YOELI 3 - Sura Magali Nuntu Ngkatuwu

I Pue ala mangabotusi waʼa banca 3:1-15

¹ Ndatoʼo i mPue, “Sindara setu Yerusale pai Yahuda da kuwali baresi muni katetoʼonya.

² Pura-pura banca da kupasambaka pai da kukeni ri Yombo mPobotusi. Nepa da Kubotusi tau seʼe njairia ua waʼa mpowia ntau seʼe ri waʼa ntau-Ku ri pangantila-ntila ntau tana nto Isaraeli pai waʼa ntau-Ku tawani ntau seʼe ri waʼa sua ntana anu lawa.

³ Tau seʼe mantende dadu, da mampakanoto isema tau ndatawani setu anu da mewali tilanya. Tau seʼe mampobalu anaweʼa pai ngalitau anu da mewali watua. Doinya napake ntau seʼe njoʼu ri weʼa wongo pai manginu-nginu anggoro.

⁴ Ara da ndikuja Yaku seʼi, ee Tiru, Sidoni pai juku-juku tana Pelisiti? Bara da rayamu mampapurasi kodi ndayamu ri Yaku? Mewali tarimamo pesawaku anu da kuparata seʼi seʼe.

⁵ Wuyawa pai salaka-Ku anu ndipamuru pai aga-agaku anu masuli olinya nditeo njoʼu ri banua lamoami.

⁶ Bangani Yahuda pai Yerusale ndikeni ungka ri tananya, nepa ndipobalu ri waʼa nto Yunani.

⁷ Seʼi-seʼi Yaku mangangkeni mpesuwu tau seʼe ungka ri kareʼe pampobalumi, pai Yaku da mampesawaka waʼa mpowiami anu majaʼa ri tau seʼe.

⁸ Waʼa anami tuama pai weʼa da kupobalu ri waʼa ntau bangani Yahuda, anu da mampobalu ri to Seba, ri tana anu lawa mpodago. Yaku Pue anu mompaumo seʼi.

⁹ Pobambarikamo songka seʼi ri waʼa banca: Ndipompatikali da mombetoto mampetujuka rosomi! Iowakamo waʼa mpandegara pai pomakoje, pasingkandurumo pura-pura surodado, ndiakomo mombetoto!

¹⁰ Palumo mata mpajekomu mewali penai, pai tibo mpopakoumu meali gayangi. Ewanceʼe tau dangga sangaya-ngaya da mompau natoʼo, ‘Yaku seʼe kukoto mombetoto ewa surodado!’

¹¹ Io ndikamaʼimo maliga-liga, ee waʼa banca ungka ri sambawo lino ndipompasambakano ri yombo sinjau.” Boo Pue, ndipokaumo surodadomi mangaungku tau seʼe!

¹² Ndatoʼo woʼu i mPue, “Waʼa banca sangaya-ngaya da mompatikali pai da njoʼu ri ri Rato mPobotusi. Njairia Yaku Pue da mangabotusi waʼa banca samposori ntau-Ku.

¹³ Tau seʼe maʼai ngkajaʼanya; sewomo tau seʼe ewa gandu anu matasamo ri jamaa. Landamo tau seʼe ewa palanda anggoro ri kareʼe pompaa rantani buke pai mesampo.

¹⁴ Moncowu-ncowu tau anu njau ri Yombo mPobotusi. Maka njairia da ronga rata Eo i mPue.

¹⁵ Reme pai wuya bareʼemo da merara pai waʼa betuʼe bareʼemo reʼe sindinya.”

I Pue Ala mangadonco waʼa ntau-A 3:16-21

¹⁶ I Pue mengara ungka ri Sioni, buyua; pai ungka ri Yerusale da pogundu oni nganga-A, yangi pai tana da moenggo ua oni nganga-A. Paikanya i Pue da mancambiranaka mpaliu pai da mangkariani waʼa ntau-A.

¹⁷ “Ee, Isaraeli, seʼi-seʼi da ndiincani, ka-Yakunya Pue Ala puemi. Yaku maroo-roo ri Sioni, buyu-Ku anu magali. Painaka Yerusale woʼu mewali kota anu magali, tau mencua bareʼe da wali mpesua.

¹⁸ Ri tempo setu waʼa buyu da buke pai waʼa bonde anggoro, waʼa mpinatuwu anu ndakambi da mangande ri pongku-pongku ntana anu marombo ewonya. Waʼa ngkoro ue ri Yahuda bareʼemo reʼe da kaʼoti uenya sambaʼa koro ue da moili ungka ri Banua i mPue, anu mangauesi Yombo Akasia pai uenya anu malino.

¹⁹ Tana Masiri da mewali pada bone anu mangau-ngau, pai Edomi da mewali madusu, bareʼemo napeari ntau. Maka tau seʼe roomo maungku Yahuda, pai mampepate waʼa ntaunya anu bereʼe salanya.

^20-21 Ua katebubu daa ntau seʼe da kutima wela mpesawa, topopepatenya da mate kupomai. Paikanya Yahuda pai Yerusale bareʼe bali-bali kareʼenya anu mampeari. Pai buyu Sioni njairia da karodo-Ku.”