Yunus 3 - Sura Magali Nuntu Ngkatuwu

I Yona mepoʼinaya ri Pue 3:1-10

¹ Karadua ngkaninya i Pue mompau ri Yona.

² Ndatoʼo, “Palaimo njoʼu ri Niniwe, kota anu bangke setu, pai paratamo ri waʼa ntau banganinya, nuntu anu kutoʼoka siko.”

³ Nalulu i Yona songka i mPue, njoʼu siʼa ri Niniwe, sambaʼa kota anu bangke kojo, tatogo ndeme kasaenya da napaleleangi raya ngkota setu

⁴ Nasuaki i Yona kota setu, pai ri kagananya sandeme pelinjanya, natepuʼumo mantuntu natoʼo, “Jamo aopo mpuyu ndeme, Niniwe seʼi da magero!”

⁵ Naaya waʼa ntau ri Niniwe nuntu i mPue setu. Nabotusi ntau seʼe pura-pura da mopuasa, pai pura-pura tau kodi bangke, da mamporengko karu mampatongawa tau seʼe mamponcosoi waʼa ncalaanya.

⁶ Butu nadonge i mokole Niniwe bambari setu, ganggara penaʼunya ungka gadera mpoparentanya. Naosu juba ngkamokolenya, naporengko karu, nepa motunda siʼa ri awu.

⁷ Siʼa woʼu mempapesuwu songka anu ewaseʼi, “Songka seʼi ungka ri Niniwe botusi ungka ri datu pai mantarii: Pura-pura tau, japi, bimba pai waʼa mpinatuwu ntaninya bareʼe maya mangkoni bara manginu.

⁸ Tolino pai pinatuwu sangaya-ngaya da mampake karu. Mewali tanda poncosoi pura-pura tau sangaya-ngaya da mekakai ri gori ngkamonconya ri Pue Ala. Tau seʼe sangaya-ngaya da mabalisaka engkonya anu majaʼa pai powianya anu masalaa.

⁹ Tuarapa i Pue Ala mabalisaka tangaraa pai bareʼemo marau rayaa da naka bareʼe magero kita!”

¹⁰ I Pue Ala mangkita powia ntau seʼe; ndakita tau seʼe mantajimo engko ntau seʼe anu majaʼa. Inceʼe painaka ndabalisaka botusi bareʼe mewali ndahuku tau seʼe.