TOPOTUNTU 5 - Sura Magali Nuntu Ngkatuwu

¹ Ndanawa-nawa mpodago ri kabareʼepanya mompau, pai ane ganggara gaga mojanji ri Pue Ala, Sira ndate ri suruga pai siko reʼe ri wawo lino, mewali da timama ane mompau-mpau.

² Kakomaeka-eka raya, kakoreʼe-reʼe pangipi anu majaʼa. Kakomaria-ria pau, kakoreʼe-reʼe pau anu mampatongawa katengo.

³ Mewali, ane mojanji siko ri Pue Ala, maliga-liga da nubangani. Sira bareʼe ndapokono tau anu motemgo-tengo. Inceʼe painaka da nubangani janjimu.

⁴ Moruana bareʼe mojanji painaka mojanji paikanya bareʼe ndabangani.

⁵ Neʼe boi waʼa mpaumu mampareʼeka siko salaa, painaka siko da mampasowa pau ri tadu mpanyomba anu mamporiokoi i Pue, maka banya nuoamo mampasowa janji. Ara nunjaa yowenya mangkelo-ngkelo karau ndaya i mPue Ala painaka da ndalesaki wua mpotetalamu?

⁶ Da ewa pangipi anu sondo bereʼe posokinya, ewanceʼe seʼe sondo pau bereʼe yowenya. Paikanya pokaekamo i Pue.

Katuwu seʼe podo ngkabongo 5:7–6:12

⁷ Neʼe nupojingki ane nukita tau makuasa majeani tau kaasi-asi, marampa anu ntau seʼe pai bareʼe mayoa ndapampowia tau seʼe. Sambaʼa-sambaʼa topotetala da nakantawi ntadulakonya pai tau seʼe radua da nakantawi woʼu anu ri wawo ntau seʼe lantinya.

⁸ Sako i mokole mangkatuwuka wua mpinamuya anu ndapota.

⁹ Tau anu manyanya doi, bareʼe da reʼe kagana doinya; tau anu mampowando aga-aga, bareʼe da reʼe napampogana rasinya. Pura-pura setu podo ngkabongo.

¹⁰ Kakomaria-ria kakoreʼe ncambaʼa tau seʼe kakomaria-ria tau ntaninya anu da nawaika pangkoni. Bereʼe rasi tila ntumpunya, podo anu maincani siʼa tau koreʼe.

¹¹ Sambaʼa topotetala bara bareʼe gana pangkoninya, paikanya lintu yau kayorenya. Paikanya tau anu koreʼe ua maria kojo aga-aganya painaka bareʼe naleʼo yore ua ipu rayanya.

¹² Kukita ri lino seʼi sangaya anu mampakasusa raya: inceʼemo sambaʼa tau anu mamparomu aga-aga ua mangaendo tempo ngkakura.

¹³ Paikanya aga-aga setu paya ngkabongo ua napere rugi, painaka bareʼe naleʼo mampantaika ananya waʼa aga-aga seʼe.

¹⁴ Kita ndapoana melambe-lambe; ewanceʼe seʼe woʼu da tampampalaika lino seʼi, bareʼe da takeni bara nunjaa-njaa sili lengeta.

¹⁵ Incetu kapuru raya kojo! Kita da malai ewa ri tempo ngkaratata wawaseʼi. Kita podo malenge ngkabongo mangaduduki ngoyu, pai nunjaamo yowenya?

¹⁶ Sangkasae ngkatuwunya podo moama-ama ri tongo mbani, kita mompari-mpari, ipu-ipu raya, majaʼa raya pai makodi raya.

¹⁷ Mewali, kurata ndayamo anu meruu ngkadagonya ri kita inceʼemo mangkoni, manginu pai mampokawongko waʼa wua mpotetala. Sangkasae katuwuta anu podo sarai ndawai i mPue ri kita; inceʼemo were ngkatuwuta.

¹⁸ Ane sambaʼa tau mantarima kakoreʼe pai aga-aga ungka ri Pue Ala, pai ri siʼa ndawai da mampoyoweka kakoreʼe setu, kamonconya siʼa sangaya-ngaya da montarima kase pai da mangampake mpengaya-ngaya wua mpotetalanya. Incetu seʼe pompai i mPue Ala.

¹⁹ I Pue Ala mawai wongkondaya gana-gana ri raya ntolino, painaka bareʼe ipu-ipu rayanya manawa-nawa kaʼede ngkatuwunya seʼi.