TOPOTUNTU 9 - Sura Magali Nuntu Ngkatuwu1 Pura-pura setu kunawa-nawa ri katimamanya. I Pue Ala mamponinika katuwu ntau anu madago pai loʼe, mau rapanya tau setu mepobanciika bara mepomawo. Bereʼe tau anu mangaincani nunjaa anu da mewali ripurinya. 2 Lawinya katedikana anu siwia da mampere sambaʼa-sambaʼa tau: Tau mayoa bara tau toporuta ntano, tau madago bara tau majaʼa ntano, tau magali bara tau karika ntano, tau anu mangkeni panyomba bara anu bereʼe nawai. Tau anu madago bareʼe bara meruu rasinya ungka ri tau anu masalaa, tau anu montandokoro siwiamo seʼe pai tau anu bareʼe montandokoro. 3 Mewali, katedikanaka anu siwia mampere tau seʼe pura-pura. Pai incetumo sangaya anu mampakapari raya, ewancetumo waʼa anu mewali ri lino. Sangkasae ngkatuwunya raya ntolino buke pai jaʼa, pai nawa-nawanya buke pai katengo. Nepa tingkarasaka siʼa mampomberataka kapate. 4 Paikanya sangkasae ntongo laupa inosa ri koronya, sangkasae setu woʼu reʼe pampomata-mata. Ara banya mau asu anu ntongo tuwupa meruu mporasi painaka singa anu bareʼemo moʼinosa? 5 Gori ngkakuranyamo, tau anu tuwu, naincanimo kapate mampopea siʼa, paikanya tau anu mate bareʼe naincani bara nunjaa-njaa. Bereʼe saro tilanya bara sili lengenya, pai sako toʼonya ndakalinganimo. 6 Paepe matowe, mepobanciika sangkani pai sawoyo ndaya pura-pura nakeni mate. Siʼa bareʼemo da reʼe bara nunjaa-njaa tilanya ri mpengaya-ngaya anu tepewali ri lino. 7 Mewali, ndiʼiomo, pangkonimo pai pakawongkomo rayamu, inumo anggoro ri kawongko ndaya. I Pue Ala bareʼe mampetangani, inceʼe yau anu ndapokono. 8 Mbolimo da tebulere liomu pai da makilaya. 9 Pokawongkomo katuwumu pai rongomu anu nupotowe, sangkasae ngkatuwumu anu podo ngkabongo anu ndawai i mPue Ala ri siko ri lino seʼi. Pokawongkomo sandeme-sandeme mau bereʼe yowenya, maka sili lengemu podo inceʼe. 10 Wianakamo mpengaya-ngaya waʼa ntetalamu gori-gori ngkaroso mbukumu. Maka ripurinya bareʼemo da reʼe nawa-nawa bara tetala. Bereʼe pangaincani pai loʼe ri lino kareʼe ntau mate. Pai njairiamo da kanjoʼumu. 11 Ri lino seʼi reʼepa anu kukita; tau anu magasi molonco bereʼe da menangi mpaliu ri pasilumba, tau anu maroso bareʼe da menangi mpaliu ri pombetoto. Tau anu loʼe bareʼe pura-pura marata tetala. Pai tau anu loʼe bareʼe bara pura-pura marata kakoreʼe. Ewanceʼe seʼe waʼa ntau anu gana loʼenya bareʼe bara pura-pura mewali tau anu tetoʼo. Maka pura-pura paka da napere ngkapari. 12 Tolino bareʼe naincani bara impia da karata temponya. Ewa tonci nakono ntolia pai anu tesua ri jala, ewanceʼemo tolino napere ngkasusa ri tempo anu bareʼe nasoro-soro. Ponawa-nawa kono kaloʼe pai katengo 9:13–10:20 13 Tondanya seʼi, reʼe sambaʼa pandiri singkana kojo kono kaʼewambeʼinya tau mampobangke loʼe: 14 Reʼe sambaʼa kota kodi anu podo pongoli tau anu mampeari. Ri anu sandeme rata sambaʼa mokole bangke mampoʼiwalika tau ri kota setu. Nalimbu ncape kota setu pai tikalimo da naruasi bente ngkota setu. 15 Ri raya ngkota setu reʼe sambaʼa tau anu kaasi-asi anu moua nawa-nawanya. Nakoto mancorepaka tau sambaʼa kota setu. Paikanya ua siʼa podo sambaʼa anu kaasi-asi, powianya anu bangke setu ganggara ndakalingani, pai bereʼe mau sambaʼa tau ntano anu maendo siʼa. 16 Mewali, kamonconya parata ndayaku kaloʼe meruu ungka ri karoso. Paikanya mau ewanceʼe kaloʼe ntau kaasi-asi bareʼe ndareke. Waʼa mpaunya bereʼe anu ndapedongeka. 17 Moruana mampedongeka waʼa mpau anu marumomo ungka ri sambaʼa tau anu gana loʼenya painaka peboo ncambaʼa tau anu makuasa ungka ri potobu waʼa ntau anu maʼai ngkatengonya. 18 Kaloʼe anu meruu poyowenya painaka parewa mpoʼiwali, paikanya rasu santede mampakajaʼamo susu sangkura. |
@LAI 2000
Indonesian Bible Society