TOPOTUNTU 7 - Sura Magali Nuntu Ngkatuwu

Ponawa-nawa kono katuwu 7:1–8:1

¹ Moruana toʼo anu madago painaka lana wongi anu masuli olinya; pai eo ngkapate meruu ngkadagonya painaka eo pampoana.

² Moruana njoʼu ri banua kareʼe ntau mate painaka njoʼu ri kareʼe ntau mosusa. Maka bareʼe bali-bali tapaendo kapate setu mampopea sambaʼa-sambaʼa tau.

³ Kapari ndaya meruu kadagonya painaka gele. Mau ri liota tongawa kasusa ndaya, podoia madonde rayata.

⁴ Tau tengo maʼilawu mpaliu kawongko ndaya; paikanya tau loʼe manawa-nawa mpaliu kapate.

⁵ Moruana naseko ntau anu loʼe, painaka naunde ntau anu bareʼe narata ndaya.

⁶ Gele ntau tengo bereʼe posokinya, podo ewa pebote ndui nakoni apu.

⁷ Ane tau anu loʼe mombamba, inceʼe powia ngkatengo; ane tau mantarima doi leko aje, majaʼamo poʼengkonya.

⁸ Moruana kapusanya sambaʼa kara-kara painaka pontepuʼunya; moruana ponawa-nawa anu mayombu painaka kaboha-boha.

⁹ Neʼe ganggara ngkasengke; podo tau anu tengo anu madika-dika kodi ndaya.

¹⁰ Neʼemo mompeoasi, “Wenu i owi sangkadagonya painaka tempo wawaseʼi?” Podo tau anu maʼai ngkatengonya anu da mompeoasi ewancetu.

¹¹ Tau tuwu da kadagonya mampotumpu loʼe; maka loʼe setu siwia pai panta;

¹² siwia woʼu pai doi mampalindo raya. Pagonya pangaincani kono kaloʼe; Isema anu mampotumpu da tesorepaka.

¹³ Da nunawa-nawa powia i mPue Ala. Maka isema anu mangkoto da mampayoa anu ndapapodenggo i mPue Ala?

¹⁴ Mewali pakawongkomo rayamu ane siko mangarata rasi. Paikanya ane siko napere ncusa, neʼe nukalingani i Pue Ala anu mawai radua ngaya setu. Kita bareʼe taincani nunjaa anu da mewali ri reme anu nepa darata.

¹⁵ Katuwuku bereʼe yowenya, paikanya sangkasae ngkatuwuku setu kukita anu ewaseʼi: Reʼe temponya tau anu madago magero, seʼi siʼa mayoa rayanya ri Pue. Reʼe temponya tau anu majaʼa marate tinuwunya, seʼi siʼa mowia salaa mpaliu.

¹⁶ Neʼe madago gaga pai neʼe woʼu loʼe gaga. Ara nunjaa yowenya ane menoo?

¹⁷ Pai neʼe woʼu maʼai ngkajaʼa bara maʼai ngkatengo. Ara nunjaa yowenya mate ane banyapa temponya?

¹⁸ Tilawangimo anu radua ngaya setu. Maka ane kita mampokaeka i Pue Ala, manoto da madago pandatata.

¹⁹ Tau anu loʼe maʼai ngkakoje painaka sampuyu tau anu makuasa ri raya sambaʼa kota.

²⁰ Ri lino seʼi bereʼe mau sambaʼa tau anu bereʼe posarinya; bereʼe anu podo mampowia dago mpaliu pai bereʼe powianya salaa.

²¹ Neʼe nupodaraya mampedongeka pasimbaju ntau, maka bareʼe nuincani boi siko ntongo natadeasi sambaʼa toporioko.

²² Maka lawi nuincanimo ngkaliomu, siko woʼu reʼemo nupantadeasi tau ntaninya.

²³ Pura-pura setu kuʼuji pai kaloʼeku. Paikanya kakokupari-pari mampepali loʼe setu, kakolawa-lawa ungka ri yaku.

²⁴ Isema anu mangkoto mangaincani yowe ngkatuwu seʼi? Maʼai gaga kayombu, bendakoto marata ndaya.

²⁵ Paikanya kukotuʼusi meguru pai mampepali pangaincani da naka kurata loʼe pai sono mpengaya-ngaya pompeoasi. Kupebutuka da mangarata ndaya kasalaa setu inceʼe katengo, pai kajaʼa inceʼe ndaoamo.

²⁶ Kurata ndayamo weʼa setu meruu ngkaparinya pai kapate. Towe mbeʼa ewa jala pai patambo anu ndataʼa anu mantarangkaku sinokonya. Pesokowakanya ewa pungu anu mekowa mainti. Tau anu mawianaka pepokono i mPue Ala tewawence ungka ri tolianya, paikanya tau masalaa manoto napantawani.

²⁷ Peole, natoʼo i nToponawa-nawa: Pura-pura setu kurata, ri tempo kupampepali sononya sangaya pai sangaya.

²⁸ Pai ntongo kupepalipa sononya anu ntaninya, paikanya bareʼe kurata. Ri oyo ntau sancowu kurata sambaʼa tuama anu kutubunaka. Paikanya ri oyo ntau bereʼe kurata weʼa anu kubila mata.

²⁹ Podo inceʼi anu kurata: I Pue mampawewali kita sintempo pai madago. Paikanya kita ngkaliota anu mampapewali korota singkapuri pai teliko-liko.