2 Timoti 3 - Chipangano Chabwangu

Inshiku shakupelako

¹ Ishiba ukuti panshiku shakupelako kwakuba ifyakwafya.

² Pakuti abantu bakuba abakwitemwa, abatemwa indalama, abakwitutumuna, abamusalula, abansele, abashumfwila abafyashi babo, abashitotela, nakambi abashilomba Lesa.

³ Tabakakwatepo ichitemweko, abatanakila, ababepesha banabo, abatayilama, abakali, abatafwayapo ifiweme.

⁴ Bakuba ababufi, abashisakamana kufitinya, abakuyitutumuna, abafwaya ukuyisekesha munshila yakusekesha Lesa.

⁵ Bakulama tufuto twakulomba, kuntu bakukana ifiso fyatuko. Abantu bamfi, ulokubatalamuka.

⁶ Bambi baku bo balenjila munanda yabantu nokuchenjeleka abanakashi abanaka kufibi, nakambi abatungululwa nolunkumbwa ulupusene-pusene.

⁷ Nangu balabasambisha lonse, tabomfwapo ichine iyowo.

⁸ Kubati ni Yenesi na Yambulesi bachitile ifikansa na Mosesi, emfyo mba bantu bakana ifyachine. Bantu ababa namalangulushi ayabi nechichetekelo chabo chabwaka.

⁹ Nomba takupo bakoya pakuti abantu bonse bakubona ukupunama kwabo, kubati nimfilya chali kuli Yanesi na Yambulesi.

Ifilangililo fyakupelako

¹⁰ Nomba webo walishiba bwino-bwino ukusambisha kwanji, imyendele yanji, amapange yanji, ichichetekelo chanji, ukufuka umutima kwanji, ukutemwa kwanji, ukushipikisha kwanji,

¹¹ amachushi yanji, amafya yanji, nefintu ifyo ifyanchitikile ku Antiyoki, Ikoniyamu naku Lisitula. Nalichulile ukwinekantu. Nomba Bashikulu balimpulwishe pali fyonse mfi.

¹² Nachine bonse abakofwaya ukuba nobumi ubwakumfwila Lesa muli Klistu Yesu, bakuchushiwa.

¹³ Nomba abantu ababipa nababufi bakubipilako bwaka. Bakubepa bambi nokwibepa benka.

¹⁴ Nomba webo ikatisha amashiwi ayo wasambilile nokuyachetekela. Pakuti walishiba abakusambisha,

¹⁵ nakambi ukufuma ulo wali ulucheche walishiba Amalembo Aabuta, ayo angakupela umulangwe wakupulushiwa ukupitila mukuchetekela Klistu Yesu.

¹⁶ Amalembo onse aputwamo na Lesa, nakambi alafwilisha pakusambilisha ichine, ukutalika ifilubo, ukulungamika ifitalungeme nokusambisha abantu ubwikalo bwalungama.

¹⁷ Echo Amalembo alafwilisha muntu waku Lesa ukuti abe uwayipekanya ukuchita ichili chonse ichilungeme.