Yunus 4 - Sura Magali Nuntu Ngkatuwu

Kasengke ndaya i Yona pai kapuru ndaya i mPue Ala 4:1-11

¹ Bareʼe liu-liu napokono i Yona katebalisakanya setu; sawanya napokawongko ja masengke rayanya.

² Inceʼe painaka mekakai siʼa natoʼo, “Boo Pue, ara banya roomo kutoʼo owi ri kabareʼepanya malai yaku ungka ri banuaku, komi manoto da mowia ewanceʼi? Inceʼe puʼunya painaka yaku liu mpalai njoʼu ri Sipanyoli! Kuincani kakominya Pue Ala anu pande mporaya pai mapuru, mayombu raya, malulu raya, pai toka mpaliu mabalisaka rencana popahuku.

³ Seʼi-seʼi, boo Pue, mbolimo yaku mate, moruana yaku mate painaka da tuwu.”

⁴ Mesono i Pue ndatoʼo, “Manoto bereʼe puʼunya da sengke rayamu ewancetu.”

⁵ Ungka lairia malai i Yona njoʼu ri tondo pebetea ngkota setu, motunda njairia. Napowia sambaʼa kandepe, nepa memou njairia, mampopea nunjaa anu da mewali pai kota Niniwe.

⁶ Ndapatuwu i mPue Ala sangaya pinamuya anu melele mamouti kareʼe i Yona, painaka mawongko raya i Yona. Lawinya mawongko kojo raya i Yona ri pinamuya setu.

⁷ Paikanya ri mosu reme, ndapareʼe mPue Ala sambaʼa tolodo mangkokoti kale mpinamuya setu, painaka malele.

⁸ Butu mebete reme, ndapapewui i mPue Ala ngoyu anu mapane ungka ri pebetea, sakodi malimpu i Yona ua narara ndeme mampana-mpana woʼonya, ewa da wara tanoananya. Malelumo rayanya pai da rayanyamo mate. Natoʼo, “Moruana yaku matemo painaka da tuwu!”

⁹ Paikanya ndatoʼo i mPue Ala ri siʼa, “Bareʼe liu-liu sintinaja siko da mapari rayamu podo ua pinamuya setu!” Mesono i Yona natoʼo, “Wenu painaka bareʼe? Sintinaja yaku da masengke rayaku rantani mate!”

¹⁰ Nepa ndatoʼo i mPue ri siʼa, “Pinamuya seʼi podo sambengija katuwunya, bangke reme malele; banya liu-liu siko anu mampatuwu pai mamporewu siʼa. Paikanya mau ewanceʼe mapari rayamu mangkita siʼa malele.

¹¹ Wenu painaka Yaku bareʼe da mapari rayaku manawa-nawa Niniwe, kota anu bangke setu. Banya podo waʼa mpinatuwunya anu bareʼe ndaincani imbanya setu, paikanya njairia njau meruu ri 120.000 tau ananggodi anu bareʼepa naincani mampaposisala nunjaa anu madago pai nunjaa anu majaʼa.”