TOPOTUNTU 8 - Sura Magali Nuntu Ngkatuwu

¹ Ara lesesa naepe ntau anu loʼe. Naincani sononya pura-pura anu mewali. Kaloʼe mampakatekalumiri siʼa mawongko rayanya, painaka bebali katebulere lionya.

Pepoʼinayamo ri mokole 8:2-8

² Pepoʼinayamo ri songka anu nawai i mokole, pai neʼe pontopanyamo mampowia janji ri Pue Ala.

³ I mokole nakoto mowia malulu pepokononya, ane bareʼe napokono siko, muroana tilawangi siʼa.

⁴ I mokole mowia ua kuasanya; bereʼe anu mantaha da mangancapu siʼa!

⁵ Tau anu mepoʼinaya ri siʼa, da uono pai dalindo rayanya; tau loʼe naincani impia tempo pai ewambeʼi jaya mpelulu ri mokole.

⁶ Tila mpengaya-ngaya reʼe tempo pai katewianakanya ngkalionya, paikanya podo santila kodi anu tarata ndaya.

⁷ Bereʼe mau sambaʼa tau anu maincani were ngkatuwu anu ewambeʼi da napomberataka, pai bereʼe anu mangkoto mantoʼo nunjaa anu da tepewali.

⁸ Bereʼe mau sambaʼa tau anu mangkoto mantaʼamaka bara mampelawisi tempo da kamatenya. Incetu sangaya anu bareʼe ndakoto da memperenggoka, pai bareʼe ndakoto da lapa ungka njairia, mau ewambeʼi kaloʼe maliko-liko pai akala.

Tau anu madago pai tau anu majaʼa 8:9–9:12

⁹ Pura-pura seʼi kukita ri tempo kupamparesa mpengaya-ngaya anu mewali ri lino.Reʼe teasantongo tolino mampake kuasanya da mampakarugi kasitaunya.

¹⁰ Reʼe kupangkita tau majaʼa mate pai ndapotaumate. Paikanya ri tempo mpewalili ntau ungka ri popadayo, tau seʼe mangaunde siʼa ri kota pangawianakanya jaʼa. Mewali inceʼe seʼe podo ngkabongo.

¹¹ Wenu painaka saru-saru gaga tau mampowia jaʼa? Puʼunya hukunya bareʼe ganggara ndapapakoyoka.

¹² Mau bara saatu ngaya jaʼa anu napowia ncambaʼa tau masala, siʼa tuwu mpaliu seʼi marate tinuwunya. kamonconya isema anu mepoʼinaya ri Pue Ala manoto bareʼe da mapari katuwunya.

¹³ Paikanya tau anu majaʼa marata maria kapari. Katuwunya maliga da paya podo ewa limbayo. Siʼa da mate ntongo mangurapa, ua siʼa bareʼe mepoʼinaya ri Puenya.

¹⁴ Paikanya pura-pura setu podo pau soa ngkabongo. Peolemo, nunjaa anu mewali ri lino: Reʼe tau anu meaya ri Pue ndahuku ewa tau baleparu, reʼe tau majaʼa anu ndawaika saronya ewa tau meaya ri Pue. Mewali, incetu seʼe podo ngkabongo.

¹⁵ Mewali, malulu parata ndayaku inceʼemo painaka tau da mawongko wongko raya. Maka ri raya ngkatuwunya ri lino, bereʼe wongko ndayanya ntaninya podo mangkoni, manginu pai mawongko-wongko raya. Podo inceʼe anu naloʼe da mangaepe sindara ngkalenge ndayanya, sangkasae katuwu anu ndawaika siʼa i mPue Ala.

¹⁶ Ri tempo pompari-mpariku da marata loʼe, pai kupatomata mpengaya-ngaya anu mewali ri lino seʼi, kurata ndayamo, mau ewambeʼi ntano pompari-mparita ri eo pai ri wengi, bereʼe peosa,

¹⁷ bareʼe takoto da marata ndaya powia i mPue Ala. Mau ewambeʼi ntano pompari-mparita, bareʼe da takoto marata ndaya. Tau loʼe mangaʼaku kasiʼanya maincani, paikanya kamonconya bareʼe naincani.