TOPOTUNTU 6 - Sura Magali Nuntu Ngkatuwu

¹ Kukita woʼu kabareʼenya mayoa anu maʼai kojo pamparininya tolino ri lino seʼi.

² Reʼe temponya i Pue Ala mawai kakoreʼe, katetubunaka pai aga-aga ri sambaʼa tau, painaka bareʼemo reʼe anu napodaraya ntau setu. Paikanya bareʼe ndawai i mPue Ala siʼa da mampoyoweka pura-pura pombai setu. Ntanoka, tau anu bareʼemo naincani da mampoyoweka kakoreʼenya setu. Mewali, pura-pura setu podo ngkabongo pai mampakapari raya.

³ Mau rapanya sambaʼa tau mampotumpu ananya saatu tau pai masae woʼu katuwunya rantani maʼai katuʼanya, paikanya bareʼe naepe kadago ngkatuwunya pai bareʼe madago ndapangadayo, malulu parata ndayaku, ongaa anu nepa ndapoana pai mate yau, inceʼepa anu madago painaka tau setu.

⁴ Maka ongaa setu bereʼe kasusanya, ndapoana bara bareʼe ntano; siʼa njoʼu ri kawengi-wenginya pai liu-liu ndakalingani.

⁵ Bareʼepa reʼe napangkita sindi ndeme, pai bareʼepa narata ndaya nunjaa katuwu seʼi, painaka moturu-turu siʼa ri karodo ndayanya.

⁶ Pai inceʼe meruu ngkadagonya painaka tau anu tuwu radua atu ntaʼu kasaenya paikanya bereʼe kalindo ndayanya. Ara banya radua-duamo seʼe da njoʼu ri kareʼe anu siwia woʼu?

⁷ Tolino motetala podo da nakareʼe nakoni, paikanya bereʼe kaʼosa ndayanya naepe.

⁸ Mewali, nunjaa porasinya tau anu loʼe pai tau anu tengo? Pai nunjaa woʼu yowenya ane tau anu kaasi-asi madago poʼengkonya ri katuwunya sandeme-sandeme mogalo-galo pai yunu?

⁹ Pura-pura setu podo ngkabongo ewa pompari-mpari maduduki ngoyu. Moruana kita mampokawongko nunjaa anu reʼemo ri kita, painaka bareʼe bali-bali mamposawoyo anu meruu ngkasondo woʼu.

¹⁰ Pura-pura anu reʼe, lawi masaemo kareʼenya. Lawi taincani tolino bareʼe da nakoto mampombebalika tau anu meruu karosonya pai siʼa.

¹¹ Maka kakomasae-sae pebali-balinya, kakoteranga-rangani kabareʼenya reʼe oli mpaunya, pai lawi bareʼe da reʼe bara nunjaa-njaa rasinya.

¹² Ewambeʼi da napangkoto ntau mangaincani nunjaa anu maʼai ngkadago ri raya ngkatuwunya anu podo sarai pai bereʼe yowenya, anu liu ewa limbayo? Ewambeʼi da napangkoto ntau marata ndaya nunjaa anu da mewali ri lino seʼi ane bareʼemo reʼe siʼa?