁸ Nghoid loug we'-xangsu: byu yigi nyang: nya: shid re" du: to" da" gyoin: moo nyang: nya: da" kang: gyo" lo" boem wa nghoid.

¹⁹ Lhoid zoo: lhoid shoug da" moo" zoo" gi:-lhoid zoo: lhoid shug mo da" kangso' khyoo: ri tid fu" byid: nyid. Athoug" akhyoug: khyo" dei nyid mo, da" shidkhoin" moo: bue" nyid da" moo" nghoid.

Phajhi" Yoid Khe: Nyid Khyoo:

²⁰ Tam" gyoo: we'-phajhi" juyhi: ga: zigi fu" moo" khyoo: joem yo'-kid" vang" cang nyho: yoid yen" zi nghoid.

²¹ Voogung khoem" moo" duang: joem yo'- byu phoung: foem: da" joyoo khang" moo" moo gyi" sho' nyho: yoid tid nyid.

²² Nheig agyeung: da" mung" byu we"-nanu" gi khamyhang ju" sho' akhyeing" ashoeb koid nyid goo" wa lha". Nanu" gi khamyhang myang" sho'-lasi phajhi" ri juang" yi nyid wa ein: go" lha". Nanu" gi khanham we' ajhau" yu loo: wa ein: go' la".

²³ Nang ri ngoo gyi koid jhau" mho' da" uri tam" gyo: yu we gyo yu ge'. Ngoo nanu" ri phajhi" byid: lho: lasi laleug gam, byid: wa.

²⁴ Nga" jang" moo: ju" ri" wa shid re" nang ri khe: lho: mho' lhoung: yu" bye:. Nghoid loug we' nang atam" gyoo: nghoid da:.

²⁵ Nang ri ngoo phajhi" byid: da" khyoo: ri cishu: anhang: nghoid nyid da- nang ri so, koid so, nyheung khyoo: ri nang avhoo: nghoid da:.

²⁶ Houg: yoomo nang kyi" khyeug zi shoug" lho: gyoug dain ja thoung" shoug" nyid uri we'

²⁷ Hau: gyoug dain' yau: khi" da" khyoo: gi uglid zoo" su" re" da" atho' moo: hau, ju" lo lho: nang gi amyen akhyoid wim ziyo'-yau: khe" khyoo: thoung" shoug" nyid uri we' ngoo gi nang ri juang" yi lho: yi foo: khyo' pyam wa zi nghoid.

²⁸ Houg: lang" she' nang gi phajhi" ju, yhi: ri mho' yoid loo wa. Nghoid loug we' ngoo gi tu" byid: wa zi anghoid. Nang gi joyoo khang" moo" moo: cang sho: yen" nghoid loug we' ngoo ri shoug" shoo: loo: wa zi anghoid.

²⁹ Nanu" gi lasi phajhi" dajhi' rilang" khanham we' ase' yhoung: yu" ziyo' Aseing ri gyoug phau" myang: wa shid re" we' khanham we' atam" gyoo: nghoid ago".

³⁰ Nanu" ri ngoo phajhi" byid: dang: gi khanham we' avhoo: angei nghoid nyid ago- ngoo jhau" byid: khyoo: ri we' agyo: yu nghoid ago".

³¹ Hougsu" nghoid yoomo nang koid ziyo' dakhyoo" ti"- shoug" kham: yu wa zi nghoid wigi nanyang: koid moo" zoo" gi nang ri amyen akhyoid shen" yhen zi shoug" nhang: nyid.

³² Ci" we' athoung" shoug" yu" shi" da" byu yigi phajhi" juyhi: ri phyen: pyam, nyid yoomo shid: lo" boem wa nheig agyeung: da" byu yigi nyangnu" da" adu: adam: koid khyoo: moo byo, yoin" loo" goo" wa nghoid.

³³ Nghoid loug we' nga" da" ji dang: tam" gyo: nyid mo, gi gau: nyu myenjham" khyoo: ri yo" yu boem wa zi nghoid. Nyangnu" gi gau: nyu: myenjham" wigi gyoug ci' khyoo: ce" noem we' shau" boem wa zi anghoid.